Salmos 27
27
1Náquiëʼ Xanruʼ Dios beníʼ quiaʼ, en Nu rusölá nedaʼ.
¿Nuzxi caz ral-laʼ gádxidaʼ?
Rapa chiʼë Xanruʼ Dios caz yöl-laʼ naʼbán quiaʼ.
¿Nuzxi caz gaca gun ga gadxi idzö́bidaʼ?
2Cateʼ gulaʼdáʼbagaʼ nedaʼ nupa tuáʼ döʼ para iluti nedaʼ,
nupa naʼ bitiʼ taʼléʼe nedaʼ dxiʼa, en tuʼdíʼi nedaʼ,
yöjchéguʼgaca, en yöjbíxigaca.
3Sal-laʼ ilaʼdáʼbagaʼ nedaʼ bönachi guizxi yu,
bitiʼ caʼ tsaza yöl-laʼ radxi ládxiʼdaʼahuaʼ.
Sal-laʼ ilaʼdíl-lalen bönachi nedaʼ,
nacaʼ nedaʼ tsutsu ladxiʼ.
4Tu le rinabaʼ lahuëʼ Xanruʼ Dios, lë naʼ güíʼi ládxiʼsaʼ,
le naca para sóaticaʼsaʼ lidxëʼ Xanruʼ yúguʼtë dza soaʼ ibanaʼ,
para gaca uyúaʼ yöl-laʼ lachi queëʼ Xanruʼ Dios,
en para saʼ ládxaʼa ca naca queëʼ lu yuʼu láʼayi queëʼ.
5Cateʼ idxín dza soa bönadxi quiaʼ, ucáchëʼë Lëʼ nedaʼ lu yuʼu lidxëʼ.
Ga nagachiʼ lu yuʼu lidxëʼ ucáchëʼë nedaʼ.
Uzóëʼ nedaʼ tsutsu ca tu lu guiö́jtoʼo.
6Gunëʼ ga ucul-laʼ nupa tuʼdíʼi nedaʼ,
ateʼ lu yöl-laʼ rudzeja quiaʼ cö́dxiʼaticaʼsaʼ
cateʼ bi unödzjaʼ queëʼ lu yuʼu lidxëʼ.
¡Gul-laʼ queëʼ! ¡Ön, gul-laʼ queëʼ Xanruʼ yöl-laʼ ba!
7Buzë́ naguʼ, Xan, cateʼ ulidzaʼ Liʼ.
Buzáʼ ladxiʼ quiaʼ, en bubíʼi didzaʼ ca naca le inábidaʼ Liʼ.
8Cateʼ Liʼ gudxuʼ nedaʼ: “Buguilaj nedaʼ”,
idú ládxaʼa bubiʼa didzaʼ, gunníaʼ: Uguiljaʼ Liʼ, Xan.
9Bitiʼ ucachiʼ loʼ lahuaʼ nedaʼ.
Bitiʼ taʼbaguʼu nedaʼ lu yöl-laʼ rilé quiuʼ.
Liʼ nacuʼ Nu rácalen nedaʼ.
Bitiʼ ucáʼanuʼ nedaʼ, en bitiʼ usán noʼo nedaʼ.
Nacuʼ Dios, Nu rusölá nedaʼ.
10Huáca uluʼsán ládxëʼë xuz xináʼa nedaʼ,
pero uzíʼ cazëʼ Xanruʼ Dios nedaʼ.
11Busedi nedaʼ para gunaʼ ca rë́ʼënuʼ Liʼ, Xan.
Buluíʼi nedaʼ para gunaʼ le naca tsahuiʼ,
tuʼ nacuáʼ nupa taʼdáʼbagaʼ nedaʼ.
12Bitiʼ usanuʼ nedaʼ lu náʼagaca nupa bitiʼ taʼléʼe nedaʼ dxiʼa
para cabí ilún quiaʼ le të́ʼëni.
Taʼdáʼbagaʼ nedaʼ nupa taʼzíʼ yëʼ,
en nupa të́ʼëni iluáʼ döʼ quiaʼ.
13Guzxíʼ lu nëʼë Xanruʼ Dios gunëʼ ga iléʼedaʼ le naca dxiʼa,
en le naca tsahuiʼ queëʼ ga nacuáʼ nupa nabángaca.
Laʼtuʼ cabí réajlëʼa lë ni, chibö́aj ládxaʼa.
14¡Guliʼgún lözëʼ Xanruʼ!
¡Guliʼgaca tsutsu, en buliʼtipa ládxiʼliʼ!
¡Ön, guliʼgún lözëʼ Xanruʼ!
Currently Selected:
Salmos 27: zar
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
