Yohanes 6

Puang Yesus umpakande limang sa'bu la'bi tau

1Tahpana yatoo le'ba'mi Puang Yesus ullambang Le'bo' Galilea, bahtu' ang disanga Le'bo' Tiberias. 2Lambi'na bete', ya' ungngitang mai'di liu tau mampentindo'i aka' puhang sika naita pembabena ang mepusa'-pusa', umpabono' to makorong. 3Pihsananna dai'mi Puang Yesus di mesa tanete anna mohko'i sibaha-baha pahsikolana yaho. 4Donetoo marungku'mi allo pa'rame-rameang Paskana to Yahudi.

5Tahpana umbua' matanna Puang Yesus, ungngitaranne' mai'di liu tau sulei mallumba. Ya' ungngoaminte Filipus, ”Umbang la dipangngallii andeang anna malai dipakandeing inde mai tau noa mai'dinna?” 6(Ampo' inang nainsammi Puang Yesus aka ang la nababe. Supung ungkutanai kale ta Filipus aka' la napangngitai umba noa kapampetahpa'anna.)

7Natimba'mi Filipus naoatee, ”Ampo' moi la mosaho tau pa'sahtaungang#6:7 Yaling di basa Yunani: 200 doi' pera' ang sinnoa 200 allona nasaho mesa tau. dialliing andeang, datuke' la pantang inde pano tau mai'di moi poro napopantammi sisai'di'.”

8Mesa di alla'na pahsikolana ang senga' disanga Andreas, siullu'na Simon Petrus, ma'karang naoatee, 9”Aha inde änä' muane ang umbaha lima roti saohko' anna derua bau saohko', ampo' la napoakangkae' inde pano tau mai'di?”

10Naoante Puang Yesus, ”Suo asangngi ne tau mai'di umpahapa' ohko'na.” Di hao yato di ongeang ang sika naongei mai'di lohpo ang mahasa diohko'i. Ya' mohko' asammi yato tau mai'di umbai limang sa'bu muane mai'dinna, dake' diihsa' bahine anna änä'-änä'. 11Pihsananna ungngalang yato roti Puang Yesus anna ma'kuhhu'sumanga'i dai' di olona Puang Alataala. Mane nasusa-susaing pano di tau mai'di. Yato bau nasusa-susa toe' napasiandeing. Ya' sika mandeing lambi' boho.

12Tahpana boho yato tau mai'di, ya' ma'tula'mi Puang Yesus pano di pahsikolana naoatee, ”Himpung asangngi ingkänna ang mela'bi. Dauntibeii.” 13Sika nahimpungnging yato ang mela'bi, ya' punnoke'ne' sampulo derua baki.

14Tahpana naita yato tau mai'di inde pembabena Puang Yesus, ya' sika pusa'mi anna naoaite, ”Ahana Diangnga'te' indee nabi ang masae liung diempei kasuleanna tama di lino.” 15Ampo' aka' nainsang Puang Yesus naoate sika pemala la napahsa mendahi tomarayannaii, lambi' le'ba' namesa-mesa mendende dai' di mesa tanete ang mahulla-hulla.

Puang Yesus mellao yaho di haho le'bo'

16Tahpana tempu' allo tuhungnging pahsikolana Puang Yesus naung di behing le'bo', 17mane sika dai'i di lopinna anna sika lambangngi la lubete' di Bohto Kapernaum. Donetoo malillimmi kalane aka' la benging, ampo' daloloke'ne' sule Puang Yesus umpelolai yato pahsikolana. 18Menge sika ullambang le'bo', ya' merohong pepahi käyyäng lambi' aha bombang.

19Tahpana umbai unnung kilomete' sika umbose lopinna umpellei behing le'bo', ya' sika ungngitaranne' Puang Yesus mellao yaho di haho uhai. Ya' sika mahea' liung. 20Ampo' ma'kara Puang Yesus pano diii naoatee, ”Daummahea'a'! Kodi'ete' indee.” 21Ya' sika mahasang inahanna napadai' di lopinna. Donetoo tahpa sika ullambi' siang bohto ang inang la nakalambi'i.

22Marondonnai yato tau mai'di tohho loloke'ne' di hipe yato di ongeang ang napengkalaoi pahsikolana Puang Yesus. Anna sika nainsang naoatee inang mesa supu lopi ang aha di hipe pehengi, dianto ang napake pahsikolana le'ba', ampo' daine' mempola Puang Yesus. 23Pihsananna suleng sangngaka-sangngaka lopi di hipe mai di Bohto Tiberias anna napatohhoi di behing le'bo' sidungku' yato ang puha naongei tau mai'di ungngande roti ang nakuhhu'sumanga'i Puang Yesus. 24Tahpana sika naita yato tau mai'di dai aha Puang Yesus di hipe, noa tunne' pahsikolana, ya' sika dai'mi di lopinnaii anna le'ba'i bete' di Kapernaum do napeäng.

Puang Yesus dianto andeang ang mepatuho

25Tahpana yato tau mai'di silambi' Puang Yesus di hipe di tando bete'na Le'bo' Galilea, sika mekutanang pano naoatee, ”O Tuang, tehte' sangngaka anna lambi'o sule done?”

