Zónà 3
3
Zónà e Yàwɛ wè kɛ
1Zéniía Yàwɛ wéèe e nu Zónà píé kpolà pèèlɛ zɛ̀ wéa kélɛ̀, 2“Ì wɛ̀lɛ̀, í ló Nínívɛ̀ pɛ́lɛ gbùòa yí, í wè vɔ lɛ́ ma dɔ i káa gèe o lɛ̀ɛ.” 3Lɛ̀ e kɛ kília, Zónà e Yàwɛ wè kɛ e lo Nínívɛ̀ pɛlɛí. Pɛ́lɛ gbùò e kília, lɛ́ɛ̀ mia si lúó yààka ká kɛɛ o tàà à yí ó lé gbɛ̃̀ 4Zónà, e táá lúó doó píé pɛ́lɛɛ yi, lɛ́ e gbɛ̃̀ áà gèe wèa kélɛ̀, “Lúó vũ̀-yììsɛ yíí wià, Nínívɛ̀ yí lɛ́ɛ̀ lo sìè.”
5Míá o kɛ Nínívɛ̀ɛ o Wálà wɔ̃̀ sí wánà, lɛ́ wa yà o gé kɛɛ o o bè tó, lɛ́ o ɓɔ̀ɔ́ sɔ dà o mɔ̀ kɛ ó yà yéĩ́zɛ̀, é kã́ mia gbùò gbùò mɔ̀ é lo é ɓɔa mia kélé kélé mɔ̀ kɛ á zɔ̃ kélɛ̀ wáà dà o yéĩ yia.
6Lɛ̀ e kɛ kília, wɔ̃́ làṹa séĩ́ e ɓɔ kĩ́ĩ̀ lɛ́ e kɛ Nínívɛ̀a mɔ̀. Lɛ́ e wɛlɛ là dɔ-táŋáná yí, lɛ́ e là kĩ́ĩ̀ sɔ ɓo e mɔ̀, lɛ́ e ɓɔ̀ɔ́ sɔ dà e mɔ̀, lɛ́ e yà yúé ɓaa. 7Lɛ́ e tɔ̃ũ̀ kpɔ, wáá gèe, Nínívɛ̀ pɛ̀lɛ̀ lɛ̀ séĩ́ mɔ̀. Wɔ̃́ lɛ́ kĩ́ĩ̀ wá o kɔ píé mìà wá gèea gɛ̃̀ e ké, “Yékɛ mì nɔ̀ɔ fé, ɛ̃́ɛ̃́ wii nì, ɓáá nì, ɛ̃́ɛ̃́ tòlòpɛ̀ nì, o pɛ nɔ́ɔ fé dã. Yé kɛ o ɓèlè pɛ̀, ɛ̃́ɛ̃́ yíí nɔ́ɔ fé mi. 8Kɛɛ mía ɓéèe wà tòlòpɛ̀ nì ɓɔ̀ɔ́ sɔ e kɛ dàa ká o mɔ̀, o sɛ̀nɛ ɓo gágà Wálà lɛ̀ɛ. Kɛɛ mia séĩ́ o gó wà kɛ wɔ̃̀ yɔɔ mɔ̀, e kpaa à ká o zì gãna wɔ̃̀ lɛ́ lɛ̀ o kɔ píéa mɔ̀. 9Kéa dé a yí dɔ, kélɛ̀ lúó dò káa Wálà lɛ́ɛ̀ lo e zò mɛ́ vɔɔ, kɛɛ e kã́ la wɔ̃́a wàa sùa mɔ̀, yé kɛ kɔa yí é nu sìè?”
10Yé Wálà e wɔ̃́ lɛ́ wá kɛɛ gɛ̃̀, ɛ̃́ɛ̃́ lɛ̀ zí o o ko gbɛ̃ à ká wà sɔ̃̀ɔ̃ yɔɔ mɔ́ɔ̀ wɔ̃̀ mɔ̀ɔ gɛ̃̀ɛ̃, Wálà e e zò mɛ́ vɔɔ, wɔ̃́ yɔɔ lɛ́ a yà e gé a kɛ o káa mɔ́ɔ̀ wɔ̃̀ ká.
Currently Selected:
Zónà 3: MHB
Highlight
Share
Copy
Want to have your highlights saved across all your devices? Sign up or sign in
