KEJADIAN 49
49
Nai Yakub in molok amsoput
1Nalali onane te Nai Yakub no'en in anah sin ma in nak, “Mibuaom aim neu i, amhaumak kau. Au of uton neu ki ale sa' le of hi mieku mokan anbi neno amunit:
2Amnibunom nai, hoi Nai Yakub in anah-anah sin,
amnen nai Israel, hi ama.
3Nai Ruben, ho au anmone nael,
ho le nane au be'ik au matanik,
fuaf ahunut na'ko au matanik, fuaf ahunut na'ko au matanik.
Ho mumas amfini ma abe'it anesit na'ko ale au anah sin ok-oke.
4Ho mune'o onle oe,
talantia ho ka ahunut ko fa;
natuin hom tup mubua mok au fe kliko,
ho mulahi mulali ho ama in hala tupa.
5Nai Simeon ma Nai Lewi hi maoil tatan;
sin bale manuat nane afani blua makenat mabe'ut.
6Au of ka tam oke fa anbi sin salit,
ma of ka tam oke fa anbi sin buat in nanan amsa.
Natuin anbi sin nek to'as in nanan sin namate atoni,
sin na'oleb bijae fui neu sin nek malinat.
7Kasat neu sin to'as nane,
natuin nae le'uf kun.
Kasat neu sin nek maputu nane,
natuin maneun le'uf kun.
Au of usitab ma usana sin anbi Israel ok-oke.
Au of a'kaki ma kifun sin neu ale' uf sin atnanan.
8Nai Yehuda, ho of amheke ho musu sin anbi sin a'kon;
ho biaf sin of anpules ko
ma naluli nabes anbi ho matam.
9Nai Yehuda in onle meo asu tipu';
in namate in musu sin, oke te anfani kun neu in kuna;
in of namateson ma antup,
ma kan mu'i fa atoni mese amsa le nabe'i hen li'u in.
10Nai Yehuda in of es ana' tias aplenat,
in sufan nane es of naplenat tal nabal-bal.
Uf-uf of sin neki noni puni,
ma naluli nabes nok amtaus anbi in matan.
11In bikase luke mnanu ana in anfutun neu hau,
hau tua min kase amasat.
In anfase in blua pake sin neki tua min kase,
tua min kase le amtasa onle na'.
12In matan amtasa natuin in ninu tua min kase,
in nisin muti natuin in ninu susu.
13Nai Zebulon of namaika anhaumak tasi;
ale bnao of anhake anbi in tasi ninen;
in pah nane of an nakat nok Sidon.
14Nai Isakhar nane in onle' bikase luke mnanu abe'it
le antup anbi baut-baut sin atnanan.
15In ankiso bale nane leok le'uf kun
ma pah nane lo in namas kun,
es nane te in anluin ma an lomi he nasaeb baut mafena neu in benan,
ma naseke in hen mepu on ate.
16Ho Nai Dan, ho of mufek ho uf sin lasi,
hom fani uf mese onle uf bian anbi Israel.
17Ho onle kauna anbi lanan in ninen,
kaun laso anbi lolok in ninen,
le anlau bikase in haen tikan
talantia anpolin in asaet nane.
18Koi Uisneno, honis le Hom fe nane,
es au hat ma pao.
19Nai Gad, atoni asikat sin of anmaken nok ko,
mes of ho mubain'om ma musik mufani sin.
20Nai Asyer, ho bukae nane of nathoe,
ho of muloitan bukae neu kesel sin.
21Naftali, ho onle lus le nafetnon,
in anah-anah sin namas anfin kun.
22Nai Yusuf, onle bikase luke mnanu tipu',
bikase luke mnanu fui le anhaumak oe mata,
le na oin-oin son anbi tubu in un.
23Musu anken in nok matani,
anli'u in neki aklaot ma as'anef.
24Mes Nai Yusuf in niman nahel ma namep,
in as'anef sin namep piut,
natuin kuasat Atukus Abe'it Anesit.
Nai Yakub in Uisneno, Aneot Ahafot Israel.
25Ho ama in Uisneno antuntaku ko;
Uisneno Akuasat Afin-finit anfe ko tetus
neki ulan na'ko neno tunan
ma oe na'ko pah pinan in nupun.
Nok li'ana ma bijae,
26ane kase ma tuna.
Tetus na'ko ho ama in Uisneno
nesin bnak ma mu'if tubu-tubu le namnasi nalali.
So nati' ale tetus nane ansanu
neu Nai Yusuf in nakan,
neu in ilan.
In es mabeti na'ko
in biaf sin atnanan.
27Nai Benyamin nane asu fui apisut.
Anbi nok-noka in anheke in musu.
Anbi fai in anbati.”
28Le nane uf Israel sin bo'es am nua, ma uab a'at le sin amaf namolok nani leka in anfe han seon neu sin mese-mese.
Nai Yakub anmate ma sin ansub in
29-30Nalali onane te Nai Yakub anba'an in anah-anah sin nak, “Ka lo fa anteni of au nao fani onle au am uf sin. Nati' amsub kau anbi sin aon bian anbi Nuat Makhpela, aon neno saen Mamre anbi Kanaan. Nai Abraham in ansos nalali nuat ma mnela anbi in aon bian na'ko Nai Efron atoni Het hen fani nate naukel. 31Anbi nane ansub Nai Abraham ma bi Sara, Nai Ishak ma bi Ribka; ma anbi nane amsa au sub bi Lea. 32Mnela ma nuat le anbi nane au sos na'ko atoni Het. Amsub kau anbi nane amsa.” 33Leka Nai Yakub anba'an nalali in anah sin, in antup oke te in anmate.
Currently Selected:
KEJADIAN 49: AOZ
Highlight
Share
Copy
Want to have your highlights saved across all your devices? Sign up or sign in
