Lúù 8

Loà lɛ́ wà Zízɛ̀ nì o kɛ lópìàa

1Lɛ̀ à lɛ̀ e ɓo pèèlɛɛ, Zízɛ̀ e ló dìèá sí pɛlɛí wà kpã̀ãã̀ kɔ́ɛ́í píé, áà lò wɔ̃́ làṹ yiè lɛ́ à gbɛ̃̀ɛ̃̀ lɛ Wálà zì tò‐mia‐là mɔ̀ɔ gèèá sí. Wà là tòà‐píé‐mìà vũ̀ doó wɛ́lɛ́ pèèlɛɛ o ló. 2Ɛ́ɛ̃́ zeĩ́, wà loà dò lɛ́ o laà e kɛá pɛ yɔɔ vɔ̀, ɛ̃́ɛ̃́ yáá kɛ̀lɛ̀ɛ, lɛ́ wà ye nì o kɛ lópìàa. Loà o kília o tɔ́ lɛ́ Melé, lɛ́ o kɛ à sípìà Mádɛ̀lɛ̀ mi, lɛ́ pɛ yɔɔ sálápèèlɛ ɓoò e kɛá à píéaò, 3ɛ̃́ɛ̃́ Zòánà lɛ́ e kɛ Súzà, lɛ́ e kɛ Hɛ́lɔ̀ kɔ̀‐lé káa na káa, e bɛ̀i, Sùzánà. Ɛ́ɛ̃́ zeĩ́, loà búnù‐búnùzɛ̀ gbɛɛ̀ gbɛɛ, lɛ́ o kɛ gbũpìà Zízɛ̀ wà là tòà‐píé‐mìà mɔ̀ o zì pɛ́ e kɛ o kɛ̀lɛ̀ɛ káa, o kɛ o bà.

Pĩ̀ã̀ lɛ́ à gbɛ̃̀ɛ̃̀ lɛ pɛ‐taa‐mì mɔ̀ɔ

(Máfìù 13.1-9; Máà 4.1-9)

4Míá o kɛ nupìà Zízɛ̀ píéa, o kɛ gópìà sɛ́lɛ́ gbɛɛ̀ gbɛɛ yí, wáà nù à píé. Lɛ̀ mia gbũ e kília o pá o kíe mɔ̀ɔ, Zízɛ̀ e là pĩ̀ã̀ doó vɔ. Ye lɛ́ e kélɛ̀,

5“E kɛ gɔ̃ doó ká, lɛ́ e wɛ̀lɛ̀ e ló là taa‐pɛ̀ wɛ́lɛ́ taàa. Lɛ̀ e kɛ pɛ́ e kília pɛ̃̀ɛ̃̀pìàa, à dò e dà zi gbùò píé. O ɓálá à là. Lɛ̀ e kɛ kília, mɔ̀ɔ̀ vɔ̀ o à mání. 6À dò bɛ̃̀ɛ̃ e dà gɛ̀lɛ̀ là. Lɛ̀ pɛ́ e kília e ɓɔɔ, e kpáa kṹ, ɓii yíí gbɛɛ lɛ̀ɛ́ gbaa kɛ sɛ́lɛ́ e kília mɔ̀. 7Pɛ wɛ́lɛ́ e kília dò e dà lɛ̀ lɛ́ gɛ́nɛ́ e kɛ yía mɔ̀. Gɛ́nɛ́ɛ wà pɛ wɛ́lɛ́ɛ o fàa o kíe ká. Lɛ̀ e kɛ kília, gɛ́nɛ́ɛ e pɛ pínía kṹ e kpɛí. 8Pɛ wɛ́lɛ́ɛ dò e dà sɛ́lɛ́ yiè yí. Pɛ wɛ́lɛ́ e kília e ɓɔ, ɛ̃́ɛ̃́ e ɓa e gbã̀ã̀ ká. À wɛ́lɛ́ e kɛ à gbã̀ã̀ doó mɔ̀ wũ doó.”

Zízɛ̀ e à líé nyɛ weeá kélɛ̀, “Mi lɛ́ à tóó è wɔ̃́ maa, è e tóó dɔ.”

