MARKUS 4

Eek bapatakum ipit baetaa atakam

(Mat. 13:1-9; Luk. 8:4-8)

1Emesare. Wan bare ere, Yesus jupima aememen. Are atakam aememtamen. Owe tanane Yesuspu ajarisiomesen. Armat Ipitam era owe tanane aporen. Erarawa Are ti andaejuuapen. Ararawa bup ajiresen. Era owe tanane anom jupima aememesen. 2Armat Ipit arawa baetaa atakam bay era owe akoretamen. Are era owe atakam aememtamen. Are emes atakam aememtamen:

3“Atakam jane pajiay! Kebun karai ipit eek bajapom aesosen. 4Are era eek bambi patakumtiien. Eek apatakumtiierawa, wan eek bai asanpu andaeamesteteresen. Sakaorawa andaepipiapteteresen, wanam sakao era eek andakoromesen. 5Me wan eek ere, eka tapirmipu andaeamesteteresen. Erapu se daytu apoken. Era seam koo apoken. Erarawa, era eek dampii ajitapen. 6Me, era pak akene bimi daytu apoken. Oup jee atemetape ere, sisin aemapteteresen. Wanam sa asapesen. 7Me wan eek ere, fa aptam wus bomon andaeamesteteresen. Era fa aptam akene daytu wanam era eek akene apurimompesen. Ararawa, era eek akene asanamimompesen. Era akene eek bapeomtep apoken. 8Wan eek ere, asan akot tapirmipu andaeamesteteresen. Era akeneam ajitteteresen. Ararawa sira atemetawotemteteresen. Eek arawa apeomtepteteresen. Me wan akene, eek 30 apeomtepteteresen. Me wan ere, eek 60 apeomtepteteresen. Me wan ere, eek 100 apeomtepteteresen.” Yesus emes atakam aesimen.

9Yesus arawa, “Jane fero owe ara atakam jane bajitas.” Emes atakam aesimen.

Yesus baetaa atakam akore atakam

(Mat. 13:10-17; Luk. 8:9-10)

10Emesare. Asep ere, Yesus apa aemapen. Abajamkai owe 12, wanam takan ajamememes oweam, Armat Ipitpu ambaremesen. Ararawa, Armat Ipit era baetaa atakam basonak bataetiitam atakam ajanimesen. 11Yesus arawa, “Allah Owe aobaomep atakam, ere bomonnak atakam. Era bomonnak atakam jane bajiekorom, ere tas. Era tasan owe ere, ara baetaa atakam jane bambi ajimas. 12Are Alkitab atakam jipu arare:

‘Era owe baporaartas. Me are baporkorom-ombar. Are jane bajiaartas. Me, are jane bajiekorom-ombar. Are bamekem-ombar. Allaham adosa bimak binip bajanimemtam-ombar.’

Alkitab emes atakam akorem. Erarawa tasan owe ara baetaa atakam jane bambi bajitas.” Yesus emes atakam aesimen.

Yesus eek apatakummar ipit baetaa atakam basonak aoesimtame atakam

(Mat. 13:18-23; Luk. 8:11-15)

13Yesusam era owe ajateporen. “Tare ara baetaa atakam jane bajiekorom apok apaye, tare wan baetaa atakam jane baemejiekorom asan apok? 14Emesare, era eek bapatakum ipit, Allah atakam bakoretam ipit tamen awar. 15Bai asanpu andaeamesteteres eek ere, wan Allah atakam jane ajimas owe awar. Are era atakam jane ajimas, Bii Kapar Ipit era owepu afepiemem. Are era owe era jane ajimas atakam bimak binip ataerem. 16Era eka tapirmi andaeamesteteres eek ere, wan Allah atakam jane ajimas owe awar. Are era atakam jane ajimas, jak akot aemememas. Are era atakam ji fef afemeememas. 17Era owe ere, era atakam bajamkai fiak apok aemememas. Are ju jirao bajamkai apok aemememas. Owe era atakam bajamkai aportas, wanam asan pota era owe baemapom apaye, bajurusum apaye, emesare are fef ambompimmas. 18Era fa aptam akene bomon andaeamesteteres eek ere, wan Allah atakam jane ajimas owe awar. 19Are ara aemansa tapirmi pak bimak binip arke aemememas. Are pak tanane bataet jiak asenomememas. Are pak kupis batakamut bimak binip jak asenomememas. Erarawa Allah atakam bimak binip bojanim apok aemememas. Are Allah karai baetamnak apok aemememas. 20Me tapirmi akot andaeamesteteres eek, ere, wan Allah atakam jane ajimas owe awar. Are era atakam ambesemkorommas. Me are eek 30 pii, Tuhan ambwemtamemas. Me wan ere eek 60 pii, Tuhan ambwemtamemas. Me wan ere, eek 100 pii, Tuhan ambwemtamemas.” Yesus emes atakam aesimen.

