PAMUNGKAAN 18

Dijanjihon Debata muse sada anak tu si Abraham

1Dipataridahon Tuhan ma diriNa tu si Abraham di lambung ni harangan inganan ni paribadatan na di Mamre. Santak milas ni ari hatiha i, jana topet ma si Abraham juguk di pintu ni bandarnia i. 2Di na nipadorgaknia ulunia, diida ia ma adong tolu halak jongjong di jolonia. Disi diida si Abraham halahi, marlojong ma ia laho mangalo-alo halahi. 3Manungkap ma ia laho mandok hata ning ia ma, “Angka tuanku, ulang ma laosi hamu bagasku so jolo maradian tu bagas, jop ma rohamunu huoloi hamu. 4Paloas hamu ma jolo au laho mangalap aek pamasu ni patmunu, jana di toru ni hayu on ma hamu jolo marsilaung maradian. 5Huparade ma jolo nanggo pala indahan sangaum anso margogo na imbaru hamu patoruskon pardalananmunu. Dapotan sangap do au di na maradian on hamu tu bagaskon, hara ni i paloas hamu ma jolo huoloi hamu.”

Dialusi halahi ma, “Tarimakasi ma da, hami jagit ma pangidoanmi.”

6Diompoti si Abraham ma masuk tu bagasan bandarnia i jana didok ia ma tu si Sara, “Ompoti ma buat topung na dumenggan, tutung ma roti intap ni na tuk.” 7Dung i dilojongi ia ma tu habanan ni pahan-pahanannia, dipili ia ma sada anak ni lombu na mokmok jana na jeges juhutna, dilehen ia ma tu parkobasnia, na paradehonsa manigor. 8Dibuat si Abraham ma susu, dohot susu na mata dohot juhut ni anak ni lombu sinangkin, dipasahat ia ma tu jolo ni angka tamunia i. Si Abraham sandiri do mangoloi halahi di toru ni hayu i di na mangan i halahi.

9Dung i marsapa ma halahi, “Di dia lakna si Sara ripemi?” “Di sadu do di bagasan bandar i,” ning si Abraham.

10Didok sada halak ma sian halahi, “Di hatiha songon on ma giot mulak ro au mandapotkon ho. Jana disi ma adong anak halaklahi di si Sara ripemi.”

Topet do di hatiha i si Sara manangihon di pintu ni bandar i, di pudinia. 11Madung tobang sajo si Abraham dohot si Sara jana si Sara pe madung manyampul. 12Jadi gabe martata ma si Sara di bagasan rohania, didok ia ma, “Saonnari dung matobang au boti madung markerut, adong dope luai jop ni roha di au rap dohot halaklahingku boti na dung matobang?”

13Jadi disapai Tuhan ma tu si Abraham, “Biasi martata si Sara jana ganggu ia sanga na tarbaen ia dope manubuhon anak, hara ni na dung matobang ia? 14Adong ma he pangalaho bagi aha na maol di Tuhan lakna? Di hatiha na dung ditontuhon, giot mulak ro Au mandapotkon ho di taon na ro, jana adong ma anak di si Sara.”

15Jadi hara ni biar ni si Sara, disoadahon ia ma i, ning ia ma, “Nanggo na martata Au.”

Tapi dialusi Tuhan i ma, “Tutu ma da ho martata.”

Mangido ampun si Abraham salaho tu Sodom

16Dung i kehe ma tamu na tolu i dipataru si Abraham. Jadi lalu ma halahi tu sada inganan, tartatap ma tu Sodom sian i. 17Dung i didok Tuhan ma di bagasan rohaNia, “Nada pola bunihononKu tu si Abraham sanga aha na giot baenonKu. 18Gabe bangso na godang jana na markuaso do pomparannia; jana hara ni ia pasupasuonKu ma sude bangso na di tano on. 19Na Hupili do ia anso diparentahon ia tu angka dakdanaknia dohot tu pomparannia anso oloanna Au bope patulusonna sanga aha na denggan dohot na tigor. Muda mangoloi halahi, gohanKu ma janjingKu tu si Abraham.”

20Dung i didok Debata ma tu si Abraham, “Adong do tuhas-tuhas na borat tu Sodom dohot Gomora, jana na lobi dokdok do tehe dosa ni halahi. 21Na giot manuat do Au tu sadu anso Huboto sanga na tutu do, sanga nada angka tuhas-tuhas na Hubege i.”

22Jadi kehe ma dua halak sian tamu na tolu i laho tu Sodom, tapi anggo Tuhan laing rap dope dohot si Abraham. 23Dipadonok si Abraham ma mandapotkon Tuhan jana marsapa ma ia, “Tutu dehe lakna na giot abiskononMu halak na so marsala rap dohot halak na marsala? 24Sugari sura adong lima pulu halak na so marsala di kota i, laing abiskononMu dehe lakna sude kota i? Na so ra be lakna Ho mangampuni anso malua silima pulu halak i? 25Pasti do na so ra Ho mamunu angka halak na so marsala i rap dohot na marsala. Inda masuk di akal! Inda mungkin ra Ho mambaen songon i. Sugari sura dibaen Ho songon i, gabe sarupama angka halak na so marsala dohot na marsala. Hape nian matua na tigor do anggo Panguhum ni sandok na adong.”

26Dung i didok Tuhan i ma, “Sugari adong dapot Au lima pulu halak na tigor di Sodom, ampunanKu do sude na sakota i hara ni halahi.”

27Dialusi si Abraham ma, “Mangido ampun ma au dibaen mabarani tu do au mangkatai dohot Tuhan haru pe hum jolma sajo iba na so tola nian mandok bagi aha. 28Tapi aropku hum opat pulu lima halak do na so marsala jana nanggo lima pulu halak. Laing abiskononMu ma he sude kota i hum hara ni na marsala lima halak?”

Didok Tuhan ma, “Nada abiskononKu kota i sugari adong dapot Au opat pulu lima halak na so marsala disi.”

29Didok si Abraham ma mangulahi, “Bia do sugari adong opat pulu halak?”

Dialusi Tuhan ma, “Sugari adong opat pulu halak nada abiskononKu kota i.”

30Didok si Abraham ma, “Ulang Ho muruk ale Tuhan, angkon laing mandok hata dope au mangulahi. Bia sugari adong hum tolu pulu halak sajo?”

Dialusi Tuhan i ma, “Muda adong dapot Au tolu pulu halak nada patulusonKu i.”

31Didok si Abraham ma, “Mangido ampun ma au o Tuhan hara ni habaranionkon mandatdati manghatai dohot Ho. Sugari adong dapot hum dua pulu halak sajo?”

Didok Tuhan i ma, “Muda adong dua pulu halak dapot Au, nada pola abiskononKu kota i.”

32Didok si Abraham ma, “Ulang ma da muruk Ho ale Tuhan, hum sanoli on noma dokkononku. Bia muda adong dapot hum sampulu halak sajo?”

Didok Tuhan ma, “Muda adong sampulu halak na so marsala, nada pola abiskononKu kota i.” 33Dung sidung manghobari dohot si Abraham kehe ma Tuhan jana mulak ma si Abraham tu bagasnia.

Currently Selected:

PAMUNGKAAN 18: LAIAKB

Highlight

Copy