HARURUAR 4

Dilehen Debata kuaso tu si Musa mambaen hahomangan

1Dung i ninna si Musa ma mangalusi Debata, “Bia ma muda nada porsaya halak Israel jana nada ditangihon halahi hatangku? Aha ma sibaenonku muda didok halahi nada adong ro Tuhan tu au?”

2Disapai Debata ma si Musa, “Aha na di tanganmi?” “Tungkot,” ning si Musa.

3Didok Debata muse, “Danggurkon ma tu tano i.” Didanggurkon si Musa ma tungkot i dung i gabe ulok, jabat marlojong si Musa dipadao ia dirinia. 4Didok Debata ma tu si Musa, “Surduhon ma tanganmi, jana tangkup ma lalai ni ulok i.” Disurduhon si Musa ma tangannia laho manangkup ulok i, dung i gabe tungkot ma mangulahi ulok i di tangan ni si Musa. 5Ninna Debata ma, “Baen ma songon i mambuktihon tu halak Israel bahaso Au do, Tuhan Debata ni ompu ni halahi, Debata ni si Abraham, si Ishak dohot si Jakob na dung ro manopot ho.”

6Dung i didok Debata ma mangulahi tu si Musa, “Pamasuk ma tanganmu tu bagasan bajumi.” Dioloi si Musa songon i, tapi dung ditarik ia tangannia, madung puruon, gok turik-turik na bontar songon hapas. 7Dung i didok Debata ma, “Pamasuk mangulahi tanganmu tu bajumi.” Dioloi si Musa ma, dung ditarik ia mangulahi tangannia i, madung mulak jeges songon na somal. 8Didok Debata, “Muda so porsaya halahi tu ho, jana nada porsaya halahi di tanda hahomangan na parjolo gabe porsaya ma halahi hara ni tanda hahomangan na paduahon. 9Muda laing so porsaya do halahi di ho, haru pe madung diida halahi tanda hahomangan na dua i, jana nada ditangihon halahi hatamu, buat ma aek saotik sian Batang aek Nil lalu usehon tu tano i. Muba ma aek i gabe mudar.”

10Ninna si Musa ma, “Iale Tuhan, nada malo au manghobari, bope saonnari, sian dung mangkatai Tuhan dohot au, dokdok do dilangku, lambat do au mangkatai nada gartip.”

11Didok Debata ma tusia, “Ise dehe na mangalehen pamangan tu jolma. Ise muse dehe mambaen jolma i ngungu sanga maingol? Ise mambaen marnida sanga mapitung? Nada he Au, Tuhan? 12Saonnari, kehe ma ho, Au do manolong dohot mangajari ho sanga aha pe sidokkononmu.”

13Tapi dialusi si Musa ma, “Pangidoanku, ulang ma au suruhon Tuhan, tapi suru ma halak na asing.”

14Gabe muruk ma Debata, lalu didok Ia tu si Musa, “Bia do si Harun, angkangmu halak Levi i? Huboto do, na malo do ia manghobar. Ligi da, madung ro ia giot marsuo dohot ho, jop do rohania marsuo dohot ho. 15Manghobari ma ho dohot ia, paboa ma tusia aha sidokkononnia. Huurupi pe hamu na dua jana Huajari pe mandok sanga aha sidohononmunu dohot sibaenonmunu. 16Angkon songon gonti ni goarmu do ia mandok hata tu rayat i. Ia ma na palalu hatamu, jana ho ma gabe songon Debata laho mandokkon sanga aha na giot dohononna. 17Oban ma tungkot i, baenonmu ma angka hahomangan marhite i.”

Mulak si Musa tu Mesir

18Mulak ma si Musa tu bagas ni si Jetro tulangna i, ning ia ma, “Paloas hamu ma mulak au tu Mesir laho mangaligi angka kahanggingku sanga na mangolu dope halahi.” Dioloi si Jetro do i jana dipaloas ia kehe si Musa.

19Dompak di Midian dope si Musa, didok Debata ma tusia, “Mulak ma ho tu Mesir. Sude jolma na giot mamunu ho hian, madung mate.” 20Dung i dialap si Musa ma dadaborunia dohot angka anaknia jana dipajuguk ia tu halode asa kehe ma halahi tu Mesir jana maroban tungkot na nidok ni Debata obanonnia.

21Didok Debata ma tu si Musa, “Madung Hulehen di ho kuaso mambaen angka tanda hahomangan. Jadi dung mulak ho tu Mesir sanoli on, angkon baenonmu do sude tanda hahomangan i di jolo ni raja Mesir i. Tapi mur patangkangonKu do rohana, gabe nada loasonnia kehe bangso i. 22Dokkon ma tu raja i bahaso Au Tuhan, martona songon on, ‘AnakKu siangkaan do bangso Israel, 23jana madung Huparentahon tu ho, laho paloaskon kehe anakKi anso tarbaen halahi mangoloi Au, hape nada dioloi ho. Hara ni i bunuonKu ma anakmu siangkaan i.’ ”

24Di tonga dalan di sada parbornginan, ro ma Debata giot mamunu si Musa. 25Dibuat si Zipora dadaborunia i ma batu na tajom, dihorotkon ia ma tu sibur-sibur ni anaknia i, jana didaiskon ia ma tu pat ni si Musa. Ninna si Zipora, “Pangoli mudar do ho di au.” 26Didok ia pe songon i na mardomu do i tu parsunaton i. Gabe laing dipadiar Debata ma mangolu si Musa.

27Di hatiha i didok Debata ma tu si Harun, “Kehe ma ho tu halongonan anso marsuo ho dohot si Musa.” Dung i kehe ma si Harun mandapotkon angginia i di dolok na badia. Di na marsuo i halahi diumma si Harun ma si Musa. 28Dung i dibaritahon si Musa ma tu si Harun sude na nidok ni Tuhan, dompak na disuru ni Tuhan ia mulak tu Mesir, dohot tanda hahomangan na giot baenonnia. 29Dung i kehe ma si Musa dohot si Harun tu Mesir, jana dipalagut halahi ma sude hatobangon ni Israel. 30Dung i dipabolkas si Harun ma tu halahi sude na nidok ni Debata tu si Musa, jana dipatidahon si Musa ma tanda hahomangan i di jolo ni halahi. 31Gabe porsaya ma halahi boti dung dibege halahi bahaso na dung ro hape Debata marnida sude parkancitan ni halahi, dipaunduk halahi ma marsomba tu Debata.

Currently Selected:

HARURUAR 4: LAIAKB

Highlight

Copy