Fèlépĩ̀ã̀ 2

Kɛ́lɛ̀ì e e dìè sí péĩ́ kɛ é tĩã́ kɛɛ̀ kpànazɛ̀

1Ka zì kɛ̀ ɓe Kɛ́lɛ̀ì yía, lɛ́ɛ̀ ka mɛ́ kɛ̀ gágà kàáà? Ka zì lɔ̀ lɛ́ à kpɔ́ɔ̀ lɛ à mɔ̀ɔ, lɛ́ɛ̀ ka zò yà ka gé? Kà Gɛ̀ɛ̀ Púlú nì káà tàà-kíe-píé kɛ̀? Ka zò lɛ sɛ̀ ka kíe nì ká, káà ka kíe nì yéĩ̀ kũ̀? 2Lɛ̀ lɛ kília, kà m zì géli kɛ à lé é pa. Kà wɔ̃́ e kéa kɛ kíli ka zì yɛ́lɛ́-tàà-yí-wɔ̃̀ kɛ̀ doó, ɛ̃́ɛ̃́ dɔ́ kà ɓo lɔ̀-kɛ̀à-mɔ̀ doó yíaò, ɛ̃́ɛ̃́ zeĩ́ ka zì zò wà ka zì yɛ́lɛ́-táá kɛ̀ doó kolo là zàá. 3Yékɛ̀ ká wɔ̃́ nɔ́ɔ fé kɛ nàà-ka-dìè ká, e bɛ̀i, lé-gbùò-là kɛ̀ ka dìè mɔ́ɔ̀ wɔ̃̀ mɔ̀ kolo là. Kɛɛ kà ka dìè sí péĩ́, ɛ̃́ɛ̃́ yékɛ̀ ɓá gɛ̃̀ ɓɔ̀ɔ i kpeĩ í diá mia yé o tóa là. 4Yékɛ̀ í gbũ̀-i-dìè doó mɔ̀ wàà ɓèlè. Kɛɛ kà wàa ɓèlè ka kíe nì mɔ́ɔ̀ wɔ̃̀ mɔ̀ nɔ́ kíli. 5Yɛ́lɛ́-táá lɛ́ e kɛ Kɛ́lɛ̀ì Zízɛ̀ mɔ̀ɔ, lɛ́ lɛ à mɔ̀ é kɛ ka mɔ̀ɔ. Ye lɛ́ e kélɛ̀,

6E kɛ teele lɛ̀ Wálà lɛ́ ɓe.

Kɛɛ lɛ̀ɛ́ gbaa e yɛ́lɛ́ táá kélɛ̀ bɛ̀i lɛ́ à ɓoò lɛ Wálà píéa, lɛ pɛ́ e kɛ à mɔ̀ á kṹ gana káa ká.

7Kɛɛ e e kɔ̀ ɓo pɛ séĩ́ wì, áà e dìè kɛ̀ lɛ̀ yɛɓo-kɛ̀-mi-mɔ̀ mì lɛ́ ɓe.

E kɛ lɛ̀ mi lɛ́ ɓe.

Ɛ́ɛ̃́ à kɛɛ̀ e kɛá lɛ̀ mi gbunu lɛ́ ɓe.

8E e dìè sí péĩ́, ɛ̃́ɛ̃́ e táá Wálà wéè kɛɛ̀ kpáá yí teele, é tóá kíli é ɓɔá e ga-lùò mɔ̀.

Gá e kília lɛ́ e gá lɛ́ a ɓo kɔ́lɔ́sì mɔ̀ɔ káa.

9Wɔ̃́ e kéa mɔ́ɔ̀ wɔ̃̀ mɔ̀ɔ, Wálà a mɔ́ɔ̀ à sí ɓo lɛ̀í, e ló à ká lɛ̀í là lɛ̀í,

Ɛ́ɛ̃́ e tɔ́ lɛ́ e kpànazɛ̀ é diá tɔ́ séĩ́ làa kpɔ́ ɓo à mɔ̀.

10À mɔ́ɔ̀ wɔ̃̀ mɔ̀ɔ, pɛ séĩ́ lɛ́ lɛ ɓe lɛ̀í, ɛ̃́ɛ̃́ kpóṹ là zèe, ɛ̃́ɛ̃́ lɛ́ e sɛ́lɛ́ wì tã́ã̀a,

óò lo káà o kpuò là kɛ ó ɓɛ̀lɛyà nɔ Zízɛ̀ tɔ́ lɛ̀ɛ.

