PAMUNGKAAN 31

Lintun ma si Jakob sian si Laban

1Tarbege ma tu si Jakob adong hata ni angka anak ni si Laban songon on, “Ma dibuat si Jakob sude sinadongan ni amanta i. Sude sinadongannia i, sian harto ni amanta do asal ni i.” 2Boti diida si Jakob nada songon na parjolo i be rama ni si Laban tusia. 3Jadi didok Tuhan ma tu si Jakob, “Mulak ma ho tu luat ni amangmu dohot tu angka kahanggimu. Sai na dongananKu do ho.”

4Dung i ditonahon si Jakob ma tu si Rahel dohot si Lea anso marsuo di padang halahi, diinganan parmahanan ni hambeng biri-biri i. 5Jadi didok si Jakob ma tu halahi, “Huida nada songon na salpu-salpu i be rama ni amanta tu au; tapi Debata na nipasomba-somba ni damang i do mandongani au. 6Hamu na dua pe tangkas do mamboto, na dung markarejo au di amanta; hupusu do gogo na adong di au na karejo i. 7Tapi haru songon i pe laing dipaoto-oto do au jana ma pola sampulu noli dipauba-uba halahi upangku. Tapi nada dipadiar Debata ia torus mambaen na jat tu au. 8Muda didok amanta i tu au, ‘Hambeng na marturik i ma upamu,’ jadi sude ma pahan-pahanan i maranak na marturik; jana muda didok ia, ‘Na marbolang-bolang i ma upamu,’ jadi sude ma pahan-pahanan i maranak na marbolang-bolang. 9Songon i ma dibaen Debata laho mambuat pahan-pahanan nampuna ni amanta i laho mangalehensa di au.

10Jana di hatiha musimna angka pahan-pahanan i campur, marnipi do au huida sude hambeng jantan i angka na marbolang. 11Jana mangkobari do Debata songon rupa ni surusuruan tu au di bagasan nipi i didok, ‘Jakob!’ ninna. Gabe hualusi ma, ‘Olo da’. 12Didok surusuruan i ma muse, ‘Ligi pe da, bolang dohot na marturik do sude hambeng jantan i. Au do mambaen songon i, angke madung Huida sanga songon dia pambaen ni si Laban maradopkon ho. 13Au do Debata na pataridahon diringKu tu ho di Betel. Madung dibaen ho disi sada batu gabe hapunjunganKu, di na niusehonmu miak zetun di ginjang ni batu i. Laing marsumpa do ho tu Au disi. Saonnari marhobas ma ho jana mulak ma ho tu luat hatubuanmu.’ ”

14Jadi dialusi si Lea ma dohot si Rahel, “Nada adong hian be sinadongan ni amanta na patut teanonnami. 15Halak na asing noma hami dietong rohania. Na dung digadisnia do hami jana hepeng na nijagitnia disi, madung diabiskon ia. 16Sandok sinadongan na dung dibuat Debata sian amanta, hami noma nampunasa dohot angka dakdanaknami. Baen ma sanga aha na niparentahon ni Debata tu ho.”

17-18Jadi marhobas ma si Jakob laho kehe mandapotkon amangnia di Luat Kanaan. Dipanaek ia ma angka ripenia dohot angka dakdanaknia i tu tanggurung ni unto jana diiring ia ma sude hulanan ni hambeng biri-biri dohot sude na dapotnia di Mesopotamia. 19Topet do hatiha kehe si Laban manggusting angka biri-birina, jana disi ma ditangko si Rahel dewa parsaripeon nampuna ni amangnia i. 20Na mangakali si Laban do si Jakob umbaen na so marpaboa ia na kehe i. 21Dioban ma sude sinadongannia jana mopop noma ia na kehe i. Ditaripari ia ma Batang aek Efrat manulus ma halahi tu Dolok Gilead.

