KEJADIAN 30
30
1Mes bi Rahel fe ka napeni fa li'ana amsa. Es nane te in nek tinon in tataf, ma in nak neu Nai Yakub nak, “Amfe neu kau li'ana, kalu kahaf, of au mate.”
2Nai Yakub in nato'an bi Rahel ma in nak, “Au le i ka Uisneno kau fa. In es anmo'e ko talantia ho ka mupeni fa li'ana.”
3Oke te bi Rahel nak, “I au ate bi Bilha; amtup mok in he nati' in nahoni. Nao natuin in au fani ainaf neu in.” 4Oke te in anfe bi Bilha neu in mone, ma Nai Yakub antup nabua nok ate nane. 5Bi Bilha naapu ma nahonis li'anmone mese. 6Bi Rahel namolok nak, “Uisneno anlefi nalali lasi neu au sutais. In nen au onen totis ma in anfe nalali li'anmone mese neu kau.” Oke te in nakanab li'ana nane Nai Dan. 7Bi Bilha naapu ma nahonis li'anmone mese anteni. 8Bi Rahel in nak, “Au mabe'u nok matani laban au tata, ma au is,” es nane te in nakanab li'ana nane Nai Naftali. 9Leka bi Lea in nahin nak of in ka napeni anteni fa li'ana, in anfe in ate bi Zilpa, neu Nai Yakub hen fani in fenai. 10Bi Zilpa nahonis li'anmone mese. 11Bi Lea in nak, “Au is ulalien,” oke te in nakanab li'ana nane Nai Gad. 12Bi Zilpa nahonis li'anmone mese anteni, 13ma bi Lea in nak, “Au ua alekot nae le'uf kun! Tabu le i ale bife of namolok nak au ua alekot kau.” Es nane te nakanab li'ana nane Nai Asyer.
14Anbi tabu anlefi aen kase, Nai Ruben in nao neu mnela, in napeni hau sena le anfani malo, oke te in neki neu bi Lea in ainaf. Bi Rahel nak neu bi Lea nak, “Amfe kau hau sena le anfani malo nane kle'o le ho anah napeni nane.”
15Bi Lea natae nak, “Au fe ka noka fa neu ho musik man au mone ka? Es tabu le i ho he maiti amteni malo le au anah napani.”
Bi Rahel in nak, “Kaluhom lomi hem fe neu kau hau sena le anfani malo le ho anah napeni nane, nabe'i hom tup mubua mok Nai Yakub anbi fai le i.”
16Leka Nai Yakub anfani nem neu ume anbi neon mabe nane, bi Lea ansenu in ma nak neune nak, “Amtup mok kau anbi fai le i natuin au baen ulali eki hau sena le anfani malo na'ko au anah.” Oke te Nai Yakub antup nabua nok in anbi fai le nane.
17Uisneno ansimo bi Lea in onen totis, ma in naapu ma nahonis li'anmone no nima. 18Bi Lea in nak, “Uisneno anfe nalali upa neu kau natuin au una'at ulali bi Zilpa neu au mone,” es nane te in nakanab li'ana nane Nai Isakhar. 19Bi Lea naapu anteni ma nahonis li'anmone no ne'. 20In nak, “Uisneno anfe nalali neu kau pa' amasat. Leku le i au mone of naupab kau, natuin au uhonis ulali li'anmone ne',” es nane te in nakanab li'ana nane Nai Zebulon. 21Nalali onane te bi Lea nahonis li'anfeto mese ma in nakanab in bi Dina.
22Oke te Uisneno namnau bi Rahel; Uisneno ansimo in onen totis ma anfe neune tabu sona he in napeni li'ana. 23Ma Rahel naapu ma nahonis li'anmone mese. Bi Rahel in nak, “Uisneno naneku nalali au nek mae. 24So nati' Uisneno anfe neu kau li'anmone mese anteni.” Es nane te in nakanab li'ana nane Nai Yusuf.
