JOHANNES 11

Hamamate ni si Lasarus

1Adong ma sada halak na marnyae, si Lasarus goarna. Di Betania do ia maringanan, i ma kota ni si Maria dohot si Marta na martinadohon i. (2Si Maria ma halakna na manduruskon miak na huskus i tu pat ni Tuhan i jana mangapusina dohot obuknia. Ibotonia ma si Lasarus na marnyae i.) 3Ditonahon halahi na dua ma barita i tu Jesus, ninna halahi ma di tona i, “Tuhan, marnyae do donganMu haholongan ni rohaMi.”

4Dung dibege Jesus barita i didok Ia ma, “Nada pola mate ia baenon ni nyae i. Anso marsangap do Debata umbaen na marnyae si Lasarus; anso laing dohot muse ma dipasangap Anak Ni Debata.”

5Tutu do, holong do roha ni Jesus mida si Marta dohot anggina i songon i tu si Lasarus. 6Tapi haru pe na dung lalu tu Jesus barita na paboahon marnyae si Lasarus, disangajo Ia dope dua ari nari laing di inganan i. 7Dung dua ari pe anso didokkon Ia tu angka siseanNia i, “Beta ma hita mulak tu Judea.”

8Dialusi angka siseanNia i ma, “Baru dope, na giot didangguri ni halak Jahudi i Guru i dohot batu, hape saonnari giot mangulahi ma Guru i tusi?”

9“Nada he dua bolas jom do sadari?” ninna Jesus. “Anggo arian do halak mardalan nada tartuktuk bagi na tu aha, harana torang do diida ia tano on. 10Tapi muda borngin do halahi mardalan, tartuktuk ma ia, angke nada adong na torang disia.” 11Songon i ma pandok ni Jesus. Dung i didok Ia muse dope tehe, “Madung modom si Lasarus donganta i, tapi kehe ma Au manyungguli ia.”

12Didok angka sisean ni Jesus i ma, “Muda tarpodom do si Lasarus Tuhan, na giot malum ma i.”

13Hape anggo na nidok ni Jesus paboa na dung mate do si Lasarus. Tapi ninna roha ni halahi, na tutu do tarpodom si Lasarus anggo maksud ni Jesus. 14Jadi torus torang ma dipaboa Jesus, “Madung mate si Lasarus. 15Tapi hara ni na porlu tu hamu sude, gabe jop do rohangKu nada disi Au, anso porsaya hamu. Beta ma tadapotkon si Lasarus.”

16Didok si Tomas na nigoaran muse “si Linduat” ma tu angka dongannia sisean i, “Beta ma laing dohot hita anso rap mate hita dohot ia!”

Na mambaen mulak mangolu dohot na mangalehen ngolu

17Dung lalu Jesus disi, ma opat ari si Lasarus ditanom. 18Nada jabat tolu kilometer dao ni Betania sian Jerusalem. 19Bahat do halak Jahudi marroan manopot si Maria dohot si Marta laho mangapoi halahi hara ni parmonding ni si Lasarus ibotona i.

20Dung dibege si Marta na ro Jesus, haruar ma ia mangalo-alo Jesus, tapi anggo si Maria di bagas do ia. 21Dung i didok si Marta ma tu Jesus, “Sugari dison Ho Tuhan dompak so mate ibotongki, tontu nada tulus ia mate! 22Tapi haru pe songon i huboto do, sanga aha na nipangidoMu tu Debata, sai na lehenon ni Debata do i di Ho.”

23“Mulak mangolu do ibotomi mangulahi,” ninna Jesus tu si Marta.

24Dialusi si Marta ma, “Huboto do i angkon mulak mangolu si Lasarus dung disungguli angka na mate i di Ari Parpudi.”

25Dialusi Jesus ma, “Au do hangongot dohot hangoluan. Laing mangolu do sanga ise na porsaya tu Au haru pe na dung mate ia. 26Halak na mangolu jana na porsaya tu Au, nada mate be ia salolot-lolotna. Porsaya dehe ho disi?”

27Dialusi si Marta ma, “Olo Tuhan, porsaya do au Kristus i do Ho, Anak Ni Debata na ro tu portibi on.”

Tangis Jesus

28Dung didok si Marta songon i, kehe ma ia marpio si Maria angginia i jana dihusipkon ia ma, “Madung dison Guru i, dipiohon Ia do ho.” 29Umbege i manigor diompoti si Maria ma jongjong, bulus mandapotkon Jesus. (30Inda podo masuk Jesus hatiha i tu huta i. Laing di inganan parsuoanNia dohot si Marta nangkin dope Ia.) 31Diida halak Jahudi na marjuguhan na mangapoi si Maria di bagas i ma si Maria jongjong mopop tu ruar, gabe diihutkon halahi ma ia, harana diambang halahi na giot kehe tu kuburan do ia giot mangandungi disi.

32Dung lalu si Maria tu inganan ni Jesus jana diida ia ma Jesus, marsinggang ma ia di jolo ni Jesus mandok, “O Tuhan, sugari dison Tuhan i, nada jabat mate ibotongki!”