Dikojar si Laban ma si Jakob

22Dung tolu ari pe anso dipaboa tu si Laban na dung lari si Jakob. 23Jadi dipalagut si Laban ma halaknia, jana rap ma ia dohot halahi mangkojar si Jakob pitu ari honokna lopus dapot halahi ia di Dolok Gilead. 24Borngin-borngin i ro ma Debata tu si Laban di bagasan nipi mandok, “Jago ho! Ulang jabat adong hatamu sanga aha mangancam si Jakob.” 25Madung dipajongjong si Jakob hian bandarnia di sada dolok-dolok. Dung i si Laban pe dibaen ia ma bandarnia dohot halaknia i di dolok-dolok na asing di na humaliang i muse.

26Dung i didok si Laban ma tu si Jakob, “Biasi pola akalanmu au jana dilarihon ho ma antong angka borungki, songon dia ma rupani na tartangkup di porang dibaen ho halahi? 27Biasi pola akalanmu au gabe sip-sip ho kehe, nada marpaboa? Sugari marpaboa ho tu au pasti do hupatola ho laho kehe di bagasan jop ni roha jana niendean dohot musik dohot hasapi! 28Hape hum dipaummahon ho pe tu au nada pahompungki tanda ni parsirangan. Haotoan do na nibaenmi! 29Markuaso do da au mambaen na jat tu ho, tapi napotangin dipaingot Debata na nisomba ni amangmi do au anso ulang huancam ho. 30Huboto do hara ni lungun ni rohamu do tu luatmu umbaen na kehe ho, tapi biasi tangkoonmu dewa parsaripeonki?”

31Jadi dialusi si Jakob ma, “Umbaen na sip-sip pe da au kehe, hara ni na mabiar do au ditarik hamu borumunu i. 32Anggo salaho tu dewami do, muda adong dapot ho sahalak sian na dison on manangkosa, nimatehon ma i uhumanna. Pareso hamu ma sanga na adong bagi na ahamunu. Muda adong antong, buat hamu ma. Jana angka halakta be ma na gabe saksina.” Nada diboto si Jakob, hape na si Rahel do mambuat dewa ni si Laban i.

33Jadi masuk ma si Laban tu bagasan bandar ni si Jakob i laho mamareso; dung i masuk muse ma ia tu bandar ni si Lea dohot tu bandar ni naposo dadaboru na dua i, tapi nada adong dapot ia dewa i. Dung salpu i, masuk ma ia tu bandar ni si Rahel. 34Jadi di hatiha i ma dipaimbar si Rahel dewa i dipamasuk ia tu bagasan palano ni unto, hape dijuguhi ia muse do palano i. Sude ma dipareso ia bandar ni si Rahel i, hape na so dapotnia do dewa i. 35Jadi didok si Rahel ma tu amania i, “Ulang ma muruhi hamu au amang, nada tarbaen au jongjong, harana hatiha ro pantang ni abitku.” Manat ma dijalahi si Laban, hape laing nada dapot ia dewa i.

36Gabe muruk ma si Jakob, “Aha ma he hajahatan na hubaen lakna?” ning ia manyonggak. “Aturan dia ma he na hulanggar umbaen na adong hakmu dihilala ho laho mangkojar-kojar au? 37Saonnari dung sude barang-barangku abis dipareso ho, parkokas rumahtangga ni aha ma na dapot ho? Paruar bo barang i, payakkon dison anso rap diida angka halakku dohot halakmu jana anso diputuskon sanga ise do sian hita na tigor. 38Ma pola dua pulu taon au sainganan rap dohot ho, nada sundat mamopari biri-birimu dohot hambengmu, jana sada hambeng jantan pe nada unjung hupangan sian pahan-pahananmu. 39Ganop dipangan binatang panyoro sian pahan-pahananmi, matua laing na au ma manggonti harugianmu. Nada unjung huoban tu jolomu pahan-pahanan i gabe songon bukti paboa na so marsala au. Dituntut ho do sian au anso hugarari sandok na nitangko ni halak arian sanga borngin. 40Jotjot do hutaon milas ni ari, jana ngalian borngin jana jotjot nada tarpodom au. 41Songon i ma na hutaon i salolot na dua pulu taon i au karejo di ho. Opat bolas taon da karejo au anso dapot au borumunu na dua i – jana onom taon nari anso dapot au angka pahan-pahanan i. Jana dipauba-uba ho ma upangku disi pola sampulu noli muba. 42Sugari sura na so nidonganan ni Debata ni daompung au, i ma Debata na nisomba ni si Abraham dohot si Ishak, ma pasti rumar tanganku paorotonmu. Tapi madung diparrohahon Debata hasusaanki dohot parkarejoan na dung hubaen i, jana napotangin, madung dilehen Ia haputusanNa.”

