AEMAARIS PAK 22

1“Duturua! Biitia! Aykuna! Atep tara ajitmin atakam, jane pajiay.” Emes atakam aesime. 2Era owe, Paulus, Ibrani atakam apores, wanam atakam apoknak aememes. Paulus arawa, atakam akore.

3“Dere Yahudi ipit. Dere Kilikia tapirmi kota juas Tarsus ajisamso, wanam sira ara aemansa kota bomon awotemo. Gamaliel ere darfais basakamtam atakam dera aememtamkoromaarin. Denom Allah Karai fiak baetam, akot aemaaru. Era pak waa aemapmakam owe aemmakam pak awarnak. 4Denom ara aemanse agama bajamkai owe ajurusumaaru. Denom era owe atatiia ajiaaru. Dere ooreyam, tapesam, banam ajikapoma ajiaaru, wanam buji tame bomon ajitaapoma ajiaaru. 5Allah Tame pak baem owe daytuam, atakam basakamtii owe duturuam, emes amsam. Era owe, kota Damsyik Yahudi owe batetam surat aetamenis. Derarawa, ara aemanse agama owe banam bajikapom, wanam Yerusalem bajurusum batuomas, Damsik aesoso.”

Paulus, Yesus eemnak ambesemkorome atakam

6“Aemjaro. Aemjaro. Emesare, denom Damsyik setep ambaremo, wanam jok ere, wonamo oup sare daytinak dedamopu ametesaramdaeme. 7Dere bap andaebuanso, wanam atakam jane ajio. ‘Saulus! Saulus! Apa jurusummanem?’ Emes atakam jane ajio. 8Derarawa, atep ajito. ‘Wore tanam?’ Emes atakam aesimo. Armat Ipit arawa, atakam akoromen. ‘Dere Nasaret Ipit juas Yesus. Dere era ajurusumemmanim Ipit Derare.’ Emes atakam aesime. 9Me takan ajamememenis owe, era sare apores. Are era Ipit akoromen atakam ere, jane bajie apok. 10Derarawa, ‘Tuhan! Dere apa pak emtey?’ Emes atakam aesimo. Tuhan arawa, ‘Bawasitey! Damsyik aesosey. Allah, era aemtem pak takes, atakam emesakamtiie. Era asan ere, wore emes atakam jane ajitemarem.’ Emes atakam aesime. 11Era sare ere, daytinak. Erarawa dere banamek pete aememo. Me takan aemomenis owerawa, ban akemomasenis. Erarawa dere Damsyik ambaremo.

12Era asan ere, Musa Basakamtam Atakam bajamkai fiak ipit juas Ananias aemape. Me era asan aemapes Yahudi owe takesam, armat ipit asitimes. 13Armat ipitam setep ambaromen, wanam atakam akoromen. ‘Saulus! Dejoo ipit akot! Baporey.’ Emes atakam aesimen. Derarawa, armat ipit bi aporo. 14Armat ipit arawa, ‘Darfais aAllah, wore abimak binip akukuretiie, emes atakam baporkorom akoten. Are, wore, Yesus, aAtakam Ji Turunak Ipit, bi bapor akoten. Are wora Yesus aokone atakam jane bajie akoten. Are wore emes baem aeremtaeren. 15Wore era aporem pakam, era jane ajiem pakam, owe takes ateman atamtemarem. 16Wore apa pak emaparem? Bawasitey! Owe bwi wora bakupimtaertanis. Wore Tuhan ajatey. Ere Tuhan wodosa bakokoromosomtam are.’” Emes atakam aesimen.

Tuhan, Paulus, Yesus Akot Atakam, Yahudi apok saman bakoretam, asakamtame atakam

17“Emesare. Denom Yerusalem aofasio. Dere Allah Tame bomon atakam Allah ajanimo, wanam pak bambi aporo. 18Dere Tuhan aporo. Armat Ipitam atakam akoromen. ‘Wore fefar! Yerusalem beken ametejiosey. Ara aemapes owe ere deateman atamtamemmarem atakam jane bajie potan.’ Emes atakam aesime. 19Derarawa, ‘Tuhan! Dere Yahudi owe samayen tame tanane ajiiaaru, wanam eemnak Wora bamesemkorom owe, buji tame bomon ajitaapoma ajiaaru. Denom era owe wusup ata ajiaaru. Ara aemapes owe emes amsam. 20Owe, woateman ipit juas Stefanus atatiies, denom emes akot ajio. Denom armat ipit atatiies owe apakaian, banamek ataitamo.’ Emes atakam aesimo. 21Tuhanam atakam akoromen. ‘Te! Dere wore setep apok Yahudi apok samanpu ambirimemomtemin.’ Emes atakam aesime.” Paulus emes atakam akore. 22Emesare. Era owe tanane Paulus atakam takes jane ajies. Erarawa, are Yahudi apok samanpu baesos atakam akore, ara owe tanane atakam afaketaaes. “Aememe Ipit batatiiay! Emes ipit jatiaptam boemem bas!” Emes atakam aesimes. 23Are atakam daytinak afaketaaes. Are apakaian apatapipimteteres. Are jimit porsa oup apatakumtemetemes. 24Tentara kapar ipit arawa, Paulus tentara tame bomon atoomjiie. Armat ipit Yahudi owe jokoman atakam daytinak Paulus akoromes apore. Erarawa are atentara owe Paulus wusup bata atakam asakamtame. Me Paulus, era apota pak aeme, baoorpor are. 25Are Paulus banam ajikapomes. Paulus arawa, atakam setep aememe komandan ipit akorome. “Dere Roma ipit. Oweam dere jokoman apaye, jokoman apok apaye, emes batakamoorpor apok. Emesare tare wusup dera bata, pemerintah basakamtam atakam jipu ape?” Emes atakam aesime. 26Era komandan ipit emes atakam jane ajie, are tentara kapar ipitpu aombarome. “Wore apa pak emtem? Ara aemema ipit Roma ipit.” Emes atakam aesime. 27Kapar ipit arawa, Paulus ambarome, wanam atakam akorome. “Atakam baesimtaman. Wore Roma ipit ape?” Emes atakam aesime. Paulus arawa, “Dere Roma ipit.” Emes atakam aesime. 28Kapar ipit arawa, “Dere uang daytinak Roma pemerintah atetamo, wanam Roma ipit aememo.” Emes atakam aesime. Paulus arawa, “Dere ere, Roma ajisamso.” Emes atakam aesime. 29Me Paulus baoorpor aememes owe emes apores, wanam ameteotasiemes. Kapar ipitam, Paulus Roma ipit apore, wanam ombare aememe. Are Paulus rantai banam emejikapome apore.

Paulus, Yahudi Agama Atakam Basakamtii Owe bipu aememe atakam

30Emesare. Ajofe ere, are Paulus asurume. Are Yahudi owe, Paulus jaos ipit, emes atakam akores atakam, jane bajiekorom aren. Erarawa are Allah Tame pak baem owe daytuam, Yahudi Agama Atakam Basakamtii Oweam, bajarisiap atakam asakamtame. Ararawa, Paulus era owe bipu ataeme.

Currently Selected:

AEMAARIS PAK 22: LAIASC

Highlight

Copy