YOHANES 1

Yohanes

Aeapome Allah Akot Atakam Owe juas “Atakam,” jiinenak, owe batetamteter Ipit atakam

1Owe juas “Atakam” aememe. Bonaknak, Allah, tapirmi bakenemtii apok ere, era owe juas “Atakam” taemema ememaaririn. Era “Atakam”, Allah takan aemapaarisin. Era “Atakam”, Allah aren. 2Bonaknak ere, era “Atakam,” Allah takan aemapaarisin. 3Era “Atakam,” pakiin pakiin takes akenemapomen. Era pak ji amba baereap apoknak. 4Era “Atakam,” jiinenak, owe batetamteter Ipit eraren. Era jiinenak aemomemmas owe, bimak binip baso atetaramemas. Are sare damon ajaremas. 5Era sare jiiti asan asaramtiim. Era jiiti ere, era sare baemesapimapom asan apok.

6Emesare, Allah jipit taka ambirimemome. Era ipit juas Yohanes. 7Era ipit era sare atakam bakoretam ajinaoe. Are owe takes era atakam jane bajie, wanam era atakam eemnak bamesemkorom, ajinaoe. 8Yohanes, era sare basaramapom Ipit apok. Me, are era sare basaramapom Ipit atakam bakoretam ajinaoe. 9Era sare basaramapom Ipit, ere anakot. Are ara aemansa tapirmi andae. Are owe takes asaramapomum.

10Armat Ipit ara aemansa tapirmi aemapaarir. Are ara tapirmi akenemtiie. Me, ara tapirmi owe Armat Ipit amsam apok aemapes. 11Armat Ipit asamane ambareme. Me, ajoo owe Armat Ipit bataet apok aemes. 12Me wan owe ere, Armat Ipit ataetes. Are Armat Ipit eemnak ambesemkoromes. Armat Ipit arawa, era owe, Allah arereis ataemome. 13Era owe Allah arereis aememes ere, are asamot jii tamen bajisames apok. Aritipit, ere asamot ipit apok. Aritipit ere Allah.

14Me “Atakam” asamot ipit ajaoreme. Are da takan ajamememero. Danom aakotipitnak aememe aporom. Era akotipitnak aememe, Aritipit Andep takakope atetame akotipitnak aememe are. Emesare dare Allah dara afaimero aporom.

15Yohanesam era Ipit atakam afaketaae. “Era atakam akoretamaaru Ipit aemeta. Era akoretamaaru atakamam, ‘Armat Ipit defe asep andaetem. Me, dere bajisames apok aemo, Armat Ipit bonak taemema ememaaririn. Erarawa Armat Ipit juas aptam ipit. Dere ere, juas apok ipit.’ Emes atakam akoreaaru.” Yohanes emes atakam aesime.

16Emesare, era “Atakam,” daytinak dara afaimomaarir. Are asan akotnak dara atetamaarir. 17Emesare, Allah abasakamtam atakam Musa atetamen. Musarawa, era basakamtam atakam wan owe aotetamen. Me, Allah Yesus Kristus ambirimemome. Armat Ipit ere, Allah asan akotam, aatakammakam aporomtamero. 18Oweam Allah bi baemepor asan apoknak. Me Andep takakope, ere Allah takan aemapa. Armat Ipitam Allah bi baso aporomtamkoromero.

Yohanes Owe Bwi Bakupimtaer Ipit akoretame atakam

(Mat. 3:1-12; Mrk. 1:1-8; Luk. 3:1-18)

19,20Emesare, Yerusalem Yahudi owe, Allah Tame pak baem oweam, Lewi saman oweam, Yohanespu ambirimemomes. “Yohanes ta ipitmaye?” Emes bajatepor ambirimemomes. Yohanes arawa, atakam basonak akorome. “Dere Allah Aeremtaere Ipit apok.” Emes atakam aesime. 21Era oweam aojatepores. “Wore ere, ta ipitim? Bonaknak ere, Allah atakam bakoretam ipit juas Elia aememen. Wore Elia ape?” Emes atakam aesimes. Yohanes arawa, “Denom Elia apok.” Emes atakam aesime. Era oweam, “Wore Allah Ambirimemomto Atakam Bakoretam Ipitkor ape?” Emes atakam aesimes. Yohanes ere, “Denom era ipit apok.” Emes atakam aesime. 22Era owerawa, “Wore ere, ta ipitim? Wore apa pak ememmarem? Dare era ambirimaroas owe emes atakam bokore.” Emes atakam aesimes. 23Armat ipit arawa, “Dere tame apok asan atakam bafaketaa ipit. ‘Tuhan andaetem. Tare Armat Ipit ajarto bokotpu imtuu akenemtiiay.’ Emes atakam aesimmin.” Yohanes emes atakam aesime. Emesare, era atakam, bonaknak aemaarir Allah atakam bakoretam ipit juas Yesaya, era akoretame atakam jipu. 24Emesare, Yohanes ajinaomes owe Parisi owe ambirimes owe are. 25Are armat ipit ajatepores. “Wore Allah Aeremtaere Ipit apok apaye, wore Eliam apok apaye, wore Allah Ambirimomem Atakam Bakoretam Ipitam apok apaye, wore owe bwi akupimtaermarem wama tamenem?” Emes atakam aesimes. 26Yohanes arawa, “Dere owe bwi akupimtaermin. Me, ara aememtakam owe bomon ere, jipit taka aemeta. Tanom era Ipit tamsam apok. 27Are defe asaramtan Ipit are. Are juas aptamnak Ipit. Dere ere, juas apok ipit. Erarawa dere asendal dem baemesurumtam asan apok.” Emes atakam aesime. 28Emesare, era pak takes Betania tapirmi aemes. Era tapirmi Yordan ju poman are. Ere Yohanes owe bwi akupimtaere asan are.