Pɛ́ è kɛ̀ lɛ́ Zízɛ̀ è pĩ̀ã̀ vɔɔ

(Máfìù 13.10-17; Máà 4.10-12)

9Zízɛ̀ là tòà‐píé‐mìà wa wɛ̃́ĩ́‐lɔ̀ɔ kɛ kɛ é pĩ̀ã̀a yí ɓo. 10Zízɛ̀ a gèe, “Wɔ̃́ nì lɛ́ à bĩ̀ĩĩ̀ e kɛ à ká, lɛ́ à gbɛ̃̀ɛ̃̀ lɛ Wálà là tò‐mia‐là mɔ́ɔ̀ wɔ̃̀ mɔ̀ɔ, à nɔɔ̀ lɛ gbaa ka lɛ̀ɛ, kɛ ká à dɔ. Kɛɛ mia yé o tóa yee, o zì lɛ́ nɔ́ pĩ̀ã̀ vɔ̀ o lɛ̀ɛ káa. Wɔ̃́ e kília kɛɛ̀ lɛ kíli, kɛɛ ó o nyìɛ gbɛ̃̀ pɛ mɔ̀, kɛɛ yékɛ̀ ó gɛ̃̀, ɛ̃́ɛ̃́ kɛ ó o tóó dɔ wɔ̃́ mɔ̀, kɛɛ yékɛ̀ ó yí ma.

Zízɛ̀ e pĩ̀ã̀ lɛ́ à gbɛ̃̀ɛ̃̀ lɛ pɛ‐taa‐mì mɔ̀ɔ yí ɓo

(Máfìù 13.18-23; Máà 4.13-20)

11“Pĩ̀ã̀ e kéa yí gɛ̃̀ e ké. Pɛ wɛ́lɛ́ɛ lɛ́ e Wálà lé‐wè káa. 12Pɛ wɛ́lɛ́ yé e dà zi gbùò píéa, o lɛ́ o míá ò Wálà lé‐wè maa káa. Yé aà kɛ kília, tó Dɛ́ɓò e nu, e wéé lɛ́ lɛ o zò píéa sí. Lɛ́ɛ̀ à kɛ̀ kíli, yékɛ̀ ó o zò dɔ wééa mɔ̀, yékɛ̀ ó la‐ɓo sɔ̀lɔ̀ ɓo. 13Pɛ wɛ́lɛ́ yé e dà gɛ̀lɛ̀ làa, o lɛ́ o mia lɛ́ ò Wálà lé‐wè ma, tó wáà à kũ̀ géli káa káa. Kɛɛ à gáná gbɛ̃̀ɛ̃̀ wá o yí. Óò o zò dɔ Wálà lé‐wè mɔ̀ lúó zààle píé. Tó o kɔ̃́ à mɔ̀ yé yí‐dã́‐wɔ̃̀ aà ɓɔ o làa ká. 14Pɛ wɛ́lɛ́ yé e dà lɛ̀ lɛ́ gɛ́nɛ́ e kɛ yía mɔ̀ɔ, o lɛ́ o míá ò Wálà lé‐wè maa káa. Kɛɛ yé waà kɛ lópìà o líéa, zò‐tàà‐yí‐wɔ̃̀, ɛ̃́ɛ̃́ kɛ̀‐kpànazɛ̀‐pɔ̀ɔ̀ wà mia zò‐dà‐wɔ̃̀ lɛ́ à gbɛ̃̀ɛ̃̀ lɛ ko zì kɛ̀ kpóṹ là zèe wɔ̃̀ mɔ̀ɔ aà o kṹ kɔ̃̀ɛ̃̀ɛ̃̀ le. Tó áà kɛ̀ o zì ɓɛɛ lɛ́ ò ɓa à káa, áà vómóló kũ̀. 15Pɛ wɛ́lɛ́ yé e dà sɛ́lɛ́ yiè yía, o lɛ́ o míá ò Wálà lé‐wè ma, tó wáà à yàlà ɓò o zò píé, wáà kùnù à mɔ̀ wɔ̃́ kɛ‐zì kpeĩ ɛ̃́ɛ̃́ yiè ká, tó wáà o zò kũ̀ tã́ã̀, é tóá kíli ó ɓa o gbã̀ã̀ yiè káa káa.

