AEMAARIS PAK 15

Owe Yerusalem ajarisiapes atakam

1Emesare. Yudea tapirmi owe era Antiokia ambaremesen. Are atakam era Yesus bajamkai owe aememtames. “Bonaknak ere, Musa tamane pitini basakamosom pak tai ataetiitamen. Owe tamane pitini basakamosom apok aemtan, Allah tara bajortaer apok.” Emes atakam aesimesen. 2Paulus anama Barnabas ere, era owe atakam daytinak ajamkoramesen. Era Yesus bajamkai owerawa, atakam asakamtiiesen. Are Paulusam, Barnabasam, me wan oweam, Yerusalem baesos, wanam era Yesus atakam bakoretam bamirimemom oweam, era Yesus basitim bajarisiap armat baemem oweam, era tamane pitini basakamosom Yahudi pak tai bajatepor, emes atakam asakamtiiesen.

3Emesare, Yesus basitim bajarisiap owe era owe ambirimemomesen. Era waut, are Fenisia tapirmiam, Samaria tapirmiam, aofeosesen. Era asanam, are era Yahudi apok saman Allah ajamkaies atakam era owe akoromesen. Erarawa are, Yesus bajamkai owe, jak akotnak aemapomesen. 4Emesare, are Yerusalem ambaremesen. Era Yesus basitim bajarisiap oweam, era Yesus atakam bakoretam bamirimemom oweam, era Yesus basitim bajarisiap armat baemem oweam, era owe atoomjiiesen. Era owerawa, Allah aeme pak takes, atakam akoresen. 5Me, wan Yesus eemnak ambesemkoromes Parisi owe awasites, wanam atakam akoresen. “Yesus eemnak bamesemkorom Yahudi apok saman owe tamane pitini basakamosomtas. Era pak baem ere, Musa Basakamtam Atakam jipu erare.” Emes atakam aesimesen.

6Yesus atakam bakoretam bamirimemom oweam, Yesus basitim bajarisiap armat baemem oweam, era pak atakam basakamtii ajarisiapesen. 7Are atakam jirao ajamkoramesen. Atakam jirao ajamkorames arawa, Petrus awasite, wanam atakam akoren. “Dejoo owe akot! Bonak ere, Allah dere tawaut aeremtaeren. Are Yesus Akot Atakam Yahudi apok saman bakoretam aeremtaeren. Ere, era oweam Yesus bamesem are. Tare emes tamsam. 8Emesare, Allah owe ajak bomon pak takes amsam. Are era Yahudi apok saman oweam ataate. Are emes pak aporomtame. Emesare Are aJip era oweam atetame. Are aJip dara atetamero emes tamen are. 9Me, ‘Era Yahudi saman apas. Me Yahudi apok saman apas,’ emes bajie apok. Era oweam Yesus ambesemes. Emesare Allah era owe jak bomon dosa bimak binip ajanimemtame. 10Emesare, tare Allah baempor aemmakam, wama tamenem? Tare wuturu pak ara Yesus bajamkai owe saia ten ataetiimakam. Me, tanom, tarfaisomaram, era pak baemetaer asan apok. 11Tuhan Yesus dare bambi ajortaermaro. Are era oweam bambi emes ajortaertem. Dare emes atakam eemnak ambesemkorommarom.” Petrus emes atakam aesimen.

12Emesare. Era owe tanane takes atakam apoknak aemapesen. Barnabas anama Paulus, Allah aeme pak, atakam era owe akoromemisen. Bonak ere, Allah afiak pak era ipit amnuk atetamen. Erarawa are jinim bae pak era Yahudi apok saman bipu aememisen. Are emes atakam era ajarisiapes owe akoromemisen. 13Era ipit amnuk emes atakam akorekoromemis arawa, Yakobusam atakam akoren. “Dejoo owe akot! De atakam jane pajiay. 14Allah era Yahudi apok saman bajom apok aeme. Are wan Yahudi apok owe, abajamkai owe baemem aereremartaae. Simonam era atakam akorear. 15Era bonaknak Allah atakam bakoretam oweam, emes atakam taka aeapomes:

16‘Tuhanam,’ Owe era pak aemkoromtas, aofasitemin. Dere Daut andaepupuamse tame aoeapomtemin.

‘Dere era danais tame aoeapomtemin. Dere era tame aotaakenemapomtemin.

17Emesare era wan owe takes Tuhan andimartemas. Me deowe baemem ajateo Yahudi apok saman owe are.’

18Tuhan emes atakam akorem. Are tarainak emes atakam akoreaarir.”

Me bonaknak Allah atakam bakoretam owe emes atakam aeapomesen.

19“Emesare, wan Yahudi apok saman owe, bimin awaiemmas, wanam Allah ajamkaimas. Debimak binip ere, dare era owe bajurusum bas. 20Wanam dare surat era owe pataejirimamo. Era suratam, ‘Owe, pak, eto bipu ataetiitamemas. Erarawa are eto asitimemas. Emesare, tare era pak banda bas. Tare tani tamane bajamdamat bas. Esee aptam dambir aemes binatang dasa banda bas. Eseeam banda bas.’ Emes surat pataejirimamo. 21Emesare, tarainak, owe era kotaiin kotaiin, Musa Basakamtam Atakam akoretamaaris. Era Yahudi Owe Samayen Bare takes, owe era Yahudi owe samayen tame bomon ara basakamtam atakam baca aemas.” Yakobus emes atakam aesimen.

