LUKAS 4
4
Cobaan ni Sibolis tu Jesus
(Mat. 4:1-11; Mrk. 1:12-13)
1Digohi Tondi Parbadia ma Jesus di na mulak Ia sian Batang aek Jordan. Dioban Tondi i ma Ia tu halongonan. 2Diuji Sibolis i ma Ia disi opat pulu ari honokna. Nada mangan bagi aha Ia salolot disi. Jadi gabe male ma dihilala Ia.
3Didok Sibolis i ma tuSia, “Muda Anak Ni Debata do Ho, baen ma batu on anso muba gabe roti.”
4Dialusi Jesus ma, “Tarsurat do di Buku Na Badia i, ‘Nada hara ni roti sajo umbaen na mangolu jolma.’ ”
5Dung i dioban Sibolis i ma Jesus tu inganan na gincat. Dipatidahon Sibolis i ma santongkin tu Jesus sude harajaan na di tano on. 6“Sude kuaso dohot hamoraon on hulehen pe di Ho angke madung dipasahat i sude tu au jana marguru di au do mangalehen i sanga na tu ise pe giotku. 7Gabe Ho ma nampuna i sude muda tunduk Ho marsomba tu au.”
8Dialusi Jesus ma, “Tarsurat do di Buku Na Badia i, ‘Somba ma Tuhan, Debatamu jana Ia sajo do sioloanmu!’ ”
9Dung i dioban Sibolis i ma Jesus tu Jerusalem, dibaen ia ma Jesus tu bungkulan ni Bagas Ni Debata. Didok Sibolis i ma tu Jesus, “Muda Anak Ni Debata do Ho, mangambur ma Ho sian on. 10Angke tarsurat do di Buku Na Badia i, ‘Suruhonon ni Debata do angka surusuruanNia manjagohon Ho.’ 11Dung i muse, ‘Dijagit angka surusuruan i do Ho dohot tangan ni halahi anso ulang antuk patMi tu batu.’ ”
12Dialusi Jesus ma, “Tarsurat do di Buku Na Badia i, ‘Ulang uji Tuhan Debatamu.’ ”
13Dung sidung diuji Sibolis i Jesus markite-hite ragam-ragam cobaan, ditadingkon ia ma Jesus painte ro hatiha na denggan muse.
Dipungka Jesus ma karejoNia di Galilea
(Mat. 4:12-17; Mrk. 1:14-15)
14Dung i mangulahi ma Jesus tu Galilea. Jana gok Tondi do Ia, gabe tarsar ma barita taringot tuSia di luat i sude. 15Mangajari do Ia di angka bagas paribadatan jana sude do halak mamuji Ia.
Nada dijagit Jesus di Nasaret
(Mat. 13:53-58; Mrk. 6:1-6)
16Dung i kehe ma Jesus tu Nasaret kota hagodanganNia. Hatiha Ari Sabat songon na somal dohot ma Ia tu bagas paribadatan. Hatiha jongjong Ia laho mamasa Buku Na Badia i, 17dilehen ma tuSia buku ni Panurirang Jesaya. Dibuka Ia ma buku na margulung i gabe dapot Ia ma disi ayat on,
18“Tondi Ni Tuhan do na adong di Au,
angke madung dimiahi Ia do Au laho mamaritahon
Jamita Na Denggan na sian Debata tu halak na pogos,
jana disuru Ia do Au
paboahon haluaan tu angka na tartangkup
dohot parnidaan tu angka na mapitung;
laho paluahon halak na marhancit,
19dohot paboahon taon na denggan na sian Tuhan.”
20Dibalun Jesus ma mangulahi buku i laho paulakkon tu parkobas na disi, dung i juguk ma Ia. Sude ma halak na disi marsiligi tuSia. 21Dung i dipungka Ia ma mandok tu halahi, “Sadari on ma hasongtian surat on, taran dibege hamu dope!”
22Di parhatutu halahi do Ia jana homang do roha ni halahi hara ni dengganna sude hata na nidokNia i. Didok halahi ma, “Inda he anak ni si Josep on?”
