PAMUNGKAAN 25

Pomparan ni si Abraham sian ina na asing

(1 Juj. 1:32-33)

1Mangalap boru dope mangulahi si Abraham, i ma sada anak boru na margoar si Ketura. 2Ditubuhon ripenia i do angka anak na margoar: Si Zimran, si Joksan, si Medan, si Midian, si Isbak dohot si Suah. 3Si Joksan ma amang ni si Seba dohot si Dedan, jana pomparan ni si Dedan, i ma halak Asur, halak Letus dohot halak Leum. 4Angka anak ni si Midian i ma: Si Efa, si Efer, si Hanokh, si Abida dohot si Eldaa. Pomparan ni si Ketura ma i sudena.

5Haru pe na nipateankon ni si Abraham sude sinadongannia tu si Ishak, 6dompak di ngolunia bahat do diparleheni ia silehen-lehen tu angka dakdanaknia na nitubuhon ni angka dongan saripenia na asing i. Dung i disuruhon ia ma angka dakdanaknia i marpindaan tu luat Habincaran ni Kanaan, anso dao be sian si Ishak anaknia i.

Marujung ma ngolu ni si Abraham jana dikubur

7-8Marujung ma ngolu ni si Abraham dung matobang situtu ia, di na marumur saratus pitu pulu lima taon. 9Dikuburkon si Ishak dohot si Ismael anaknia i ma ia di Liang Mahpela, di ladang na di Habincaran ni Mamre, i ma nampuna ni si Efron hian anak ni si Zohar halak Het i. 10Na nitobusan ni si Abraham do ladang i sian halak Het, si Sara pe dongan saripe ni si Abraham i, laing disi do dikuburkon. 11Dung jumolo si Abraham, dipasupasu Debata ma si Ishak anak ni si Abraham i, na maringanan hatiha i di lambung ni sumur na margoar, “Na Mamparrohahon Au”.

Pomparan ni si Ismael

(1 Juj. 1:28-31)

12On ma pomparan ni si Ismael anak ni si Abraham na nitubuhon ni si Hagar boru Mesir hatoban ni si Sara i. 13Songon on ma parjojorna angka anak ni si Ismael mangihutkon partubuna: Si Nebayot, si Kedar, si Adbeel, si Mibsam, 14si Misma, si Duma, si Masa, 15si Hadad, si Tema, si Jetur, si Nafis dohot si Kedma. 16Halahi ma ompu ni dua bolas marga jana dipanggoarkon ma angka goar ni halahi gabe goar ni huta dohot inganan parbandaran ni halahi. 17Marumur saratus tolu pulu pitu taon ma si Ismael di na marujung ngolunia. 18Di holang-kolang ni Hawila dohot Sur do maringanan pomparannia i, i ma di Habincaran ni Mesir tu Asur. Marsirang do halahi sian pomparan ni si Abraham na asing i.

Hasosorang ni si Esau dohot si Jakob

19On ma barita ni si Ishak, anak ni si Abraham. 20Marumur opat pulu taon ma si Ishak di na marripe ia dohot si Ribka, iboto ni si Laban, boru ni si Betuel. (Halak Aram na di Mesopotamia do anggo si Betuel.) 21Dibaen nada maruntungan si Ribka, martangiang ma si Ishak tu Tuhan salaho tu dongan saripenia i. Jana dipatalus Tuhan do tangiang ni si Ishak i, jana denggan ma pamatang ni si Ribka. 22Linduat do na di pamatangnia i. Jadi dompak so sorang dope dakdanak i, marsiranggut do halahi na dua di bortian. Ninna si Ribka ma, “Muda songon i, biasi luai mangolu au?” Jadi diparsapahon ia ma i tu Tuhan.

23Didok Tuhan ma tusia,

“Adong dua bangso di bagasan bortianmu;

tubuhononmu ma dua bangso na marsialoan;

gumogo do sianggian i sian angkangna

oloan ni siangkaan i ma siampulan i.”

24Dapot ma arina hipas ma si Ribka, jana sorang ma dua anaknia halaklahi silinduat. 25Songon na rara tompa ni siangkaan i jana songon baju na marimbulu do huling-kulingna i. Hara ni i, digoari ma i si Esau.#25:25ESAU: Didodo roha, mardomu do goar on dohot Seir, i ma luat na niinganan ni pomparan ni si Esau di pudi ni ari. Seir sarupa do sora i di hata Ibrani, “marimbulu” artina. 26Di na sorang anak paduahon i, ditiop ia do togu tambihul ni si Esau. Hara ni i ma da digoari ia si Jakob.#25:26JAKOB: Sarupa do begeon goar on tu hata na mandok “tambihul” di hata Ibrani. Marumur onom pulu taon ma si Ishak di na sorang na dua i.

Digadis si Esau ma haknia songon siangkaan

27Mur magodangi ma dakdanak na dua i. Gabe parburu na utusan ma si Esau jana sai di padang ma por ni rohania maringanan; tapi anggo si Jakob, tenang do ia jana sai di bagas ma nian giotnia. 28Humolong do roha ni si Ishak mida si Esau, harana hagiot ni si Ishak do mangankon juhut ni binatang na niburu. Tapi anggo si Ribka tu si Jakob do humolong rohania.

29Sanoli hatiha mangalompa kacang na rara si Jakob baen ingkayu, ro ma da si Esau sian parburuan. Ma male sajo ia. 30Jadi didok ia ma tu si Jakob, “Ma sun malena huhilala, lehen ma jolo di au saotik kacang na rara-rara i.” (Hara ni i ma umbaen na nigoaran ia si Edom.)#25:30EDOM: Pandok ni goaron, sarupa do begeon di hata Ibrani dohot hata “rara”, astuanna.

31Dialusi si Jakob ma, “Ra do au mangalehen di ho, muda ra ho mangalehen hakmu songon anak siangkaan tu au.”

32Didok si Esau ma, “Ahana ma he di au hak na songon i. Ma pola satonga mate huhilala na malean on!”

33Didok si Jakob ma, “Sumpahon ma jolo paboa na nilehenmu di au hakmi.”

Marsumpa ma si Esau jana dilehen ia ma haknia i tu si Jakob. 34Dung i dilehen si Jakob ma tusia roti dohot ingkayu i deba. Mangan ma si Esau jana minum lalu kehe ma ia. Songon i ma nayang ni roha ni si Esau di haknia songon anak siangkaan.

Currently Selected:

PAMUNGKAAN 25: LAIAKB

Highlight

Copy