ZAKARIA 12
12
Giot paluaon ma Jerusalem
1On ma tona ni Tuhan taringot tu Israel, i ma Tuhan na pahembang langit, na manompa portibi jana na mangalehen ngolu tu jolma, didok Ia ma, 2“BaenonKu ma Jerusalem songon piala na marisi anggur; inumon ni angka luat na hombar balokna ma i jana lenong-lenong halahi songon na mabuk. Jana muda hona hobuk Jerusalem, angka kota na tading i pe di Juda laing hona hobuk muse ma. 3Tapi muda dung dapot ari i, baenonKu ma Jerusalem songon batu na dokdok, sanga bangso dia pe na mancubo mangangkatsa, gabe dapotan hamamago. Mardomu ma sandok bangso na di tano on laho mamorangi Jerusalem. 4Anggo di ari i baenonKu ma lenong sandok kudo jana angka na mangalombut i Hubaen rintik, halak na maringanan di Juda Hujagohon, tapi sandok kudo ni musuna i Hubaen nada marnida. 5Jadi dokkonon ni ganop ripe ni Juda ma di bagasan rohana, ‘Dilehen Tuhan Na Markuaso i do antong gogo di bangsongku na maringanan di Jerusalem.’
6Anggo di ari i, baenonKu ma angka ripe ni Juda songon api di harangan sanga di ladang ni gandum na gumorsing; putusan ni halahi ma angka bangso na humaliang halahi. Tapi anggo halak na maringanan di Jerusalem tongtong do sonang di bagasan kota.
7Parjolo-jolo lehenon ni Tuhan ma hamonangan tu tentara ni Juda, anso ulang sumurung hasangapan na nijagit ni pomparan ni si Daud dohot halak Jerusalem sian hasangapan na nijagit ni halak Juda na asing i. 8OndihononKu ma di ari i pangisi ni Jerusalem; salang jolma na gumale sian halahi gabe songon gogo ni si Daud. Togu-toguon ni pomparan ni si Daud ma halahi songon SurusuruanKu, olo tutu, songon panogu-noguonKu sandiri. 9Anggo di ari i, abiskononKu ma ganop bangso na mancubo-cubo mamorangi Jerusalem.
10Dung i lehenonKu ma tondi na sai marhagiot mangampuni dohot na marhagiot martangiang tu pomparan ni si Daud dohot tu halak na maringanan di Jerusalem. Tatapon ni halahi ma na nitiham ni halahi jana andungan ni halahi ma i songon pangandungi ni anak sasada. Lungun noma pangandung ni halahi, songon dia na agoan anak siangkaan. 11Masa ma di ari i andung na godang di Jerusalem songon na mangandungi Hadad-Rimon#12:11 HADAD-RIMON: Disura Roha goar ni Debata Baal do on, debata ni suan-suanan di Kanaan dohot Siria. Muda marmatean suan-suanan hatiha musim ngali, dietong roha ni halak na marsomba Baal do na mate muse Baal jana diandungi halahi ma i. na di Rura Megido. 12Tangis ma luat i, ganop ripe tarasing; horong ni si Daud tarasing jana dadaboru ni halahi pe tarasing; horong ni si Natan tarasing jana dadaboru ni halahi pe tarasing; 13horong ni si Levi pe tarasing jana dadaboru ni halahi pe tarasing; horong ni si Simei tarasing jana dadaboru ni halahi pe tarasing; 14songon i muse sude horong na tinggal, ganop horong tarasing jana dadaboru ni halahi pe tarasing.”
Currently Selected:
ZAKARIA 12: LAIAKB
Highlight
Share
Copy
Want to have your highlights saved across all your devices? Sign up or sign in
Indonesian Bible Society