26Sika natimba'mi Puang Yesus naoaintee, ”Kutula'ingkoa' setonganna nasuhung umpeäng lelengngä'a' dai aka' ungngitakoa' tanda ang mepusa'-pusa' ang hali kubabe, ampo' aka' halikoa' kupakande lambi' boho. 27Daumpengkähängnga' aka' pemalakoa' supu ullambi' andeang mentolinona ang la puha anna la bosi, ampo' diare' pengkähängkoa' anna malakoa' ullambi' andeang mendehatanna ang dai aha la puhanna anna dai aha la bosi ang la mala mebea katuhoang ang lambi' sapano-panona. Yato andeang Kodi' inde Änä' to Lino ang la mambeakoa', aka' puhamä' nalanti' Ambeku Puang Alataala anna malai yato kubabe.”

28Mekutana bung yato tau mai'di naoatee, ”Dahi aka ang la pahallu kibabe anna malaang umpamasannang Puang Alataala?”

29Natimba' bung Puang Yesus naoaintee, ”Noa indee pangngelo'na Puang Alataala: dianto pampetahpa'koa' mai di Kodi' ang nasuo mentama inde di lino.”

30Sika naoa buntee, ”Ponna noa yatoo, ya' paitaiang tanda anna malaang mampetahpa' mating di dio. Babeingkang tanda ang mepusa'-pusa'! 31Peneneanta dolu puha sika ungngande andeang ang disanga manna di hao di ongeang makä'däng, situhu' ang tiuki' yaling di Suha' Masero naoatee, ‘Sika napakande roti ang tuhung yaho mai di suruka.’ ”

32Ma'tula'mi Puang Yesus pano diii naoaintee, ”Kutula'ingkoa' setonganna tadiaete' Musa ang mambeakoa' andeang yaho mai di suruka, ampo' Ambekuetee' ang mambeakoa', anna dianto yato andeang ang tahpa' si'da-si'da. 33Aka' andeang ang mebea Puang Alataala, tuhung yaho mai di suruka anna dianto yato ang umbea katuhoang pano di to lino.”

34Sika naoantee, ”O Puang, tungka pobea-beamang ne andeang ang ungngoaing.”

35Mentimba'mi Puang Yesus naoatee, ”Kodi'mito indee andeang ang mepatuho. Menna ang sule mampellambi'iä' danne' aha la manono di mendehatanna lambi' sapano-panona; anna menna ang mampetahpa' pano di Kodi' danne' la mahähäng di mendehatanna lambi' sapano-panona. 36Ampo' umba noa inang puhakoa' kutula'ing, dianto moinnakato ungngitamä'a' ampo' daia' ungngaku umpetahpa'ä'. 37Ingkänna tau ang inang puhang napama'tantu Puang Alataala la mendahi to pentindo'ku la sika nalumbaä', anna tau yatoo dai la sika kupasule. 38Aka' nasuhung tuhungngä' yaho mai di suruka, tadia anna umpembabeingkä' pangngelo'ku tobou Kodi', ampo' anna malaä' umpembabeing pangngelo'na ang mansuoä' sule. 39Dianto anna malai ingkänna tau ang puha napama'tantu la mendahi to pentindo'ku inang dai aha la kuhang moi poro la mesa, ampo' la sika kupatuho asang sumule ke lambi'mi katämpä'anna lino. 40Aka' inang dianto indee pangngelo'na Ambeku anna malai ingkänna tau ang puhang ungngita Änä' to Lino anna mampetahpa'i pano la ullambi' katuhoang sapano-panona anna la kupatuho sumule ke lambi'mi katämpä'anna lino.”

41Napahandu'mi to Yahudi momämmäng didiona Puang Yesus tahpana sika nahingngi naoatee, ‘Kodi'mito indee andeang ang tuhung yaho mai di suruka.’ 42Sioa-oaintee, ”Tadiarakae' inde Yesus, änä'na Yusuf ang tainsang liua', noa tunne' indona tainsang toua' nei'? Ampo' akana la naoae'tee, ‘Tuhung yahoä' mai di suruka’? ”

43Ya' sika naoaminte Puang Yesus, ”Daumpomämmängnga'. 44Dai aha moi poro la mesa tau ang la mallumbaä' ke dai Kalaena Puang Alataala ang mansuoä' sule mambahaingkä' di hao mai, anna yato tau ang la mallumbaä' la kupatuho sumule ke katämpä'annang lino. 45Aha tiuki' yaling di suha'na ingkänna nabi ang naoatee, ‘Ingkänna tau la napaturu Puang Alataala.’ Dahi tau ang mellaya' pano di pepaturunna anna mampehingngii la sule nalumbaä'. 46Kaha-kaha noa yatoo daete' dioatee ahang tau ang hali ungngita Puang Alataala, aka' tau ang haling ungngita Puang Alataala supunte' Yato ang nasuo sule. 47Kutula'ingkoa' setonganna ingkänna tau ang mampetahpa' la ullambi'ne' katuhoang sapano-panona. 48Kodi'mito inde andeang ang mepatuho. 49Moinnakato yato peneneammua' haling sika ungngande roti manna di hao di ongeang makä'däng, ampo' tontong sika ungngolai kamateang. 50Ampo' daine' noa yato andeang ang tuhung yaho mai di suruka. Tau ang ungngande yato andeang daine' la mate. 51Kodi'mito indee andeang ang mepatuho ang tuhung yaho mai di suruka. Inde andeang ang kuoaing dianto bale ang sule yaling mai di Kalaeku ang kubea pano di to lino. Kupanoa anna malai ingkänna tau ang mangngande la tuho lambi' sapano-panona.”

