YOHANES 11

Lasarus dambir aeme atakam

1Emesare. Owe juas Lasarus damo ajaue. Are kota Betania ipit. Era kota, Mariaam, arpit juas Martaam, akota. 2Bonak ere, Maria, pinim akot pak, Tuhan bai aokomdaeme. Wanam armat taot afini, Yesus bai ajiime. Me Maria, era damo ajaue ipit juas Lasarus, arosan. 3Emesare, era arosan amnuk owe Yesuspu ambirimemomemis. “ ‘Tuhan! Afaimemmarem ipit damo daytinak aemanse,’ emes atakam aesimtamay.” Emes atakam aesimemis.

4Emesare, Yesus emes atakam jane ajie ere, Are atakam akore. “Lasarus damo aemanse, are dambir apok. Era owe Allah aakotipit aememe baporomtam pak. Erarawa, owe Allah Andepam aakotipit aememe aportemas.” Emes atakam aesime. 5Emesare, Yesus Martaam, era armasiam, Lasarusam, afaimome. 6Me, Armat Ipit Lasarus damo aemanse atakam jane ajie, Are bare jamnuk aoememe. 7Bare jamnuk aememerawa, atakam abajamkai owe akorome. “De! Yudea tapirmi oesosamo.” Emes atakam aesime.

8Me abajamkai owerawa, “Guru! Japen ere, Yahudi owe, eka Wora basampirim aemenis. Worarawa, era asan apa oesostem?” Emes atakam aesimes. 9Yesusam, “Bare taka, ere jam 12. Owe jok ajartas apaye, are ara aemansa tapirmi sare aportemas. Ararawa abaimbi bawotem apok aemtemas. 10Me, eam ere, sare apok. Erarawa owe eam ajartas apaye, pak abaimbi awotemtemas.” Emes atakam aesime. 11Wanam Yesus wan atakam akorome. “Me dajoo ipit juas Lasarus, ere ise emeputamse. Dere ere, armat ipit bajitin aesostemin.” Emes atakam aesime.

12Me Yesus bajamkai owerawa, “Tuhan! Armat ipit ise aputamse apaye, are amba awasitem.” Emes atakam aesimes. 13Emesare, Yesus, Lasarus dambir aeme atakam akorome. Me, armat owe, Yesus, Lasarus bambi ise putames atakam korejiraoemes. 14Yesus arawa, atakam baso era owe akorome. “Lasarus, ere dambir emeeme. 15Dere era asan akan bajakos apok aemo ere, era pak tare eemnak dera bamesemkorom are. Erarawa Dere era asan baemem apok aemo, jak akot aememmin. De! Dare Lasarus era asan aesosamo.” Emes atakam aesime. 16Tomas, atakam wan Yesus bajamkai owe akorome. “Danom ajamesosamo. Danom Armat Ipit dambir takan bajameem.” Emes atakam aesime. (Emesare, Tomas wan juas Kapom Ipit.)

Yesus, owe bajaoromwasumtumtam ipit atakam

17Emesare, Yesus era asan ambareme, Lasarus dambir ipit, era dambir asan bomon bare eak taka apok ememanse. Yesusam emes apore. 18Yerusalem tapirmi baemem, wanam Baitania tapirmi ajiire bajarem, are kilometer bamintep. 19Yahudi owe tanane Marta anama Maria ambaromes. Are era ajoo ipit dambir aeme atakam jane ajies, wanam are jak akot era taot amnuk baemapom ambaromes. 20Me Martaam Yesus atasereme atakam jane ajie, are Armat Ipit bimnuk baemamtaer ajise. Me Maria ere, era tame bomon aape. 21Emesare, Marta atakam Yesus akorome. “Tuhan! Wore ara asan aemem ere, dereot dambir baem apok. 22Me, Allah, era ajanimmarem atakam, Wora atetamtan apormin.” Emes atakam aesime. 23Yesusam atakam era taot akorome. “Woreot ajaorwasittem.” Emes atakam aesime. 24Me Martarawa, “Ju Ajiirenak aemamesto dambir owe takes ajaorwasittas, armat ipitam ajaorwasittem. Dere emes demsam.” Emes atakam aesime. 25Yesusam, “Dere owe bajaoromwasumtumtam Ipit ara aememey. Denom jiinenak batetam Ipit ara aememey. Me eemnak Dera ambesemkorommanis owe dambir aemtas, anom jiinenak aememaartemas. 26Me eemnak Dera ambesemkorommanis jatiaptam owe, dambir apoknak aemtemas. Wore ara atakam eemnak bamesemkorom ape?” Emes atakam aesime. 27Me Martarawa, “Tuhan! Wore Allah Aeremtaere Ipit, Worare. Wore Allah Andep, Worare. Wore ara aemansa tapirmi bandaeap banamek apeapaarum Ipit, Worare. Dere emes atakam eemnak ambesemkorommin.” Emes atakam aesime.