23Dung i didok Jesus ma tu halahi, “Tontu didok hamu do umpama on tu Au: ‘Ale, pangubati, pamalum ma jolo diriMu sandiri. Angka na nipatupaMu di Kapernaum, laing songon i ma jolo baen di huta hagodanganMon.’ ” 24Dung i didok Jesus dope tu halahi, “Porsaya ma hamu, nada adong sada panurirang na dipasangap di hutana sandiri. 25Tapi ingot hamu ma: Di hatiha ni si Elia, di na so ro udan tolu satonga taon honokna, jabat masa haleon potir di luat i sude, bahat sajo do na mabalu di tonga-tonga ni halak Israel. 26Haru pe songon i nada disuru Debata si Elia tu sada sian angka na mabalu i. Hum tu sahalak na mabalu di kota Sarfat na di Luat Sidon i sajo do disuru Debata si Elia. 27Songon i muse do di hatiha ni Panurirang Elisa, bahat do halak na hona panyakit kusta di Israel, hape umpe sahalak sian halahi na dipamalum; hum si Naaman halak Siria i sajo do.”
28Muruk ma sude halak na di bagas paribadatan i umbege hata ni Jesus na songon i. 29Jongjong ma halahi manyarat Jesus tu balian ni kota. Dioban ma Ia tu puncut ni dolok. (Di dolok i do parkotaan ni halahi dibaen.) Umbaen na tusi pe Ia dioban anso dionjarkon do Ia tu rahis godang i. 30Hape kehe ma Ia mamolus sian tonga-tonga ni halak na bahat i.
Halak na hona setan
(Mrk. 1:21-28)
31Dung i kehe ma Jesus tu Kapernaum na di Galilea. Hatiha Ari Sabat diajari Ia ma halak disi. 32Homang do roha ni halahi mida pangajaranNia i, harana gok kuaso do angka pandohanNia. 33Adong ma di bagas paribadatan i sada halak na hona setan. Sai mangangguhi ma bayo i. 34“O Jesus halak Nasaret, na giot mambaen bia do Ho tu hami? Adong he na giot mangagohon hami do Ho? Huboto do sanga ise Ho: Na Badia do Ho sian Debata!”
35Disonggakkon Jesus ma tondi i. “Sip!” ninna Jesus, “Morot ma sian bayo on!” Dung i diompaskon setan i ma bayo i di jolo ni halahi sude, dung i ruar ma ia sian bayo i. Nada jabat mahua bayo i nian.
36Homang ma halahi sude. Marsipandohonan ma halahi sama halahi, “Marhagogoan do hataNia. Mardongan sahala dohot kuaso, dipaorot Ia angka tondi na jahat i, morot muse do angka tondi i!” 37Gabe sar ma barita ni Jesus di luat i sude.
Dipamalum Jesus bahat halak
(Mat. 8:14-17; Mrk. 1:29-34)
38Ditinggalkon Jesus ma bagas paribadatan i, kehe ma Ia tu bagas ni si Simon. Topet marun nantulang ni si Simon, jana dipaboa halak ma i tu Jesus. 39Jadi, jongjong ma Ia di lambung ni dadaboru i, jana disonggak Ia ma nyae i. Dung i ditadingkon nyae i ma ia, manigor jongjong ma dadaboru i mangoloi halahi.
40Dung lusut mataniari, sude halak na adong na marnyaena sanga na nyae aha pe, diparobani be ma i tu Jesus. Dipayakkon Jesus ma tanganNia tu halahi pamalumkonsa. 41Angka setan pe marmorotan ma sian pamatang ni bahat halak, huhut marsurak-surak, “Anak Ni Debata do Ho!”
Tapi disonggak Jesus ma halahi jana nada dipaloas Ia halahi mangkatai, angke diboto halahi do bahaso Ia do Kristus i.
Marjamita Jesus di angka bagas paribadatan
(Mrk. 1:35-39)
42Jadi di na mamungka torang ari, kehe ma Jesus sian kota i tu balian, tu sada inganan na lungun. Jalak-jalak ma halak na bahat i diSia. Jadi dung dapot halahi Ia, digogohon halahi ma anso ulang kehe Ia maninggalkon halahi. 43Tapi didok Jesus ma tu halahi, “Tu kota na asing pe angkon pabotohononKu do Jamita Na Denggan taringot tu Harajaan Ni Debata, angke hara ni i do umbaen na disuru Au!”
44Jadi marjamita do Ia di sude bagas paribadatan na di Luat Judea.
Currently Selected:
LUKAS 4: LAIAKB
Highlight
Share
Copy
Want to have your highlights saved across all your devices? Sign up or sign in
Indonesian Bible Society
