Lukas 22
22
Pahtuyunna Yudas umbalu' Puang Yesus
1Donetoo marungku'mi pa'rame-rameang ungngande Roti Takeragi, ang si disanga pa'rame-rameang Paskana to Yahudi. 2Lella'mi yato kapala-kapala imang anna sangngaka-sangngaka to pampakuhu ada' umpeäng lalang umba la napanoa umpatei Puang Yesus, aka' sika mahea' umpihki' aka ang la nababe yato tau mai'di.
3Yato ta Yudas ang disangai toe' Iskariot, mesa di alla'na sampulo derua pahsikolana Puang Yesus, napentamai setang. 4Ya' le'ba'mi do umpellambi'i kapala-kapala imang anna ingkänna kapalana to pandaka Dasang Ada'na Puang Alataala, anna sika situla'i pahtuyunna la umbeho Puang Yesus pano diii. 5Aka toiro tahpa sika kahsi liu anna sika ma'dandii la umbea doi' pano di ta Yudas mendahi sahona. 6Ya' naaku tunne' ta Yudas anna semata umpeängngi lalang umba la napanoa umbeho Puang Yesus pano diii ke dang naita tau mai'di.
Pampatokaang andeang pa'rame-rameang Paskana to Yahudi
7Pihsananna lambi'mi tempona la umpakahoa' pa'rame-rameang Roti Takeragi ang si naongei toe' ingkänna tau pahallu pantang untunu domba umpakahoa' pa'rame-rameang Paskana to Yahudi. 8Ya' unsuong derua pahsikolana Puang Yesus dianto ta Petrus anna ta Yohanes naoaintee, ”Laokoa' anna umpatokaingkea' kapahalluang ang la dipake umpakahoa' pa'rame-rameang Paska, anna malai mande toingkea' kita' sibaha-baha.”
9Sika mekutanang pano naoatee, ”Umba naongei ang ungkärä'i la kipampasadiai?”
10Natimba'mi naoaintee, ”Ponna mentamamokoa' di Bohto Mahoa' Yerusalem, la sitammukoa' mesa tau sule tumimba. Tindo'i yato tau lambi' tama di dasang ang la napentamai, 11anna ungngoainte yato puäng dasang, ‘Nakutanaio Tuangkuhu didiona umba are' ongeang ang la naonge ungngande andeang pa'rame-rameang Paska sibaha pahsikolana.’ 12Lambi' la natuhoingkoa' mesa tambing malua' yaho di loteng, ang toka asammi yaho ingkänna pangkahka' ang la dipahallu. Diangnga'to ang la ungngonge umpatoka ang la taandea'.”
13Ya' sika le'ba'mi yato deruai pahsikolana anna nalambi' asang si'dai yato samai ang natula'ing Puang Yesus. Ya' sika napasadiang ang sika napahallu ma'rame-rame.
Puang Yesus mande sibaha pahsikolana
14Tahpana lambi'mi tempona yato pa'rame-rameang, ya' mohko'mi Puang Yesus sibaha pahsikolana la mande. 15Ma'tula'mi Puang Yesus pano diii naoatee, ”Pemala liuä' la sibaha-bahaingkea' ungngande inde roti pa'rame-rameang dolungku la ungngolai kamadahhaang. 16Aka' kutula'ingkoa', setonganna inang dang aha la kuande sala inde roti pa'rame-rameang lambi' dipakahoa' sala bou yaling di Kapahentaanna Puang Alataala.”
17Mane ungngalai mesa enu'ang ang keihsi angkoro', mane malaui behe dai' di Puang Alataala anna naoaitee, ”Alaia' indee anna unsienu'-enu'ii. 18Aka' kutula'ingkoa', setonganna dang aha la kuenu' sala inde angkoro' lambi' Puang Alataala ma'pahenta sihapang tomaraya yaling inde di lino.”
19Mane ungngalai roti anna ma'kuhhu'sumanga'i. Puhai, ya' nabika-bikang anna nasusaiing sikaii naoaintee, ”Diangnga'to inde bätäng kalaeku ang kubeho nasulängngikoa'. Babeia' indee anna malaä' ungkalehai lolo.”
20Noa tunne' puhanna sika mande, ungngalang enu'ang punno angkoro' Puang Yesus anna naoaitee, ”Ihsinna inde enu'ang dianto pa'dandiang bakahunna Puang Alataala, ang la kupasundung ungngolai hahaku ang titollo aka' dioa'. ” 21Ampo' itaia', tau ang la mambehoa' dipatei dinne toe' sibahaang dinoa mohko' di meja. 22Inang la materä'tee', Kodi' inde Änä' to Lino, situhu' aka ang inang puha napama'tantu Puang Alataala, ampo' la tilakane' yato tau ang mambalu'ä'!” 23Ya' merohong yato pahsikolana sika kutana-tanai didiona yato menna ang la mambabe noa di alla'naii.