Yesus bate ambate atakam

28Me armat taot emes atakam aesimerawa, are armasi juas Maria bajate aesose. Are Maria tiruu atakam akorome. “Guru aemeta. Wora ajateman.” Emes atakam aesime. 29Me Maria emes atakam jane ajie, are ametewasite. Are Yesus bipu ambareme. 30Me Yesusam era tamsan bajarem apok. Are tamepem aemape. Are Marta bimnuk aemamtaeres asan taka are. 31Emesare, Yahudi oweam Maria era tame bomon takan aemapes. Are jak akot armat taot baemapom aemapes. Are Maria ametewasite apores. Are armat taot atame ajise apores. Ararawa, afwe asarames. Are Maria era dambir asan bate bamat aesos jiraoemes. 32Me armat taot ere, Yesus aemape asan ambareme. Are Yesus bi apore. Are Yesus bi aporerawa, abipu bi fop andaejiape. “Tuhan! Wore ara asan aemem ere, derepot dambir baem apok.” Emes atakam aesime. 33Me armat taotam bate ambate. Era ajamjares Yahudi oweam bate ambates. Yesusam era owe bate ambates apore. Erarawa are jak pota daytinak aememe. 34Atakamam akorome. “Tare Lasarus dambir ipit ete asana jiitaetiiekem?” Emes atakam aesime. Era owerawa, “Tuhan! Wonom de, baporey.” Emes atakam aesimes. 35Emesare, Yesus bate ambate. 36Me Yahudi oweam atakam akores. “Baporay! Armat Ipit Lasarus daytinak afaime.” Emes atakam aesimes. 37Me wan Yahudi owe ere, “Armat Ipit era banamek kapie ipit banamek awaramemome. Emesare, joon Lasarus damo daytinak ajaue. Yesus ere, Lasarus baoromtaer fiak pak aemomeme apaye. Are Lasarus bajaoromtaer ere, Lasarus dambir baem apok.” Emes atakam aesimes.

Lasarus ajaorwasite atakam

38Emesare, Yesus jak pota daytinak aoememe, wanam era dambir asanpu ambareme. Era dambir asan, eka jipa. Bonak ere, owe, eka pwe daytu era jipa iim emekapimapomes. 39Yesusam atakam akorome. “Era eka pwe baparamosomay.” Emes atakam aesime. Me dambir aeme ipit arpit juas Marta ere, atakam Yesus akorome. “Tuhan! Lasarus ere, dambir bare eak taka apok aemanse. Erarawa are ofa pinim daytinak.” Emes atakam aesime. 40Yesus arawa, “Dere atakam wore emekoromo. ‘Wore Allah ambesemtem, wore Allah afiaknak pak aportemarem.’ ” Emes atakam aesime.

