Máfìù 28

Zízɛ̀ e wɛ̀lɛ̀ ga kɛ̀lɛ̀

(Máà 16.1-10; Lúù 24.1-12; Zɔ̃̀ɔ̃́ 20.1-10)

1Lɛ̀ lɛ́ fĩ́ĩ́‐dɔ‐lùòa e die, lɛ́ lɛ̀‐kpɛ̀iì bèĩzɛ̀ lɛ́ e lɔ́ɔ́ yía, kpɛ̀i‐gã̀‐là e kɛɛ, Melé lɛ́ è go Mádɛ̀lɛ̀‐pɛlɛía, ɛ̃́ɛ̃́ Melé yéa bɛ̃̀ɛ̃, o ló kɛ ó ɓɔ́àa gɛ̃̀. 2Nɔ́ zá lea, tã́ã̀ e vĩ́ ɓo yí gbùò zɛ̀. Ko Dàa‐mì là vɔ‐mì doó e gó lɛ̀í, e nu tã́ã̀. E gɛ̀lɛ̀ɛ gìni‐gíní, e gó bṹa lé, e yà à là. 3À zì kɛ‐kɔ̀ɔ e kɛ lɛ̀ lɛ̀í‐kɛ‐gɛ́lɛ́ lɛ́ ɓe. À mɔ̀‐sɔ̀ e kɛ púlú lɛ̀ laa‐wɛ́lɛ́ lɛ́ ɓe. 4Mia lɛ́ o kɛ o nyìɛ kɛpìà ɓɔ́à e kília mɔ̀ɔ, túó e kɛ o kɛpìà nyɔ́ɔ̀ɔ. O mɛ́ a mɔ́ɔ̀ tàle ɓo, tó wáà kɛ̀ lɛ̀ mia bílí lɛ́ ɓe.

5Kɛɛ Wálà là vɔ‐mìa a gèe loàa lɛ̀ɛ kélɛ̀, “Yékɛ̀ ká túó. Ḿm̀ à yí dɔ kélɛ̀ ka Zízɛ̀ lɛ́ wa pá nélè ká kɔ́lɔ́sì mɔ̀ɔ naapìà. 6Ye wá lɛ̀ɛ mɔ̀. Aà wɛ̀lɛ̀ ga kɛ̀lɛ̀, lɛ̀ zí a gèe à káa lɛ́ ɓe. Kà nu ká lɛ̀ lɛ́ e kɛ wɔ̀á yia gɛ̃̀. 7Kà lo tíè‐tíèe dɛɛ ká, ká gèe là tòà‐píé‐mìà lɛ̀ɛ kélɛ̀, aà wɛ̀lɛ̀ ga kɛ̀lɛ̀, ɛ̃́ɛ̃́ lɛ dɔpìà o mɔ̀ líé, áà lò Gálàlíì. À lɛ̀ mɔ̀ lɛ́ ò lo à gɛ̃̀ɛ̃̀ yia. Ɛ̀ɛ̀, maà à gèe gbaa ka lɛ̀ɛ.”

8Lɛ̀ e kɛ kília, loàa o gó gbaa ɓɔ́àa mɔ̀ tíè‐tíèe. O kɛ túópìà, kɛɛ o paà e kɛá géli kpó‐kpó ká. O ló bàlá kɛ ó wɔ̃̀ gèe là tòà‐píé‐mìà lɛ̀ɛ.

9Nɔ́ zá lea, wà Zízɛ̀ nì o o kíe gɛ̃̀, áà gèè o lɛ̀ɛ kélɛ̀, “Kaà vùò.” O nu à sɔ́nɔ́ kɔ̀ɛ́, o wí à gã̀ mɔ̀, wáà gbìnì à lɛ̀ɛ. 10Zízɛ̀ a gèe o lɛ̀ɛ, “Yékɛ̀ ká túó. Kà lo ká gèe m lèe‐gé vɔ̀ lɛ̀ɛ ó ló Gálàlíì. À lɛ̀ mɔ̀ lɛ́ ò lo m gɛ̃̀ɛ̃̀ yia.”