33Dung diida Jesus tangis si Maria jana dohot muse ma halak Jahudi na marroan i dohot si Maria tangis muse, gabe marsak jana ibo sajo ma roha ni Jesus. 34Dung i disapai Ia ma tu halahi, “Di dia ditanom hamu ia?”

“Beta ma taligi Tuhan,” ning halahi.

35Dung i tangis ma Jesus. 36Gabe didok halak Jahudi i ma, “Ligi ma, holong ni rohaNia i tu si Lasarus!”

37Tapi adong muse do sian halahi na mandok, “Madung dibaen Ia gabe marnida na mapitung, biasi nada haantahan Ia anso ulang mate si Lasarus?”

Dipangolu mangulahi si Lasarus

38Di bagasan arsak dohot ibo ni roha, kehe ma Jesus tu kuburan i. Songon liang na ditutup dohot batu na godang do kuburan i.

39“Paorot hamu ma batu i,” ninna Jesus.

Dialusi si Marta iboto ni na mate i ma, “Tapi ma adong opat ari Tuhan dung ditanom ia. Ma bau i Tuhan!”

40Didok Jesus ma tu si Marta, “Na he madung Hudok tu ho: Anggo porsaya ho, idaonmu do hasangapan ni Debata!” 41Dung i dipaorot halahi ma batu i. Jadi manatap ma Jesus tu langit jana didok Ia ma, “Tarimakasi ma Hudok tu Ho Amang hara ni na nitangihonMu pangidoanKu. 42Huboto do na sai tongtong ditangihon Ho pangidoanKu, tapi Hudok pe songon i hara ni angka jolma na dison on do; anso porsaya halahi, na Ho do marsuru Au.” 43Dung didok Jesus songon i, dipagogo Ia ma soraNia pio-pio, “Haruar ma ho Lasarus!” ning Ia. 44Dung i haruar ma bayo na dung mate i. Laing bungkus dope tanganna i dohot patna i dibaen kopenna i, jana bohina i pe laing ditutupi kopen panutup ni bohi i dope. “Buka hamu kopenna i,” ninna Jesus tu halak na disi i, “jana padalan hamu ma ia.”

Partahian laho mangalo Jesus

(Mat. 26:1-5; Mrk. 14:1-2; Luk. 22:1-2)

45Bahat do halak Jahudi na marroan i manopotkon si Maria gabe porsaya tu Jesus, dung diida halahi na masa i. 46Tapi adong muse do sian halahi na kehe mangulahi tu halak Parise laho paboahon sanga aha na nibaen ni Jesus i. 47Jadi hara ni i, dibaen angka halak Parise dohot angka sintua ni malim ma rapot, i ma rapot godang ni ugamo i. Didok halahi ma disi, “Bia noma baenonta? Bahat do dibaen Bayo i hahomangan! 48Muda tapadiar-diar do Ia sai songon i, gabe sude ma halak porsaya tusia. Ujungna ro muse ma halak Rom na markuaso i mangaroncohon Bagas Ni Debata dohot sude bangsonta on!”

49Adong ma sahalak sian halahi si Kayafas goarna, i ma na gabe Malim Godang di na sataon i, ning ia ma, “So adong diboto hamu sanga na aha. 50Na so diboto hamu do? Gumonanan do mate sada halak humopkop na bahat ulang pado sudena bangso on mago?” 51Satutuna nada sian pikirannia sandiri didok si Kayafas songon i. Tapi songon Malim Godang do ia di na sataon i, madung songon na nibaennia hian boa-boana na angkon mate Jesus humopkop halak Jahudi. 52Jana nada hum hara ni halak Jahudi sajo, tapi dohot muse anso dipalagut sudena gabe sada angka dakdanak ni Debata na marserak i.

53Jadi mamungka sian ari i, martahi-tahi ma halak Jahudi i laho mamunu Jesus. 54Hara ni i nada be mardalani Jesus torang di jolo ni halak Jahudi. Ditadingkon Ia ma Judea, kehe ma Ia tu kota na margoar Efraim na donok tu halongonan. Disi ma Ia tinggal rap dohot angka siseanNia i.

55Jadi hatiha i giot dapot ne ma Pesta Paskah ni halak Jahudi. Ma bahat halak sian angka kota i markehean tu Jerusalem laho paiaskon diri dompak so dapot Pesta Paskah i. 56Jadi taran di Bagas Ni Debata halahi, dijalak-jalahi halahi ma Jesus. Marsisapa-sapaan ma halahi, ninna halahi ma, “Bia do ninna rohamu, na so ro do Ia ulaning tu pesta on?” 57Madung diparentahon angka sintua ni malim dohot angka halak Parise, sanga ise na umbotoan di dia Jesus, angkon paboaon ni na umbotosa i ma i; anso tarbaen manangkup Jesus.

Currently Selected:

JOHANNES 11: LAIAKB

Highlight

Copy