MALEAKI 2
2
1Jadi saonnari tu hamu do hahonaan ni parenta on, o hamu angka malim! 2Ninna Tuhan Na Markuaso: “Muda nada ditangihon, jana nada diparate-atehon hamu laho pasangapkon goarKu, baenonKu ma bura tu tonga-tongamunu jana angka pasupasumu gabe bura, jana madung Hubaen i gabe bura, harana nada diparate-atehon hamu. 3UhumonKu ma angka dakdanakmunu jana lapuhononKu tu bohimunu i kotoran ni pahan-pahanan na nihaulkonmunu i, jana hamu saratonKu tu ginjang ni kotoran i. 4Jadi botoonmunu ma na dung Hulehen parenta on tu hamu anso hot parjanjianKu dohot angka malim pomparan ni Levi, ninna Tuhan Na Markuaso.
5Di bagasan parjanjian i, Hujanjihon do na giot mangolu halahi jana sonang, jana Husuru halahi pasangapkon Au. Anggo di hatiha i pasangapon ni halahi ma Au tutu jana habiaran ni halahi. 6Ajarkonon ni halahi ma na sintong, nada be na marsalaan. Hombar tu hagiotKu noma parngoluon ni halahi. Bulus noma parrohaon ni halahi jana solkot parngoluonna dohot Au, nada hum na denggan be baenon ni halahi, tapi urupan ni halahi muse ma halak na asing anso ulang be mambaen na jahat. 7Harana pamangan ni angka malim manjagohon parbinotoan jana dijalahi halak do pangajaran sian pamanganna, harana i do suruan ni Tuhan Na Markuaso.
8Hape saonnari, madung manyimbil hamu angka malim sian dalan na tutu. Hara ni angka pangajaranmunu, hona sarat do bahat halak gabe mambaen na sala. Diputuskon hamu do parjanjian dohot halak Levi ninna Tuhan Na Markuaso. 9Jadi Au sian pihakKu, baenonKu ma halak Israel marlayas ni roha tu hamu hara ni na so dioloi hamu hagiotKu, dohot hara ni na marnida bohi hamu dompak mangajari bangsongKu.”
Nada burju jolma i tu Debata
10Inda he sisada ama hita on sude? Nada he sada do Debata na manompa hita on sude? Antong, biasi dehe marsiosean janji hita on? Biasi muse taose parjanjian na nibaen ni Debata dohot ompunta i? 11Dilaosi Juda parjanjian ni halahi dohot Debata, jana dibaen halahi pangalaho na jorbut di Jerusalem dohot di sude luat i. Dipahodar halahi do Inganan Na Badia na nihaholonganNia i. Dibuat halahi do angka boru na marsomba tu angka debata ni bangso sileban. 12Padiar dipangabis Tuhan sian undung-undung ni si Jakob sude pomparan na mambaen si songon i, haru pe dioban ia haul tu Tuhan Na Markuaso i.
13On ma parbuatanmunu deba nari. Dilonong hamu do langgatan ni Tuhan dohot ilu ni mata, tangis do hamu jana mangandungi patunda ni na so ra be Tuhan manjagit angka haulmunu. 14Sapa-sapa hamu sanga hara ni aha umbaen na so dijagit Ia angka haulmunu. Anggo dalanna i ma hara ni na niboto ni Tuhan do na manguba janji hamu dohot dadaborumunu na dibuatmunu taran di haposoonmu. Anak boru i ma dongamunu sahangoluan, hape diose hamu do janjimunu tusia. Haru pe na dung marsumpa hamunu di jolo ni Debata mandok tongtong burju ho tusia. 15Nada he na dung dibaen Debata hamu sapamatang dohot satondi dohot dadaboru i? Ahe dehe maksud ni Tuhan disi? Nada asing sian sada maksud, i ma anso maruli dakdanak hamu na tutu situtu bangso ni Debata. Jadi, tangkas parrohahon hamu; ulang jabat adong sian hamu na manguba janji sian dadaboruna. 16“Huhagigihon do parsirangan,” ninna Tuhan Debata ni Israel. “Goyak do rohangKu muda adong sahalak sian hamu na mambaen songon i jungkatna maradopkon dongan saripena. Manat ma hamu, ulang langgar hamu janjimunu na mandok burju tu dongan saripena.”
Madung donok ari paruhuman i
17Susa do Tuhan dibaen angka hata-hatamunu. Tapi didok hamunu do, “Bia ma he hami baen pasusahon Ia?” I ma na niambangmunu: “Ganop halak na mambaen hajahatan denggan do i di mata ni Tuhan; tu halak si songon i ma jop ni rohaNia sanga muda nada, di dia ma he Debata na manguhumi i?”
Currently Selected:
MALEAKI 2: LAIAKB
Highlight
Share
Copy
Want to have your highlights saved across all your devices? Sign up or sign in
Indonesian Bible Society
