PAMUNGKAAN 28

1Dung i dipiohon si Ishak ma si Jakob, dijalang ia ma jana didok ia, “Ulang alap boru Kanaan. 2Tu Mesopotamia ma ho kehe tu bagas ni ompungmu si Betuel jana boru ni tulangmu si Laban ma buat sahalak di ho. 3Sai dipasupasu Debata Na Gumogo i ma parsaripeonmunu jana dilehen ma di ho hagabean maranak marpahompu ho anso gabe ompu ni bahat bangso ho! 4Sai dipasupasu Tuhan ma ho dohot pomparanmu songon pamasumasu ni Tuhan di si Abraham jana sai ho ma nampuna tano na niingananmon, tano na dung dipahot ni Debata tu si Abraham!” 5Jadi songon i ma dipabuat si Ishak anakna si Jakob tu Mesopotamia mandapotkon si Laban anak ni si Betuel halak Aram i. Iboto ni si Laban ma da si Ribka inang ni si Jakob dohot si Esau i.

Mangalap boru mangulahi si Esau

6Tarbege ma tu si Esau na dung dipasupasu si Ishak si Jakob jana madung dipabuat ia anso kehe tu Mesopotamia laho manjalahi boru disi. Dibege si Esau muse do, di na nipasupasu ni si Ishak si Jakob, diantahi ia do si Jakob mangalap boru Kanaan. 7Diboto si Esau muse do pangoloi ni si Jakob di hata ni ama dohot inangna di na kehe ia tu Mesopotamia. 8Jadi baru pe anso diboto si Esau, hape na so tumbuk do di roha ni amangnia si Ishak boru Kanaan, 9jadi kehe ma ia mandapotkon si Ismael anak ni si Abraham jana dibuat ia ma boru ni si Ismael, na margoar si Mahalat anggi ni si Nebayot.

Marnipi si Jakob di Betel

10Ditinggalkon si Jakob ma Berseba jana kehe ma ia tu Haran. 11Di na sundut mataniari, lalu ma ia tu sada inganan, disi ma ia marborngin. Dipapodom ia ma disi, marbantalkon sada batu. 12Dung i marnipi ma ia, songon na niidania ma sada tangga lalu tu langit ujungna i jana manaek mijur ma angka surusuruan di tangga i. 13Jana di lambungna i jongjong ma Debata mandok, “Au ma da Debata na nisomba ni si Abraham dohot si Ishak. LehenonKu ma di ho dohot di pomparanmu tano inganan na nipodomanmon. 14Songon bahat ni abuan na di tano on ma bahat ni pomparanmu. Pabidangonmu ma tano ni halahi tu ganup humaliang, jana markite-hite ho dohot pomparanmu, pasupasuonKu ma sude bangso na di tano on. 15Ingot ma! Sai na dongananKu do ho jana ondihononKu sanga na tu dia pe ho kehe, jana obanonKu do ho mangulahi tu luat on. Nada tadingkononKu ho lopus Hupatulus sude sanga aha na Hujanjihon tu ho.”

16Jadi tarsunggul ma si Jakob jana didok ia ma, “Dison, di inganan on do Tuhan, tapi on dope anso huboto!” 17Jadi gabe mabiar ma ia, ning ia ma, “Na hebat ma antong inganan on! Pasti on do bagas ni Debata; pasti on do horbangan ni banua ginjang.”

18Ancogotna i andostorang dope, ngot ma si Jakob, dibuat ia ma batu na niparbantalnia i, dipajongjong ia ma i gabe batu parningotan. Dung i diduruskon ia ma miak zetun tu ginjang ni batu i laho mambaensa gabe hapunjungan ni Debata. 19Dibaen ia ma goar ni inganan i Betel.#28:19 BETEL: Di hata Ibrani, hata on astuanna “bagas ni Debata”. (Lus hian do goar ni kota on na salpu i.) 20Jadi marsumpa ma si Jakob tu Debata, “Muda didongani jana diondihon Ho au di pardalanankon jana dilehen Ho panganon dohot pakean 21di au lopus mulak au tu bagas ni damang horas torkis, Ho ma gabe Debatangku. 22Jana lehenonku ma di Ho saparsampulu ni sandok na nilehenMu di au. Batu parningotan, na hupajongjong on, gabe inganan parsombaan tu Ho ma i.”

Currently Selected:

PAMUNGKAAN 28: LAIAKB

Highlight

Copy