24Donetoo dahi kasibehta-behtaang di alla'na pahsikolana unsiala-alai didiona menna yato di alla'naii ang handang keangka'. 25Ya' sika napa'tula'ing Puang Yesus naoaintee, ”Ingkänna tomaraya ang dai ungnginsang Puang Alataala supung nainsang undahha petauanna, anna yato ang naängkä' la umpalao kapahentaanna si disanga boheng to umpetundui hupatau. 26Ampo' dioa' dio daia' dio mala umponialai yatoo, ampo' diare' tau ang handang keangka'a' di alla'-alla'mu pahallu mendahi sinnoa ang handang mahäti', anna ang la mendahia' to pambahanammu pahallu sinnoa sabua'mu. 27Menna ang keangka' puha: tau ang ditahiai bahtu' tau ang mantahiai? Tantunte' anna keangka' puhaine' tau ang ditahiai. Ampo' ungngitangnga' inde dinoa, ya' Kodi' ang mantahiaikoa'. 28Yaling di ingkänna kamadahhaang ang kuolai si umposolai loloä'a'. 29La kubeakoa' baheang ma'pahenta, sinnoa Kodi' nabea touä' Kodi' Ambeku. 30Donetoo la mohko' boingkea' di mesa meja sibaha yaling di kapahentaangku, anna dioa' la mohko'koa' yaho di ongeang panghohto'ang anna unghohto'koa' yato sampulo derua peänä'anna Israel.”
Puang Yesus ma'tula' lohpo' naoate la nabahoi Petrus
31Mane ma'tula'mi Puang Yesus pano di ta Simon naoatee, ”O Simon, pehingngii. Napemala Pongkahana setang la nasändä'ikoa' sihapang banne ang dipasisähä' längkona anna lähpänna. 32Ampo' puhamo kusambayangngi anna malai dai la malamma kapampetahpa'ammu. Anna ponna ke matoto'mi sumule kapampetahpa'ammu, ya' pakatoto' toine' kapampetahpa'anna ingkänna solamu.”
33Mentimba'mi Petrus naoatee, ”O Puang, moi tamaä' di tahungkung, bahtu' moi mateä' sibahaingke.”
34Ampo' naoainte Puang Yesus, ”O Petrus, kutula'ingko setonganna dolunna la mentuhturuu' mane' inang puhaä' umbahoi pentallung di olona tau.”
35Napatahhi' bumi tula'na Puang Yesus pano di pahsikolana naoatee, ”Naonge do kusuokoa' mao do umpepainsangnging Kaheba Mapia anna dakoa' kupabei umbaha bokung bahtu' pangkahka' ang senga', ya' aharakakoa' kakuhangang?”
Sika mentimba'mi naoatee, ”Moi poro saidi' tala ahai kakuhangangki'.”
36Naoa bunte pano diii, ”Ampo' dinoa menna ang aha doi'na bahtu' pangngananna, ya' pahallu nabaha. Anna menna ang dai aha pa'danna, ya' pahallune' umbalu' kaya' lapi'na anna naalliing pa'dang. 37Aka' kutula' manahpaingkoa' dinoa, pahallu dipasundung asang yato ang tiuki' yaling di Suha' Masero didioku ang naoatee, ‘La diangka' mesa di alla'na to karake.’ Aka' ingkänna ang tiuki' didioku lella'mi dipasundungngi dinoa.”
38Sika mentimba'mi naoatee, ”O Puang, ahang dinne derua pa'dangki'.”
Naoaminte, ”Malante' nee supu.”
Puang Yesus ma'sambayang yaho di Tanete Zaitun
39Situhu' ang si biasa nababe Puang Yesus, ya' le'ba'mi dai' di mesa tanete ang disanga Tanete Zaitun di aneanna bohto mahoa'. Anna donetoo sibaha pahsikolana. 40Lambi'na dai', ya' ungngoaminte pahsikolana, ”Pa'sambayangkoa' anna malai tähäng kapampetahpa'ammu ke disändä'i.” 41Mane maoi ungkahaoi sai'di' pahsikolana anna ma'sambayangngi namesa naoatee, 42”O Ambe', ke la malai ke la umpakahaoi inde kamadahhaang ang la kuolai. Ampo' daete' situhu' pangngelo'ku, supunte' situhu' pangngelo'mu.” 43Ya' napengkalanda'ing mesa malaeka' yaho mai di langi' anna nabeai kamatohoang anna malai ungngolai yato kamadahhaang. 44Mapi'di' si'da-si'da inahanna nasa'ding lambi' tuhtuang napetatooi ma'sambayang. Yato kahpu'na sinnoa haha ang motaloro naung di tampo.
45Puhanna ma'sambayang, ya' ke'de'mi mao umpellambi'i yato pahsikolana, ampo' nalambi' menge sika hanne aka' masuhsa sika nasa'ding. 46Naoante pano diii, ”Akana haherakoa' dio? Kalehakoa' anna ma'sambayangkoa' andana dai la natähäng kapampetahpa'ammu ke disändä'i.”
Puang Yesus disahka
47Mengeke' Puang Yesus umpa'tula'i pahsikolana, ya' suleing sambahanang tau, nakadoluangngi yato Yudas, mesa di alla'na sampulo derua pahsikolana Puang Yesus. Ya' mendungku'mi Yudas pano di Puang Yesus la naurung. 48Napa'karaing Puang Yesus naoaintee, ”O Yudas, aka sakali anna palla' inahammu la umbehoä' Kodi' inde Änä' to Lino dipatei ungngolai ungngurungngä'?”
