Lukasi 17

Bahangapa pákáꞌna paturoꞌna Iesu

1Roo onoꞌ, nauliꞌ Iesu i topeguruNa, “Tauna bateꞌna ina rakeloꞌ bona madósá, agáiáná hurewuꞌ ntepuꞌuheꞌ tauna to mopaꞌara pekeloꞌ iti! 2Ina rumihi pehuku to nalámbiꞌ hangko i Pueꞌ Ala. Rángina miꞌi hambuaꞌ watu pogiliá to mahile ratóe i tambólóna hai ia ratibe i lalu tahiꞌ, haneꞌi mopakanawoꞌ hadua tauna to tiꞌara maróhó pepoináláina, álána tiꞌara piꞌi mepoinálái i Kódóꞌ. 3Onoꞌ miꞌi haneꞌi hangaa-ngaa maroꞌa-roꞌakou mokámpái bábehiámi haduduámi!

Ane halalumi mobábehi salaꞌ, hangaa-ngaa nikámbáróá. Hai ane tebáliki miꞌi laluna, hangaa-ngaa niámpungi. 4Ane halalumi mobábehi salaꞌ i kómu, kehapiꞌ miꞌi pitu kánina i lalu hangaloá, hai pitu woꞌo kánina lao membiáꞌ ámpu i kómu, hangaa-ngaa niámpungi.”#17:4 Básá woꞌo ngkóráꞌ pándiriꞌ ntániꞌna. Matiu 18:21-35.

5Rauliꞌ suroNa, “Pueꞌ, Nupakaróhó pepoináláingkiꞌ!”

6Nahániki Iesu, “Ane rápáꞌna ara miꞌi pepoináláimi, kehapiꞌ nodo peá kamahilena lihu duiꞌá, peisá nihángáꞌá kau to mahile deꞌe, ‘Ee, kau! Marebuꞌmokoꞌ hangko i katueꞌámu, hai melimbákoꞌ i tahiꞌ!’ hai bateꞌna ina mewaliꞌ hintotoꞌ hai hawaꞌmi.”

Pambiárána hawiꞌ

7Iesu mopaliliu wopiꞌi laluitaNa hai ngkóráꞌ pándiriꞌ deꞌe, Nauliꞌ, “Rápáꞌna, ane ara hadua hangko i oloꞌmi to ara hawiꞌna, hai hawiꞌ iti lao mobágóꞌ i hinoe ba moewu binataꞌmi, apa to ina nihángáꞌá i pesuleꞌna hangko i pobágóꞌána? Ba ina niuliꞌ, ‘Maimokoꞌ mandeꞌ’? 8Manótó tiꞌara! Ngkáliꞌna riꞌi, ina niuliꞌ node: ‘Mempaháwákoꞌ sieruꞌ, haneꞌi nupatimama pandeꞌkuꞌ, hai nupegiá miꞌi sieruꞌ kaupungkuꞌ mandeꞌ hai mainu hangko peisárakoꞌ mandeꞌ.’ 9Tiꞌara paraluu niuliꞌ handaꞌ kamaroꞌana i hawiꞌ iti ánti pampeuláꞌina peá hawaꞌmi. 10Noꞌonoꞌ woꞌo kómu. Ane nipeuláꞌi miꞌi upu-upu párentána Pueꞌ Ala, hangaa-ngaa niuliꞌ, ‘Kaiꞌ deꞌe, huoꞌá biásá peangkaiꞌ. Kipeuláꞌi peá apa to nahawaꞌáꞌangkaiꞌ Pueꞌkiꞌ.’ ”

Iesu mopakauriꞌ hampuloꞌ tauna to ketánggáꞌ

11I polumaoraꞌ lao i Ierusale, Iesu hai topeguruNa mouláꞌ parailiꞌraꞌ tampoꞌ Samaria hai Galilea. 12Kahaweꞌraꞌ i hambuaꞌ wánuá, araheꞌ hampuloꞌ tauna to ketánggáꞌ to lao mampohidupaꞌá Iesu, agáiáná meángkáꞌheꞌ i kakaraoꞌána,#17:12 Meángkáꞌheꞌ i kakaraoꞌána: Mouláꞌ Paturoꞌna Musa, tauna to ketánggáꞌ tiꞌara peisá mohungkuki tauna ntániꞌna, hangaa-ngaa tueꞌheꞌ i rawa wánuá. Básá Áturá Menómbá 13:45-46; Poimbaꞌ 5:2, 2 Datu-datu 15:5. hai mekióꞌ-kióꞌheꞌ, 13rauliꞌ, “Iesu! Tuá! Nupokaꞌahiꞌ wongkaiꞌkaa!”

