ZAKARIA 10
10
Dijanjihon Tuhan paluaonNa bangsoNa i
1Pangido hamu ma tu Tuhan udan di hatiha pangkuron! Tuhan do na mambaen ronggur manyoro, lehenonNa tu halahi dohot udan tu ganop suan-suanan di ladang. 2Mangido angka panogu-noguon do halak tu angka gana-ganaan dohot angka datu, hape anggo alus na dapot ni halahi hum gabus do dohot hata na rumar sajo. Adong ma i na patorangkon nipi, hape na palilu-liluhon hamu sajo do hatorangan ni halahi, jana apo-apo na nilehen ni halahi pe nada adong artina. Patunda ni i gabe marserak ma jolma i songon biri-biri na lilu. Targogot do halahi hara ni na so adong pamimpinna.
3Didok Tuhan ma, “Goyak do rohangKu tu angka parmahan jana tu angka pamimpin hulanan ni hambeng. BaenonKu ma pamaloson, harana diparate-atehon Tuhan Na Markuaso i do angka biri-biriNa, i ma horong ni si Juda, jana baenonNa songon kudo porang na gogo na dung nihobasan tu parporangan.” 4PilionKu ma sian tonga-tonga ni halahi na gabe parkuaso, pamimpin dohot panglima na giot mamarenta bangsongKi. 5Monang ma halak Juda songon angka ulu balang na mangalonca-lonca musu songon bustak di dalan. Marporang ma halahi hara ni Au, Tuhan mangurupi halahi, jana taluhonon ni halahi ma parangan ni musu angka na markudo i sude.
6“PargogoanKu halak Juda,
halak Israel Hupalua.
ObanonKu halahi mulak tu tano ni halahi,
angke holong do rohangKu mida halahi.
BaenonKu ma halahi,
songon bangso na so unjung Hugagai.
Au ma da Tuhan Debata ni halahi,
sandok tangiang ni halahi Huparrohahon mangulahi.
7Halak Israel gabe songon ulu balang na gogo,
songon halak na minum anggur halahi marjop ni roha.
Nada halupahonon ni pomparan ni halahi,
sian jaman tu jaman hamonangan na Hulehen i.
Marjop ni roha ma halahi,
hara ni pambaenanKu tu halahi.
8PiohononKu ma bangsongKu gabe sada punguan baenonKu.
Hupalua halahi jana sabahat ni na jolo baenonKu.
9Haru pe Husursar halahi di tonga-tonga ni angka bangso,
laing ingoton ni halahi do Au di adu.
Malua do halahi songon i muse angka dakdanakna,
jana rap mulak halahi tu tanona.
10Sian Mesir dohot Asur marmulahan noma halahi.
BaenonKu halahi maringanan di tanona sandiri.
ObanonKu halahi tu Gilead dohot sian Libanon bage,
lopus gohan ni halahi luat i sude.
11Muda mamolus lautan ni hasusaan halahi,
Au Tuhan mamukul angka ombaknai,
tandolan ni Batang aek Nil pe gabe mahiang.
Diparenjep ma Asur na bulbul i,
jana agoan kuasona ma Mesir na gogo i.
12PargogoanKu ma bangsongKu,
oloanna jana marsomba ma halahi tu Au.
Au Tuhan, mandok songon i.”
Currently Selected:
ZAKARIA 10: LAIAKB
Highlight
Share
Copy
Want to have your highlights saved across all your devices? Sign up or sign in
Indonesian Bible Society
