Máà 2

Zízɛ̀ là gɔ̃ lɛ́ à lɛ̀ dò gaà e kɛá à mɔ̀ɔ lapìà

(Máfìù 9.1-8; Lúù 5.17-26)

1Lɛ̀ lúó e die ké zìlàà lea, Zízɛ̀ e nu e mɛ̀ĩ́ Kàpɛ́nìɛ̀ pɛlɛí. Mia wa ma kélɛ̀ lɛ e píé kɛ́ì. 2Lɛ́ mia búnùzɛ̀ o pá o kíe mɔ̀. Lɛ̀ e kɛ kília, dɔ̀lɔ̀-pìà gbɛɛ lɛ̀ɛ́ gbaa kɛ gbaa yí, ɛ̃́ɛ̃́ bɛ̃̀ɛ̃ kɛ é kɛ ká nɔ́ɔ̀ fèle mɔ̀. Zízɛ̀ e kɛ Wálà lé-wè gèepìà o lɛ̀ɛ. 3Yé e kɛ kília, mia dò wáà nù mi lɛ́ à lɛ̀ dò gaà e kɛá à mɔ̀ɔ ká à píé. Mia yììsɛ lɛ́ o kɛ à vũpìàa. 4Bɛ̀i lɛ̀ɛ́ gbaa kɛ o mɔ̀ kɛ ó ɓɔ à ká Zízɛ̀ ká kɔ̀ɛ́, ɓii mia gbũ e kɛ zuú gbùòa mɔ́ɔ̀ wɔ̃̀ mɔ̀. À mɔ́ɔ̀ wɔ̃̀ mɔ̀ɔ, o káa là kpolo lɛ̀ lɛ́ Zízɛ̀ e kɛ dɔ̀á yi káa wìa, kpeĩ-kpeĩ ká. Lɛ̀ wa lé kã́a, o gɔ̃́ɛɛ tó líía yí, wa ɓɔ bṹa ká, wa yɔ̀ɔ́ káa wì. 5Lɛ̀ Zízɛ̀ e zi lɛ́ o o zò dɔá à mɔ̀ɔ gɛ̃̀ɛ, a gèe gɔ̃ lɛ́ à lɛ̀ dò gaà e kɛá à mɔ̀ɔ lɛ̀ɛ, “M gbe, i zì kɛ-wɔ̃̀ yɔɔ aà ɓo i wũ mɔ̀.”

6Kɛɛ Wálà kii-dɔ-mìà dò lɛ́ o kɛ yàá yia, o kɛ wɛ̃́ĩ́-lɔ̀ɔ kɛpìà o zò píé weeá kélɛ̀, 7“Mɛ́ɛ kɛ lɛ́ gɔ̃́ e kéa è wɔ̃́ sùua gèe? Ye lɛ́ è Wálà tɔ́ sìèá ɓe. Deĩ̀ lɛ́ è bɛ̀i à mɔ̀ é kɛ-wɔ̃̀ yɔɔ ɓo mi mɔ̀? Wálà doó lɛ́ nɔ́ è bɛ̀i à kɛɛ̀ kília.”

8Yé nɔ́ e kɛ kília, Zízɛ̀ e wɛ̃́ĩ́-lɔ̀ɔ lɛ́ o kɛ à kɛpìà o zò píéa yí dɔ e zò píé zàá. Lɛ́ a gèe o lɛ̀ɛ, “Mɛ́ɛ kɛ lɛ́ kà wɛ̃́ĩ́-lɔ̀ɔ sùua kɛ̀ ka zò píé zàá ɓɛ? 9Yé maà gèe gɔ̃ lɛ́ à lɛ̀ dò gaà laa ká à mɔ̀ɔ lɛ̀ɛ, ‘I zì kɛ-wɔ̃̀ yɔɔ aà ɓo i wũ mɔ̀,’ ɛ̃́ɛ̃́ maà gèe, ‘Wɛ̀lɛ̀, í ɓà líía sí í tááa,’ à ye kpɛɛ̀ zɛ̀ lɛ́ lɛ lɔ́ɔ́-lɔ̀ɔ̀ kɛ ḿ gèe? 10Ḿm̀ lo à zɔ̃̀ɔ̃̀ ka lɛ̀ɛ kélɛ̀ yíkɛ̀ gáàa lɛ Mi Gbe kɛ̀lɛ̀ kpóṹ là zèe kɛ é kɛ-wɔ̃̀ yɔɔ ɓo mi ɓéèe wũ mɔ̀.” Yé e kɛ kília, a gèe gɔ̃ lɛ́ à lɛ̀ dò gaà e kɛá à mɔ̀ɔ lɛ̀ɛ, 11“Ḿm̀ gèe i lɛ̀ɛ, wɛ̀lɛ̀, í ɓà líía sí, í ló à ká i píé kɛ́ì.”

