Máfìù 18
18
Deĩ̀ lɛ́ e mi kpànazɛ̀ ká?
(Máà 9.33-37; Lúù 9.46-48)
1Lɛ̀ e kɛ nɔ́ kília, tòà‐píé‐mìàa o nu Zízɛ̀ píé, wáà gèè, “Dé e kpànazɛ̀, é dieá mia séĩ́ lɛ́ Wálà lɛ́ e lɛ̀ía tóò lɛ o làa là?”
2Zízɛ̀ e nɛ́fú doó súo kɛ, e à gbɛ̃̀ o wɛlɛ mɔ̀, 3áà gèè, “Wánà‐wɔ̃̀ lɛ́ m̀ gèe ka lɛ̀ɛ ɓɛ. Ká gɔ̃̀á nìà ká kɛ lɛ̀ nɔ́ɔ̀ɓé lɛ́ ɓea, kàá ló kɛɛ̀ Wálà lɛ́ e lɛ̀ía zì tò‐mia‐là wì. 4Mi lɛ́ è e dìè si péĩ́, lɛ́ è kɛ̀ lɛ̀ nɛ́fú e kéa lɛ́ ɓea, à ye lɛ́ e kpànazɛ̀, é dieá mia séĩ́ lɛ́ Wálà lɛ́ e lɛ̀ía tóò lɛ o làa làa. 5Mi lɛ́ è lo e kɔ̀ yàà nɛ́fú nyɔ̀nɔ́ sùu e kéa dò wì m tɔ́ yía, kɛɛ aà e kɔ̀ yà m wì.
Pɛ́ à kɛ̀ tó mi ɓáà gò Wálà píéa
(Máà 9.42-48; Lúù 17.1-2)
6“Mí è lo à kɛɛ̀ nɔ́ɔ̀ɓé o ké, lɛ́ o zò dɔɔ̀ lɛ m mɔ̀ɔ, o dò é gó m píéa, áá kɛɛ̀ sɛ̀ à mɔ̀ kɛ ó gɛ̀lɛ̀‐wéĩ́ gbùò yèlè à kpɛɛ mɔ̀, ó à dùòá mɛ̀ĩ́ bà é tó yi. 7Wɔ̃́ yéĩ̀zɛ̀ kɛɛ̀ lɛ kpóṹ là zèe ká pɛ lɛ́ è lo à kɛɛ̀ mi í kɛ‐wɔ̃̀ yɔɔ kɛɛ mɔ́ɔ̀ wɔ̃̀ mɔ̀. Lɛ à mɔ̀ kɛɛ wɔ̃́ nìa é kɛ. Kɛɛ wɔ̃́ yéĩ̀zɛ̀ kɛɛ̀ lɛ mi lɛ́ à kɛ̀, tó wɔ̃́ nìa áà kɛ̀ɛ ká.
8“I kɔ̀ ɛ̃́ɛ̃́ i gã̀ é kɛ̀á kɛpìà í gó Wálà píéa, ì à kã́ é gó yi, ɓá dùò luú. Ƃii lɛ sɛ̀ i kɔ̀ é kɛ doó, ɛ̃́ɛ̃́ i gã̀ é kɛ doó, í ló lɛ̀ lɛ́ kɛ̀ɓe lɛ yía mɔ̀, é dieá i kɔ̀ pèèlɛ wà i gã̀ pèèlɛ kɛ̀ yi, tó wáà i dùòá tòá‐kíli tíé yí là. 9I nyìɛ é kɛ̀á kɛpìà í gó Wálà píéa, i nyìɛ e kília à ɓo e kèlè yí, í à dùò luú. Ƃii lɛ sɛ̀ i nyìɛ é kɛ doó, í ló lɛ̀ lɛ́ kɛ̀ɓe lɛ yía mɔ̀, é dieá i nyìɛ pèèlɛ kɛ̀ yi, tó wáà i dùòá tíé‐pàa là.
