Máfìù 16

O lé‐pa‐wɔ̃̀ naa ó gɛ̃̀

(Máà 8.11-13; Lúù 12.54-56)

1Fálásíì‐mìà wà Sáyúsíì‐mìà dò o nu Zízɛ̀ píé. Wa naa ó à yí dã́. À mɔ́ɔ̀ wɔ̃̀ mɔ̀ɔ, o à gèe à lɛ̀ɛ é lé‐pa‐wɔ̃̀ kɛ o lɛ̀ɛ, kɛ á zɔ̃̀ɔ̃̀ kélɛ̀ à zì yíkɛ̀ gáàa lɛ́ɛ̀ go Wálà kɛ̀lɛ̀ lɛ̀í. 2Lɛ̀ e kɛ kília, Zízɛ̀ a là nìɛ̀ weeá kélɛ̀, “Yé nyɛ́nɛ́ aà kɛ dàpìàa, káà à gèe kélɛ̀, ‘Lɛ̀ɛ lɛ̀ɛ́ ló bãã̀ dɛɛ ká, ɓii lɛ̀í lɛ zólóa mɔ́ɔ̀ wɔ̃̀ mɔ̀.’ 3Tó làapíé bɛ̃̀ɛ̃, káà à gèe, ‘Lɛ̀ɛ lɛ́ɛ̀ lo bãã̀ pɛ́nɛɛ, ɓii lɛ̀í lɛ zóló ɛ̃́ɛ̃́ à gɔ̀ũ̀ yàà lɛ.’ Káà bɛ̀i à mɔ̀ ka lɛ̀í gɛ̃̀, káà wɔ̃́ lɛ́ à gbɛ̃̀ɛ̃̀ lɛ à mɔ̀ɔ gèè. Kɛɛ kàá bɛ̀i à mɔ̀ ká pɛ lɛ́ è lúó lɛ́ e pɛ́nɛɛ̀ɛ wɔ̃̀ yí ɓo ko lɛ̀ɛ dɔ. 4Míá o ɓe yà kɔa ɓoa yía, o sɔ̃̀ɔ̃ wá sɛ̀, ɛ̃́ɛ̃́ óò o ko gbɛ̃̀ Wálà mɔ̀. O nyìɛ lɛ lé‐pa‐wɔ̃̀ kɛɛ̀ mɔ̀. Kɛɛ lé‐pa‐wɔ̃̀ gbɛɛ lɛ̀ɛ́ ló kɛɛ̀ ɓe o lɛ̀ɛ, é kã́ Zónà zìa mɔ̀ɔ ká.”

Lɛ̀ e kɛ kília, Zízɛ̀ e gó gbaa o bà, e là ló ɓo.

Fálásíì‐mìà wà Sáyúsíì‐mìà o zì belè‐fɔ̀ɔ‐pɛ̀

(Máà 8.14-21)

5Lɛ̀ tòà‐píé‐mìàa o yíía kã́a, òó gbaa ló belè ká, ɓii o zò e ni à mɔ̀. 6Zízɛ̀ a gèe o lɛ̀ɛ, “Kà ka líé dɔ, ɛ̃́ɛ̃́ kà ka yɛ́lɛ́ kɛ ka dìè píé Fálásíì‐mìà wà Sáyúsíì‐mìà zì belè‐fɔ̀ɔ‐pɛ̀ɛ wɛ̃́ĩ̀.”

7O gbɛ̃̀ gbaa, wáà wɔ̃́ gèè o kíe píé weeá kélɛ̀, “A gèe kíli, ɓii kòó gbaa nu belè káa wɛ̃́ĩ̀.”

8Zízɛ̀ e wɔ̃́ lɛ́ o kɛ à gèepìàa dɔ. A mɔ́ɔ̀ à gèe ɓo o lɛ̀ɛ, “Mɛ́ e kɛ lɛ́ kà zi lɛ́ belè wá à ká ka kɛ̀lɛ̀ɛ, wɔ̃̀ gèe ka kíe nì lɛ̀ɛ ɓɛ? Ka zì zò‐dɔ̀à‐mɔ̀ lɛ dóo nyɔ̀nɔ́ kpó‐kpó ɓo. 9Kàá à yí dɔ nɛ́? Ka zò lɛ̀ɛ́ vùò lúó lɛ́ m belè‐kpo sɔ́ɔ́li kpuú yɛ́ à ká gɔ̃à wáá sɔ́ɔ́li lɛ̀ɛ ká? Ƃɛ̀lɛ̀‐kolo‐kɔ̃̀ɛ̃̀ wɛ̀ɛɛ̀ lɛ́ ka pa à yé e tóa ká? 10Kó ma belè‐kpo sálápèèlɛ lɛ́ ma kpuú yɛ́ gɔ̃à wáá yììsɛ lɛ̀ɛ píé? Támé‐kɔ̃̀ɛ̃̀ wɛ̀ɛɛ̀ lɛ́ ka pa à yé e tóa ká? 11E dɔ kpɛɛ̀ lɛ́ kàá yí dɔ kélɛ̀ m̀ḿ gbaa kɛ belè‐wɔ̃̀ gèepìà ka lɛ̀ɛ? Kà ka yɛ́lɛ́ kɛ ka dìè píé Fálásíì‐mìà wà Sáyúsíì‐mìàa o zì belè‐fɔ̀ɔ‐pɛ̀ɛ wɛ̃́ĩ̀.”