Nábò yé páni gbinì lɛ à làa

(Máà 4.21-25)

16“Mi gbɛɛ lɛ̀ɛ́ nábò dɔ, kɛ é páni sí á gbini à là, ɛ̃́ɛ̃́ kɛ á sí, á wàà kpĩ̀ĩ̀ wì. Kɛɛ lɛ́ɛ̀ à yà nábò yàà‐là‐pɛ̀ là. Láà kɛ̀ kíli, kɛ mia ó wàá kɛ́ìa, kɛ ó wàà lɛ̀‐fɔ̀nɔɔ̀ɔ bà. 17Pɛ séĩ́ lɛ́ à bĩ̀ĩĩ̀ lɛɛ, óò lo nuù o ká wáà‐là, ɛ̃́ɛ̃́ pɛ séĩ́ lɛ́ lɛ gbòo wìa, óò lo o gɛ̃̀ɛ̃̀, tó o nu o ká lɛ̀‐púlú mɔ̀.

18“À mɔ́ɔ̀ wɔ̃̀ mɔ̀ɔ, kà ka yɛ́lɛ́ kɛ ka dìè píé ka tóó dɔ̀ wɔ̃́ mɔ̀ mɔ́ɔ̀ wɔ̃̀ mɔ̀. Ƃii mi nɔ́ɔ fé lɛ́ pɛ laa kɛ̀lɛ̀ɛ, óò lo nɔ́ tĩã́ à dò nɔɔ̀ à lɛ̀ɛ. Kɛɛ mi lɛ́ pɛ gbɛɛ wá à kɛ̀lɛ̀ɛ, é kɛ bɛ̃̀ɛ̃ à nyɔ̀nɔ́ lɛ́ à gèe lɛ à kɛ̀lɛ̀ɛ káa, óò lo à kṹũ̀ à kɛ̀lɛ̀.”

Zízɛ̀ lòóò wà à lekè gɔ̃à zɛ̀

(Máfìù 12.46-50; Máà 3.31-35)

19Lɛ̀ e kɛ kília, Zízɛ̀ lòóò wà à lèe‐gé gɔ̃à zɛ̀ o nu à píé. Kɛɛ bɛ̀i lɛ̀ɛ́ gbaa kɛ o mɔ̀ kɛ ó ɓɔ à mɔ̀, ɓii mia gbũ lɛ́ e kɛ zuúa e kɛ gbùò. 20Mi dò a gèe Zízɛ̀ lɛ̀ɛ, “I lòóò wà i lèe‐gé nì o dɔ̀á pɛ́lɛ̀ zèí, wáà nàà ó i gɛ̃̀.”

21Zízɛ̀ a gèe míáa lɛ̀ɛ, “Mia lɛ́ ò Wálà lé‐wè ma, tó wáà à kɛ̀ɛ, o lɛ́ o m lòóò wà m lèe‐gé nì káa.”

Zízɛ̀ e fã̀ã̀ wà yíí o tèá

(Máfìù 8.23-27; Máà 4.35-41)

22Lúó doó káa, Zízɛ̀ wà là tòà‐píé‐mìà o yà gɔɔ doó yí. A gèe o lɛ̀ɛ, “Kɔ̀à lo yíía mɛ̀ĩ́.” O gbɛ̃̀ gbaa, wáà lò. 23Lɛ̀ o kɛ lópìàa, yi e die Zízɛ̀ ká. Fã̀ã̀ yí gágà zɛ̀ dò e gbɛ̃̀ gbaa, áà dìè yíía là. Yíí e gbɛ̃̀ gbaa, áà gɔ́ɔ́ɔ pà. E kɛ wɔ̃́ mìni zɛ̀ ká o lɛ̀ɛ. 24Tòà‐píé‐mìàa o ló Zízɛ̀ píé, wáà à vùò weeá kélɛ̀, “Ko dàa‐mì, ko dàa‐mì, ko gapìà.”

Zízɛ̀ e vùò, e mɛ́ĩ́ ɓo fã̀ã̀a wà yíí súlúú lɛ́ e kɛ dɔpìàa lɛ̀ɛ. Lɛ̀ e kɛ kília, yíía wà fã̀ã̀a o dɔ tã́ã̀ gbaa dĩĩ le. 25Lɛ̀ e kɛ kília, a gèe là tòà‐píé‐mìàa lɛ̀ɛ, “Ka zì zò‐dɔ̀à‐mɔ̀ɔ lɛ mɛ́?”

