Máfìù 22

Pĩ̀ã̀ lɛ́ à gbɛ̃̀ɛ̃̀ lɛ lee‐sí‐kpìlì mɔ̀ɔ

(Lúù 14.15-24)

1Zízɛ̀ e bɛ̀i, e mɛ́ĩ́ ɓo míáa lɛ̀ɛ pĩ̀ã̀ vɔɔ̀ ká. A gèe kélɛ̀, 2“Wálà lɛ́ e lɛ̀ía, zì tò‐mia‐là lɛ kélɛ̀ sɛ́lɛ́ líé‐sí‐mì, lɛ́ e e gbe là lee‐sí‐kpìlì kɛɛ lɛ́ ɓe. 3E là yɛɓo‐kɛ‐mìà vɔ kɛ ó ló mia lɛ́ waà o súo kɛ kpílì e kília làa, súo kɛɛ̀. Kɛɛ òó gbaa naa ó nu. 4Lɛ̀ e kɛ kília, e là yɛɓo‐kɛ‐mìà dò vɔ zeĩ́, áà gèè o lɛ̀ɛ, ‘Kà lo ká gèe mia lɛ́ maà o súo kɛɛ lɛ̀ɛ kélɛ̀, “M̀ kpílìa káá‐lùò aà ɓɔ. Maà m̀ dìì nì wà m̀ dìì nyɔ̀nɔ́ ɓó máàa zɛ̀ɛ nì zɛ. Ɛ́ɛ̃́ pɛ séĩ́ pɛ̀ kɛɛ̀ lɛ gbaa. Kà nu kpílìa là.” ’ 5Kɛɛ míáa òó gbaa o tóó dɔ à mɔ̀. O kɛ lópìà píé wà wɔ̃́ doò do kɛ̀á sí. Mi dò e ló e píé nyɛ́nɛ̀ĩ̀. Mi dò bɛ̃̀ɛ̃ e ló là pɔɔ̀ lɔ̀ɔ̀ dɔpìà, 6tó mia dò bɛ̃̀ɛ̃ o yɛɓo‐kɛ‐mìàa kṹ, o o mɛ̀, ɛ̃́ɛ̃́ o o zɛ. 7Sɛ́lɛ́ líé‐sí‐mì e kília, wɔ̃́ a wàa kpó‐kpó ɓo. E là sóyà vɔ̀ vɔ. O mia zɛ‐mìà o kília zɛ, o o pà gélé. 8Lɛ̀ e kɛ kília, a gèe là yɛɓo‐kɛ‐mìàa lɛ̀ɛ, ‘Kpílìa káá‐lùò aà ɓɔ. Kɛɛ mia lɛ́ m o súo kɛ à làa, o nù lɛ̀ɛ mɔ̀ lɛ̀ɛ́ à mɛ́ kṹ. 9À mɔ́ɔ̀ wɔ̃̀ mɔ̀ɔ, kà lo zi ɓɛ̀lɛ̀ĩ̀‐fĩ̀ã̀ gbùò gbùòa mɔ̀ píé, ká mia séĩ́ lɛ́ kà lo o gɛ̃̀ɛ̃̀ yia súo kɛ ó nu m̀ kpílìa là.’ 10Lɛ̀ e kɛ kília, yɛɓo‐kɛ‐mìàa o ló zi gbùò píé píé, wáà lò mia séĩ́ lɛ́ ò o gɛ̃̀, ó kɛ bɛ̃̀ɛ̃ mi kɛ‐pɛ̀ yɔɔ zɛ̀, wà à yiè zɛ̀ o káa, wáà o pà o kíe mɔ̀. Ɛ́ɛ̃́ lee‐sípìà e kília paà e kɛá mia ɓéèe ká.

11“Sɛ́lɛ́ líé‐sí‐mìa e ló kɛ é lɔ̀ɔ̀‐mìàa là gɛ̃̀. E gɔ̃ lɛ́ lò‐kpílì‐là sɔ̀ lɛ̀ɛ́ gbaa kɛ à mɔ̀ɔ gɛ̃̀ yi. 12A gèe à lɛ̀ɛ, ‘M ɓɛ́ɛ, e dɔ kpɛɛ̀ lɛ́ i wàà káa wì, lɛ́ lò‐kpílì‐là sɔ̀ɔ dò wá i mɔ̀ ɓɛ?’ Gɔ̃́ɛɛ lɛ̀ɛ́ gbaa wɔ̃́ gbɛɛ gèe. 13Lɛ̀ e kɛ kília, sɛ́lɛ́ líé‐sí‐mìa a gèe là yɛɓo‐kɛ‐mìà lɛ̀ɛ, ‘Kà à kɔ̀ wà à gã̀ yèlè, ká à dùò pɛ́lɛ̀ zèí bĩ́ tii bà. Lɛ́ɛ̀ lo gbóó ɓoò, tó áà e sɔ̃́ɔ̃́ là ɓèlè yi.’