12Lɛ̀ e kɛ kília, wa yí dɔ gbaa kélɛ̀ Zízɛ̀ lɛ̀ɛ́ gbaa kɛ à gèepìà o lɛ̀ɛ ó o yɛ́lɛ́ kɛ o dìè píé belè‐fɔ̀ɔ‐pɛ̀ yé ò kàà belè bàa mɔ́ɔ̀ wɔ̃̀ mɔ̀. Kɛɛ Fálásíì‐mìà wà Sáyúsíì‐mìà o zì pɛ‐zɔ̃̀ɔ̃̀‐kɔ̀ lɛ́ e kɛ wéépìà à káa.

Wɔ̃́ Pílɛ̀ a gèe é gbɛ̃̀á Zízɛ̀ mɔ̀ɔ

(Máà 8.27-30; Lúù 9.18-21)

13Zízɛ̀ e ló sɛ́lɛ́ lɛ́ e kɛ Sízàlíà Félépà mɛ̀ĩ́a yí. Lɛ̀ e ɓɔ yía, e là tòà‐píé‐mìà wɛ̃́ĩ́‐lɔ̀ɔ kɛ weeá kélɛ̀, “Míáa óò gèe dé e Mi Gbe ká?”

14Wa gèe, “Mia gbṹũ̀ óò gèe i Zɔ̃̀ɔ̃́ mia bàtáì‐kɛ‐mì ká. Tó mia gbṹũ̀ bɛ̃̀ɛ̃ wáà gèè Ìláyà lɛ́ e i káa. O dò wáà gèè zeĩ́ i Zɛlèmáyà, ɛ̃́ɛ̃́ dɔ̀‐Wálà‐lé‐là‐mìàa dò ká.”

15Zízɛ̀ a gèe o lɛ̀ɛ, “Ka bɛ̃̀ɛ̃, káà gèe deĩ̀ lɛ́ e m ká?”

16Sáímɔ̀ Pílɛ̀ e à yí ɓo weeá kélɛ̀, “Kɛ́lɛ̀ì lɛ́ e Wálà ɓéèea Gbe káa, lɛ́ e i káa.”

17Zízɛ̀ a gèe à lɛ̀ɛ, “Sáímɔ̀ Bàzónà, i zì lɛ sɛ̀. Ƃii wánà‐wɔ̃̀ e kéa, mi wá kɛ é lɛ́ɛ́ ɓo à là i lɛ̀ɛ. M Dàa lɛ́ e lɛ̀ía, lɛ́ e lɛ́ɛ́ ɓo à là i lɛ̀ɛ. 18Ɛ́ɛ̃́ zéniía, ḿm̀ gèe i lɛ̀ɛ, óò i si Pílɛ̀. Pílɛ̀ lɛ́ e kélɛ̀, gɛ̀lɛ̀. Ɛ́ɛ̃́ gɛ̀lɛ̀ e kéa là lɛ́ m̀ lo m̀ mia nì séĩ́ gã̀ gbɛ̃̀ɛ̃̀ yia. Ɛ́ɛ̃́ ga‐kɔ̀ lɛ̀ɛ́ ló diè o là gbɛɛ ɓo. 19Ḿm̀ lo lɛ̀ lɛ́ Wálà lɛ́ e lɛ̀ía, tóò lɛ mia là yia, à mɔ́ɔ̀ kíì nɔɔ̀ i lɛ̀ɛ. Wɔ̃́ ìí ló wéè à kɛ‐wɔ̃̀ mɔ̀ tã́ã̀ zèea, òó ló wéè à kɛ‐wɔ̃̀ mɔ̀ lɛ̀í. Ɛ́ɛ̃́ wɔ̃́ lɛ́ ì lo wéè à kɛ‐wɔ̃̀ mɔ̀ tã́ã̀ zèea, óò lo wéè à kɛ‐wɔ̃̀ mɔ̀ lɛ̀í.”