O lé paà e kɛá, tó wáà tùò. Wa gèe o kíe nì lɛ̀ɛ, “Dé e gɔ̃́ e kéa ká, lɛ́ è mɛ́ĩ́ ɓo fã̀ã̀ wà yíí o lɛ̀ɛ, tó wáà wéè kɛ̀ ɓɛ?”

Zízɛ̀ e gɔ̃ lɛ́ pɛ yɔɔ e kɛ à píéa la

(Máfìù 8.28-34; Máà 5.1-20)

26Lɛ̀ e kɛ kília, o tó yíía là, o ɓɔ sɛ́lɛ́ lɛ́ e Gèlásɔ́nì‐mìà pà ká, lɛ́ wà Gálàlíì o wɛlɛ vɔɔ̀ lɛ o kíe píéa yí. 27Lɛ̀ Zízɛ̀ e gbɛ̃̀ kpóṹ làa, wà gɔ̃ lɛ́ pɛ yɔɔ e kɛ à píé, lɛ́ è go sɛ́lɛ́ e kília yía, o o kíe gɛ̃̀. Sɔ aà gó à mɔ̀ ɓɛ̀lɛ̀‐píé gbèĩ zɛ̀. Lɛ̀ɛ́ gbaa kɛ yììpìà e píé kɛ́ì, kɛɛ e kɛ lópìà yììá sí ɓɔ́à sɔ́nɔ́ píé píé. 28Lɛ̀ e Zízɛ̀ gɛ̃̀ɛ, e gbɛ́ɛ́ gágà. E pèlè gbaa tã́ã̀ Zízɛ̀ wɛlɛ mɔ̀. E gbɛ́ɛ́ yí gágà zɛ̀, áà gèè, “Zízɛ̀, lɛ́ i Wálà yé e pɛ séĩ́ làa Gbe káa, mɛ́ ɓà nàà m píé? Ḿm̀ kpé kã i lɛ̀ɛ, yékɛ̀ í m sã̀ dɔ.” 29Gɔ̃́ɛɛ e kɛ à gèepìà kíli, ɓii Zízɛ̀ aà à gèe pɛ yɔɔ lɛ̀ɛ é gó à píé. Lúó búnùzɛ̀ káa, pɛ yɔɔ e kɛ gɔ̃́ɛ̃ɛ̃ ɓopià. Yé bɛ̃̀ɛ̃ mia o kɛ o nyìɛ kɛpìà gɔ̃́ɛɛ mɔ̀, tó à kɔ̀ wà à gã̀ yèlè lɛ pɛ‐kúlú ɓɛ̀lɛ̀ káa, e kɛ ɓɛ̀lɛ̀ɛ mɛ̀pìà, áà kã̀, tó pɛ yɔɔ e kília áà à yí lùò, áà lò yɛ̀í là.

30Zízɛ̀ e à wɛ̃́ĩ́‐lɔ̀ɔ kɛ weeá kélɛ̀, “I tɔ́ lɛ́ deĩ̀?”

A gèe, “M tɔ́ lɛ́ Mia Gbũ.” Ƃii pɛ yɔɔ búnùzɛ̀ e kɛ à píé. 31Pɛ yɔɔ vɔ̀ɔ o kpé kã́ Zízɛ̀ lɛ̀ɛ yékɛ̀ é o vɔ gùlù lɛ́ à tèá‐pìà wá ɓea yí.

32Ƃɔ̀ kù gbùò zɛ̀ dò o kɛ o lé ɓèlèpìà tɔ̃̀ũ̀a mɔ̀ kɔ̀ɛ́. Pɛ yɔɔ vɔ̀ɔ o kpé kã́ Zízɛ̀ lɛ̀ɛ, kɛ Zízɛ̀ á tó kɛ ó dà ɓɔ̀ vɔ̀ɔ bà. Yé e kɛ kília, Zízɛ̀ e wéé à mɔ̀ ó ló yi. 33Lɛ̀ e kɛ kília, pɛ yɔɔ vɔ̀ɔ o gó gɔ̃́ɛɛ píé, o ló, o dà ɓɔ̀ vɔ̀ɔ bà. O séĩ́‐séĩ́ o gbĩ̀ĩ bàlà ká goo gbèkènia là, wáà dùò yíía bà. Yé e kɛ kília, o tó yíí bà e nyɛ.