Ƃáá gíniìa zɛ̀
(Lúù 15.3-7)
10“Kà ka yɛ́lɛ́ kɛ ka dìè mɔ̀, yékɛ̀ ka nyìɛ é fɔ̃́ nɔ́ɔ̀ɓé e kéa dò yí. Tó ḿ gèe ka lɛ̀ɛ, nɔ́ɔ̀ɓéa zì Wálà là vɔ‐mìà lɛ́ o lɛ̀ía, o m Dàa lɛ́ e lɛ̀ía wɛlɛ mɔ̀ teele. [ 11Ƃii Mi Gbe e nu kɛ é mia lɛ́ o gíniìa lɛɛ la.]
12“Káà ka yɛ́lɛ́ tàà kpɛ? Yé ɓáá wũ doó aà kɛ gɔ̃ doó kɛ̀lɛ̀, lɛ́ à doó aà gínia, lɛ́ɛ̀ lo à kɛɛ̀ kpɛ? Lɛ́ɛ̀ lo o vũ̀ sɛ́lɛ̀isɛ wɛ́lɛ́ sɛ́lɛ̀isɛɛ tóò o léɓèlè pìà tɔ̃̀ũ̀ gí wì, tó e ló à ye lɛ́ à gíniì lɛɛ, nàá sí. 13Tó ḿ gèe ka lɛ̀ɛ, yé aà gɛ̃̀ɛ, wánà kpó‐kpó káa, à gé lɛ́ɛ̀ lo liì kpó‐kpó ɓo ɓáá doó e kéa wɛ̃́ĩ̀, é dieá à vũ̀ sɛ́lɛ̀isɛ wɛ́lɛ́ sɛ́lɛ̀isɛ lɛ́ lɛ̀ɛ́ gbaa gínia là. 14Zi nɔ́ doóa káa, lɛ́ ka Dàa lɛ́ e lɛ̀ía, lɛ̀ɛ́ à naa à ká kɛ nɔ́ɔ̀ɓé e kéa o doó‐mì é gínia.
Mi lèe‐gé yé è kɛ‐wɔ̃̀ yɔɔ kɛ̀ɛ
15“Yé i lèe‐gé aà wɔ̃́ yɔɔ kɛ i káa, lo à píé, í wɔ̃́ lɛ́ aà à nia zɔ̃̀ɔ̃̀ à lɛ̀ɛ. Kɛɛ ì à kɛ kà ye ka pèèlɛ lɛ̀ píà. Yé aà e tóó dɔ i mɔ̀ɔ, kɛɛ ɓaà kɛ i lèe‐gé e kília aà nu i píé zeĩ́. 16Kɛɛ é gɔ̃̀á e tóó dɔɔ̀ i mɔ̀ɔ, ì mi doó ɛ̃́ɛ̃́ pèèlɛ kpɔ́ i mɔ̀, ká ló à píé. Ì à kɛ kíli kɛɛ wɔ̃́ séĩ́ lɛ́ kà lo à gèeèa, à kélá é kɛ ɓe pèèlɛ ɛ̃́ɛ̃́ yààka vɔ̀. 17Kɛɛ yé lɛ̀ɛ́ à zṹ é e tóó dɔ o mɔ̀ɔ, ì lo ɓá wɔ̃̀ gèe Wálà‐mìà nì lɛ̀ɛ. Yé lɛ̀ɛ́ e tóó dɔ o bɛ̃̀ɛ̃ o mɔ̀ɔ, kà à gɛ̃̀ gbaa lɛ̀ sɛ́lɛ́ gbɛɛ yí‐mì ɛ̃́ɛ̃́ ɓo‐pɛ̀ ɓo‐mì lɛ́ ɓe.
