Matiu 14

Kamatena Iohane Toperiu

(Mrk. 6:14-29; Luk. 9:7-9)

1I tempó iti, Herode Antipa#14:1 Herode Antipa: Ia miꞌi ánáꞌna Herode Mahile. Herode Antipa mepárentá pare 4sM-39M. Básá Matiu 4:12. to mepárentá i tampoꞌ Galilea. Kanahádina Herode iti apa to nabábehi Iesu, 2ia mohángáꞌáheꞌ topobágóꞌna, nauliꞌ, “Iesu ia miꞌi Iohane Toperiu to tueꞌ huleꞌ hangko i kapate, onoꞌ miꞌi haneꞌi ara kuasaꞌNa mobábehi tandaꞌ to mehelei!”

3-4Deꞌe miꞌi daritakáná kamatena Iohane Toperiu. Herodia ia miꞌi toinána Pilipu, agáiáná Datu Herode mobualosi Pilipu halaluna, láwiꞌ moala miꞌi Herodia napotoina. Handaꞌ kánina Iohane mokámbáróá Herode mokana i bábehiána iti, nahángáꞌá, “Tiꞌarakoꞌ peisá moala toinána halalumu mewaliꞌ toinámu, láwiꞌ bábehiámu iti moliungi Paturoꞌna Musa!”#14:3-4 Básá Áturá Menómbá 18:16. Onoꞌ miꞌi haneꞌi Herode mohuoꞌ surudadoꞌna lao mohakaꞌ Iohane, ratimpuku hai rapopesuaꞌ i lalu tarungku. 5Katoꞌuána, napoinao Herode ina mopapate Iohane, agáiáná mampokalááꞌ tauna to handaꞌ, láwiꞌ rauliꞌ Iohane hadua nabiꞌ.

6Hangko ionoꞌ, i tempóna Herode mopaꞌara posusa pambuhinaona alo karapoánákana, ánáꞌna Herodia towawine monariꞌ i lindoꞌraꞌ torare. Góeꞌ ntepuꞌu Herode mampeita ponariꞌna. 7Ánti kagóeꞌna, ia mopaꞌara dándi i ánáꞌntawine iti, nauliꞌ, “Apa peá to nupembiáꞌ, ina kuweꞌikoꞌ!”

8Kanahádina Herodia laluitana, ia mogágáꞌ ánáꞌna bona membiáꞌ wuáꞌna Iohane Toperiu. Mewaliꞌ, nauliꞌ ánáꞌntawine iti i Herode, “To kupembiáꞌ, wuáꞌna Iohane Toperiu rawoli i bakiꞌ, raꞌánti mai i kódóꞌ!”

9Kanahádina Herode pembiáꞌna iti, masusa laluna, agáiáná dándina iti tiꞌara piꞌi peisá nadiiꞌ huleꞌ, láwiꞌ rahádi miꞌi torarena. Onoꞌ miꞌi haneꞌi napepárentáiá Herode bona pembiáꞌna ánáꞌntawine iti rabukeki. 10Ia mohuoꞌ miꞌi surudadoꞌna lao i lalu tarungku mobóhóki tambólóna Iohane.#14:10 Mouláꞌ Iosepu, hadua topoukiꞌ daritakáná toIahudiꞌ to tueꞌ tempó onoꞌ, Iohane Toperiu rapapate i bente Makaeru, tándáꞌ i mata alo tahiꞌ Mate, i poropensi Perea. 11Mewaliꞌ lao mpuꞌumoheꞌ surudadoꞌ mobóhóki tambólóna, haneꞌi wuáꞌna rawoli i bakiꞌ, raꞌánti lao i ánáꞌntawine iti, haneꞌi ánáꞌntawine iti moánti lao i Herodia inána.

12Karahádina topeguruna Iohane apa to pewaliꞌ iti, laomoheꞌ moala wátámandoꞌna Iohane haneꞌi ratawu. Roo onoꞌ, laomoheꞌ mobámbáriá Iesu.#14:12 Bahangapa parena hangko i kamatena Iohane, ara mani topeguruna. Básá Suro 18:24-25; 19:1-3.