34Mia lɛ́ o kɛ o nyìɛ kɛpìà ɓɔ̀ vɔ̀ɔ mɔ̀ɔ, o wɔ̃́ lɛ́ e kɛɛ gɛ̃̀. Lɛ̀ e kɛ kília, o wàà gbaa. Ɛ́ɛ̃́ o ló, wáà wɔ̃́ sùu e kília dɔ̀ɔ̀ dɔ̀ pɛlɛí, ɛ̃́ɛ̃́ nyɛ́nɛ̀ĩ̀ kɔ́ɛ́í píé déĩ́ le. 35Mia o ló kɛ ó wɔ̃́ lɛ́ aà kɛɛ gɛ̃̀. O nu Zízɛ̀ píé. O gɔ̃ lɛ́ pɛ yɔɔ aà gó à píéa gɛ̃̀ yàá Zízɛ̀ gã̀ dṹɔ̃̀. Sɔ e kɛ à mɔ̀, ɛ̃́ɛ̃́ à wũ‐kèlè yí e kɛ gbaa sɛ̀. Míáa o kɛ gbaa túópìà. 36Mia lɛ́ o kɛ yí, wɔ̃́ e kília áà kɛ̀ o nyìɛ́ɛ, o zi lɛ́ gɔ̃́ɛɛ e la à káa gã̀ pɛ́ɛ́ míá o tóa lɛ̀ɛ. 37Mia séĩ́ lɛ́ o kɛ gópìà Gèlásɔ́nì‐mìà pàa, wa gèe Zízɛ̀ lɛ̀ɛ é gó wà sɛ́lɛ́ɛ yí. Ƃii o séĩ́ o kɛ túópìà kpó‐kpó ɓo. Lɛ̀ e kɛ kília, Zízɛ̀ e yà gbaa gɔ́ɔ́ɔ yí, e là ló ɓo. 38Gɔ̃ lɛ́ pɛ yɔɔ góò e kɛá à píéa, e kpé kã́ Zízɛ̀ lɛ̀ɛ, áà gèè, “Ì à tó kò ɓi kó ló.”

Kɛɛ Zízɛ̀ e à vɔ weeá kélɛ̀, 39“Ì lo i mɛ̀ĩ́ i pà, í wɔ̃́ lɛ́ Wálà aà kɛ i lɛ̀ɛ wɔ̃̀ gèe.”

Gɔ̃́ɛɛ e ló pɛ́lɛ e kília yí píé wɔ̃́ lɛ́ Zízɛ̀ aà kɛ à lɛ̀ɛ wɔ̃̀ gèeè ká.

Zálɛ̀ lú, wà lee lɛ́ e pá Zízɛ̀ mɔ̀‐sɔ̀ mɔ̀ɔ

(Máfìù 9.18-26; Máà 5.21-43)

40Lɛ̀ Zízɛ̀ e yɛ́ e zí, e ló yíía mɛ̀ĩ́a, mia kù lɛ́ o kɛ yía, wa kpɛ̀ɛ̀ kɛ, ɓii o séĩ́ o nyìɛ e kɛ à gɛ̀nɛ̀. 41Lɛ̀ e kɛ kília, gɔ̃ lɛ́ ò si Zálɛ̀ɛ e nu yí. E kɛ Zúù‐mìà zì Wálà‐kà wũ‐là‐mì ká. E gbini Zízɛ̀ gã̀ dṹɔ̃̀, áà kpé kã̀ à lɛ̀ɛ é ló à píé kɛ́ì. 42Ƃii à lú doó nɔ́ e kɛ à kɛ̀lɛ̀, lɛ́ à kɛ̀ɛ̀ aà kɛ vũ̀ doó wɛ́lɛ́ pèèlɛɛ, e kɛ gapìà.

Lɛ̀ Zízɛ̀ e kɛ lópìàa, mia séĩ́ o kɛ tópìà à píé wìà‐wìà le. 43Lee doó e kɛ yí. Léà‐yàà a kɛ kɛ̀ɛ̀ vũ̀ doó wɛ́lɛ́ pèèlɛ mɔ̀. Bɛ̀i lɛ̀ɛ́ kɛ do mi gbɛɛ mɔ̀ kɛ é à la. 44E nu Zízɛ̀ mɛ̀ĩ́, e pá Zízɛ̀ mɔ̀‐sɔ̀ léĩ́ mɔ̀. Lɛ̀ e kɛ nɔ́ kília, léàa e tèá gbaa diè ká à mɔ̀. 45Zízɛ̀ e wɛ̃́ĩ́‐lɔ̀ɔ kɛ, áà gèè, “Dé e pá m mɔ̀ ɓɛ?”