49Tahpana yato pahsikolana Puang Yesus ungngita yato aka ang dahi, ya' sika mekutanang naoatee, ”O Puang, la kibaliraka ne pano tau umpakeang inde pa'dang?” 50Aha mesa di alla'na pahsikolana untepä'i talinga kuananna sabua'na handang pongkaha imang.
51Ampo' nasängkäi Puang Yesus naoaintee, ”Sihoang!” Anna nadohe'i sumule yato talinganna, napadehke'i sumule pano anna napabono'i.
52Ya' ma'tula'mi Puang Yesus pano di ingkänna kapala imang anna to pandaka Dasang Ada'na Puang Alataala sibaha ingkänna setobaha'ang ang sika sule la mansahka naoaintee, ”To pabokorakakä' indee anna sulekoa' umpesele'ingkä' anna umbaha sumämbu la unsahkaä'? 53Allo-allo si mampakuhuä' di hipe di Dasang Ada'na Puang Alataala di tingngayomua', ampo' akana dä' unsahka? Ampo' dinoang tempona mala unsahkaä', di tempona inde kakuasaanna kamalillingang ma'kuasa.”
Petrus umbahoi Puang Yesus
54Ya' disahkang Puang Yesus anna dibahai pano di dasanna handang pongkahana imang. Yatone' ta Petrus mentindo' malamba' nei'. 55Di hao yato di tähämpä' dasanna handang pongkahana imang sika umpapeleä'-leä' api anna sika ma'kulilingngi di behinna mennenne'. Ya' mao tunne' Petrus tama di alla'-alla'na yato tau mennenne'. 56Ahang mesa bahine to pantahiai ungngita Petrus mohko' mennenne' anna napamanenne'-nenne'i mane ma'tula'i naoatee, ”Inde toe' mesa tau nasibahaing langngena' Puang Yesus.”
57Ampo' ma'baho Petrus naoatee, ”Tadiarä'to kodi'. Daeto kodi' kuinsang indo tau!”
58Dai masae aha burang tau senga' mangngita anna naoaitee, ”Dio tou dio mesa to pentindo'na!”
Ampo' naoate Petrus natimba', ”Äh, tadiarä'to kodi'!” 59Pihsananna umbai santehte' puhanna yatoo, aha sala bung mesa tau ma'tula' pano nakarahta' naoatee, ”Ahana inang inde toe' mesa tau ang si nasibahaing, aka' to Galilea toe'!”
60Ampo' naoate Petrus, ”Tadiarä'to kodi'. Dai ne kupähäng aka ne ang menge untula'.” Done siantoo mengeke' ma'tula' Petrus, ya' mentuhturuu'dang mane'. 61Ya' mensaileng Puang Yesus unnenne'i Petrus, ya' nakalehaing umba noa tula'na Puang Yesus pano naoatee, ”Dolunna la mentuhturuu' mane' allo dinoa inang puhamä' umbahoi pentallung.” 62Ya' sohommi tama di aneang anna ma'duseng-dusengngi aka' mapi'di' liu inahanna.
Puang Yesus mengngolo pano di to Mahkeada'
63Yato ingkänna tau ang menge mandaka sika umpetae'-tae' Puang Yesus lella' siang sika nasibamba-bambai. 64Sika nasapu' lindona anna naoaintee, ”Lähpä'ii menna kahang ang mandangku'o!” 65Anna mai'dike' kara tahuhu ang natula' pano.
66Tahpana mabaya, ya' tihimpummi setobaha'anna to Yahudi, kapala-kapala imang anna to pampakuhu ada', anna sika umpopengngoloi Puang Yesus pano di to Mahkeada'na to Yahudi. 67Sika naoaintee, ”Ponna dio si'da inde To Dilanti' la Mepasalama', ya' tula'ingkang.”
Mentimba'mi Puang Yesus naoatee, ”Moinnakato la kutula'ingko inang dasiang la umpetahpa'. 68Anna moinnakato la mekutanaä' mesa pekutana mating, inang dasiang la ungngaku untimba'. 69Ampo' napahandu' dinoa la mohko'mä' Kodi' inde Änä' to Lino yaho di ongeang kakeangka'ang, tando kuananna Puang Alataala To Handang Ma'kuasa.”
70Ya' sika para-parang mekutana naoatee, ”Ponna noa, ya' Änä'narako Dio Puang Alataala?”
Natimba'mi naoatee, ”Tahpa' pangngoammu, aka' Kodi' si'danto indee Änä'na Puang Alataala.”
71Ya' sika ma'tula'mi naoatee, ”Damingkea' pahallu umpeäng sa'bi aka' tahingngingnga'ne' umba noa tula'na.”
Currently Selected:
Lukas 22: ATQ
Highlight
Share
Copy
Want to have your highlights saved across all your devices? Sign up or sign in
LAI 2004
