PAMUNGKAAN 40

Dipatorang si Josep arti ni nipi ni angka tahanan

1Dung adong sadia honok, mambaen hasalaan ma da tu raja dua halak parhobas ni raja Mesir, i ma pangurus ni siinumon dohot pangurus ni roti ni raja i. 2Gabe muruk ma raja i tu sidua halak parhobas i. 3Jadi dipahurungkon raja i ma halahi tu hurungan na di bagas ni kapala ni pangawal ni raja i, i ma inganan ni si Josep na tarhurung i. 4Honok do halahi na tarhurung i, jana dibaen kapala ni pangawal ni raja i ma si Josep gabe parkobas ni halahi.

5Sanoli, borngin-borngin rap marnipi ma pangurus ni siinumon dohot pangurus ni roti i. Jana adong be do arti ni nipi ni halahi i. 6Jadi di na ro si Josep mandapotkon halahi manyogotna i, songon na marsak ma idaon halahi. 7Jadi disapai ia ma, “Biasi songon i marsakmunu sadari on?”

8Alus ni halahi, “Na marnipi do hami, tapi nada adong halak dison na bisa patorangkon artina.”

Ning si Josep ma, “Hum Debata do na mambaen tarpatorang jolma nipi. Patorang hamu ma jolo nipimunu i.”

9Didok pangurus ni siinumon i ma, “Adong ma di bagasan nipingki bona ni anggur. 10Mardangka tolu ma bonana i. Jadi dung martunas angka rantingna i, kombang ma bungana jana malamun ma batuna i. 11Jadi di hatiha i, topet maniop mangkuk panginuman ni raja i au, jadi hubuat ma da batu ni anggur i jana huporo ma i tu panginuman ni raja i lalu hupasahat ma tusia.”

12Didok si Josep ma, “On ma astuanna: Dangka na tolu i, astuanna tolu ari. 13Di bagasan tolu ari on, paluaon ni raja i ma ho; ampunannia ma ho jana paulahonnia mangulahi tu jabatanmu na salpu i. Pasahatonmu ma mangkuk panginuman tu raja i songon na salpu i. 14Tapi pangidoanku, ingot au muda dung denggan ngolumu sanoli on. Ibo rohamu mida au, jana palalu ma antong pardangolankon tu raja i, jana laing pangidohon ma da anso dipalua ia au sian hurungan on. 15Harana anggo satutuna, na nitangko do da au sian luat ni halak Ibrani, dohot dison pe tehe di Mesir on, na so unjung do hubaen hajahatan sanga aha pe na mambaen au patut masuk hurungan.”

16Jadi dung diida pangurus ni roti i, songon na maroban paruntungan do astuan ni nipi ni siurus inumon i, didok ia muse ma tu si Josep, “Au pe marnipi muse do; songon na manjujung ampang ni roti do au tolu di ginjang ni ulungku. 17Di ampang i adong na marragam-ragam panganon di raja i, hape marroan ma angka unggas mangankon panganon i.”

18Dialusi si Josep ma, “On ma astuan ni nipimi: Na tolu ampang i, tolu ari do astuanna. 19Di bagasan tolu ari on, suruon ni raja i ma halak mamonggol ulumi jana gantungkononna ma pamatangmu di sada tiang, anso dipapangani angka unggas.”

20Jadi di na marulang tahun raja i, i ma tolu ari dung i, mambaen pesta godang ma raja i di sude pagawenia; diparuar ia ma pangurus ni siinumon dohot pangurus ni rotinia i sian hurungan jana dioban ia halahi tu jolo ni sude pagawenia i. 21Dipaulak ia ma pangurus ni siinumon i tu karejonia humani. 22Tapi anggo pangurus ni roti i, diuhum mate ma. Tarjadi ma sude songon na nidok ni si Josep i. 23Tapi anggo pangurus ni siinumon i nanggo diingot ia be na masa tu si Josep – sandok, lupa ma ia tu si Josep.

Currently Selected:

PAMUNGKAAN 40: LAIAKB

Highlight

Copy