14KaNahádina pekióꞌraꞌ iti, Iesu motótóiheꞌ haneꞌiheꞌ Nahángáꞌá, “Laomokou nipetudeꞌá wátámi i tadulako menómbá, bona ia mopáresáꞌ hai mopakanótó kamauriꞌna miꞌi hakiꞌmi.” Lao mpuꞌumoheꞌ. Tangaꞌraꞌ molumao, mauriꞌ miꞌi hakiꞌraꞌ.

15Hadua hangko i oloꞌraꞌ tauna to hampuloꞌ iti, i kanaisána kamauriꞌna miꞌi, ia mesuleꞌ lao i Iesu, haneꞌi nauliꞌ napasimbuku, “Kutóiá miꞌi Pueꞌ Ala, láwiꞌ mauriꞌmoꞌ!” 16Ia molingkudu motóngkóꞌ i bitina Iesu, hai manguliꞌ handaꞌ kamaroꞌana i Hia. Tauna iti ia miꞌi hadua toSamaria.

17Roo onoꞌ, nauliꞌ Iesu i upu-upu tauna to meuláꞌ i Hia, “Tiꞌaraheꞌ paꞌi hampuloꞌ to Kupakauriꞌ? Iumbámoheꞌ rángána to hahioꞌ? 18Moapa riꞌi haneꞌi hadua peá to mesuleꞌ mai i Kódóꞌ manguliꞌ handaꞌ kamaroꞌana i Pueꞌ Ala, mole riꞌi ia tiꞌara toIahudiꞌ?” 19Hangko ionoꞌ, nauliꞌ wopiꞌi Iesu i tauna iti, “Ánti pepoináláimu i Kódóꞌ, haneꞌikoꞌ mauriꞌ, mewaliꞌ meángkáꞌmokoꞌ, hai mesuleꞌmokoꞌ.”

Popárentána Pueꞌ Ala

(Mat. 24:23-28,36-41)

20Bahangapa toParisi mekuneꞌheꞌ i Iesu, ba impirái kaꞌina haweꞌna popárentána Pueꞌ Ala i duniáꞌ. Nahániki Iesu, “Tiꞌara ara tandaꞌ-tandaꞌ to peisá raita tauna i kahaweꞌna popárentána Pueꞌ Ala i duniáꞌ. 21Noꞌonoꞌ woꞌo, tiꞌara ara tauna to ina manguliꞌ, ‘Peita, ara ieneꞌ!’ ba, ‘Peita, ara indoraoꞌ!’ láwiꞌ popárentána Pueꞌ Ala ara miꞌi i oloꞌmi.”#17:21 popárentána Pueꞌ Ala ara miꞌi i oloꞌmi: Lempóna: Iesu haweꞌ miꞌi.

22Roo onoꞌ, nauliꞌ Iesu i topeguruNa, “Ina haweꞌ tempóna nipoinao ntepuꞌu moita Ánáꞌ Mánusiá, kehapiꞌ hangalo peá, agáiáná tiꞌara ina niꞌita. 23I tempó iti, ara woꞌo tauna to ina mohángáꞌákou, ‘Peita, Ánáꞌ Mánusiá!’ Ara woꞌo to ina manguliꞌ, ‘Ia ara ieneꞌ!’ Agáiáná ineeꞌkou lao ionoꞌ, hai ineeꞌkou woꞌo meuláꞌ i hira! 24Láwiꞌ ane haweꞌ huleꞌ Ánáꞌ Mánusiá, ina tongawaꞌ ntepuꞌu. KahaweꞌNa ina raita nodo pewangkaꞌ kiláꞌ to mowangkaꞌi humalele langiꞌ. 25Agáiáná hangko tiꞌara mani haweꞌ huleꞌ, Ia hangaa-ngaa mantódihá handaꞌ kapári hai tiꞌara ina ratarima tauna to tueꞌ deꞌe-deꞌe.