Yesus eemnak ambesemkoromes Yahudi apok saman owe surat atakam

22Emesare. Yesus atakam bakoretam bamirimemom oweam, Yesus basitim bajarisiap armat baemem oweam, Yesus basitim bajarisiap owe takesam, atakam ajamsakamamtiiesen. Are armamon owe bataemom, wanam era owe Paulus anama Barnabas takan, era Antiokia bamirimemom, emes atakam ajamsakamamtiiesen. Are Yudas aeremtaeresen. Are wan juas Barsabas. Are Silas aeremtaeresen. Emesare, era ipit amnuk Yesus bamesem owe akapar owe araren. 23Are emes surat aeapomes, wanam ataejirimesen: “Tare kota Antiokiaam, Siria tapirmiam, Kilikia tapirmiam, Yahudi apok saman Yesus bajamkai owe aemapmakam. Dararawa, Yesus atakam bakoretam bamirimemom oweam, Yesus basitim bajarisiap armat baemem oweam, aemapom. Danom Yesus bajamkai owe. Dare selamat atakam tara akorommarom. 24Atakam jane ajiom ere, wan daowe atakam tara akoretamman. Era akoremas atakam jane ajimakam, tanom jak pota aememmakam. Tanom bimak binip arke atetarammakam. Dare ere, era owe emes atakam tara bokore, atakam basakamtam apok. 25Emesare, danom ajarisiapom. Ajarisiapom, danom bimak binip awar atetaramom. Emesare, dare atakam bakoromattam owe aereremartaaom. Era owe Barnabas anama Paulus taasan takan aesostemas. Emesare, dare Barnabas anama Paulus daytu afaimmarom. 26Era ipit amnukam, Yesus Kristus daTuhan karai aetamemis ere, are poman damo dambir etetememis. 27Emesare. Dare Yudas anama Silas tara ataendaemtamtemarom. Are, era surat aeemarom atakam, amba akoretamteman. 28Dare Allah Jipajie bimak binip awar atetarammarom. Emesare dare wuturu pak tasaia ten bataetii apok aemmarom. Danom ara aemansa atakam taowenak bamintep tara asakamtamom. 29Emesare, tare owe, eto bipu ataetiitammas pak, banda bas. Tare esee banda bas. Tanom esee aptam dambir aeme binatang dasa banda bas. Tanom tani tamane bajamdamat bas. Tare emes pak baem apok aemtakam, tare akot aememtemakam. Dare aake.” Emes surat atetamesen.

30Emesare. Are era owe ambirimemomesen. Era owerawa, Antiokia aesosesen. Are Yesus basitim bajarisiap owe takes ajarisimtaeres, wanam era surat era owe atetamesen. 31Era owe era surat baca aemes, wanam jak akot aememesen. Era surat atakam jak fiak baemapom pak apores aren. 32Ara Yudas anama Silas, Allah atakam bakoretam owe araren. Are atakam jirao, era owe akoromemisen. Are Yesus bajamkai owe jak akotam, jak fiakam, aemapomemisen. 33Are tarai paratakopak era asan aemapemisen. Era Antiokia Yesus bajamkai owe ere, Yudas anama Silas asan akot ambirimemomesen. Emesare, Yudas anama Silas bonak ambirimemomes owe bipu, aoesosemisen.

34,35Me Paulus anama Barnabas ere, Antiokia aoemapemisen. Are, wan owe tananeam, Tuhan atakam era owe aememtamesen. Are Allah atakam akoretamesen.

Paulus anama Barnabas apamamtaeremis atakam

36Asep barerawa, Paulus atakam Barnabas akoromen. “De! Dare Tuhan atakam akoretamom kota takes boesosasi. Yesus bajamkai owe, asan akot apaye baporasi.” Emes atakam aesimen. 37Emesare, Barnabas, Yohanes Markus bataer atakam aesimen. 38Bonak ere, are Paulus anama Barnabas Pamfilia tapirmi beken ajien. Are era karai takan bae apok. Paulus era pak aporen. Emesare are Yohanes botaer potan. 39Me Paulus anama Barnabas atakam daytu ajamkoramemisen. Erarawa apamamtaeremisen. Emesare. Barnabas, Markus ataere, wanam Siprus ajiremisen. 40Paulus arawa, Silas aeremtaeren. Are aesosemisen. Me Yesus bajamkai oweam, era ipit amnuk, Allah ban ten atetamesen. 41Paulus arawa, Siria tapirmiam, Kilikia tapirmiam, aofeosesen. Are Yesus basitim bajarisiap owe, jak fiak aemapomen.

Currently Selected:

AEMAARIS PAK 15: LAIASC

Highlight

Copy