Matius 9

Puang Yesus ma'kuasa ungngampungngi dosa

1Donetoo dai' bumi di lopi Puang Yesus sibaha pahsikolana anna ullambangngi yato le'bo'. Pihsananna lambi'mi bete' di bohto ang naonge tohho.#9:1 bohto ang naonge tohho dianto Bohto Kapernaum (itai Mat 4:13). 2Ya' suleng dilemba mesa tau ang mate sambose' naung kalaena matindo yaling yato di patindoanna. Tahpana naita Puang Yesus naoate matama si'da-si'da kapampetahpa'annaii, ya' ma'karang yato pano di to makorong naoatee, ”O änä'ku, pamasannangngi inahammu. Ingkänna kasalaammu kuampungnging.”

3Yato sangngaka-sangngaka to pampakuhu ada' ang aha di hao, tahpana unghingngi tula'na Puang Yesus ungngampungngi yato tau, ya' sika naoante yaling di inahannaii, ”Ungngindä'-indä' sanganna Puang Alataala indo tau.”

4Ampo' nainsang Puang Yesus aka ang yaling di pihki'naii, lambi' mekutana pano diii naoatee, ”Akana umpihki'rakoa' dio kaha-kaha tahuhu yaling di inahammu? 5Umbarakae' kahang ang maromi' dioate, ‘Diampungnging kasalaammu,’ bahtu dioarakatee, ‘Kalehao anna pellaoo’? 6Ampo' la pahallua' ungnginsang ungngoatee yaling inde di lino ma'kuasaä' Kodi' Änä' to Lino ungngampungngi dosa.”

Lambi' ma'kara bumi Puang Yesus pano yato di tau ang mate sambose' kalaena naoatee, ”Kalehamo, ängkä'i ne patindoammu anna maoo sumule pano di dasammu.” 7Ya' kaleha siang yato tau anna sumulei pano di dasanna. 8Ingkänna tau ang ungngita yato kadahiang sika pusa' asang liu anna umpamatandei sanganna Puang Alataala ang umbea kakuasaang käyyäng pano di hupatau.

Puang Yesus untambai mesa to pahsinga' sima mendahi pahsikolana

9Tahpana umpellei yato ongeang Puang Yesus, ya' ungngitang mesa tau disanga Matius menge mohko' yaling di känto' pambayaang sima. Nasilahaming Puang Yesus naoaintee, ”O sammuane, maio tindo'ä'!” Ke'de' siang Matius anna mentindo'i.

10Donetoo le'ba'mi Puang Yesus pano di dasanna Matius anna mandei di hao, ya' sulei tunne' sangngaka-sangngaka to pahsinga' sima ang senga', anna tau ang naangka' to pa'bohto ‘kekasalaang,’ anna mandei sibaha-baha Puang Yesus anna pahsikolana. 11Tahpana naita sangngaka-sangngaka to Farisi, mekutanang pano di pahsikolana Puang Yesus naoatee, ”Akana mandee' indo tuangkuhummua' sibaha to pahsinga' sima anna to kekasalaang? Dai sihatang la noa!”

12Ampo' nahingngi Puang Yesus yato aka ang sika natula', ya' mentimba'mi yaling di pohapangang naoatee, ”Tadiaete' to makahsing ang umpahallu to pa'pakuli, ampo' to makorongngetee'. 13Dahi laokoa' anna umpellaya'i inde tula'na Puang Alataala ang naoatee, ‘Ang handang kukärä'i dianto pa'kalemu tadia penombaang.’#9:13 Hos 6:6 Aka' dä' sule untambai tau ang ungngangka' kalaena maroho, ampo' tau ang nainsang naoatee kekasalaang.”

Pepakuhunna Puang Yesus dai sinnoa pepakuhu ang masae

14Donetoo suleing sangngaka-sangngaka pahsikolana Yohanes ullumba Puang Yesus anna mekutanai pano naoatee, ”Akae kami' anna ma'puasaang sibahaang to Farisi, ampo' pahsikolamu dae'ne' ma'puasa?”

15Mentimba'mi Puang Yesus pano diii umpake pohapangang naoatee, ”Malaraka ingkänna tau ang menge ma'tokabeng sika umbu salamang ang kamateang ke mengeke' mohko' sibaha-baha yato to kabeng? Ampo' la aha toboe' tempona dako', Kodi', la sihapangngä' to kabeng, la dialai yaling mai di alla'-alla'na yato pahsikolaku. Ya' donento yatoo la sika naongei ma'puasa.

16Kubeakoa' mesa pohapangang. Noa indee: Daete' aha mesa tau la ungngalli kaing ang bakahu anna napakei untampi' sahedorona ang malullu' liung, aka' ponna napanoa, ya' yato kaing ang bakahu la unghentu sahedoro lambi' tuhtuang umpakehängngängngete' seu'na yato sahedoro. 17Anna noa tunne' hapanganna monna aha pangnganang lollo' ang masaeng lambi' mato'do', dai la sihatang dipampatamai angkoro' bakahu aka' la natehse, lambi' sahing ditibe. Ampo' angkoro' bakahu supung mala dipatama di pangnganang lollo' bakahu, lambi' sahing la tontong mapia.”#9:17 Bahtuanna inde derua pohapangang dianto: pepakuhungku ang bakahu dai mala dipasibolo pepakuhu ang masae.

