LUKAS 18

Jaos atakam basakamtii ipit baetaa atakam

1Yesus arawa, baetaa atakam, era owe aokoromen. Era atakam, era owe atakam Allah bajanimaar, wanam jak basakepie-ombar, emes bajomtam are. 2Era akoretame atakam ere, “Owe ajaos atakam basakamtii ipit, kota taka aemapen. Era ipit, Allah ombare apok ipitin. Are asamot owe ombare apok ipitin. 3Era kotaam tano taot aemapen. Era taot armat ipit aibaroma ajaien. Are atakam aikoroma ajaien. ‘Jipit taka deratin ajamomemamum. Wore era ajamomemamum pak atakam asakamtiitaman.’ Emes atakam aesimen. 4Bare tanane era jaos atakam basakamtii ipit, era atakam basakamtii potan. Asep arawa, are bimak binip atetaramen. ‘Dere Allah ombare apok. Denom asamot owe ombare apok. 5Me, ara tano taot ajurusuma ajiman. Emesare, dere aperkara atakam asakamtiimin. Are aifasia aifasia, wanam dere damojip baparamtii-ombar.’ Emes bimak binip atetaramen.” Yesus emes atakam aesimen. 6Emesare, Tuhan atakam akoromen. “Tare ere, era jaos atakam basakamtii jaos ipit aatakam jane pajiay. 7Me Allah aereremartaae owe, jokam, eamam, atakam fiak, Allah ajanimemas. Allaham, “Era owe, turunak owe,” emes atakam akoretem. Are era owe asan akot baem, okamisia bajie apok aemtem. 8Atakamnak! Allah, era owe, atep afemejititaertem. Me, Asamot Anakot Ajaoreme Ipit, ara aemansa tapirmi aofasito, are eemnak ara bamesemkorom owe aportemarane?” Yesus emes atakam aesimen.

Parisi ipit anama pemerintah uang bajanimtam karai ipit baetaa atakam

9Emesare. Yesus wan baetaa atakam wan owe akoretamen. Era owe ere, “Dare turu owe,” emes bimak binip atetaramesen. Erarawa era owe wan owe bifane afeomesen. 10Era baetaa atakam ere: “Jipit amnuk, atakam Allah bajanim, Allah Tame ajiiemisen. Me wan ipit Parisi ipitin. Me wan ipit ere, pemerintah uang bajanimtam karai ipitin. 11Me Parisi ipit imtuu awasite, wanam ajak bomon atakam Allah ajanimen. ‘Allah! Dere wan owe tamen apok. Denom ara aemema pemerintah uang bajanimtam karai ipit tamen apok. Emesare dere terima kasih atakam wora akorommin. Me wan owe ere, wosom owe. Are jokoman owe. Are tani anama tamane bajamdamat owe. 12Dere ere, era mingguiin, bare jamnuk banda pak ambasea ajaio.’ Denom pak ban amnuk ataera ajaio, wan pak taka Allah atetama ajaio.’ Emes atakam aesimen. 13Me pemerintah uang bajanimtam karai ipit ere, setep apok aememen. Are banamek oup bapemtemetem apoknaken. Are jak potanak aememen. Are atakam akoromen. ‘Allah! Dere dosa ipit, ere Derare. Seekot aoorporan!’ Emes atakam aesimen. 14Atakamnak! Allah era ipit turunak ipit, emes atakam akoromen. Era ipit arawa, tame aesosen. Allah ere, era wan ipit, turunak ipit atakam bakore apoken. Emesare, era amba baemetemtem owe takes damke akamemomtem. Me, are amba baemetemtem apok owe tere aeomtem.” Yesus emes atakam aesimen.

Yesus, jii koser asan akot aeme atakam

(Mat. 19:13-15; Mrk. 10:13-16)

15Wan owe ajii koser Yesuspu atoomtinesen. Are Yesus era jii ban baosompor akoten. Me Yesus bajamkai owe emes apores, wanam atii atesen. 16Yesus ere, era jii ajaten. “Ara jii, dedamopu emes bamaromemtanis. Atii bata bas. Ara jii tamen owe, Allah aobaomep owe aemapmas. 17Atakamnak! Ara jii tamen baemem apok owe, Allah aobaomep owe baemeemem asan apok.” Yesus emes atakam aesimen.

