LUKAS 15

Bibi kase amnekut

(Mat. 18:12-14)

1Ma ale asimo noni poni sin ma atoni asanat bian sin nem neu Yesus he amnen In a'an. 2Ma Farisi sin ma ahin sulat sin, na'munu ma nak, “In ansimo atoni asanat sin ma nah nok sin.” 3Es nane Yesus na'uab neu sin lasi leta i, 4“Bait anbi ki anmu'i bibi kase natun mese, ma in naneku mese, of in anmo'e sa' ka? In mes nasaitan bibi kase bo'sio am sio nane bi mnela ma in nao nami le amnekut nane tal napeni nafani. 5Ma leka in napeni bibi kase nane, in malin ma nasae nani bi in hanun. 6Ma in nem ante in ume, in no'en in ini sin ma apaumakat sin ma nak neu sin: Malin nai mok kau, fun au bibi kase amnekut nane au upeni ufani. 7Au ak ki: Bi neno tunan anmu'i malinat naek neu atoni asanat mese le napis, nesin amneot sin bo'sio am sio le sin ka nate'un fa sin nekan.”

Noni amnekut

8“Ai bife me le anmu'i dirham bo'es, ma in naneku mese – of in anmo'e sa' ka? In mes notu paku ma anpik ume ma naksani tal napeni nafani dirham nane. 9Leka in napeni nafani dirham nane, in no'en in ini sin ma in apaumakat sin ma nak: Mimlil nai mok kau, fun au dirham amnekut nane au upeni ufani. 10Onane amsa ahake Uisneno sin namlil fun atoni asanat mese napis na'ko in sanat sin.”

Anmone amnekut

11Yesus na'uab anteni, “Anmu'i amaf mese anmu'i anmone nua. 12Anmone kliko nak neu in amaf nak: Ama, Hom fe kau nai au ini na'ko hiti maus. Oke te sin amaf anbati maus nane neu sin. 13Neno fauk namuni te anmone kliko nasosa ale sa' nane ma in nao kun neu paha lo. Bi nane in ansaken ale in maus ok-oke. 14Leka in maus nane oke, amnahas mafena anbol bi pah nane ma oket in napeni mamu'it. 15Nalali te in nao ma anmepu bi atoni mese bi pah nane. Atoni nane anlelu in hen pao in fafi sin bi lele. 16In lomi he natua in tain neki fafi in mnahat mes katit fa es hen fe neu in. 17Nalali te in nekan anbe' ma nak: Ale atoni le anmepu bi au ama, sin nahan nok athoes, mes au bi i he mate natuin amnahas. 18Au he fen ma nao eu au ama ma au ak neu in: Ama, au usanab neu Uisneno ma neu ama nok, 19au ka tamaf ota hem tek kau ho anmone; mo'e kau on ho atoni ameput mese. 20Oket in anfen ma nao neu in amaf. Leka in fe bi lo onane te, in amaf nit in, ma nekan antu fun namnau nisan. In amaf naen nu ma anho nan ma nek in. 21Anah nane nak neu in: Ama, au usanab neu Uisneno ma neu ama nok, au ka tamaf ota hem tek kau ho anmone. 22Mes amaf nane no'en in atuthaes sin ma nak: Lab, meki kit blua pake alekot, he mipakeb in ma amtao kaleni neu in klulun ma penhae neu in haen. 23Ma amhel man bia apokat nane, ma him lolo nai ma hit tol he tah ma atmalin. 24Fun au anmone in anmate mes anmoni anfani, in namneku mes tapeni anfani. Ma sin anmo'e tolas amlilat. 25Mes in anmone anaet bi lene ma leka in anfani nem ma anhaumak ume te, in nen tufu hanan, ma bonet hanan. 26Oket in boin atuthaes mese ma natan in oni he lasi sa' bi ume. 27Atuthaes nane nak: Ho oli anfani nem ma ho ama anlolo bia apokat, fun in napeni nafani in anmone nok aomina. 28Anmone anaet nato'kun ma kan lomi fa hen tam. Onane te in amaf anpoi ma na'uab nok in. 29Mes in natae amaf ma nak: Bi ton fauk-fauk au mepu mate fin he tuthae ama, ma au ka tanhai it fa ama ho plenat; mes ama ho kam fe mit kau fa bibi mese he au umlil ok au ini sin! 30Mes leka ho anmone le ansaken nani ale ho maus nok bife a'paisa sin, in nem ante, ama hom lek hem lolo bia apokat neu in. 31In amaf nak neu in: Anah, ho mok kau piut bi i, ma ale sa' nane ho ini kun. 32So hit tamlil ma tam'oek nai, fun ho oli anmate mes anmoni anfani, in namneku ma mapeni anfani.”

Currently Selected:

LUKAS 15: AOZ

Highlight

Copy