JOHANNES 9

Dibaen Jesus gabe marnida halak na mapitung

1Di na mamolus Jesus, diida Ia ma sada halak na so marnida, na mapitung mamungka sian hatutubuna. 2Disapai angka siseanNia i ma tu Jesus, “Ale Guru, ise do na mardosa, bayo on do sanga simatobangna, dibaen na mapitung ia sorang?”

3Dialusi Jesus ma, “Mapitung pe ia nada hara ni na mardosa ia jana nada hara ni na mardosa simatobangnia. Mapitung pe ia anso diida halak do kuaso ni Debata markarejo di bagasan dirinia. 4Salolot torang dope ari, angkon pupuonta do mangkarejohon karejo ni na marsuru Au. Angke potang ne ma ari jana nada tarbaen sanga ise be markarejo dung di hatiha i. 5Salolot di tano on Au, Au do sinondang ni portibi on.”

6Dung didokkon Jesus songon i, marsitijur ma Ia tu tano, jana diluntak Ia ma tano i tu tijurNia. Dung i didaiskon Ia ma bustak i tu mata ni bayo i, 7jana didok Jesus ma tusia, “Kehe ma ho marsuap tu tobat Siloam.” (Siloam astuanna “Na nisuru”.)

Jadi kehe ma bayo i marsuap paiaskon bohinia. Di na mulak ia marnida ma matania i.

8Sude hombar bagasnia dohot sude halak na marnida ia mangido-ido mandok, “Na he bayo on do na somal i juguk mangido-ido?”

9Adong na mandok, “Ia ma da i.” Tapi adong muse ma na mandok, “Nada na satompa dohot ia do i.”

Tapi didok bayo i sandiri ma, “Au ma da i,” ning ia.

10“Na tarbia do umbaen na gabe marnida matami?” ninna halahi manyapai ia.

11Dialusi ia ma, “Bayo na margoar Jesus i, dibaen Ia saotik bustak di tano i, dung i didaiskon Ia ma bustak i tu matangku jana ning Ia ma, ‘Kehe ma ho marsuap tu tobat Siloam.’ Jadi kehe au. Jana disi marsuap au, marnida ma matangkon,” ning ia.

12“Di dia ma halakna i?” ning halahi manyapai.

“Inda huboto,” ning ia mangalusi.

Ditangkasi halak Jahudi sanga tarbia dibaen pamalumkon

13Dung i dioban ma bayo i tu jolo ni halak Parise.

14Hatiha na mambaen bustak i Jesus dohot tijurNia laho mambaen marnida mata ni na mapitung i topet do hatiha i Ari Sabat. 15Jadi disapai angka halak Parise ma bayo i sanga bia dalanna umbaen na gabe marnida matania. Dialusi bayo i ma, “Diapuskon Ia bustak tu matangku, dung i kehe au marsuap paiaskon matangki, gabe marnida ma au.”

16Adong ma deba sian halak Parise i na mandok, “Nada sian Debata asal ni Bayo na mambaen i, harana dilanggar Ia do tona ni ugamo taringot tu Ari Sabat.”

Tapi didok halak na asing ma, “Dia ma tarbaen halak pardosa patupa angka hahomangan sisongon i?” Paasing-asing pandapot ma halahi.

17Jadi hara ni i disapai halak Parise i ma sanoli nari tu bayo i, “Didok ho nangkin, Ia do na mambaen marnida matamu, antong bia do pandapotmu taringot tuSia?”

“Panurirang do Ia!” ning ia mangalusi.

18Tapi laing nada porsaya angka parkuaso ni halak Jahudi i na mapitung hian ia, hape saonnari madung gabe marnida. Nada porsaya halahi anggo so jolo dipiohon halahi simatobangna, 19jana disapai halahi ma, “Tutu dehe na sorang mapitung anakmon? Na bia do umbaen na gabe marnida ia saonnari?”