Uab molok Nai Yakub ma Nai Laban
25Leka bi Rahel nahonis nalali Nai Yusuf, Nai Yakub nak neu Nai Laban nak, “Mufetin kau he au nao fani Neu au pah. 26Mufetin kau he au nao oke au fenai nua sin ma au anah-anah sin. Au upeni sin natuin au mepu neu au Baba ko. Au Baba ko ho muhin, au mepu ulali nok ma'tani le'uf.”
27Nai Laban nak neune nak, “Amnen nai fe: Au upeni mnitas nak Uisneno anfe nalali kau tetus nao natuin ko. 28Muton kau nai hom toti fauk.”
29Nai Yakub natae nak, “Au Baba ko ho muhin mulali neu au mepu nok mafena, ma ho mu'it sin ansato piut natuin au es apanat sin. 30Nahun na'ko au fe ka aum fa, au Baba ho mu'im nane al faukah, mes tabu le i au Baba ko hom fani atoni amu'it. Uisneno anfe nalali ko tetus nao natuin kau.
Tabu le i antia nalali in eti he au mepu neu au in-ini sin.”
31Nai Laban nak, “Es nane te sa' es of au he fe neu ko?”
Nai Yakub natae nak, “Ka nabe'i fa au Baba ho hem fe kau sa'-sa'. Of au panat au Baba ho mu'it sin piut, al he nati' au Baba hom lomi au han totis le i: 32Mufetin kau anbi neno le i he au ka'oinsok anbi au Baba ho pukan bibi kase sin atnanan, ma au aiti bibi ankase metan, ma bibi ana le a'koto'. Nane anfani upa' le au lomi. 33Anbi neno amunit nok manoe au Baba ho muhin neu au mepu nok nek muti. Leka Baba ho aum he nati' amtae au upa' ma hom kiso bibi le ka koto' fa, ai bibi kase le ka metan fa, of Baba ho muhin nak mu'it nane au ubak ulali.”
34Nai Laban natae nak, “Au lomi! Hit of tanaoba sa' le hom toti nane!?” 35Mes anbi neno nane Nai Laban anbeti ale bibi keso koto' ma ale bibi aina koto', ai le in a'koton muti; in amsa anbeti bibi kase metan. Nalali te in anlenu in anah-anah sin natuku mu'it-mu'it nane, 36oke te sin nao neki mu'it-mu'it nane na'lo na'ko Nai Yakub, in a'lon atnao tan neno tenu.
Pukan bibi kase nane sin nesin anfani Nai Laban ini ma Nai Yakub es natuku sin.
37Namuni te Nai Yakub naiti hau no mate na'ko hau onle fenu kase, timu ma nunuh, ma an is nani in a'po'an talantia na'kot'on. 38In antao hau tlaefin nane anbi pukan bibi kase sin matan, natuin mu'it-mu'it nane na'teli anbi tabu sin ninun. 39Es nane te leka bibi-bibi nane na'teli anbi hau tlaef-hau tlaef nane sin matan, in anah sin of na'kot'ok natuin onan.
40Namuni te Nai Yakub naiti bibi kase-bibi kase ma in nabaina sin neu bibi-bibi le tui'eun ma metneun. Nok lanan nane in napeni pukan bibi kase neu in ma anbatisok na'ko pukan bibi kase Nai Laban in-ini.
41Ma leka mu'it-mu'it le anmatani fe na'teli, Nai Yakub antao hau tlaef-hau tlaef le in an'isi nane anbi sin bale mninut in nanan. 42Mes hau tlaef-hau tlaef nane in kan tao sin fa anbi mu'it-mu'it a'olet sin matan. Es nane, ale mu'it le in nafun muti nane an'ole, ma nane Nai Laban in-ini, mes ale mu'it le metan nane, tui'eun ma koto' le anmatani, le nane Nai Yakub in-ini. 43Nok nane Nai Yakub anfani atoni amu'it abainesit kun. In anmu'i pukan bibi kase namfau, bikase paha snaen, bikase luke mnanu ma ate-ate.
Currently Selected:
KEJADIAN 30: AOZ
Highlight
Share
Copy
Want to have your highlights saved across all your devices? Sign up or sign in