12Yé e kɛ nɔ́ kília, e wɛ̀lɛ̀, e là líía sí, e gbɛ̃̀ pɛlɛí mia séĩ́-séĩ́ nyìɛ ká. O séĩ́-séĩ́ o lé e pa, wáà Wálà tɔ́ kɛ̀ gbùò, wáà gèè, “Kòó wɔ̃́ sùua kɛpìà gɛ̃̀ do.”

Zízɛ̀ là Lííváì súo kɛpìà

(Máfìù 9.9-13; Lúù 5.27-32)

13Zízɛ̀ e ɓɔ pɛlɛí, e ló zeĩ́ Gálàlíì Yíí-pṹã́ sɔ́nɔ́. Lɛ̀ e kɛ kília, mia séĩ́ o nu à píé, áà pɛ zɔ̃̀ɔ̃̀ o lɛ̀ɛ yí. 14Lɛ̀ e kɛ lópìà líé zàáa, e Lííváì, lɛ́ e kɛ Áfìà gbe káa, gɛ̃̀ yàá e zì yɛɓo-kɛ-kàa wì. E kɛ ɓo-pɛ̀ ɓo-mì ká. Zízɛ̀ a gèe à lɛ̀ɛ, “Ì tó m píé.” Lííváì e wɛ̀lɛ̀, áà tò à píé.

15Lɛ̀ Zízɛ̀ e kɛ e lé ɓèlèpìà Lííváì píé kɛ́ìa, ɓo-pɛ̀ ɓo-mìà wà kɛ-wɔ̃̀ yɔɔ kɛ-mìà búnùzɛ̀ o kɛ yàá Zízɛ̀ wà là tòà-píé-mìà o bà. E kɛ kíli, ɓii o búnùzɛ̀ o kɛ tópìà à píé. 16Wálà kii-dɔ-mìà dò, lɛ́ o kɛ Fálásíì-mìà káa, o Zízɛ̀ wà kɛ-wɔ̃̀ yɔɔ kɛ-mìà, ɛ̃́ɛ̃́ ɓo-pɛ̀ ɓo-mìà o kília gɛ̃̀, wáà pɛ ɓèlè lɛ̀ doó mɔ̀. À mɔ́ɔ̀ wɔ̃̀ mɔ̀ɔ, o là tòà-píé-mìà wɛ̃́ĩ́-lɔ̀ɔ kɛ, wáà gèè, “Mɛ́ e kɛ lɛ́ wà ɓo-pɛ̀ ɓo-mìà, ɛ̃́ɛ̃́ kɛ-wɔ̃̀ yɔɔ kɛ-mìà nì ò pɛ ɓèlè lɛ̀ doó mɔ̀ ɓɛ?”

17Lɛ̀ Zízɛ̀ e o wéè maa, a gèe o lɛ̀ɛ, “Mia lɛ́ o kéléŋ-kèlèŋa òó naa nyìɛ̀-kɛ-mì ká. Kɛɛ mia kɔ̃́ṹ-kɔ̃̀ũ̀ lɛ́ ò nàà à káa. M̀ḿ gbaa nu mia lɛ́ o kpeĩa súo kɛɛ̀. Kɛɛ m nu kɛ-wɔ̃̀ yɔɔ kɛ-mìà súo kɛɛ̀.”

O wɛ̃́ĩ́-lɔ̀ɔ kɛ lò sṹũ yí mɔ́ɔ̀ wɔ̃̀ mɔ̀

(Máfìù 9.14-17; Lúù 5.33-39)

18Lúó doó káa, Zɔ̃̀ɔ̃́ là tòà-píé-mìà wà Fálásíì vɔ̀ o kɛ o sṹũ yí. Mia dò o nu Zízɛ̀ píé, wáà gèè à lɛ̀ɛ, “Mɛ́ e kɛ lɛ́ Zɔ̃̀ɔ̃́ zì tòà-píé-mìà wà Fálásíì-mìà zì tòà-píé-mìàa ò lo o sṹũ yí, lɛ́ i zì tòà-píé-mìàa òó ló à yí?”

