MARKUS 13
13
Allah Tame atietiitas atakam
(Mat. 24:1-2; Luk. 21:5-6)
1Emesare. Yesus Allah Tame ajisemen. Wan abajamkai ipitam atakam Armat Ipit akoromen. “Guru! Baporey! Era tame eka daytinak. Baporey! Era tame bamintepam akotnak.” Emes atakam aesimen.
2Yesus arawa, “Tare era tame bamintep daytinak apormakam apaye? Emesare, asep bare, era tame eka bomonapas teneapas baemames apoknak aemtemas. Jii owe, ere takes ajumdaemtemas.” Emes atakam aesimen.
Owe ajirisemtas atakam (Mat. 24:3-14; Luk. 21:7-19)
3Emesare. Yesus fami juas Saitun oup aemapen. Allah Tame era fami poman aemansen. Yesus era tame bimin ajiompen. Erarawa, Petrusam, Yakobusam, Yohanesam, Andreasam, Yesus apa ajateporesen. 4“Ara akorearem atakam, ete bare emto? Era pak aemto bare setep asisiamesto, Allah wama tamen jinim bae pak poromtamto? Emesare, era atakam dara okoretamaro.” Emes atakam aesimesen.
5Yesus arawa, “Emesare, tare turuar! Owe potet tara batutum-ombar. 6Owe tanane ajinaotemas, wanam, ‘Allah Aeremtaere Ipit, ere derare,’ emes atakam aesimtetertemas. Anom potet owe tanane atutumtemas. 7Tare jii owe tapon aportakam, wanam wan tapirmi jii owe tapon atakam jane ajitakam, tare ombare bas. Emesare, owe jii aemtemas. Me, asepnak bare, ere setepnak apok. 8Wan tapirmi owe tanane jii wan tapirmi owe tanane armamon ajamoma ajitemas. Wan pemerintah tananeam jii wan pemerintah tanane armamon ajamoma ajitemas. Ajieam asan takes asiisimtem. Amosto, pakanamtoam aemamestem. Era pak ere, bonak bajirisem are. Wan, daytinak bajirisem pak arawa asep are.
9Tare ere, turuar! Owe tara ajipirtaerteman, wanam are era atakam basakamtam owe aotasimemomtamteman. Are Yahudi owe samayen tame bomon wusup tara ateteman. Are tare Dera bajamkai owe aporteman. Erarawa tare kapar owe bipuam, raja owe bipuam aememtemakam. Me, tare Allah Akot Atakam era oweam akoretamtemakam. 10Emesare, owe Allah Akot Atakam samaniin samaniin takes bonak atatapimomemtemas, wanam asepnak bare aondaetem. 11Owe tara ajipirtaertan, wanam tare atakam basakamtii owe aotasimemomtamtan, ere tare atakam era atakam basakamtii owe akoromtakam, bimak binip jirao bas. Atakam era owe akoromtakam, Allah Jip era atakam bimak binip tara atetamteman. Era akoromtakam atakam tapa atakam apok. Ere Allah Jip tara atetamtan atakam are.
12Wan oweam arepotais apaye, areotais apaye, owe aotasimemomtamtemas. Wan duturu oweam, ajii aotasimemomtamtemas. Era owerawa, era jiiam atatiiemas. Wan arereisam, arisare awasiomittemas, wanam batatii aotasimemomtamtemas. 13Owe tare Dera bajamkai owe aportan, are takes bifane tara afeomemteman. Me, owe asep bare ajiire, Dera bajamkai bamompin apok aemtas, are ajoremtemas.”
Pota Daytinak Pak atakam
(Mat. 24:15-28; Luk. 21:20-24)
14Emesare. ‘Pota Daytinak Pak’ aememtem. Era pak, owe danais aemtiitem. (Ara atakam baca baem owe ara atakam jane bajiekoromtas.) Era ‘Pota Daytinak Pak’ Allah Akotnak Asan aememtem. Tare era pak aportakam, Yudea tapirmi aememes owe, ombare famipu baesostas. 15Tame oup kais banda asan aemaptetertas owe, tame bomon pak fef bajitaerpor bas. 16Kebun karai aeetas owe, atame baju bofasietaer bas. 17Emesare, era bare jak aptam tapesam, jii aoo andamtas tapesam, asan potanak aemaptemas. 18Tare atakam Allah ajanimay. ‘Bajirisem bare, jufu bwi andaeemtepto bare bas.’ Emes atakam ajanimay. 19Era aamsekunaoto bare, owe bajirisem daytinak aemtemas. Allah ara tapirmi akenemtiia baream, waa ajiiream, owe emes daytinak bajirisem apok aemmas. Asep baream are emes daytinak bojirisem apok aemtemas. 20Me, Tuhan atakam asakamtiie. ‘Era owe ajirisemtas pak, jiraonak bas.’ Emes atakam aesime. Are emes atakam basakamtii apok ere, owe takes dambir aemtemas. Me, Are aoereremartaae owe, seis akot aoorpore. Erarawa ara owe ajirisemtas, jirao bas, emes atakam asakamtiie.
