PAMUNGKAAN 36

Pomparan ni si Esau

(1 Juj. 1:34-37)

1On ma pomparan ni si Esau, na margoar si Edom muse. 2Angka boru Kanaan do dialap si Esau, i ma si Ada, boru ni si Elon halak Het; si Oholibama boru ni si Ana jana pahompu ni si Zibeon halak Hewi; 3si Basmat boru ni si Ismael jana iboto ni si Nebayot. 4Ditubuhon si Ada ma si Elifas, si Basmat manubuhon si Rehuel, 5jana si Oholibama manubuhon si Jeus, si Jaelam, dohot si Korah. Di Luat Kanaan do sude sorang dakdanak i.

6Dung i dioban si Esau ma sude dadaborunia, angka anak dohot borunia, dohot sude jolma na adong di bagasnia maradu sude pahan-pahanan dohot barang-barang sinadongannia na dapotnia di Kanaan, ditadingkon ia ma si Jakob angginia i, jana kehe ma ia tu luat na asing. 7Ditadingkon si Esau pe si Jakob hara ni na so tuk do luat na niinganan ni halahi i mangalehen panganon ni pahan-pahanan ni halahi i hara ni bahatna. 8Jadi torus noma si Esau maringanan di luat Dolok Edom.

9On ma pomparan ni si Esau, ompu ni halak Edom. 10-13Ditubuhon ripe ni si Esau na margoar si Ada ma sada anak halaklahi na margoar si Elifas. Jana adong do lima anak ni si Elifas, i ma si Teman, si Omar, si Zefo, si Gaetam dohot si Kenas. Adong dope ripe ni si Elifas na asing, si Timna goarna. Ditubuhon ia do anak sada na margoar si Amalek.

Dadaboru ni si Esau na margoar si Basmat, ditubuhon do sada anak halaklahi na margoar si Rehuel. Jana adong do opat halak anak ni si Rehuel, i ma si Nahat, si Zerah, si Sama dohot si Misa.

14Dadaboru ni si Esau na margoar si Oholibama, i ma boru ni si Ana jana pahompu ni si Zibeon, ditubuhon on tolu anak halaklahi, i ma si Jeus, si Jaelam dohot si Korah.

15Angka on ma marga-marga sian pomparan ni si Esau: Si Elifas anak siangkaan ni si Esau i ma na gabe ompu ni angka marga-marga na mangihut on: Teman, Omar, Zefo, Kenas, 16Korah, Gaetam dohot Amalek. Pomparan ni si Ada ripe ni si Esau i ma sudena i.

17Si Rehuel anak ni si Esau, i ma na gabe ompu ni angka na mangihut on: Si Nahat, si Zerah, si Sama, si Misa. Pomparan ni si Basmat ripe ni si Esau do sudena halahi.

18Angka na mangihut on, i ma angka pomparan ni si Esau sian ripenia na margoar si Oholibama, boru ni si Ana, i ma: Si Jeus, si Jaelam dohot si Korah. 19Pomparan ni si Esau ma sude marga-marga i.

Pomparan ni si Seir

(1 Juj. 1:38-42)

20-21Anggo mangingani tano Edom humani pomparan ni si Seir halak Hori do na marbagi-bagi piga-piga marga. Angka on ma margana: Lotan, Sobal, Zibeon, Ana, Dison, Eser dohot Disan.

22Lotan ma ompu ni Marga Hori dohot Heman. (Adong do iboto ni si Lotan, i ma na margoar si Timna.)

23Sobal ma ompu ni angka marga: Alwan, Manahat, Ebal, Sefo, dohot Onam.

24Adong do dua anak ni si Zibeon, i ma si Aya dohot si Ana. (Si Ana on ma na mandapot mual ni aek milas di padang parhorsihan, di na topet marmahan angka halode ni amangnia ia.) 25-26Si Ana ma amang ni si Dison jana si Dison ma ompu ni angka marga: Hemdan, Esban, Jitran dohot Keran. Adong muse do sada boru ni si Ana na margoar si Oholibama.

27Si Eser ma ompu ni marga: Bilhan, Zaawan dohot Akan.

28Si Disan ma ompu ni Marga Us dohot Aran.

29-30Angka on ma marga-marga ni Hori di Luat Edom: Lotan, Sobal, Zibeon, Ana, Dison, Eser dohot Disan.

Angka raja ni Edom

(1 Juj. 1:43-54)

31-39Dompak so jungada dope adong sada raja na mamarenta di Israel, mamarenta do di tano Edom angka raja na marjojor di toru on:

Si Bela anak ni si Beor na sian Dinhaba.

Si Jobab anak ni si Zera na sian Bosra.

Si Husiam sian luat ni halak Teman.

Si Hadad anak ni si Bedad sian Awit (on ma na manaluhon halak Midian di parporangan na di Luat Moab).

Si Samla na sian Masreka.

Si Saul na sian Rehobot na di topi ni batang aek.

Si Baal-Hanan anak ni si Akbor.

Si Hadar na sian Pahu (si Mehetabeel goar ni dadaboruna, boru ni si Matred jana pahompu ni si Mesahab).

40-43Si Esau ma ompu ni angka marga-marga ni Edom na mangihut on: Timna, Alwa, Jetet, Oholibama, Ela, Pinon, Kenas, Teman, Mibsar, Magdiel dohot Iram. Ganop marga do mambaen goarna tu luat na niinganannabe.

Currently Selected:

PAMUNGKAAN 36: LAIAKB

Highlight

Copy