11Ɛ́ɛ̃́ mia séĩ́-séĩ́ óò lo wéè Zízɛ̀ Kɛ́lɛ̀ì kɛ̀ mia Dàa-mì ká mɔ́ɔ̀ wɔ̃̀ mɔ̀,

kɛɛ é Wálà lɛ́ e mia Dàa káa zì tɔ́ kɛ gbùò.

Kɔ̀à kɛ lɛ̀-fɔ̀nɔɔ̀ɔ ká kpóṹ là zèe

12À mɔ́ɔ̀ wɔ̃̀ mɔ̀ɔ, m̀ lɔ̀-kɛ̀á-mìà, lɛ̀ lɛ́ m kɛ ka píé tó káà m wéè kɛ̀ teelea, lɛ dóo kpànazɛ̀ kɛ yé ma wá ka píéa, ká à kɛ nɔ́ kíli dɛɛ ká. Kà lo ka líé yɛɓo kɛɛ̀ ká túó wà mɛ́ tàle ká, kɛɛ ka zì la-ɓo lé é pa, 13ɓii Wálà lɛ yɛɓo píé ka yí, kɛ é ka kɛ ka zò é wéé à mɔ̀ kɛɛ ká wɔ̃́ lɛ́ aà yà e gé á kɛɛ kɛ, ɛ̃́ɛ̃́ kɛ bɛ̀i é kɛ ka mɔ̀ à kɛɛ̀ yí.

14Kà wɔ̃́ séĩ́ kɛ ka lɛ̀à-ga-wè yí yékɛ̀ ká ka wè kpɔ́, ɛ̃́ɛ̃́ yékɛ̀ ká tèé dà. 15Kà kɛ kíli kɛ ká kɛ mia lɛ́ wɔ̃́ tóò wá o wĩĩ́, e bɛ̀i, mia lɛ́ kɛɛ wá o mɔ̀ɔ ká. Yé aà kɛ kília, káà lo kɛɛ̀ Wálà là nɔ́ɔ̀ lɛ́ o kpeĩ, lɛ́ o ɓe mia kɛ-pɛ̀ yɔɔ zɛ̀ lɛ́ o wá kpeĩa bàa ká. Káà lo lɛ̀ fɔ̀nɔɔ̀ o fĩ̀ã̀ lɛ̀ zí sĩ̀ã́ã̀ŋèlè è lɛ̀-fɔ̀nɔɔ̀ɔ nɔ à ká kpóṹ là zèe lɛ̀ɛ lɛ́ ɓe, 16yé kaà kɛ ka kɔ̀ fólópìà wɔ̃́ làṹ lɛ́ e kɛ̀ɓe káa ká, káà nɔ̀ mia lɛ̀ɛ ká. Yé kaà kɛ kília, wɔ̃́ lɛ́ m̀ lo lé-gbùò-là kɛɛ̀ à là Kɛ́lɛ̀ì zì Lúó káa, lɛ́ɛ̀ lo kɛɛ̀ ɓe. Ƃii lɛ́ɛ̀ lo à zɔ̃̀ɔ̃̀ kélɛ̀ fã̀ã́-wàà lɛ́ e kɛ m yí, e bɛ̀i, yɛɓo lɛ́ ma kɛɛ, lɛ̀ɛ́ gbaa kɛ wɔ̃́ dà tã́ã̀ zɛ̀ ká.

17Lúó gbú ká lèĩa, óò lo m léà káà, kɛ é káá sálà lɛ́ ka zì zò-dɔ̀à-mɔ̀ à ɓo Wálà lɛ̀ɛ là. É kɛ̀á lɛ kília, m gé lɛ́ɛ̀ li, tó kɔ̀à ɓi nì kɔ́áà dɔ̀ m zì gélia yí. 18Zi nɔ́ doóa káa, ka bɛ̃̀ɛ̃ ka gé è li kɔ̀à ɓi nì kɔ́áà dɔ̀ ka zì gélia yí.