Allah Domba Jii atakam

29Ajoferawa, Yesus Yohanespu ambareme. Yohanesam Armat Ipit apore. Ararawa, “Baporay! Era ambarommar Ipit, Allah Domba Jii! Are asamot dosa bimak binip bajanimemtam Ipit. 30Era atakam akoreaaru Ipit ara emema. Era akoreaaru atakamam, ‘Armat Ipit defe asep andaetem. Me, dere bajisames apok aemo, Armat Ipit bonak taemema eme. Emesare era Ipit juas aptamnak Ipit. Dere ere, juas apok ipit.’ Emes atakam aesimaaru. 31Denom era Ipit demsam apok aememo. Dere ere, ajinao. Denom owe bwi akupimtaero. Era pak ere, Israel owe era Ipit amsam baporemap are.” Yohanes emes atakam aesime.

32Emesare, Yohanes atakam akore. “Dere Allah Jip, wonamo oup aendae aporo. Are pari bapindae tamen, Armat Ipit damo ten andaeape. Are emes atamemape. 33Denom era Ipit demsam apok aememo. Me, era owe bwi bakupimtaer ataejinaomen Allah, atakam dera aesimtamen. ‘Wore Allah Jip, jipit taka damo ten bandaeap aportemarem. Emesare, era Ipit Allah Jip, asamot owe akupimtamtem.’ Emes atakam aesimen. 34Emesare, denom era pak emeporo. Denom atakam emekoromo. ‘Armat Ipit Allah Andep.’ Emes atakam aesimo.” Yohanes emes atakam aesime.

Yesus bonak ajamkaies owe atakam

35Emesare. Ajofe ere, Yohanesam, abajamkai ipit amnukam, aememes. 36Yohanes Yesus era asan aokorefejinaoe apore, are atakam akore. “Baporay! Ara aemema Ipit, Allah Domba Jii.” Emes atakam aesime. 37Abajamkai ipit amnuk era akore atakam jane ajiemis. Ararawa, Yesus ajamkaiemis. 38Yesusam asep banep aoorpore, wanam era ipit amnuk ara asaramomemis apore. Ararawa, ajatepore. “Tare apa dimarmakam?” Emes atakam aesime. Era ipit amnuk arawa, “Rabi! Wore ta tame jamememem?” Emes atakam aesimemis. (“Rabi,” daatakam jow bauumtaer “Guru”.) 39Armat Ipit arawa, “De! Tanom baporami!” Emes atakam aesime. Era ipit amnuk arawa, takan aesoses. Are Armat Ipit aememe asan aporemis. Ere poro jam 4 apaye. Are era bare Armat Ipit takan aemapemis. 40Emesare. Jipit amnuk Yohanes atakam jane ajiemis, wanam Yesus ajamkaiemis. Me wan ipit taka juas Andreas. Are Simon Petrus areot. 41Armat Ipit arepot juas Simon ametedimartaere. “Dare Allah Aeremtaere Ipit andimartaerom.” Emes atakam aesime. (Me “Allah Aeremtaere Ipit,” wan juas “Kristus”.) 42Are Simon, Yesuspu atoomtine. Yesus arawa, Simon banamek apemjateme, wanam. “Wore Simon, Yuna andep. Me, wojuas Kefas aemin.” Emes atakam aesime. (Me Yunani atakam ere, juas “Petrus”. Me daatakam jow bauumtaer, juas “Eka”.)

Yesus Filipus anama Natanael ajate atakam

43Emesare. Ajofe ere, Yesus Galilea tapirmi baesos atakam asakamtiie. Are Filipus andimartaere, wanam atakam armat ipit akorome. “Dera jamkaian!” Emes atakam aesime. 44Filipus kota Betsaida ipit. Andreas anama Petrus, kota Betsaida ipit amnuk. 45Filipus arawa, Natanael andimartaere, wanam atakam armat ipit akorome. “Me Musa, jipit taka atakam, Musa Basakamtam Atakam buku bomon aeapomen. Allah atakam bakoretam oweam, era Ipit atakam, buku aeapomesen. Emesare. Danom era Ipit andimartaerom. Ere Nasaret ipit juas Yusuf andep. Ajuas Yesus.” Emes atakam aesime. 46Me Natanael ere, “Era akot pak Nasaret aeejinaotem are?” Emes atakam aesime. Filipus arawa, “De! Baporey!” Emes atakam aesime. 47Emesare, Yesus Natanael andae apore, wanam atakam akore. “Baporay! Ara ipit Israel ipit anakot. Are turunak ipit.” Emes atakam aesime. 48Me Natanael arawa, “Debi womsam wama tamenem?” Emes atakam aesime. Yesusam, “Filipus wora bajate apok aeman, Denom wore era wus juas “ara” bapan aemaparem aporey.” Emes atakam aesime. 49Me Natanael arawa, “Guru! Wore Allah Andep! Wore Israel owe araja Ipit.” Emes atakam aesime. 50Me Yesusam, “Dere atakam wora akorommin, ‘Dere wore era ara wus bapan aemaparem aporey,’ emes atakam aesimey. Wore emes atakam apormarem, wanam Dera ambesemmanim apaye? Era akoromey atakam ere, jinim bae pak, kope tamen. Asep bare wonom daytu pak aoportemarem.” Emes atakam aesime. 51Yesus arawa, wan atakamam akorome “Atakamnak, tare wonamo oup ambuapto aportemakam. Tararawa, Allah malaikat owe, Asamot Anakot Ajaoreme Ipitpu, bap jow auundaea, oup jow aotemeta, emes aemtas aportemakam.” Yesus emes atakam aesime.

Currently Selected:

YOHANES 1: LAIASC

Highlight

Copy