20Lɛ̀ e kɛ kília, Zízɛ̀ e mɛ́ĩ́ ɓo là tòà‐píé‐mìà lɛ̀ɛ mɛ́ gágà zɛ̀ kélɛ̀, yékɛ̀ ó gèe mi nɔ́ɔ fé lɛ̀ɛ kélɛ̀ à ye lɛ́ e Kɛ́lɛ̀ì káa.

Zízɛ̀ e wɔ̃́ gèe é gbɛ̃̀á e ga‐wɔ̃̀ mɔ̀

(Máà 8.31—9.1; Lúù 9.22-27)

21Lúó e kília káa, Zízɛ̀ e gbɛ̃̀ gbaa, áà wɔ̃́ gèè e yí púlú zɛ̀ ká là tòà‐píé‐mìà lɛ̀ɛ kélɛ̀, “Lɛ m mɔ̀ ḿ ló Zùlúsàlɛ̀. Ɛ́ɛ̃́ ḿm̀ lo wɔ̃́ nyɔ́ɔ̀ɔ búnùzɛ̀ gɛ̃̀ɛ̃̀, áà gò mia dìè‐dìè vɔ̀ wà sálà‐ɓò‐Wálà‐mɔ̀‐mìà kpànazɛ̀, ɛ̃́ɛ̃́ Wálà kii‐dɔ‐mìà kɛ̀lɛ̀. Óò lo m zɛɛ̀, ɛ̃́ɛ̃́ zeĩ́, ḿm̀ lo wɛ̀lɛ̀ ga kɛ̀lɛ̀ à lɛ̀‐kpɛ̀iì yààka lùò ká.”

22Pílɛ̀ e Zízɛ̀ súo kɛ zi doó ká, e gbɛ̃̀ áà mɛ́ĩ́ ɓò à lɛ̀ɛ kélɛ̀, “M Dàa‐mì, Wálà áá wéé wɔ̃́ sùua kɛ̀ i ká wɔ̃̀ mɔ̀ gbɛɛ ɓo.”

23Zízɛ̀ e nìɛ̀, áà gèè Pílɛ̀ lɛ̀ɛ, “Sétɔ̃̀, gó dɔ̀á m là. I mi sã́‐gɛ̀lɛ̀‐kpùlù ká m gɛ̀nɛ̀. Ƃii i zì yɛ́lɛ́‐tááa, ye wá Wálà zì yɛ́lɛ́‐táá ká. Kpóṹ là mìà zì yɛ́lɛ́‐táá lɛ́ e à káa.”

24Lɛ̀ e kɛ kília, Zízɛ̀ a gèe là tòà‐píé‐mìà lɛ̀ɛ, “Yé mi nɔ́ɔ fé à nàà kò ye kó tàà‐kíe‐píé kɛɛ, lɛ à mɔ̀ é kã́ e nàà‐ká‐pɛ̀ séĩ́ lɛ̀ɛ, é là kɔ́lɔ́sì lɛ́ è lo gaà mɔ̀ɔ sí, é tó à ká m píé. 25Ƃii mi lɛ́ à nàà é e dìè zì kɛ̀ɓe laa, lɛ́ɛ̀ lo kɔ̃́ɔ̃̀ e dìè wɔ̃̀ yí ká. Kɛɛ mí è e dìè wɔ̃̀ dà tã́ã̀ m mɔ́ɔ̀ wɔ̃̀ mɔ̀ɔ, lɛ́ɛ̀ lo e dìè laà. 26Yé kpóṹ là zèe séĩ́ aà kɛ mi doó là pɛ ká, ɛ̃́ɛ̃́ aà e kɛ̀ɓe gíni à mɔ́ɔ̀ wɔ̃̀ mɔ̀ɔ, mɛ́ è lo à sɔ̀lɔ̀ ɓoò à kolo là? Mɛ́ e ɓe kɛ mi á nɔ, kɛɛ é là kɛ̀ɓe sɔ̀lɔ̀ ɓo e mɛ̀ĩ́? 27Ƃii Mi Gbe laa kɛpìà é nu e Dàa zì lɛ̀‐fɔ̀nɔɔ̀ɔ yí wà là vɔ‐mìà ká. Yé aà kɛ gbaa kília, lɛ́ɛ̀ lo mia séĩ́ fɔ́nɔ́ nɔɔ̀ wɔ̃́ lɛ́ waà kɛɛ kolo là. 28Wánà‐wɔ̃̀ lɛ́ m̀ gèe ka lɛ̀ɛ ɓɛ. Mia gbú o dɔ̀á lɛ̀ɛ mɔ̀ɔ, òó ló gaà é tóá kíli ó Mi Gbe gɛ̃̀, áà nù e zì tò‐mia‐là mɔ́ɔ̀ yíkɛ̀ gáàa ká.”

Currently Selected:

Máfìù 16: MNT

Highlight

Copy