Témɔ́tè wà Ìpafòlòdátà

19M zò lɛ ko Dàa-mì Zízɛ̀ mɔ̀ kɛɛ ḿ Témɔ́tè vɔ ka píé yi dɛɛ ká, kɛɛ wɔ̃́ làṹ lɛ́ è lo góòá ka píéa, kɛɛ é fã̀ã́-wàà nɔ m lɛ̀ɛ. 20À ye lɛ́ nɔ́ kò ye ko yɛ́lɛ́-tàà-yí-wɔ̃̀ lɛ doó, ɛ̃́ɛ̃́ lɛ́ ka kpàà kpó-kpó lɛ à mɔ̀ɔ. 21Mia yé o tóa séĩ́ o kɔ̀ wàà lɛ o dìè mɔ́ɔ̀ wɔ̃̀ yí, tó o kɔ̀ ɓoò lɛ wɔ̃́ ké yee à gbɛ̃̀ɛ̃̀ lɛ Zízɛ̀ Kɛ́lɛ̀ì mɔ̀ɔ wɔ̃̀ yí. 22Ka dìè káà zi lɛ́ Témɔ́tè aà e dìè kɛ̀ kpànazɛ̀ zì zɔ̃̀ɔ̃̀ à káa dɔ. Káà zi lɛ́ kò à ye kò yɛɓo kɛ̀á wɔ̃́ làṹ yièa mɔ́ɔ̀ wɔ̃̀ mɔ̀, lɛ̀ mi wà e dàa lɛ́ ɓea, káà à dɔ. 23À mɔ́ɔ̀ wɔ̃̀ mɔ̀ɔ, m zò lɛ à mɔ̀ ḿ vɔ ka píé yé nɔ́ maà zi lɛ́ wɔ̃́ è lo lóòá líé m gbĩ mɔ̀ɔ dɔɔ ká. 24Ɛ́ɛ̃́ m zò dɔɔ̀ lɛ ko Dàa-mì mɔ̀ kɛ m dìè ḿ nu ka píé yi dɛɛ ká nɔ́ kíli.

25Maà ko lèe-gé Ìpafòlòdátà vɔ̀ ka píé wɔ̃̀ gɛ̃̀ gbaa wɔ̃́ kpeĩ ká. Kò à ye kɔaà kɛ yɛɓo kɛ̀-kíe-là mìà, e bɛ̀i, gèlè doó gɔ̃-mìà ká. Aà yɛɓo kɛ kɛ̀ kà vɔ-mì ká gbũ̀-m-mɔ̀ kolo là zàá. 26Ka séĩ́-séĩ́ ka gɛ̃̀-lɔ̀ lɛ́ɛ̀ à kɛ̀ nyɔ́ɔ̀ɔ. À zò lɛ́ɛ̀ zɛ́zɛ́ kũ à gé à má ka ɓo kélɛ̀ lɛ́ɛ̀ yáá kɛ̀ɛ mɔ́ɔ̀ wɔ̃̀ mɔ̀. 27Yáá e kɛ à kɛpìà wánà ká, ɛ̃́ɛ̃́ e ɓúó vɔ̀ gaà. Kɛɛ Wálà aà à yéĩ̀ kṹ. Ye wá bɛ̃̀ɛ̃ à doó mɔ̀ ká. Kɛɛ e kɛ ma bɛ̃̀ɛ̃ m mɔ̀ nɔ́ kíli, ɓii a kɛ yékɛ̀ m zì zò kɛ̀ yéĩ̀zɛ̀ é nu yà e kíe là. 28À vɔ̀ ka píé yi wɔ̃̀ diè lɛ m zò ká bé le, kɛɛ ká à gɛ̃̀áa, ka gé é li zeĩ́, ɛ̃́ɛ̃́ kɛ m zì zò-kɛ̀-yéĩ̀zɛ̀ɛ é yɔ̀ɔ-yɔ́ɔ́. 29À mɔ́ɔ̀ wɔ̃̀ mɔ̀ɔ, kà à kpɛ̀ɛ̀ kɛ géli doò do kɛɛ̀ ká ko Dàa-mì yí zàá. Kà ɓɛ̀lɛyà nɔ mia lɛ́ o kélɛ̀ à yea lɛ̀ɛ, 30ɓii à dìè zì kɛ̀ɓe míní e nyɛ à là, e ɓúó à mɔ́ɔ̀ ga ɓoò Kɛ́lɛ̀ì là yɛɓoa mɔ́ɔ̀ wɔ̃̀ mɔ̀. A kɛ kíli kɛɛ é gbũ̀-mɔ̀ lɛ́ bɛ̀i lɛ̀ɛ́ gbaa kɛ ka dìè ka mɔ̀ ká nɔ m lɛ̀ɛ, kɛɛ á nɔ m lɛ̀ɛ.

Currently Selected:

Fèlépĩ̀ã̀ 2: MNT

Highlight

Copy