Mesa bahine napabono' Puang Yesus, mesake' napatuho sumule

18Lella'ke' Puang Yesus umpa'karai yato pahsikolana Yohanes, ya' suleng mesa to pangngäto' yaling di pa'sambayangang anna mengkuntu'i di olona mane ma'karai naoatee, ”O Tuang, mane samatena di langngena' änä'ku ang bahine, dianto anna sulemä' kupalau ke la malai maoo pano anna ungnganti anna malai tuho sumule.” 19Ya' ke'de'mi Puang Yesus anna mengkalaoi sibaha pahsikolana mao untindo' yato tau.

20Donetoo aha mesa bahine ang unsa'ding korong mallambi' ang daloloi aha nabolinna yaling di sampulo derua pahiamanna. Ya' mendungku' di kebo'na Puang Yesus anna naantii pote' kaya' kalambe'na. 21Aka' yaling di inahanna yato bahine naoatee, ”Moi kuanti kale indo pote' kaya' kalambe'na, ya' bono'mä'tee'.” 22Ampo' mensaile Puang Yesus unnenne'i yato bahine anna napa'karaii naoaintee, ”O änä'ku, daummahea'! Napabono'o kapampetahpa'ammu.” Donetoo bono' siang yato koronna bahine.

23Tahpana lambi' pano di dasanna yato to kepangka', unghingnging to posuling menge umposulingngi penaniang-penaniang pa'tomateang, anna unghingngi toi mai'di tau sika koha dumuseng. 24Ma'karang Puang Yesus naoatee, ”Laokoa' aka' inde änä' daete' mate, ahana kaleete' hahe.” Ampo' sika napetaha-tahai supu. 25Puhanna unghambai yato ingkänna tau Puang Yesus, ya' tamang yato di tambing ang naongei tilampa' yato änä', anna natokeii teyyena. Ya' tuho siang sumule. 26Ya' lele sau tama siang kaheba didiona kaha-kaha yatoo yaling di ingkänna bohto di hao.

Puang Yesus umpabono' derua to buta

27Donetoo umpatahhi' bumi lalanna Puang Yesus sibaha pahsikolana. Menge sika mellao, aha derua to buta mantindo'i laona siang kakoha-koha naoatee, ”O Peänä'anna Tomaraya Daud, kalemuiang kasi.”

28Lempämmi Puang Yesus tama di mesa dasang, ampo' yato derua to buta semata mentindo' toe'. Mekutanang Puang Yesus yato pano di to deruai naoatee, ”Umpetahpa'rakaa' la malakoa' kupabono'?”

Sika mentimba'mi naoatee, ”Io, Puang, kipetahpa'.”

29Ya' naantiming Puang Yesus yato matannaii lella' ma'kara naoatee, ”La bono'mokoa'tee' situhu' kapampetahpa'ammu.” 30Donetoo titungka' siang yato matannaii. Sika naoaminte Puang Yesus, ”Dakaiia' anna malai dai aha tau mangnginsang didiona inde ang dahi.” 31Ampo' yato to deruai le'ba' siang do napalele sau tama yaling di ingkänna bohto di hao yato aka ang dahi pano di kalaena.

Puang Yesus umpabono' mesa tau ang dai mala ma'kara

32Le'ba'na yato derua to buta, ya' aha bumi sule nabaha tau mesa tau ang dai mala ma'kara ang napentamai setang. 33Tahpana nahambai Puang Yesus yato setang ang mampentamai, ya' ma'kara-kara siang yato tau. Ingkänna tau ang ungngita yato kadahiang pusa' asang liu anna sika naoaitee, ”Mane dianna si'da-si'daete' inde dahi yaling di alla'na to Israel.”

34Ampo' yato sangngaka-sangngaka to Farisi sika naoane'tee, ”Nasuhunte' mala ungngalai setang aka' kakuasaanna Pongkahana setang.”

Puang Yesus ma'kalemu pano di tau mai'di

35Napanoanto Puang Yesus sibaha pahsikolana ullelengngi asang ingkänna bohto mahoa' anna bohto saohko'. Lella' ma'kuliling lella' siang mampakuhu tama di ingkänna pa'sambayanganna to Yahudi umpepainsangnging Kaheba Mapia didiona Kapahentaanna Puang Alataala, anna umpa'dai toe' koronna anna kamalammaanna ingkänna tau. 36Tahpana ungngita yato tau mai'di Puang Yesus, ya' kende'mi pa'kalemu yaling di inahanna pano yato diii, aka' yato ingkänna tau dai nainsang aka ang la nababe anna buling di mendehatanna, sinnoa domba ang dai aha to pangkambi'na. 37Ma'karang Puang Yesus pano di pahsikolana naoatee, ”Itaia' inde mai tau masoo liu ang la dibaha tama di Kapahentaanna Puang Alataala. Kupasihapang boa kayu ang la pahallu dipupu, ampo' dai kanna' tau ang la mampupu. 38Dahi palauia' pano di puänna inde pinamula anna malai nahängngängngike' tau ang la umpupu inde boa kayu.”

Currently Selected:

Matius 9: ATQ

Highlight

Copy