Wɔ̃́ kà wèè à mɔ̀ɔ, wà à yé kàá wéé à mɔ̀ɔ
18“Wánà‐wɔ̃̀ lɛ́ m̀ gèe ka lɛ̀ɛ ɓɛ. Wɔ̃́ kàá ló wéè à kɛ‐wɔ̃̀ mɔ̀ tã́ã̀ zèea, òó ló wéè à kɛ‐wɔ̃̀ mɔ̀ lɛ̀í. Ɛ́ɛ̃́ wɔ̃́ lɛ́ kà lo wéè à kɛ‐wɔ̃̀ mɔ̀ tã́ã̀ zèea, óò lo wéè à kɛ‐wɔ̃̀ mɔ̀ lɛ̀í.
19“Ɛ́ɛ̃́ ḿm̀ gèe zeĩ́ ka lɛ̀ɛ kélɛ̀ yé ka pèèlɛ kaà wéé wɔ̃́ mɔ̀ kpóṹ là zèe, lɛ́ kaà sɛ̀nɛ ɓo à wɛ̃́ĩ̀a, m Dàa lɛ́ e lɛ̀ía, lɛ́ɛ̀ lo wɔ̃́ e kília kɛɛ̀ ka lɛ̀ɛ. 20Ƃii lɛ̀ lɛ́ mia pèèlɛ ɛ̃́ɛ̃́ yààka ò pa o kíe mɔ̀ yi m tɔ́ yía, m o píé yi.”
Pĩ̀ã̀ lɛ́ à gbɛ̃̀ɛ̃̀ lɛ yɛɓo‐kɛ‐mì yé lɛ̀ɛ́ gbaa wɔ̃́ ɓo e ɓɛ́ɛ wũ mɔ̀ɔ mɔ̀ɔ
21Lɛ̀ ɛ kɛ kília, Pílɛ̀ e nu Zízɛ̀ píé, a gèe à lɛ̀ɛ, “M Dàa‐mì, m lèe‐gé lɛ́ɛ̀ lo wɔ̃́ yɔɔ kɛɛ̀ m ká e kíe yí wɛ̀ɛɛ̀, tó máà dìè à sɔ̃̀ɔ̃ là? Ḿ kɛ kpolà sálápèèlɛ zɛ̀?”
22Zízɛ̀ a gèe à lɛ̀ɛ, “Gbàaò. Ye wá kpolà sálápèèlɛ ká. Kɛɛ à kɛ vũ̀ sálápèèlɛ kpolà sálápèèlɛ zɛ̀. 23Ƃii Wálà lɛ́ e lɛ̀ía zì tò‐mia‐là lɛ kélɛ̀ sɛ́lɛ́ líé‐sí‐mì lɛ́ a yà e gé é wɔ̃́ yí naa là yɛɓo‐kɛ‐mìà gbĩ mɔ̀ɔ lɛ́ ɓe. 24Yé e gbɛ̃̀ nɔ́ kéa, o nu là yɛɓo‐kɛ‐mì yé là pɛlèe lɛ́ɛ́ kɔ́ɛ́í búnùzɛ̀ kèlè e kɛ à mɔ̀ɔ ká à píé. 25Yɛɓo‐kɛ‐mì e kília pɛlèe kpã́‐kpã̀ lɛ̀ɛ́ gbaa kɛ à kɛ̀lɛ̀, kɛ é e mɔ̀‐kèle kã́ à ká. À mɔ́ɔ̀ wɔ̃̀ mɔ̀ɔ, à dàa‐mì a gèe ó à kpɔ́ à na wà là nɔ́ɔ̀ nì, e bɛ̀i, pɛ séĩ́ lɛ́ e kɛ à kɛ̀lɛ̀ɛ mɔ̀, ó o lɔ̀ɔ̀ dɔ, kɛ ó kèle lɛ́ e à mɔ̀ɔ ɓo à ká. 26Yɛɓo‐kɛ‐mìa e káá e kpuò là e dàa‐mì wɛlɛ mɔ̀, áà kpé kã̀ à lɛ̀ɛ weeá kélɛ̀, ‘M dàa‐mì, ì i zò kṹ tã́ã̀ m mɔ́ɔ̀ wɔ̃̀ mɔ̀. Ḿm̀ lo ɓà pɛ́ɛ sɔ̃̀ɔ̃́ nɔɔ̀ féfé le.’ 27À yéĩ́ e à dàa‐mì kɛ gbaa. À mɔ́ɔ̀ wɔ̃̀ mɔ̀ɔ, e kã́ kèle lɛ́ e kɛ à mɔ̀ɔ mɔ̀, a káá tã́ã̀. E à tó e là ló ɓo.