14“Mia lɛ́ ò o súo kɛ̀ɛ, o gbùò. Kɛɛ o wɛ́lɛ́ ɓéĩ́ lɛ́ nɔ́ o síì lɛɛ.”

O wɛ̃́ĩ́‐lɔ̀ɔ kɛ é gbɛ̃̀á ɓo‐pɛ̀ ɓo‐wɔ̃̀ mɔ̀

(Máà 12.13-17; Lúù 20.20-26)

15Lɛ̀ e kɛ kília, Fálásíì‐mìà o ló, o o wũ dũ Zízɛ̀ mɔ́ɔ̀ wɔ̃̀ mɔ̀. O kɛ zi lɛ́ ò lo à kṹũ̀ à ká e wúú mɔ̀ɔ naapìà. 16Lɛ̀ e kɛ kília, o wà tòà‐píé‐mìà dò, e bɛ̀i, Hɛ́lɔ̀ là mia nì dò vɔ Zízɛ̀ píé. Wa gèe à lɛ̀ɛ kélɛ̀, “Tísɛ̀, kóò à yí dɔ kélɛ̀ i kpeĩ. Íì pɛ zɔ̃̀ɔ̃̀ wánà ká é gbɛ̃̀á zi lɛ́ Wálà à nàà mia ó tó à píéa mɔ̀. Mí è mia bà ɓoa, wá i ká. Ƃii ìí túó mi nɔ́ɔ fé wɛlɛ lɛ̀ɛ. 17Yé lɛ kília, wɔ̃́ lɛ́ e i géa gèe ko lɛ̀ɛ. Ƃáà yí dɔ lɛ sɛ̀ kɛ ó ɓo‐pɛ̀ ɓo mia wũ‐là‐mì Sízà lɛ̀ɛ, ɛ̃́ɛ̃́ ye wá sɛ̀?”

18Kɛɛ Zízɛ̀ e o zì yɛ́lɛ́‐tàà‐yí‐wɔ̃̀ yɔɔ ɓɛ dɔ. A gèe o lɛ̀ɛ, “Mia lɛ́ kà ka dìè wɛlɛ li e ké ɓɛ. Mɛ́ e kɛ lɛ́ kà dà m wì ɓe? 19Pɛlèe lɛ́ kà ɓo‐pɛ̀ ɓoáa, dò zɔ̃̀ɔ̃̀ ḿ gɛ̃̀.”

O nu pɛlèe gbá doó ká à píé. 20Zízɛ̀ a gèe o lɛ̀ɛ, “Deĩ̀ wũ‐kèlè bĩ́ lɛ́ e pɛlèea là ɓɛ? Pɛ́ à bɛ̃̀ɛ̃ɛ̃̀ lɛ à làa, gbɛ̃̀ɛ̃̀ lɛ deĩ̀ mɔ̀?”

21Wa gèe kélɛ̀, “Sízà lɛ́ là pɛ lɛɛ.”

Lɛ̀ e kɛ kília, Zízɛ̀ a gèe o lɛ̀ɛ, “À mɔ́ɔ̀ wɔ̃̀ mɔ̀ɔ, kà pɛ lɛ́ e Sízà là pɛ káa nɔ à lɛ̀ɛ, ɛ̃́ɛ̃́ pɛ́ yé lɛ Wálà zì pɛ káa, kà nɔ Wálà lɛ̀ɛ.”

22Lɛ̀ o wɔ̃́ e kéa maa, o lé e pa. O gó gbaa à píé, o wà ló ɓo.