41Erarawa, era owe era eka pwe aparamosomes. Yesus arawa, banamek oup apemtemeteme, wanam atakam akorome. “Dot! Wore dokoremin atakam jane ajimarem. Terima kasih 42Wore deatakam takes jane ajiaaremarem. Dere emes demsam. Me, Dere ara aememares owe tanane apormin. Erarawa Dere ara atakam Wora akorommin. Ere ara owe, Wore Dera ataendaemenim baporomtam are. Era owe emes bamasemtas.” Emes atakam aesime. 43Are emes atakam akorerawa, atakam daytu afaketaere. “Lasarus! Ajisey!” Emes atakam aesime. 44Emesare, dambir aeme ipit ajise. Bonak ere, owe era dambir ipit, ban anama bai, biam, pitini biramo ajikitiies. Ajiserawa, are era pitini aptam ajise. Yesus arawa, atakam era asan aememes owe akorome. “Era pitini biramo basurumay. Armat ipit asan akot atame baesosto.” Emes atakam aesime.

Owe Yesus batatii akukuramtiies atakam

(Mat. 26:1-5; Mrk. 14:1-2; Luk. 22:1-2)

45Yahudi owe tanane Maria ambarpores. Are Yesus era aeme pak apores, ararawa Armat Ipit eemnak ambesemkoromes. 46Me wan Yahudi owe ere, Parisi owe ambaromes, wanam Yesus aeme pak atakam era owe aesimtames. 47Erarawa, Allah Tame pak baem owe daytu anama Parisi owe, Yahudi Agama Atakam Basakamtii Owe bajarisiap, atakam ajanimes. Are atakam era owe akoromes. “Yesus jinim bae pak tanane aemum. Dare ere, apa pak emtam? 48Dare era Ipit bambi aporomemtam, owe takes era Ipit taka besemtemas. Roma samane oweam ajinaotemas. Are daAllah Tame andanaesumtiikoromtemas. Anom, dasaman owe, atatiitetertemas.” Emes atakam aesimes.

49Wan ipit taka juas Kayafas. Era tahun, are Allah Tame pak baem ipit daytu aememe. Armat ipit atakam era owe akorome. “Tanom tamsam apoknak. 50Jipit taka, ara owe takes dambir batemtam apaye, wanam dasaman owe takes dambir batem apok apaye, ere akotnak. Era pak, asan akot tara baemtam pak. Me, tare emes tamsam apok.” Emes atakam aesime. 51Era akore atakam, ere apa atakam apok. Me, era tahun are Allah Tame pak baem ipit daytu aememe. Erarawa are Yesus, Yahudi saman owe, atemtamto dambir, atakam akore. 52Yesus atemtamto dambir, Yahudi saman pak taka apok. Allah, era samaniin samaniin owe, arereis baemem akoten. Anom arereis takes, owe samane taka bajarisimapom akoten. Yesus atemtamto dambiram, emes baem pak. Emesare, Kayafas era pak atakamam akorome. 53Erarawa, era bare ajiire, Yahudi owe Yesus batatii atakam akukuramtiies.

54Erarawa, Yesus Yahudi owe tapirmi baso bojar apok aeme. Are era tapirmi beken ajiose, wanam kota juas Efraim ambareme. Ere era tame apok tapirmi setep. Era asan, Armat Ipit abajamkai owe takan aemapes.

55Emesare, Yahudi pakambwi juas Paskah Pakambwi setep asisiamse. Era samaniin samaniin owe tanane, era pakambwi bare setep apores. Ararawa, era pota pak aemteteres baeosom, Yerusalem aesoses. Era pak Yahudi agama tarai pak tai jipu. 56Era oweam Yesus andimarpores. Are Allah Tame bomon aememes, wanam atakam ajamkorames. “Tare wama bimak binip tetarammakam? Armat Ipit ara pakambwi bajameem apok apeno.” Emes atakam aesimes. 57Bonak ere, Allah Tame pak baem owe daytuam, Parisi oweam, atakam etesakamtames. “Owe, Yesus aememto asanpu aportas, atakam dara boesimtamtaroas. Dare era Ipit bajipirtaer.” Emes atakam aesimes.

Currently Selected:

YOHANES 11: LAIASC

Highlight

Copy