KELUARAN 1
1
Anhamu'i atoni-atoni Israel anbi Mesir
1Nai Yakub le nakanab in amsa Israel, in nao neu Mesir nok in anah-anah sin ma sin ume nanan sin mese-mese. Nai Yakub in anah-anah sin esle':
2Nai Ruben
Nai Simeon
Nai Lewi
Nai Yehuda
3Nai Isakhar
Nai Zebulon
Nai Benyamin
4Nai Dan
Nai Naftali
Nai Gad
Nai Asyer.
5Nai Yakub in sufan nane alsin atoni bo'hitu. Nai Yusuf in nao nahun neu Mesir. 6Anbi tabu fauk namuni te Nai Yusuf nok in biaf sin anmaten, onane amsa ale atoni le nabatnokan. 7Mes sin sufan, esle' atoni Israel, sin sufan ka'un nane namfau, ma sin aiken nane ansae piut nok manoe le'uf, talante pah Mesir nahenu nok sin.
8Namuni onane te kesel fe'u mese le ka nahin fa Nai Yusuf in nanaoba plenat anbi Mesir. 9In nak neu in to nak, “Atoni-atoni Israel nane of sin nale'un kit, natuin sin namfau nes ma sin nabe'i nesin kit. 10Oni kalu makenat anbol, sin of nabua ma sin neka mese nok musu he nati' anlaban kit, oke te sin naplenat pah le i. Hit mes he tami lanan he nati' sin ain nane kaisa namfau anesi anteni.” 11Es nane te atoni-atoni Mesir naiti apanat-apanat neu to Israel he nati' anhafen sin monit neki mepu naek. Naseke sin he nati' sin nafena neu Kesel Mesir kot-kot Pitom ma Raamses hen fani kot anaek hen nabela ale blua. 12Mes maski nak atoni Mesir anhamu'i sin nok mafena, atoni Israel sin aiken nane antu'an ma namfau piut, ma sin nasitbok anfun natef ma nahenu pah nane, talante atoni Mesir namtausan sin. 13Oke te nok maufinu sin amhamu'i atoni Israel, 14ma nasusab sin anbi sin monin. Ka nok fa nek amnaut sin naseke sin ma anmepu nok matani anbi bale-bale mepu he nafena ma anbi lene-lene.
15Nalali te Kesel Mesir anfe plenat neu bi Sifra ma bi Pua, bife apalolit nua le antuntaku bife-bife Ibrani le he nahoni. 16Kesel Mesir nak, “Anbi tabu him tuntaku bife Ibrani he nahoni, mimnau lasi le i: Kalu li'ana le nahonis nane atoni, mimate in! Kalu li'ana le nahonis nane feto, mifetin he in anmoni.” 17Mes bife apalolit nua en nane atoni le namtausan Uisneno. Sin kan lomi fa he nanaoba kesel in plenat nane ma sin nafetin ale li'anmone sin anmoni. 18Es nane te kesel anboin apalolit nua en nane ma natan sin nak, “Nansa' es hi mifetin li'anmone sin anmoni?”
19Sin natae nak, “Bife Ibrani sin ka onfa bife Mesir. Sin nahoni ka nok fa susal. Nahun na'ko apalolit nem antia, sin nahoni nalali sin anah.” 20-21Es nane te Uisneno anfe tetus neu bife-bife apalolit nane ma anfe neu sin sufa ka'uf, natuin sin nabes neu Uisneno. Ma atoni Israel sin ansato ma namfau piut ma anmatani. 22Oke te kesel anfe plenat i neu in to ok-oke nak, “Ale li'anmone na'ko atoni Ibrani le fe nahonis nalali mes ampolin mitan sin neu Noe Nil in nanan, mes sin li'anfeto mifetin hen moni.”
Currently Selected:
KELUARAN 1: AOZ
Highlight
Share
Copy
Want to have your highlights saved across all your devices? Sign up or sign in