O wɛ̃́ĩ́‐lɔ̀ɔ kɛ é gbɛ̃̀á mia wɛ̀lɛ̀‐ga‐kɛ̀lɛ̀ wɔ̃̀ mɔ̀

(Máà 12.18-27; Lúù 20.27-40)

23Lúó nɔ́ doóa káa, Sáyúsíì vɔ̀ dò o nu Zízɛ̀ píé. O lɛ́ o mia lɛ́ ò gèe mia òó ló wɛ̀lɛ̀ ga kɛ̀lɛ̀ɛ káa. O wɛ̃́ĩ́‐lɔ̀ɔ doó kɛ Zízɛ̀ kɛ̀lɛ̀ 24weeá kélɛ̀, “Tísɛ̀, Móózè a gèe mɔ́ kélɛ̀, ‘Yé gɔ̃ lɛ́ nɛ́ wá à kɛ̀lɛ̀ɛ aà gaa, lɛ à lèe‐gé mɔ̀ é e lìi e kília na sí, kɛ wà ye ó nɛ́ ye à lìi dìè e ga kília lɛ̀ɛ.’ 25Ɛ̀ɛ̀, e kɛ ye‐mìà gɔ̃à zɛ̀ sálápèèlɛ ká ko píé zèe. O dɔ̀‐líéa e lee sí. E ga, kɛɛ nɛ́ wá nɛ́ à kɛ̀lɛ̀. À mɔ́ɔ̀ wɔ̃̀ mɔ̀ɔ, e e na tó e lekè kɛ̀lɛ̀. 26Wɔ̃́ nɔ́ doóa e kɛ mi tò‐ko‐mɔ̀ zɛ̀ɛ ká. Ɛ́ɛ̃́ e kɛ zeĩ́ à yé e tó à bɛ̃̀ɛ̃ ko mɔ̀ɔ ká nɔ́ kíli. E tó kɛpìà kíli ye‐mìà sálápèèlɛɛ ká. 27Lɛ̀ gɔ̃àa o ga o nyɛɛ, lééa bɛ̃̀ɛ̃ e ga nɔ́ kíli. 28Yé aà kɛ kília, yé mia wɛ̀lɛ̀‐ga‐kɛ̀lɛ̀ lùò aà ɓɔɔ, ye‐mìà sálápèèlɛɛ, dé è lo kɛɛ̀ lééa dɛ̃ kpó‐kpó ká? Ƃii o séĩ́ waà à kɛ o na ká.”

29Zízɛ̀ e o wéè yí zṹ weeá kélɛ̀, “Kaà wɔ̃́ ni, ɓii kàá Wálà kii dɔ, ɛ̃́ɛ̃́ kàá Wálà là yíkɛ̀ gáàa wɔ̃̀ yí dɔɔ mɔ́ɔ̀ wɔ̃̀ mɔ̀. 30Ƃii yé mia waà wɛ̀lɛ̀ ga kɛ̀lɛ̀ɛ, óò lo gbaa kɛɛ̀ lɛ̀ Wálà là vɔ‐mìà lɛ́ o à pàa lɛ́ ɓe. Ƃii gɔ̃à wà loà òó ló gbaa o kíe síì yi. 31É ló é gbɛ̃̀á mia wɛ̀lɛ̀‐ga‐kɛ̀lɛ̀ wɔ̃̀ mɔ̀ɔ, kàá wɔ̃́ lɛ́ Wálà a gèe ka lɛ̀ɛ, wɔ̃̀ gèe do? A gèe kélɛ̀, 32‘Ma lɛ́ m Éɓɔ́lɔ́hã́ã̀ là Wálà ká, e bɛ̀i zeĩ́ Áázè là Wálà ká, ɛ̃́ɛ̃́ Zékɔ̀ là Wálà káa.’ À yí lɛ́ e kélɛ̀, ye wá mia yé o gaà lɛɛ, wà Wálà ká. Mia yé o ɓéèea, lɛ́ wà Wálà lɛɛ.”

33Lɛ̀ mia kùa o wɔ̃́ e kéa maa, o lé paà e kɛ à ká pɛ́ e kɛ à zɔ̃̀ɔ̃̀pìàa mɔ́ɔ̀ wɔ̃̀ mɔ̀.

Wálà lɔ́ɔ̀ kpànazɛ̀

(Máà 12.28-34; Lúù 10.25-28)

34Lɛ̀ Fálásíì‐mìà wa ma kélɛ̀ Zízɛ̀ aà kɛ kpɔu aà yà Sáyúsíì‐mìàa léa, o pá o kíe mɔ̀. 35O doó‐mì lɛ́ e kɛ Wálà là lɔ́ɔ̀ɔ dɔ‐mì káa, e dà Zízɛ̀ wì wɛ̃́ĩ́‐lɔ̀ɔ kɛ̀ à kɛ̀lɛ̀ ká. 36A gèe kélɛ̀, “Tísɛ̀, Wálà là lɔ́ɔ̀ lɛ́ à bɛ̃̀ɛ̃ɛ̃̀ lɛ Lɔ́ɔ̀ kiia yía, ye kpɛɛ̀ lɛ́ lɛ kpànazɛ̀, é dieá à yé e tóa là?”