Pak daytu owe atakam

(Mat. 19:16-30; Mrk. 10:17-31)

18Emesare. Kapar ipit takaam Yesus ajateporen. “Guru akotnak! Dere jiinenak baememaar akot. Dere emes wama pak oemtey?” Emes atakam aesimen. 19Yesus arawa, “Dere owe akot ajimanim ere, wama tamenem? Owe akot, ere Allah taka erare. Wan owe apok. 20Emesare, wonom Musa Basakamtam Atakam womsam. ‘Tani tamane bajamdamat bas. Owe tatiitem. Wosom etem. Pote atakam koretem. Wuritipit anama worsoot afaimaarey.’ Allah emes atakam Musa asakamtame.” Yesus emes atakam aesimen. 21Era ipit arawa, “Dere jii kope aeememaaru, dere era atakam ji takes aeaaru.” Emes atakam aesimen. 22Yesus emes atakam jane ajie ere, Are atakam armat ipit aokoromen. “Wore pak takakope baem apoknak aemem. Me wopak takes bajititkoromtas, era uang era pak apok owe sai asaietamey. Emes aemtem, asep ere wore era Surga oup tapirmi, pak anakot atoomemtemarem. Wonom bofasiey. Dera jamkaian.” Emes atakam aesimen. 23Era ipit ere, pak daytinak aemome. Erarawa are emes atakam jane ajie, are jak potanak aememen. 24Yesusam era ipit jak pota aporen. Ararawa, atakam akoren. “Pak daytu owe, Allah aobaomep owe baemem, ere asan pota daytinak. 25Unta, jarum jafa baemtuk, ere asan pota kope. Pak daytu owe ere, Allah aobaomep owe baemem, ere asan pota pak daytinak.” Emes atakam aesimen. 26Me emes atakam jane ajies owerawa, atakam akoresen. “Erarawa era ajoremtas owe, ete oweem?” Emes atakam aesimesen. 27Yesus arawa, “Asamot owe baemeem asan apok pak, Allah ere, era pak aemtem.” Emes atakam aesimen. 28Petrus arawa, “Baporey! Dare dapak takes beken ajiom, wanam Wora ajamkaiom.” Emes atakam aesimen. 29Yesus arawa, atakam era owe aokoromen. “Atakamnak! Wan owe atame apaye, atapesti apaye, areotais apaye, arisare apaye, Allah owe aobaomep karai baetam, beken ajioses. 30Era owe ere, ara aemansa tapirmi aemapmas, are era pak daytinak aotoomeptemas. Wanam era ajamsekunaoto bare, jiinenak aememaartemas.” Emes atakam aesimen.

Yesus adambir atemto atakam

(Mat. 20:17-19; Mrk. 10:32-34)

31Emesare. Yesus bajamkai owe 12 ajate, wanam atakam era owe akoromen. “Atakamnak! Dare Yerusalem aesosmarom. Bonaknak ere, Allah atakam bakoretam owe, Asamot Anakot Ajaoreme Ipit aemto pak, ameeapomes. Emesare, Yerusalem, owe era atakam takes, era atakam jipu aemtemas. 32Owe, Armat Ipit, Yahudi apok saman owe aotasimemomtamtemas. Era owerawa, Armat Ipit wote awotomtemas. Are Armat Ipit bifane afeomemtemas. Are besa Armat Ipit damo ajiepirimtemas. 33Are Armat Ipit wusup atetemas, wanam atatiitemas. Bare bamintep arawa, Armat Ipit ajaorwasittem.” Emes atakam aesimen. 34Era owe ere, emes atakam bimak binip batoomem apoknaken. Era atakam baso apoken. Emesare, are Yesus akore atakam amsam apoken.

Yesus banamek kapie ipit banamek awarameme atakam

(Mat. 20:29-34; Mrk. 10:46-52)

35Emesare. Yesus kota Yeriko setep emes ambaresisieme ere, banamek kapie ipit era bokot dasman aemapen. Are uang atakam bajanim aren. 36Era ipit, owe tanane era asan baokorefe jane ajie, wanam ajateporen. “Are apa pakem?” Emes atakam aesimen. 37Owerawa, atakam, era ipit akoromesen. “Are Nasaret Ipit juas Yesus aokorefem.” Emes atakam aesimesen. 38Era ipit arawa, “Yesus! Daut Wurpise! Seekot aoorporan!” Emes atakam aesimen. 39Era bonak ajares owerawa, era ipit ajatemotaeresen. “Atakam bas!” Emes atakam aesimesen. Era ipit ere, atakam daytinak aokoren. “Daut Wurpise! Seekotnak aoorporan!” Emes atakam aesimen. 40Yesus arawa, aseme, wanam owe era ipit abipu batoomtin atakam asakamtamen. Era ipit setep ambaromerawa, Yesus era ipit ajateporen. 41“Dere wore apa pak emtamtey?” Emes atakam aesimen. Era ipit arawa, “Tuhan! Debanamek bandimemomtaman.” Emes atakam aesimen. 42Yesus arawa, atakam era ipit aokoromen. “Me wobanamek bawareto. Wore Dera ambesemmanim. Erarawa wobanamek awaramemmarem.” Emes atakam aesimen. 43Emesare, era ipit banamek ametewaremen. Ararawa, Yesus ajamkaien. Are Allah tere aeomen. Era owe takesam era pak apores, are Allah tere aeomesen.

Currently Selected:

LUKAS 18: LAIASC

Highlight

Copy