Mia séĩ́ wa tèé ɓo. Pílɛ̀ a gèe, “M dàa‐mì, mia nìɛɛ̀ lɛ i mɔ̀, tó wáà tò i píé wìà‐wìà le.”

46Kɛɛ Zízɛ̀ a gèe, “Mi dò e pá m mɔ̀. Ma yí dɔ lɛ̀ lɛ́ yíkɛ̀ gáàa e gó m yía ká.” 47Lééa a yí dɔ gbaa kélɛ̀ à bĩ̀ĩĩ̀ wá. E nu gbaa mɛ́‐tàle ká, e gbini Zízɛ̀ gã̀ dṹɔ̃̀. Mia séĩ́ nyìɛ mɔ̀ à lɛ̀ mɔ̀ɔ, e wɔ̃́ lɛ́ a mɔ́ɔ̀ pá ɓo Zízɛ̀ mɔ̀, ɛ̃́ɛ̃́ zi lɛ́ e la‐ɓo sɔ̀lɔ̀ ɓoa ká nɔ́ zá lea, a wɔ̃̀ gèe à lɛ̀ɛ. 48Zízɛ̀ a gèe à lɛ̀ɛ, “M lú, i zì zò‐dɔ̀à‐mɔ̀ aà i la. Ì ɓà ló ɓo í yi yiè zɛèé.”

49Lɛ̀ Zízɛ̀ e kɛ tĩã́ wɔ̃́ e kília gèepìàa, gɔ̃ dò e gó Zálɛ̀ píé kɛ́ì, áà gèè à lɛ̀ɛ, “I lú aà ga. Yékɛ̀ í Tísɛ̀ yí gíni ɓɔ̀ɔ.”

50Kɛɛ Zízɛ̀ e wɔ̃́ lɛ́ wa gèea ma, áà gèè Zálɛ̀ lɛ̀ɛ, “Yékɛ̀ i lè é dũ. I zò yee dɔ nɔ́ gágà. Ƃá kɛ̀á kília, lɛ́ɛ̀ lo kɛɛ̀ kéléŋ‐kèlèŋ.”

51Lɛ̀ e ɓɔ Zálɛ̀ píé kɛ́ìa, lɛ̀ɛ́ gbaa naa wà mi nɔ́ɔ fé dò ó wàà káa wì, é kã́ Pílɛ̀, wà Zɔ̃̀ɔ̃́ ɛ̃́ɛ̃́ Zĩ́ĩ̀, e bɛ̀i, nɛ́fúa dàa wà à lèe o mɔ̀ɔ ká. 52Mia séĩ́ o kɛ gbɛ́ɛ́pìà gbóó ká nɛ́fúa mɔ́ɔ̀ wɔ̃̀ mɔ̀. Zízɛ̀ a gèe kélɛ̀, “Yékɛ̀ ká gbóó ɓo. Nɛ́fúa gaà wá. Yi lɛ́ lɛ à bàa.”

53Míáa wáà yéí sì Zízɛ̀ mɔ̀, ɓii wa yí dɔ kélɛ̀ nɛ́fúa gaà lɛ. 54Kɛɛ Zízɛ̀ e nɛ́fúa kṹ e kɔ̀ mɔ̀, áà gèè à lɛ̀ɛ, “Nɛ́fú, wɛ̀lɛ̀.” 55Lɛ̀ e kɛ kília, à gɛ̀ɛ̀ e nu à yí e mɛ̀ĩ́. Nɔ́ zá lea, e wɛ̀lɛ̀. Zízɛ̀ a gèe à mìà nì lɛ̀ɛ ó pɛ nɔ nɛ́fúa lɛ̀ɛ á ɓèlè. 56Nɛ́fúa mìà nì lé kpó‐kpó paà e kɛá. Kɛɛ Zízɛ̀ e lìè‐wè dɔ o lɛ̀ɛ, áà gèè yékɛ̀ ó wɔ̃́ lɛ́ aà kɛɛ, wɔ̃̀ gèe mi nɔ́ɔ fé lɛ̀ɛ.

Currently Selected:

Lúù 8: MNT

Highlight

Copy