Parjanjian ni si Jakob dohot si Laban

43Jadi dialusi si Laban ma si Jakob, “Borungku do da na dua i, au do nampuna dakdanak ni halahi i, jana au muse do nampuna pahan-pahanan i. Satutuna, sanga aha na niidamu dison, au ma da nampuna i. Tapi hara ni na so tarbaen au be sanga na aha laho mampartahankon angka pahompungkon, 44rade do au mambaen parjanjian dohot ho. Tole ma taatak batu songon tanda parningotan ni parjanjianta.”

45Dung i dibuat si Jakob ma sada batu, dipajongjong ia ma i gabe batu parningotan. 46Jadi disuru ia ma angka halaknia palagut batu jana diatak ma i. Dung sidung, mangan ma halahi di lambung ni batu na nisusun i. 47Digoari si Laban ma batu na niatak i, Jegar-Sahaduta,#31:47 JEGAR-SAHADUTA: Goar on sarupa pandokkonna dohot hata “na niatak gabe batu parningotan” di hata Aram. jana si Jakob digoari ia ma i, Galed.#31:47 GALED: Sarupa artina dohot na di ginjang i di hata Ibrani. 48Didok si Laban ma tu si Jakob, “Timbunan batu on ma na gabe parningotan di hita na dua.” Hara ni i do dibaen digoari inganan i Gilead. 49Laing didok si Laban muse ma, “Sai dimatai Tuhan ma hita salolot mangolu di parsirangan hita.” Jadi hara ni i, laing digoari muse ma inganan i Mispa.#31:49 MISPA: Goar on sarupa pandokkonna dohot hata “ingananta di matai” di hata Ibrani. 50Didok si Laban dope, “Muda mambaen jahat ho tu dakdanakku, sanga mangalap boru na asing, haru pe na so huboto, ingot ma na nimataan ni Debata hita. 51On ma angka batu na huatak di antara hita jana batu parningotan ma on. 52Sanga na nitimbun on pe, sanga batu parningotan i, rap tanda parningotan do i. Nada salpuanku timbunan on laho manyerang ho, jana ho pe antong, nada tola lewatanmu timbunan on dohot batu parningotan on laho manyerang au. 53Debata na nisomba ni si Abraham jana na nisomba ni damang si Nahor ma na gabe panguhum di hita.” Dung i marjanji muse ma si Jakob mangasahon goar ni Debata na nisomba ni si Ishak amangnia i jana marsumpa ma ia paboa na marsitutu do ia maniop janji i. 54Disambol ia ma sada pahan-pahanan jana dihaulkon ia ma gabe songon haul na nitutung di ginjang ni dolok i. Diontang ia muse ma angka halaknia rap mangan. Dung abis mangan, marborngin di dolok i ma halahi. 55Ancogotna i manyogot dope, diummai si Laban ma angka pahompunia i, dohot borunia i tanda ni parsirangan, jana dipasupasu, lalu kehe ma ia mulak tu inganannia.

Currently Selected:

PAMUNGKAAN 31: LAIAKB

Highlight

Copy