KEJADIAN 10
10
Nai Nuh in anah sin sufan
(I Taw. 1:5-23)
1Le i sufa ka'uf na'ko Nai Nuh, esle' Nai Sem, Nai Yafet ma Nai Ham. Leka noe sako anfin, sin tenu sin napenin li'anmone.
2Nai Yafet in anah sin esle' Nai Gomer, Nai Magog, Nai Madai, Nai Yawan, Nai Tubal, Nai Mesekh, ma Nai Tiras. 3Nai Gomer in sufan esle' atokos anbi Askenas, Rifat ma Togarma. 4Nai Yawan in sufan esle' atokos Elisa, Spanyol, Siprus ma Rodes. 5Sin anfani on naif na'ko uf-uf le namaika anbi tasi in ninen ma pah-pah. Nane Nai Yafet in sufan. Uf mese-mese namaika anbi in pah anmes ma es-es nok in uab ma in a'at.
6Nai Ham in anah sin esle' Nai Kus, Nai Mesir, Nai Libia ma Nai Kanaan. 7Nai Kus in sufan esle' amaika anbi Seba, Hawila, Sabta, Raema ma Sabtekha. Nai Raema in sufan esle' atokos anbi Syeba ma Dedan. 8Nai Kus anmu'i anmone kanan Nai Nimrod le anfani atoni abe'it ma amatanit ahunut anbi pah pinan. 9Nok Uisneno In matakun in anfani atoni ali'ut atomatas. Es nane te atoni-atoni sin namolok nak, “So Uisneno anmo'e ko anfani atoni ali'ut atomatas onle Nai Nimrod.” 10Anbi ahunut in naplenat antia Babel, Erekh ma Akad, bael tenu le i anbi Babilonia. 11Na'ko nane in nao neu Asyur, oke te in nahakeb kot Niniwe, Rehobot-Ir, Kalah, 12ma Resen le anbi Niniwe ma Kalah sin atnanan. Sin alsin anfani kot-kot anaek.
13Nai Mesir in sufan nane esle' atokos anbi Libia, Anamim, Lehabim, Naftuhim, 14Patrusim, Kasluhim, ma Kaftorim. Uf Kasluhim nane anfani on uf Filistin sin na'if.
15Nai Kanaan in anah sin esle' Nai Sidon, li'mone ahunut ma Nai Het. 16Nai Kanaan amsa anfani on na'if neu atoni Yebusi, Amori, Girgasi, 17atoni Hewi, Arki, Sini, 18Arwadi, Semari ma Hamati. Nonot-nonot uf Kanaan nane nasitbok ma na'lon, 19talantia sin pah in nakat anmainua na'ko Sidon kabenan ne'u anao nok Gerar, anao ma anhaumak nok Gaza, ma anbi neno saen anao Sodom, Gomora, Adma, ma Zeboim, ma anhaumak nok Lasa. 20Le nane Nai Ham in sufan sin. Uf ma nonot mese-mese namaika anbi in pah anmes ma anmu'i in uab ma in a'at anmes kun.
21Nai Sem, le Nai Yafet in tataf, nane anfani on uf Ibrani sin na'if. 22Nai Sem in anah-anah sin esle' Nai Elam, Nai Asyur, Nai Arpakhsad, Nai Lut ma Nai Aram. 23Nai Aram in sufan esle' atokos anbi pah Us, Hul, Geter ma Mas. 24Nai Arpakhsad nane anfani amaf neu Nai Selah. Ma Nai Selah nane anfani amaf neu Nai Eber. 25Nai Eber in anmone sin nua; ahunut in kanan Nai Peleg, natuin anbi in batan uf-uf anbi pah pinan nasitbok; anmone nua in kanan Nai Yoktan. 26Nai Yoktan in sufan esle' atokos anbi Almodad, Selef, Hazar-Mawet ma Yerah, 27Hadoram, Uzal, Dikla, 28Obal, Abimael, Syeba, 29Ofir, Hawila, ma Yobab. Sin alsin Nai Yoktan in sufan. 30Pah le sin namaika anbine in anmenua na'ko Mesa antia Sefar, esle' pah tubu anbi kabenan neno saen. 31Nane Nai Sem in sufan. Uf ma nonot mese-mese namaika anbi in pah ma anmu'i in uab ma in a'at anmes kun.
32Le nane Nai Nuh in sufan ok-oke, batnes neu batnes natuin kun in sufan anmes. Na'ko sin nape'an uf-uf anbi pah pinan le i, leka noe sako nane ansanu nalali.
Currently Selected:
KEJADIAN 10: AOZ
Highlight
Share
Copy
Want to have your highlights saved across all your devices? Sign up or sign in
