PAMUNGKAAN 15
15
Parjanjian ni Tuhan dohot si Abram
1Dung i dijagit si Abram ma sada halumbaan, jana dibege ia ma Tuhan mandok tusia, “Ulang ho mabiar Abram, Au do mangondingi ho sian parmaraan, jana lehenonKu ma tu ho upa bahat.”
2Tapi didokkon si Abram ma, “Iale Tuhan Debata, aha ma he guna ni upaMi di au, anggo so na adong anakniba? Hum si Elieser halak Damaskus i ma na manean au. 3So na adong anak dilehen Ho di iba, gabe sahalak sian hatoban i ma na manean sinadonganki.”
4Dung i dibege si Abram ma mangulahi hata ni Tuhan tusia, “Nanggo hatobanMi na manean sinadonganmi, tapi anakmu sandiri do na gabe panean di ho.” 5Dioban Ia ma si Abram tu ruar jana didok Ia ma tusia, “Tatap ma tu langit, jana etongi ma jolo angka bintang i: Songon i ma bahat ni pomparanmu sogot.”
6Porsaya do si Abram tu Tuhan, jana dietong ma i disia gabe hatigoran.
7Dung i didok Tuhan ma tusia, “Au ma da Tuhan na mangiring-iring ho ruar sian tano Ur na di Babilonia, anso Hulehen luat on gabe tanomu.”
8Tapi disapai si Abram ma, “Iale Tuhan Debata, bia ma hubaen mamboto paboa na giot au nampuna tano i?”
9Ninna Tuhan mangalusi, “Buat ma di Au sada lombu, sada hambeng boru-boru dohot sada hambeng jantan na marumur tolu taon dohot sada balam dohot sada darapati.” 10Dibuat si Abram ma angka binatang i di Debata; dibola dua ia ma lombu i dohot hambeng na dua i jadi dipayakkon ia ma bola-bolana i paadop-adop dua baris. Tapi anggo unggas i nada dibola dua ia. 11Dung i marsonggopan ma angka unggas sipangan bangke di juhut ni angka binatang i, tapi diusir si Abram do.
12Di na mamungka lusut mataniari, tarpodom ma si Abram sinok. Dung i gabe digohi biar ma pangkilalaan ni si Abram. 13Didok Tuhan ma tusia, “Gabe paisolat ma pomparanmu di luat na asing; gabe hatoban ma halahi disi jana taonon ni halahi ma na hancit opat ratus taon honokna. 14Tapi uhumonKu do bangso na marhatobankon pomparanmu; jana di na manadingkon luat i pomparanmu, obanon ni halahi ma bahat arta sinadongan. 15Ho sandiri pe, jagitonmu ma umur na ginjang, sonang ma parmatemu torus dikuburkon. 16Dung opat sundut pe anso mulak mangulahi pomparanmu tuson, angke nada paorotonKu dope halak Amori painte so santak jahat ni halahi anso tumbuk uhumon.”
17Dung borngin tompu ma tarida sada dalihan na martimus dohot obor na gara, na mamolus di antara ni bola-bolaan ni juhut i. 18Laing di hatiha i ma dibaen Tuhan parjanjian dohot si Abram. Ninna Tuhan ma, “Marjanji ma Au laho mangalehen tano on sudena di pomparanmu, mamungka sian batas ni Luat Mesir lopus tu Batang aek Efrat, 19masuk ma disi tano ni halak Keni, Kenas, Kadmon, 20Het, Peris, Refaim, 21Amori, Kanaan, Girgasi dohot Jebus.”
Currently Selected:
PAMUNGKAAN 15: LAIAKB
Highlight
Share
Copy
Want to have your highlights saved across all your devices? Sign up or sign in
Indonesian Bible Society