37Zízɛ̀ a gèe à lɛ̀ɛ kélɛ̀, “ ‘Ì Dàa‐mì lɛ́ e ɓà Wálà káa, zì lɔ̀‐kpɔ̀ i mɔ̀ɔ, lɛ à mɔ̀ é gó i zò gbáà píé séĩ́ mɔ̀, ɛ̃́ɛ̃́ i gé lɛ̀ séĩ́ mɔ̀, e bɛ̀i, i yɛ́lɛ́‐táá‐pìè séĩ́ mɔ̀.’ 38Wálà là lɔ́ɔ̀ɔ wũ ɛ̃́ɛ̃́ à yé kpó‐kpó e kpànazɛ̀ɛ lɛ́ e ɓɛ. 39À tò‐ko‐mɔ̀ zɛ̀ɛ bɛ̃̀ɛ, à lóò lɛ à píé. Ye lɛ́ e kélɛ̀, ‘I yà‐sɔ́nɔ́‐mìà zì lɔ̀‐kpɔ̀ i mɔ̀ɔ, lɛ à mɔ̀ é kɛ lɛ̀ zí i dìè lɔ̀ kpɔ́ɔ̀ lɛ à ká i mɔ̀ɔ lɛ́ ɓe.’ 40Móózè là Lɔ́ɔ̀ɔ wà wɔ̃́ lɛ́ dɔ̀‐Wálà‐lé‐là‐mìàa wa gèea, o gã̀‐gbɛ̃̀ɛ̃̀ lɛ lɔ́ɔ̀ pèèlɛ e kília là.”

Wɛ̃́ĩ́‐lɔ̀ɔ lɛ́ à gbɛ̃̀ɛ̃̀ lɛ Kɛ́lɛ̀ì mɔ̀ɔ

(Máà 12.35-37; Lúù 20.41-44)

41Lɛ̀ Fálásíì‐mìàa o pá o kíe mɔ̀ɔ, Zízɛ̀ e wɛ̃́ĩ́‐lɔ̀ɔ kɛ o kɛ̀lɛ̀ 42weeá kélɛ̀, “Zi sùu kpɛɛ̀ lɛ́ kà ka yɛ́lɛ́ tàá Kɛ́lɛ̀ì ká? Dé à gbe lɛ Kɛ́lɛ̀ì e kília ká?”

Wa gèe à lɛ̀ɛ, “Dèɓé lɛ́ à Gbe lɛɛ.”

43Zízɛ̀ a gèe o lɛ̀ɛ, “Mɛ́ e kɛ mɔṹ lɛ́ Wálà là Gɛ̀ɛ̀ Púlú e kɛ Dèɓé píé, tó Dèɓé áà sì m Dàa‐mì? Ƃii Dèɓé a gèe kélɛ̀,

44‘Kɔa Dàa‐mì a gèe m Dàa‐mì lɛ̀ɛ weeá kélɛ̀,

Ì yà m kɔ̀ yiè yí,

é tó à ká kíli ḿ mia lɛ́ ò gèlè gɔ̃ i káa, wàà i gã̀ wì.’

45Yé mɔṹ Dèɓé e à sí e Dàa‐mìa, lɛ́ɛ̀ dɔ kpɛɛ̀ lɛ́ à Dàa‐mì è kɛ̀ à gbe ká?”

46Mi gbɛɛ lɛ̀ɛ́ gbaa kɛ yí, kɛɛ é wéé doó ɓo e sɔ̃́ɔ̃́ píé, é gbɛ̃̀á wɔ̃́ lɛ́ Zízɛ̀ a gèea mɔ̀. Ɛ́ɛ̃́ é kã́ lúó e kília mɔ̀ɔ, bɛ̀i lɛ̀ɛ́ gbaa kɛ mi gbɛɛ mɔ̀ é wɛ̃́ĩ́‐lɔ̀ɔ kɛ à kɛ̀lɛ̀ zeĩ́.

Currently Selected:

Máfìù 22: MNT

Highlight

Copy