JOHANNES 20

Hangongot ni Jesus

(Mat. 28:1-10; Mrk. 16:1-8; Luk. 24:1-12)

1Andostorang ni Ari Mingguna i kehe ma si Maria Magdalena tu kuburan i. Diida ia ma madung digulang batu panutup ni tanoman i sian baba ni kuburan i. 2Dung i marlojong ma ia manjalahi si Simon Petrus dohot sisean na asing haholongan ni Jesus i, didok ia ma tu halahi, “Madung dibuat halak bangke ni Jesus; nada hami boto sanga di dia dipayakkon bangkeNa i!”

3Torus ma kehe si Petrus dohot sisean na sada nari tu kuburan. 4Rap marlojong ma halahi na dua, tapi humipas do marlojong sisean na sada nari i sian si Petrus; gabe parjolo ma ia lalu tu kuburan i. 5Dung diligi ia tu bagasan kuburan i; diida ia ma angka kopenna i disi tapi nada pola masuk ia tu bagasan. 6Didapoti si Petrus ma sisean i sian pudi, jana torus masuk ma ia tu bagasan kuburan i. Diida ia ma payak disi angka kopen i, 7tapi anggo abit na nililitkon i tu ulu ni Jesus nada pungu disi. Asing do i marlompit. 8Jadi ro ma sisean na sada nari, na parjolo lalu i, masuk ma ia muse. Laing diida ia do i sudena jana dihaporsayai ia. (9Lopus tu hatiha i laing na so diastui halahi dope na tarsurat di Buku Na Badia i, na angkon mulak mangolu Ia mangulahi sian hamatean.) 10Dung i mulak ma sisean ni Jesus i.

Dipatidahon Jesus Ia tu si Maria Magdalena

(Mat. 28:9-10; Mrk. 16:9-11)

11Laing tangis-tangis ma si Maria di jolo ni kuburan i. Di na tangis ia ditailihon ia ma tu bagasan kuburan i, 12jadi diida ia ma disi dua halak surusuruan marbaju na bontar. Di lambung hapayahan ni bangke ni Jesus i ma surusuruan na dua i juguk. Sahalak juguk sabola uluNa i, sahalak nari juguk sabola patNa i. 13Disapai surusuruan i ma tu si Maria, “Biasi tangis ho inang?” ninna halahi.

Dialusi si Maria ma, “Madung dibuat halak Tuhanku hape nada huboto sanga na tu dia dibaen halahi.”

14Dung didok si Maria songon i, manaili ma ia adop pudi, diida ia ma Jesus jongjong disi. Tapi nada diboto ia, hape Jesus do i. 15Disapai Jesus ma tusia, “Biasi tangis ho inang? Ise na nijalahanmu?”

Ning roha ni si Maria, panjago ni kobun i do i. Jadi didok si Maria ma, “Muda hamu do amang paimbarkon sian on, paboa ma jolo tu au sanga di dia dibaen ho Ia. Au pe mambuatsa annon.”

16Ninna Jesus ma tu si Maria, “Maria!”

Dung i manaili ma si Maria tu Jesus jana didok ia ma di hata Ibrani, “Rabbuni!” (astuanna “Guru”).

17Didok Jesus ma tu si Maria, “Ulang jama Au jolo, harana nada podo manaek Au tu Damang. Kehe ma ho mandapotkon angka kahanggingKu jana paboa ma tu halahi, ‘Manaek ma Au tu Damang, i ma Amangmunu muse; tu DebatangKu, i ma Debatamunu muse.’ ”

18Dung i kehe ma si Maria paboahonsa tu angka sisean ni Jesus, bahaso na dung diida ia Tuhan i jana Tuhan i do mandok tusia sudena i.

Dipatidahon Jesus diriNia tu angka siseanNia i

(Mat. 28:16-20; Mrk. 16:14-18; Luk. 24:36-49)

19Laing di Ari Minggu i dung borngin marlagut ma anak sisean ni Jesus di sada bagas. Digoruk halahi ma sude pintu ni bagas i; hara ni na mabiar halahi tu angka parkuaso ni halak Jahudi. Jadi tompu ma ro Jesus jongjong di tonga-tonga ni halahi, ning Ia ma, “Hasonangan ma di hamu!”

20Dung didokkon Ia songon i dipatuduhon Ia ma tangan dohot rusukNia tu halahi. Jadi moga sajo ma halahi dung diida halahi Tuhan i. 21Dung i didok Jesus ma tu halahi sanoli nari, “Hasonangan ma di hamu! Songon parsuru ni Damang di Au, laing songon i ma hamu Husuru.” 22Dung didok Ia songon i mangombus ma Ia tu halahi jana ning Ia ma, “Jagit hamu ma Tondi Parbadia. 23Muda disesa hamu dosa ni sanga ise, laing tarsesa ma dosana i; muda nada disesa hamu dosa ni halak, laing na so tarsesa ma dosana i.”

Jesus dohot si Tomas

24Si Tomas (na nigoaran muse si Linduat) i ma sahalak sian sisean ni Jesus na dua bolas halak i. Jadi hatiha na ro i Jesus, nada dohot si Tomas rap dohot sisean ni Jesus na asing i. 25Jadi dipaboa angka sisean ni Jesus na asing i ma tu si Tomas, ninna halahi ma, “Madung hami ida Tuhan i!”

Tapi dialusi si Tomas ma, “Anggo so jolo huida pamakuan na di tanganNa i jana hudaiskon jari-jaringkon tu pamakuan i, jana anggo so jolo hubaen tangankon tu rusukNa i, nada porsaya dope au.”

26Dung salapan ari, marlagut ma mangulahi angka sisean ni Jesus di bagas i, dohot ma si Tomas disi. Margoruk do sude pintu ni bagas i. Tapi ro ma Jesus jongjong di tonga-tonga ni halahi, ning Ia ma, “Hasonangan ma di hamu!” 27Dung i didok Jesus ma tu si Tomas, “Baen tuson jari-jarimi, ligi ma tanganKon. Surduhon ma tanganmi tu rusukKon. Ulang be ganggu rohamu. Porsaya ma ho!”

28Dung i ninna si Tomas ma tu Jesus, “O Tuhanku! Debatangku!”

29Jadi didok Jesus ma tusia, “Hara ni na dung niidami dehe Au umbaen na porsaya ho? Martua ma sanga ise na porsaya tu Au haru so diidasa pe Au!”

Tujuan ni buku on

30Laing bahat dope angka hahomangan na nibaen ni Jesus di jolo ni angka siseanNia i, tapi nada pola disuratkon anggo angka hahomangan i di bagasan buku on. 31Umbaen na nisurat pe sudena na tarsurat di bagasan buku on, anso porsaya do hamu bahaso Jesus do Kristus i, i ma Anak Ni Debata; jana anso dapotan hangoluan hamu markite-hite haporsayaan di goarNia.

Currently Selected:

JOHANNES 20: LAIAKB

Highlight

Copy