21“Owe atakam tara akoromtan, ‘Baporay! Allah Aeremtaere Ipit ara asana,’ wanam, ‘Baporay! Allah Aeremtaere Ipit era asana,’ emes ajietamtan, tare era atakam jane bajie bas. 22Emesare wan owe, ‘Dere Allah Aeremtaere Ipit derare,’ emes pote atakam akoretetertemas. Allah atakam bakore pote oweam aememtemas. Era owe potet Allah aereremartaae owe atutumportemas. Erarawa are jinim bae pak aemtemas. 23Emesare, tare turuar! Dere ara pak atakam takes bonak tara akoretammin.”
Asamot Anakot Ajaoreme Ipit andaeto atakam
(Mat. 24:29-31; Luk. 21:25-28)
24“Era bare, owe ajirisemtemas. Ajirisemtas arawa, jee sare apok jiiti atamtiitem. Piram bandaesaramtii apok aemtem. 25Baetam, baisam akookosendaetem. Allah wonamo oup pak tayiepota aemtopumtem. 26Erarawa, owe Asamot Anakot Ajaoreme Ipit Surga wonamo bomon andaeto aportemas. Armat Ipit afiak pak aptam andaetem. Are akotipitnak aememe pak aptamam andaetem. 27Armat Ipit amalaikat owe ara tapirmi samaniin samaniin takes apatosomtem. Era malaikat oweam, Allah samaniin samaniin aereremartaae owe, ajarisimapomtemas.
Wus juas “ara” atakam
(Mat. 24:32-35; Luk. 21:29-33)
28Emesare, tare wus juas ‘ara’ aememar pak bimak binip batetaramay. Era wus jini asakuemto aportakam, sue bwi setep emes ajitemakam. 29Emesamare, tare ara akoretammin atakam pak ajinaoto aportakam, tare Asamot Anakot Ajaoreme Ipit andaeto bare setepnak aportemakam. 30Atakamnak, ara tapirmi aememes owe dambir baem apok, ara akoretammin atakam pak bonak aemkoromtem. 31Emesare, wonamo oupam, ara tapirmiam, ajaniostem. Deatakam ere, emes aemansaartem.
Owe asepnak bare amsam apok atakam
(Mat. 24:36-44)
32“Asamot owe ere, Armat Ipit aondaeto baream, jamam, amsam apok. Surga malaikat oweam, Allah Andepam, amsam apok. Deritipit taka amsame. 33Emesare, tare turuar! Banamek fiaka! Tare aemto bare tamsam apok. 34Ara atakam akorommin, jipit taka wan tapirmi aesosto emes tamen are. Are atame beken ajiosem. Are akarai baetam owe, apak takes banamek bataitam atakam asakamtamum. Are owe karai taketama taketama ajim. Are atakam, tame banamek batai ipit akoretamum. ‘Ara tame banamek fiaka!’ Emes atakam aesimum. 35Emesare, tanom are! Tanom banamek fiaka! Tare tame armat ipit aofasiendaeto bare tamsam apok. Poro apaye. Eamnak apaye. Era ajomo atakam akoreto apaye. Tom apaye. Emesare, tanom tamsam apok. 36Armat ipit ajananamteman. Emesare banamek fiaka! Tare ise taojamestakam, emes bapor-ombar. 37Tara akorommin atakam, denom era owe takes aokoretammin. ‘Tare banamek fiaka!’ Emes atakam aesimmin.” Yesus emes atakam aesimen.
Currently Selected:
MARKUS 13: LAIASC
Highlight
Share
Copy
Want to have your highlights saved across all your devices? Sign up or sign in
@LAI 1994