20Dialusi simatobangna i ma, “Anaknami ma da on; jana mapitung do on sian mamungka sorang. 21Tapi anggo taringot tu na gabe marnida ia saonnari, sanga tarbia dalan ni i nada hami boto. Jana sanga ise na mambaen gabe marnida matania i, i pe nada hami boto. Tusia ma sapai hamu. Madung tuk umurnia; madung tola ia mangalusi sandiri.” 22Hara ni na mabiar do simatobang ni bayo i mida angka parkuaso ni halak Jahudi i umbaen na songon i didok halahi; harana madung putus tahi ni angka parkuaso ni Jahudi i, pakaruaron ma sian bagas paribadatan sanga ise na mangoku Ia Kristus i. 23Hara ni i ma umbaen didok simatobang ni bayo i, “Nada dakdanak be ia; tusia ma sapai hamu.”

24Dung i dipiohon halahi ma mangulahi na sorang mapitung i hian, jana didok halahi ma tusia, “Oku ma di jolo ni Debata paboa ma dohot tigor, angke hami boto pardosa do Bayo i.”

25Didok ia ma, “Sanga pardosa sanga inda, nada huboto i. Tapi sada do na huboto: Na mapitung humani do au, saonnari madung marnida au.”

26Dung i didok halahi ma mangulahi tusia, “Bia dibaen Ia tu ho? Bia pambaenNia gabe marnida matamu?”

27Dialusi bayo i ma, “Madung hupaboa di hamu, hape so ra hamu manangihon. Biasi dope disapai hamu i? Adong he na giot siihutkon Ia muse ma hamu?”

28Dung i muruk ma halahi tusia ninna halahi ma, “Ho do sisean ni i; anggo hami nada! Sisean ni si Musa do anggo hami. 29Anggo taringot tu si Musa tangkas do hami boto na dung mangkatai Debata tusia. Tapi taringot tu Bayo i nada hami boto sanga sian dia asal ni i.”

30Dialusi bayo i ma, “Hahomangan noma i anggo so diboto hamu be sanga sian dia asal ni Bayo i, hape madung marnida matangku dibaen Ia. 31Taboto do, na so ditangihon Debata do anggo pardosa. Hum halak na pasangap Debata dohot na patuluskon hagiotNia sajo do na nitangihon ni Debata. 32Sian parmulaan ni tano on nada unjung dope tarbege adong halak tarbaensa jolma na sorang mapitung gabe marnida. 33Anggo na so sian Debata do Bayo i, nada tarbaen Ia sanga aha na songon i.”

34Dialusi halahi ma, “Himpal do ho halak pardosa mamungka sian ujung ni obukmu lopus tu palampak ni patmu sian hasosorangmu, giot ajaranmu ma he hami?” Dung i dipakaruar halahi ma ia sian bagas paribadatan i.

Halak na mapitung mangihutkon partondion

35Dibege Jesus ma na dung dipakaruar halahi bayo i sian bagas paribadatan. Jadi dung marsuo dohot bayo i didok Jesus ma tusia, “Porsaya dehe ho tu Anak Ni Jolma i?”

36Dialusi bayo i ma, “Ise dehe i Tuhan? Laing paboa ma jolo tu au anso laing porsaya au tuSia!”

37Dialusi Jesus ma, “Madung diida ho Ia. Na manghatai dohot ho saonnari, i ma Ia.”

38“Porsaya do au Tuhan!” ninna bayo i, dung i manungkap ma ia marsomba di jolo ni Jesus.

39Didok Jesus ma, “Laho mandalankon uhum do umbaen na ro Au tu portibi on; anso marnida angka na mapitung jana halak na marnida gabe mapitung.”

40Jadi dibege halak Parise na adong disi do na nidok ni Jesus songon i, gabe didok halahi ma tuSia, “Na didok rohaMu do na mapitung hami on?”

41Dialusi Jesus ma, “Anggo sugari mapitung hamu, so na mardosa hamu. Tapi hara ni na nidokmunu i, ‘Marnida do hami,’ i ma patandahon laing na mardosa hamu.”

Currently Selected:

JOHANNES 9: LAIAKB

Highlight

Copy