Wɔ̃́ lɛ́ nyìɛ‐kɛ̀‐ɓɔ́àa‐mɔ̀ mìà wa gèea

11Lɛ̀ loàa o kɛ lópìàa, gɔ̃à lɛ́ o kɛ o nyìɛ kɛpìà ɓɔ́àa mɔ̀ɔ, o dò o ló pɛlɛí, o wɔ̃́ séĩ́ lɛ́ à kɛɛ̀ e kɛáa, gèe sálà‐ɓò‐Wálà‐mɔ̀‐mìà kpànazɛ̀ɛ lɛ̀ɛ. 12Sálà‐ɓò‐Wálà‐mɔ̀‐mìà kpànazɛ̀ɛ wà mia dìè‐dìè vɔ̀ɔ o o kíe gɛ̃̀ wɔ̃́ lɛ́ ò lo à kɛɛ̀ɛ mɔ́ɔ̀ wɔ̃̀ ká. O pɛlèe gbùò kpó‐kpó nɔ sóyà vɔ̀ɔ lɛ̀ɛ, 13wáà gèè o lɛ̀ɛ kélɛ̀, “Kà à gèe kélɛ̀ là tòà‐píé‐mìà o nu bĩ́míà, o à kã̀ã ɓo lɛ̀ lɛ́ ka kɛ yi bàa ká. 14Ɛ́ɛ̃́ yé wɔ̃́ sùua aà dà mia wũ‐là‐mì tóó kɛ̀lɛ̀ɛ, kóò lo mɛ́ĩ́ ɓoò à píé, tó pɛ gbɛɛ lɛ̀ɛ́ ló kɛɛ̀ ka ká.”

15Míáa o pɛlèea kṹ, o wɔ̃́ lɛ́ wa gèe o lɛ̀ɛ ó kɛɛ kɛ. É tóá kíli é ɓɔá pɛ́nɛɛ mɔ̀ɔ, wɔ̃́ lɛ́ Zúù‐mìà o ló à gèèá sí lɛ̀ séĩ́ mɔ̀ɔ, lɛ́ ɓɛ.

Zízɛ̀ e e dìè zɔ̃̀ɔ̃̀ là tòà‐píé‐mìàa lɛ̀ɛ

(Máà 16.14-18; Lúù 24.36-49; Zɔ̃̀ɔ̃́ 20.19-23; Àpɔ́sɔ̀lɔ̀ 1.6-8)

16Tòà‐píé‐mìà vũ̀ doó wɛ́lɛ́ doóa o ló Gálàlíì, tɔ̃̀ũ̀ lɛ́ Zízɛ̀ a gèe ó ló à mɔ̀ɔ mɔ̀. 17Lɛ̀ wa gɛ̃̀ɛ, o gbini à lɛ̀ɛ, yé bɛ̃̀ɛ̃ zò pèèlɛ e kɛ o dò géa ká. 18Zízɛ̀ e nu o ká kɔ̀ɛ́, áà gèè o lɛ̀ɛ kélɛ̀, “Yíkɛ̀ gáàa séĩ́ lɛ́ e lɛ̀í, ɛ̃́ɛ̃́ lɛ́ e tã́ã̀ zèea, nɔɔ̀ lɛ m lɛ̀ɛ. 19À mɔ́ɔ̀ wɔ̃̀ mɔ̀ɔ, kà lo mia lɛ́ o sɛ́lɛ́ séĩ́ yía, ká o kɛ tò‐m‐píé mìà ká. Kà o bàtáì kɛ m Dàa tɔ́ yí, à Gbe tɔ́ yí, ɛ̃́ɛ̃́ là Gɛ̀ɛ̀ Púlúa tɔ́ yí. 20Ɛ́ɛ̃́ ká à kɛ ó kɛ wɔ̃́ séĩ́ lɛ́ maà à gèe ka lɛ̀ɛ kɛ‐mìà ká. Ka zò è vùò kélɛ̀ ḿm̀ lo kɛɛ̀ ka píé teele, é tóá kíli é ɓɔá lúó yé kɔa yàáa líé nyɛpìà.”

Currently Selected:

Máfìù 28: MNT

Highlight

Copy