Pelita ember bomon bapurimapom atakam

(Luk. 8:16-18)

21Emesare. Yesus atakam era owe aokoromen. “Owe pelita ambatemapomtas, are pelita ember bomon bapurimapompor ape? Are pelita ese asan bomon baputaapompor ape? Are emes apok. Are pelita oup asan ataapomemas. 22Era atukumtiimas pak takes baso ataapomemas. Me tiruu pak takesam, baso aemapemas. (Era baetaa atakam takes emes taka are.) 23Jane fero owe ara atakam jane bajitas.” Emes atakam aesimen.

24Yesus anom, “Era jane ajimakam owe bimak binip fiakar. Tare ara atakam jane ajiekoromtakam, Allah bimak binip basonak tara atetamteman. Are tare wan atakam jane bajiekorom, bimak binip baso aotetamteman. 25Ara atakam jane ajiekoromtas owe, wan atakam anom jane aojitemas. Me, ara atakam jane bajiekorom apok owe, ara jane ajitasam bimak binip ajanimemtemas.” Yesus emes atakam aesimen.

Eek ajitteteres baetaa atakam

26Emesare. Armat Ipit wan atakamam aokoren. “Allah owe aobaomep atakam, eek apatakume ipit emes awar. 27Eam ara ipit ise aputamsa ajaien. Tomam awasita ajaien. Me, ara eek ajitteteres erarawa sira awotemteteresen. Era pak ere, wama tamenem? Ara ipitam amsam apok. 28Emesare, ara pak akene se bomon amba ajisim. Bonak jini ajisim. Wanam tae ajisim. Me eek ere, asepnake. 29Era ipitam, eek pii aporto, are bakokomtaa bare aporen. Emesare, are eek akokomtaaen.” Yesus emes atakam aesimen.

Kutukoser wus eek baetaa atakam

(Mat. 18:31-32, 34; Luk. 13:18-19)

30Yesusam, “Allah owe aobaomep awar wama pakem? Dare atakam baso bakore, wama tamen baetaa atakam koretam? 31Are kutukoser wus eek tamen awar. Era eek, ere kutukosernak. Me wan pak eek kupis, ere daytu. 32Owe era kutukoser wus eek se bomon ataapomemas. Era akene ajitto, daytu aemememas. Me wan akene takes, ere kutukoser. Era akene anom awa daytu atatarejisim. Sakao anom era efe jiiti bomon, to aeemas.” Yesus emes atakam aesimen.

33Armat Ipit era owe era baetaa atakam jane feronak aporen. Erarawa emes baetaa atakam tanane era owe akoromen. Are Allah atakam era owe baememtam atakam aren. 34Era atakam kupis takes akorerawa, Are baetaa atakam aokoren. Me, Are, abajamkai oweam apa aemapes, Are era atakam takes baso akoretamen.

Yesus kuur akarimtupume atakam

(Mat. 8:23-27; Luk. 8:22-25)

35Era bare poro, Yesus atakam abajamkai owe aokoromen. “De! Dare poman ajiramo.” Emes atakam aesimen. 36Erarawa are owe tanane beken ajiosesen. Yesus ere ti bomon timen atakamdaeapen. Era oweam Armat Ipit batoomjir andaejuuesen. Wan ti anom takan ajamdaejuuesen. 37Erarawa bupnak ajireses, kuur daytu ajumjinaoen. Wo anom ti bomon afaumjuumen. Era ti bwi daytu afaumjuumen. 38Me, Yesus ere ti tip ise aputamsen. Are kuus bespak awosamsen. Abajamkai owe, Yesus ajitinwasumtumesen. “Guru! Wore dare bwi dambir akote?” Emes atakam aesimesen.

39Erarawa Armat Ipit awasiten. Are atakam kuur ajume asakamtamen. “Bakariey!” Emes atakam aesimen. Are atakam bwi wo akoromen. “Bakariesay!” Emes atakam aesimen. Erarawa era kuuram akarien. Era bwi wo aatakam ji aeesen. 40Armat Ipit arawa, atakam era owe akoromen. “Tare wama tamen jak fiak apokem? Tare eemnak Dera bamesemkorom apok wama tamenem?” Emes atakam aesimen.

41Era owerawa, ombare daytu aememesen. Ararawa armamon atakam ajamkoramesen. “Are ta ipitima? Kuur anama bwi aatakam ji taka aeemas.” Emes atakam aesimesen.

Currently Selected:

MARKUS 4: LAIASC

Highlight

Copy