PAMUNGKAAN 13
13
Marsirang ma si Abram dohot si Lot
1Kehe ma si Abram sian Mesir jana tu Utara ma diparayak ia tu bagian Selatan ni Kanaan dohot dadaborunia dohot sude sinadongannia jana ihut do si Lot dohot ia. 2Kayo situtu do si Abram, adong do biri-birinia, hambeng, lombu songon i muse perak dohot sere. 3Jadi kehe ma ia sian inganan na sada tu inganan na asing mandapotkon Betel. Lalu ma ia tu antara ni Betel dohot Ai, i ma luat na niinganannia na salpu i pajongjong undung-undungnia 4dohot langgatan. Disi ma ia manyomba Tuhan.
5Si Lot pe adong do dongan sabagasnia dohot angka hatoban, bope biri-biri, hambeng dohot lombu. 6Jadi hara ni i nada tuk be angka ruput na di padang-padang i muda rap halahi na dua sainganan, harana madung mabahattu pahan-pahanan ni halahi. 7Gabe martangkangi ma angka parmahan ni si Abram dohot parmahan ni si Lot. (Laing maringanan dope hatiha i halak Kanaan dohot halak Peris disi.)
8Dung i didok si Abram ma hatana tu si Lot, “Na markahamaranggi do hita, nada denggan muda sai martangkangi angka halak na adong di ho dohot halakku. 9Jadi gumonan ma hita marsirang. Ho ma mamili sanga na dia giotmu bagianmu. Muda sabola on do di ho, anso tu na asing au kehe.”
10Jadi ditatap si Lot ma humaliang jana diida ia ma sude rura ni Jordan lopus tu kota Zoar, bahat aek disi, songon kobun ni Tuhan sanga songon tano Mesir. (Di hatiha i nada disegohon Tuhan dope kota Sodom dohot Gomora.) 11Gabe dipili si Lot ma sude rura ni Jordan disia, jana kehe ma ia sabola Habincaran. Gabe marsirang ma halahi na dua. 12Anggo si Abram laing tinggal do di tano Kanaan, hape anggo si Lot mambaen undung-undung di holang-holang ni angka kota na di rura i lalu tu lambung ni Sodom. 13Na jahat do halak Sodom jana mardosa maradopkon Tuhan.
Mimbar ma si Abram tu Hebron
14Dung kehe si Lot, didok Tuhan ma tu si Abram, “Sian tano hajongjonganmi, tatap ma tangkas humaliang; 15lehenonKu ma tu ho dohot tu pomparanmu sude tano na niidami anso gabe ho nampunasa salolot-lolotna. 16LehenonKu ma di ho bahat pomparanmu, jabat nada adong sahalak pe na tarbaen mangetongsa. Songon abu na di tano i, na so adong halak na sanggup mangetongsa, laing songon i ma pomparanmu nada taretong sanga ise. 17Saonnari pe, kehe ma ho, haliangi ma sude tano i harana na giot lehenonKu ma i di ho.” 18Dung i dipaimbar si Abram ma inganan ni undung-undungnia jana maringanan di lambung ni harangan inganan paribadatan na di Mamre donok tu Hebron ma ia torus. Jana disi ma dipajongjong ia langgatan di Tuhan.
Currently Selected:
PAMUNGKAAN 13: LAIAKB
Highlight
Share
Copy
Want to have your highlights saved across all your devices? Sign up or sign in
Indonesian Bible Society