52Yato ingkänna to Yahudi sibehta-behta naoatee, ”Umbane' are' indo la noa tau la mebea bale ang sule yaling mai di kalaena diande?”

53Ma'tula'mi Puang Yesus pano diii naoaintee, ”Kutula'ingkoa' setonganna ponna ke dakoa' ungngande baleku, Kodi' inde Änä' to Lino, anna ungngenu' hahaku, ya' inang dakoa' la ungngampui katuhoang ang setonganna. 54Pano di tau ang ungngande baleku anna ungngenu' hahaku, ungngampui nei' katuhoang sapano-panona anna la kupatuho sumule ke katämpä'annang lino. 55Aka' baleku dianto supu andeang ang setonganna, anna hahaku dianto supu uhai dienu' ang setonganna. 56Menna-menna ang ungngande baleku anna ungngenu' hahaku la tohho yaling di Kalaeku anna la tohho touä' Kodi' yaling di kalaena. 57Tuhoä' aka' Ambeku ang mansuoä' mentama inde di lino, aka' Dianto kasuleanna katuhoang. Ya' la noa tunto nei' ingkänna tau ang ungngande baleku la tuho aka' Kodi'. 58Kodi'mito indee andeang ang tuhung yaho mai di suruka. Dä' sinnoa yato andeang ang hali naande peneneammua', aka' moinnakato anna sika naandei ampo' tontongke' ungngolai kamateang. Ampo' tau ang ungngande inde andeang ang kuoaing la tuho nei' lambi' sapano-panona.”

59Noanto inde ang naoa Puang Yesus naonge mengei mampakuhu yaling di pa'sambayangang di hao di Bohto Kapernaum.

Tula'na Puang Yesus dianto ang la mebaha pano di katuhoang sapano-panona

60Tahpana sika nahingngi to pentindo'na yato tula'na Puang Yesus, ya' mai'ding di alla'na ang mangngoatee, ”Inde pepaturunna makahha' si'da-si'da! Dai aha ang la mambela mantuhu'i!”

61Nainsang toboe' Puang Yesus naoatee to pentindo'na momämmäng aka' unghingngi pepaturunna. Lambi' ma'tula' naoatee, ”Tisikurakakoa' dio unghingngi yato tula'ku lambi' pemalakoa' umpellei kapampetahpa'ammu? 62Ya' akangnga'ne' la umbabe ke ungngitamä'a' Kodi' Änä' to Lino sumule dai' di ongeangku ang inang kukasulei dolu? 63Setonganna Inaha Maseroetee' ang mebea katuhoang, tadiaete' kamatohoanna hupatau. Ingkänna inde ang kutula' mating di dioa' dianto tula'na Inaha Maserona Puang Alataala anna mala dioatee: tula' ang mepatuho. 64Moinnakato noa aha siake'a' yaling di alla'-alla'mu ang dai mampetahpa'.” (Natula' noa inde Puang Yesus aka' inang nainsammi mengkalao dolu menna yato tau ang dai mampetahpa' anna menna ang la mambalu'.) 65Nalombungngike' tula'na naoatee, ”Dianto suhunna anna kuoaingkoa'tee: dai aha moi poro la mesa tau ang la mallumbaä' ke dai Kalaena Ambeku mampama'tantu.”

66Mengkalao donetoo, ya' mai'ding di alla'na to pentindo'na ang mampensähä'i anna dang naaku mentindo'. 67Mekutanang Puang Yesus pano yato di sampulo derua pahsikolana naoatee, ”La mao turakakoa' dio umpelleiä'a'?”

68Mentimba'mi ta Simon Petrus naoatee, ”O Puang, umba salangkang la kiola? Aka' yato tula'mu dianto tula' ang la mebaha pano di katuhoang sapano-panona. 69Anna inang kiinsammi anna kipetahpa' kioatee Dionto To Masero ang nasuo Puang Alataala mentama inde di lino.”

70Naoa bunte Puang Yesus, ”Darakae' Kodi' tobou Ko ang mampilleikoa' to sampulo deruakoa'? Ampo' moinnakato noa yatoo, aha mesa di alla'mua' setang!” 71(Ang nahoa inde tula'na Puang Yesus, dianto ta Yudas, änä'na ta Simon Iskariot. Aka' moinnakato anna mentama toine' di kamesaanna sampulo derua pahsikolana, ampo' inang nainsammi Puang Yesus naoate dianto ang la mambalu'.)

Currently Selected:

Yohanes 6: ATQ

Highlight

Copy