26Apa to mewaliꞌ hangkoia i tempóna nabiꞌ Noho tueꞌ mani,#17:26 Básá Pewaliꞌána gáláꞌna ka-7 hai ka-7. ina mewaliꞌ woꞌo i alo kahaweꞌána huleꞌ Ánáꞌ Mánusiá. 27I tempóna nabiꞌ Noho, tauna mampomaleꞌaheꞌ, tiꞌara raisá apa to ina merampe. Mandeꞌ hai mainuheꞌ oaꞌ, mosambokoheꞌ hai mosusaheꞌ. Noꞌonoꞌ katueꞌraꞌ duuꞌna haweꞌ tempóna nabiꞌ Noho mesuaꞌ i lalu duanga to mahile. Hangkaꞌ-hangkaꞌ perái, upu-upuheꞌ nalábóꞌ uwai hai mate humpu. 28Noꞌonoꞌ woꞌo kamampomaleꞌaraꞌ tauna i kótá Sodomo i tempóna Loꞌoti toroꞌ ionoꞌ. Mandeꞌheꞌ oaꞌ hai mainu-inuheꞌ, mobaluꞌ-baluꞌheꞌ, mowiáꞌheꞌ hai moaróheꞌ támbi. 29Agáiáná i kapohuꞌna Loꞌoti hangko i kótá Sodomo, hangkaꞌ-hangkaꞌ perái udá api hai watu belerang to moawaa mendáulu hangko i langiꞌ, onoꞌ miꞌi haneꞌi maropuꞌheꞌ upu-upu.#17:29 Básá Pewaliꞌána gáláꞌna ka-19. 30Noꞌonoꞌ woꞌo kamampomaleꞌaraꞌ tauna i tempóna Ánáꞌ Mánusiá ina haweꞌ huleꞌ i duniáꞌ.

31I alo iti, heáná peá tauna to mehoda i atuꞌ to hirante, ineeꞌheꞌ lebaꞌ mesuaꞌ i lalu támbi moala párewáraꞌ. Noꞌonoꞌ woꞌo tauna to i hinoe, ineeꞌheꞌ lebaꞌ mesuleꞌ lao i wánuá moala ba apa-apa. Hangaa-ngaa liliuheꞌ melangka! 32Nibuhinao apa to mewaliꞌ i toinána Loꞌoti!#17:32 Toinána Loꞌoti mehaileꞌ bona moita apa to napálehi i kótá Sodomo. Onoꞌ haneꞌi ia nahuku Pueꞌ Ala mewaliꞌ watu bure. Básá Pewaliꞌána 19:26. 33Heáná peá to moundeꞌ mopári-pári mampelae katueꞌna, ia tiꞌara ina molámbiꞌ katueꞌ to maroꞌa to tiꞌara mokahópóꞌá, hai heáná peá to mate ánti pepoináláina, ia ina molámbiꞌ katueꞌ to maroꞌa to tiꞌara mokahópóꞌá.

34Toꞌu ntepuꞌu to Kuhángáꞌákou: i alo kahaweꞌáNgkuꞌ, rodua to maturu i hambuaꞌ lintuꞌ, hadua ina raꞌala hai to haduána rapálehi. 35Noꞌonoꞌ woꞌo, rodua towawine tangaꞌraꞌ mombau, hadua ina raꞌala hai to haduána rapálehi. [ 36Noꞌonoꞌ woꞌo ane rodua tauna ina mobágóꞌ hingkakani i hinoe, hadua ina raꞌala hai to haduána rapálehi.]”#17:36 I surana Lukasi i lalu básá Iunani to sae ntepuꞌu, wátiꞌ iti tiꞌara teukiꞌ, agáiáná teukiꞌ i handaꞌ sura to raukiꞌ huleꞌ i bókóꞌ.

37Karoona Iesu molaluita, mekuneꞌheꞌ topeguruNa i Hia, rauliꞌ, “Pueꞌ, ane haweꞌKoꞌ huleꞌ, iumbá pewaliꞌána?”

Nahánikiheꞌ Iesu, Nauliꞌ, “Ane moitakou tádáhi kaaꞌ hirámpu, niꞌisá kaꞌárána to mate ionoꞌ. Noꞌonoꞌ woꞌo, ina tongawaꞌ ntepuꞌu kahaweꞌKuꞌ huleꞌ i duniáꞌ.”

Currently Selected:

Lukasi 17: NTBEP

Highlight

Copy