28“Gɔ̃́ e kília e ló, e ɓɔ e ɓɛ́ĩ̀ yɛɓo‐kɛ‐mìà doó‐mì lɛ́ là kèle e kɛ à mɔ̀ɔ là. Kèle e kília e kɛ nɔ́ dálà zààle kèlè ká. E wí à mɔ̀, e à kṹ e zɔ̀kɔ̀lɔ̀ mɔ̀, áà gèè, ‘Pɛlèe lɛ́ ɓa kèlè kṹ m mɔ̀ɔ, ì à kèlè ɓo.’ 29À ɓɛ́ɛ e kília e pèlè tã́ã̀, áà kpé kã̀ à lɛ̀ɛ weeá kélɛ̀, ‘Ì i zò kṹ tã́ã̀ m mɔ́ɔ̀ wɔ̃̀ mɔ̀. Ḿm̀ lo ɓà pɛleea sɔ̃̀ɔ̃́ nɔɔ̀.’ 30Kɛɛ lɛ̀ɛ́ gbaa wéé à mɔ̀. E à kɛ wa dùò bĩ́‐kɛ̀ì, é tóá kíli é là pɛlèea nɔ. 31Lɛ̀ lɛ́ yɛɓo‐kɛ‐mìà yé o tóa o wɔ̃́ sùua gɛ̃̀ áà kɛ̀ɛ, o zò e dà zízàá kpó‐kpó ɓo, o ló o dàa‐mì píé, o wɔ̃́ɔ séĩ́ gèe à lɛ̀ɛ. 32Lɛ̀ e kɛ kília, o dàa‐mìa e là yɛɓo‐kɛ‐mìa súo kɛ, a gèe à lɛ̀ɛ, ‘I yɛɓo‐kɛ‐mì zò yɔɔ zɛ̀ ká. M kã́ m̀ kèle séĩ́ lɛ́ e kɛ i mɔ̀ɔ wɔ̃̀ mɔ̀, ma káá tã́ã̀, ɓii i kpé kã́ m lɛ̀ɛ mɔ́ɔ̀ wɔ̃̀ mɔ̀. 33Ḿ gɔ̃̀, ɓáá i ɓɛ́ɛ yɛɓo‐kɛ‐mì yéĩ̀ kṹũ̀ lɛ̀ zí m i yéĩ̀ kṹ à káa lɛ́ ɓe?’ 34Lɛ̀ e kɛ kília, wɔ̃́ e o dàa‐mìa wàa kpó‐kpó ɓo. A mɔ́ɔ̀ là yɛɓo‐kɛ‐mìa dùò ɓo kɛ́ì, ó à sã̀ dɔ é tóá kíli é pɛlèea séĩ́ nɔ.
35“Zi nɔ́ doóa lɛ́ m Dàa lɛ́ e lɛ̀ía è lo à kɛɛ̀á ka séĩ́ ka ká, yé kàá kã́ ka lèe‐gé kɛ‐wɔ̃̀ mɔ̀, ká káá tã́ã̀ ka zò séĩ́ káa káa.”
Currently Selected:
Máfìù 18: MNT
Highlight
Share
Copy
Want to have your highlights saved across all your devices? Sign up or sign in
Mann New Testament © Bible Society in Liberia, 1978.