Bágóꞌna Iesu hungkuꞌ i tampoꞌ Galilea (14:13–17:21)

Iesu mopaꞌandeꞌ lima sábuna tauna#14:12 Kanapopandeꞌraꞌ Iesu tauna to handaꞌ ina mampopambuhinaoá toIahudiꞌ mokana i kanakádipurána Pueꞌ Ala toioruraꞌ i pádá loriꞌ hangkoia. Básá Pesuwuꞌá gáláꞌna ka-16.

(Mrk. 6:30-44; Luk. 9:10-17; Ioh. 6:1-13)

13Kanahádina Iesu bámbári kamatena Iohane Toperiu, Ia pohuꞌ hangko ionoꞌ, {hai topeguruNa meuláꞌheꞌ woꞌo i Hia}. Mengkaheꞌheꞌ i duanga lao i katoroꞌá to tepataniꞌá. Tunggáiána Iesu bona karaoꞌ hangko i tauna to handaꞌ. Agáiáná handaꞌ tauna mohádi bámbári kapohuꞌNa, onoꞌ miꞌi haneꞌi laoheꞌ metutuhá, mouláꞌheꞌ rárá to mewiwi rano. 14Pendáuluna Iesu hangko i duanga, Ia moita tauna to handaꞌ mepegiámoheꞌ. Maꞌahiꞌ laluNa moitaheꞌ, hai i oloꞌraꞌ tauna to handaꞌ iti araheꞌ tauna to maduꞌa, mewaliꞌ Napakauriꞌheꞌ.

15Kalumbaꞌ miꞌi, topeguruNa laoheꞌ mengkahungkuꞌ i Hia haneꞌi ara to mohángáꞌá, “Guru, deꞌe katoroꞌá to tepataniꞌá, hai ina támpu miꞌi alo. Rángina Nuhuoꞌmoheꞌ tauna to handaꞌ lao i wánuá to hungkuꞌ bona mohólóheꞌ pandeꞌraꞌ.”

16Nauliꞌ Iesu, “Tiꞌaraheꞌ paraluu pohuꞌ. Kómu riꞌi to hangaa-ngaa mopaꞌandeꞌheꞌ.”

17Ara to mohániki, “To ara i kaiꞌ, lima peá wuaꞌna rótiꞌ hai rombaꞌa bouꞌ.”

18Nahániki Iesu, “Ánti mai.” 19Hangko ionoꞌ, Nahuoꞌmoheꞌ tauna to handaꞌ mehoda i wongko rumpuꞌ, haneꞌi Iesu moala rótiꞌ to lima wuaꞌna hai bouꞌ to rombaꞌa, hai mengoaꞌ i langiꞌ mekakae i Pueꞌ Ala. Roo onoꞌ, Nabiseꞌ-biseꞌ miꞌi rótiꞌ iti, haneꞌi Naweꞌiheꞌ topeguruNa bona ragáláꞌ-gáláꞌáheꞌ tauna to handaꞌ. 20Mandeꞌmoheꞌ upu-upu duuꞌraꞌ mabuhu. Karooraꞌ mandeꞌ, pelábiána pandeꞌ rarámpu topeguruna Iesu, hampuloꞌ mani hai rongkárándi. 21Kahandaꞌraꞌ tauna to mandeꞌ tempó iti rekeꞌ-rekeꞌna lima sábuna tobaleilo, tiꞌara teimbaꞌ towawine hai ánángkóiꞌ.

Iesu molumao i wongko uwai

(Mrk. 6:45-52; Ioh. 6:16-21)

22Roo onoꞌ, Iesu mohuoꞌmoheꞌ topeguruNa moduanga moioru lao tándáꞌ i hambali rano Galilea, hai Ia mohuoꞌmoheꞌ woꞌo tauna to handaꞌ mesuleꞌ lao i wánuáraꞌ. 23Kapesuleꞌraꞌ tauna iti, mempanaiꞌ miꞌi Iesu i buluꞌ, lao mekakae haduduáNa ionoꞌ duuꞌna káindi.

