YOHANES 21

Yesus, abajamkai owe poman ban jamnuk bipu ajateome atakam

1Emesare. Asep barerawa, Yesus, abajamkai owe bipu aoememe. Are daytu fo juas Tiberias jupima aememe. Ararawa, emes aeme: 2Simon Petrusam, Tomasam, Natanaelam, Sebedeus andep amnukam, wan Yesus bajamkai ipit amnukam, emes owe takan aemapes. (Tomas wan juas “Kapom Ipit”. Natanael, Galilea tapirmi kota juas Kana ipit.) 3Emesare, Simon Petrusam atakam era owe akorome. “Dere jimi bapie.” Emes atakam aesime. Me wan owerawa, “Danom dam.” Emes atakam aesimes. Emesare, are ti andaejuues. Are era eam ju ajiraoismap, enamo bopietii apoknak.

4Me jo bapuameskorom apok ere, Yesus fikin aememe. Abajamkai owe ere, are wan ipit jiraoemes. 5Yesusam atakam era owe akorome. “Tiparaise! Tare enamo apok apeno?” Emes atakam aesime. Era owerawa, “Emesare, dare enamo apoknak.” Emes atakam aesimes. 6Yesusam, “Era jimi bo poman ajiimpuumay. Tanom enamo ataatemakam.” Emes atakam aesime. Emesare, era owe era jimi ataesemes, wanam enamo tananenak ataaes. Erarawa are era jimi baemejiimtaa asan apok.

7Emesare, Yesus wan bajamkai ipit taka, daytu afaimomaarir. Era ipitam atakam Petrus akorome. “Are Tuhan.” Emes atakam aesime. Me, Simon Petrusam damo fie aememe. Erarawa are, “Are Tuhan,” emes atakam jane ajie, are pakaian ajiimome, wanam bwi asopuue. (Ararawa, fikin atiitejire.) 8Me wan Yesus bajamkai owe, ti era fikin setep emes aemeses. Era ti baemes, era fikin bajirite, are 100 meter apaye. Era oweam po ajies, wanam era jimi enamo aptam ametejiitaaes. Era enamo tananenak. Emesare, are fikin ajiriteses. 9Era oweam asokues, are jisimak tanam apores. Are enamo era jis aemape apores. Era asanam amos aemanse apores.

10Yesusam atakam era owe akorome. “De! Era japen ataerakam enamo, wan batoomkunaoay.” Emes atakam aesime. 11Simon Petrusam era ti asotemete. Are era jimi enamo aptam wasen ajiimomjose. Daytu enamo 150 era jimi bomon ajukese. Enamo ere tananenak. Me, era jimi basesakam apoknak. 12Yesusam atakam era owe akorome. “Tanom de! Amos banda.” Emes atakam aesime. Me Yesus bajamkai oweam, era aememe ipit, Tuhan apores. Erarawa are, “Wore ta ipitim?” emes baemejatepor asan apok. 13Emesare, Yesus era owepu ambareme. Ararawa, era amos ataere, wanam era owe atetamtetere. Era enamoam emes tamen aeme. 14Emesare, bonak ere, Yesus dambir ateme, wanam Allah Yesus ajaoromwasumtume. Ararawa, abajamkai owe bipu aojateoma ajaie. Era bare, Are era jupima aememe ere, era owe bipu bare bamintep ajateome arare.

Yesus anama Petrus atakam

15Emesare, era owe amos andes. Amos andes arawa, Yesus Simon Petrus ajatepore. “Simon! Wore Yohanes andep. Wore Dera bafaim daytu emes, wanam ara aemapes owe Dera bafaim kope emes, emes apaye?” Emes atakam aesime. Me Petrus arawa, “Ijee! Tuhan, wonom womsam. Dere Wora afaimemin.” Emes atakam aesime. Yesusam, “Emesare, wonom dedomba jii ajuumtamaaran.” Emes atakam aesime. 16Yesus arawa, atakam Petrus aokorome. “Simon! Wore Yohanes andep. Wore Dera bafaim ape?” Emes atakam aesime. Me Petrus arawa, “Ijee! Tuhan, Wonom womsam. Dere Wora afaimemin.” Emes atakam aesime. Yesusam, “Emesare, dedomba ajuumtamaaran.” Emes atakam aesime. 17Yesus arawa, Petrus bare bamintep ajatepore. “Simon! Wore Yohanes andep. Wore Dera bafaim ape?” Emes atakam aesime. Emesare, Petrus, Yesus bare bamintep ara ajatepore apore. Erarawa jak pota aememe. Armat ipitam, “Tuhan! Wonom womsam takes. Dere Wora afaimemin. Wore emes womsam.” Emes atakam aesime. Yesusam, “Emesare, dedomba ajuumtamaaran. 18Atakamnak, wore ai ipit aememem, wore pakaian womba ajiimoma ajaiem. Wanam, era akot aporempu ajara ajaiem. Me, wore paytu aememtem, wonom sep ajiraomamestemarem. Oweam, wore banam ajikitiitemanis. Anom era pota aportempu atomastemanis.” Emes atakam aesime. 19Yesus emes atakam akore ere, are Petrus dambir atemto pak atakam akore. Me Petrus dambir atemto pak, Allah akotnak, emes baporomtam pak are. Emesare, Yesusam atakam armat ipit aokorome. “Dera jamkaiaaran.” Emes atakam aesime.

Yesus anama wan bajamkai ipit atakam

20Petrusam, bimin awaie. Are wan Yesus bajamkai ipit, afe asaramome apore. Are Yesus daytu afaimaarir ipit are. (Bonak ere, Yesusam, abajamkai oweam, amos takan andes. Era ipitam Yesus setep asisiape, wanam Armat Ipit ajatepore. “Tuhan! Wore jokoman owe aotasimemomtamtan ipit tanam?” Emes atakam aesime.) 21Emesare, Petrus era ipit apore ere, are Yesus ajatepore. “Tuhan! Ara aemema ipit wama tamenem?” Emes atakam aesime. 22Yesus arawa, “Asep bare Dere aofasitemin. Dere ara aemema ipit era bare ajiire jatiaptam baemem akot aportey apaye, ere wopak apok. Ere depak. Wore ere, Dera jamkaiaaran.” Emes atakam aesime. 23Emes atakam jane ajies owe, era atakam wan oweam aokoretames. Erarawa Yesus bajamkai owe tanane atakam jane ajies. “Era Yesus bajamkai ipit taka dambir baem apok aemtem.” Emes atakam jane ajies. Yesus ere, era ipit dambir baem apok, emes atakam apok. Are, “Asep bare dere aofasitemin. Dere ara aemema ipit era bare ajiire jatiaptam baemem akot aportey apaye, ere wopak apok. Ere depak.” Emes atakam taka aesime.

24Era Yesus bajamkai ipit, ere era pak takes ateman atame ipit are. Are era pak takes buku aeapome ipit are. Emesare, danom aateman atamar, ere atakamnak apormarom.

Asep atakam

25Emesare. Yesus wan pak tananenak aemaarir. Owe, Yesus aemaarir pak takes aeapomtas apaye, buku tananenak aeapomtemas. Debimak binip ere, ara aemansa tapirmi, ere kope. Erarawa ara aemansa tapirmi emes buku tananenak bataapom asan, ere apok.

Currently Selected:

YOHANES 21: LAIASC

Highlight

Copy