19Zízɛ̀ a gèe o lɛ̀ɛ, “Yé lee-sí-gɔ̃̀ aà kɛ lɔ̀ɔ̀-mìà vɔ̀ píé lee-sí-kpìlì làa, óò bɛ̀i à mɔ̀ ó o lé tó? Yé lee-sí-gɔ̃̀ lɛ o píéa, òó bɛ̀i à kɛɛ̀ kíli. 20Kɛɛ lúó dò lɛ́ɛ̀ lo kɛɛ̀ɛ, óò lo lee-sí-gɔ̃̀ɔ ɓoò o píé. À lúó e kília káa, lɛ́ ò lo o lé tóò à káa.

21“Mi lɛ̀ɛ́ sɔ dɛɛ pɛ̃́ɛ̃́ sí, kɛ é sɔ zii bũ taa à ká. É à kɛ̀á kília, sɔ dɛɛ pɛ̃́ɛ̃́ ɓɛ, lɛ́ɛ̀ lo sɔ ziia dò pɛ́ɛ̀ à mɔ̀, tó e bṹa là kpɔ́. 22E bɛ̀i, mi lɛ̀ɛ́ yɔ́ lɛ tĩã́ tɛ́lɛ́pìàa, gbɛ̃̀ wìì-kii-kpòò zii yí. Á kɛ̀á kília, yɔ́ɔ lɛ́ɛ̀ lo kpòòa pɛ́ɛ̀, tó i kɔ̃́ gbaa yɔ́ɔ wà kpòòa o yí ká. Lɛ à mɔ̀ kɛɛ í yɔ dɛɛ gbɛ̃̀ kpòò dɛɛ yí.”

O wɛ̃́ĩ́-lɔ̀ɔ kɛ fĩ́ĩ́-dɔ-lùòa mɔ́ɔ̀ wɔ̃̀ mɔ̀

(Máfìù 12.1-8; Lúù 6.1-5)

23E kɛ fĩ́ĩ́-dɔ-lùò doó káa, Zízɛ̀ e kɛ diepìà nyɛ́nɛ̀ĩ̀ kɔ́ɛ́í lɛ́ ɓu sùu dò taà e kɛá yia mɔ̀. Là tòà-píé-mìà lɛ́ wà ye nì o kɛ lópìàa, o gbɛ̃̀ wáà ɓú e kília dò kã̀. 24Lɛ́ Fálásíì-mìà wa gèe Zízɛ̀ lɛ̀ɛ, “Íì lɛ̀ gɛ̃̀? Mɛ́ e kɛ lɛ́ ò wɔ̃́ lɛ́ ye wá mia mɔ̀ kɛ ó kɛ fĩ́ĩ́-dɔ-lùò káa, ò kɛ̀ à ká ɓe?”

25Zízɛ̀ a gèe o lɛ̀ɛ, “Kàá wɔ̃́ lɛ́ Dèɓé a kɛ, lɛ̀ lɛ́ lɔ̀ɔ e kɛ wà là mia nì o kɛpìà, lɛ́ pɛ gbɛɛ lɛ̀ɛ́ gbaa kɛ o kɛ̀lɛ̀ɛ, wɔ̃̀ gèe do Wálà-kiia yí? 26E wɛ̀lɛ̀, e ló Wálà-kɛ̀ì, áà belè lɛ́ à nɔɔ̀ e kɛá Wálà lɛ̀ɛ ɓèlè. Wɔ̃́ e kéa, e kɛ lɛ̀ Àbáyátà e kɛ sálà-ɓò-Wálà-mɔ̀-mìà wũ-là-mì káa ká. Ye wá mi gbɛɛ mɔ̀ kɛ á ɓèlè, kɛɛ sálà-ɓò-Wálà-mɔ̀-mìà lɛ́ nɔ́ ò à ɓèlèa. Kɛɛ Dèɓé a ɓèlè, ɛ̃́ɛ̃́ zeĩ́, a dò nɔ là mia nì lɛ̀ɛ.”

27Lɛ́ Zízɛ̀ a gèe o lɛ̀ɛ, “Wálà e fĩ́ĩ́-dɔ-lùòa kɛ mia wɛ̃́ĩ̀. Kɛɛ lɛ̀ɛ́ gbaa mia kɛ fĩ́ĩ́-dɔ-lùòa lɛ̀ɛ. 28À mɔ́ɔ̀ wɔ̃̀ mɔ̀ɔ, Mi Gbe là yíkɛ̀ gáàa lɛ fĩ́ĩ́-dɔ-lùòa là kíli.”

Currently Selected:

Máà 2: MNT

Highlight

Copy