24I tempó iti, topeguruNa karaoꞌmoheꞌ hangko i lorena, i tangaꞌ ranomoheꞌ.#14:24 Kakararuna rano Galilea hampuloꞌ hai tálu kilómete, hai kamaeláꞌna rompuloꞌ kilómete. Duangaraꞌ iti narumpa bálumbá, láwiꞌ mampohidupaꞌáheꞌ wui to rumihi hangko i lindoꞌ. 25Hungkuꞌ mabaa, mendáulu miꞌi Iesu hangko i buluꞌ haneꞌi lao molumao i wongko uwai monóntóhiheꞌ. 26Karaitána ara tauna to molumao i wongko uwai, malááꞌmoheꞌ, haneꞌi monganga-ngangaheꞌ, rauliꞌ, “Louꞌ mai tometánuánáꞌ!”

27Agáiáná kásáliu nahángáꞌáheꞌ Iesu, “Pakaróhó lalumi! Ineeꞌkou malááꞌ! Kódóꞌnto.”#14:27 Kódóꞌnto: Laluita to napakeꞌ Iesu ieneꞌ i lalu básá Iunani peisá woꞌo molempónga “KÓDÓꞌ ARA MIꞌI AMI”, hibali lempóna hai Yahweh (YHWH), hangaꞌna Pueꞌ Ala i lalu básá Iberani. (Básá Pesuwuꞌá 3:14.) Babilaꞌ iti to natunggái Iesu, bona raisá topeguruNa kaꞌIana Pueꞌ Ala to makuasaꞌ.

28Nauliꞌ Peturuꞌ, “Ane Iomonto noiti Pueꞌ, Nukióꞌaꞌ bona molumaoaꞌ woꞌo i wongko uwai.”

29Nahániki Iesu, “Maimokoꞌ!” Mendáulu mpuꞌu miꞌi Peturuꞌ hangko i lalu duanga, hai molumao i wongko uwai ina lao i Iesu.

30Agáiáná i kamoitána bálumbá, malááꞌ miꞌi haneꞌi mantepuꞌu tiri. Ia mekióꞌ, nauliꞌ, “Pueꞌ! Tulungiaꞌ wongkódóꞌá!”

31Naónáꞌ miꞌi Iesu taeNa modiiꞌ Peturuꞌ, Nahángáꞌá, “Makuraꞌ mani pepoináláimu! Moapa riꞌi haneꞌi bata-bata mani lalumu?”

32Hangko ionoꞌ, mengkaheꞌmoheꞌ i lalu duanga, hai wui woꞌo mengkaroo. 33Mewaliꞌ upu-upuheꞌ topeguruNa to i lalu duanga iti menómbáheꞌ i Iesu, rauliꞌ, “Toꞌu-toꞌu mpuꞌu, kaꞌIona Ánáꞌna Pueꞌ Ala!”

Iesu mopakauriꞌ handaꞌ tauna to maduꞌa i Genesare

(Mrk. 6:53-56)

34Roo onoꞌ, Iesu hai topeguruNa mengkalimbamoheꞌ haweꞌ i hambali rano i tampoꞌ to rauliꞌ Genesare. 35Karaisána pueꞌ wánuá kaꞌIana miꞌi Iesu to haweꞌ i wánuáraꞌ, rabámbári miꞌi i wánuá-wánuá to hungkuꞌ, álána upu-upu tauna to maduꞌa raꞌánti i Iesu. 36Rapembiáꞌ i Iesu ba peisái, hubaꞌ wuntu kumbáNa rapetóbóꞌ. Mewaliꞌ upu-upu tauna to mampetóbóꞌ kumbáNa kasáliuheꞌ mauriꞌ.

Currently Selected:

Matiu 14: NTBEP

Highlight

Copy