Lúù 17
17
Kɛ‐wɔ̃̀ yɔɔ
(Máfìù 18.6-7, 21-22; Máà 9.42)
1Zízɛ̀ a gèe là tòà‐píé‐mìà lɛ̀ɛ, “Pɛ lɛ́ è lo à kɛɛ̀ kɛ mi é kɛ‐wɔ̃̀ yɔɔ kɛɛ, lɛ à mɔ̀ é kɛ. Kɛɛ mi lɛ́ à kɛ̀ lɛ́ wɔ̃́ nì e kília è kɛ̀ɛ, wɔ̃́ yéĩ̀zɛ̀ kɛɛ̀ lɛ à ká. 2Áá kɛɛ̀ dóo sɛ̀ à mɔ̀ yé waà gɛ̀lɛ̀ wéĩ́ gbùò yèlè mí e kília kpɛɛ mɔ̀, wáà dùòá mɛ̀ĩ́ bàa ká, é dieá à tò é à kɛ nɔ́ɔ̀ɓé o kéa doó‐mì é kɛ‐wɔ̃̀ yɔɔ kɛɛ là. 3Kà ka yɛ́lɛ́ kɛ ka dìè píé.
“Yé i lèe‐gé aà kɛ‐wɔ̃̀ yɔɔ kɛɛ, ì mɛ́ĩ́ ɓo à lɛ̀ɛ. Yé aà dà yéĩ̀ yía, ì kã́ à kɛ‐wɔ̃̀ mɔ̀, ɓá káá tã́ã̀. 4É kɛ‐wɔ̃̀ yɔɔ kɛ̀á i ká kpolà sálápèèlɛ zɛ̀ lúó doó píé, tó áà nù, áà dà yéĩ̀ yí yé aà kɛɛ ká doó doóa, lɛ i mɔ̀ í kã́ à kɛ‐wɔ̃̀ mɔ̀, ɓá káá tã́ã̀.”
Zò‐dɔ̀à‐mɔ̀
5Àpɔ́sɔ̀lɔ̀ vɔ̀ɔ wa gèe ko Dàa‐mì lɛ̀ɛ, “Ì ko zì zò‐dɔ̀à‐mɔ̀ là kpɔ́.”
6Ko Dàa‐mì a gèe kélɛ̀, “Zò‐dɔ̀à‐mɔ̀ e ka yía, è kɛ̀á lɛ gbùò vɔ̀ kélɛ̀ màà‐yè‐ŋèlè wɛ́lɛ́ doó kɛ̀‐gbɔ́ù‐kɔ̀ lɛ́ ɓea, káá à gèeè síkámɔ̀‐yìlì e kéa lɛ̀ɛ, ‘Ì i dìè wòlò i gáná ká, í i dìè taa mɛ̀ĩ́ bà,’ tó áà ka wéè kɛ̀.
Wɔ̃́ lɛ́ lɛ yɛɓo‐kɛ‐mì mɔ̀ á kɛɛ
7“Yé vɔ̀ mi dò aà kɛ ka dò ka kɛ̀lɛ̀, tó áà lɛ̀ wìĩ́ĩ̀ ɓò, ɛ̃́ɛ̃́ tó áà e nyìɛ kɛ̀ kà ɓáá vɔ̀ mɔ̀ɔ, yé aà gó nyɛ́nɛ̀ĩ̀a, káà lo à gèeè à lɛ̀ɛ, ‘Nu zázá, í yà tã́ã̀, í pɛ ɓèlè’? 8Gbàaò, ìí ló à kɛɛ̀ kíli. Kɛɛ íì lo à gèeè à lɛ̀ɛ, ‘Ì lo í m̀ léɓèlè pɛ̀ kɛ, ɛ̃́ɛ̃́ í ɓà yɛɓo‐kɛ‐sɔ̀ɔ dà i mɔ̀, í i yɛ́lɛ́ kɛ m mɔ̀ yé maà kɛ pɛ ɓèlèpìà, máà pɛ mìa ká. Yé maà nyɛɛ, kɛ í pɛ ɓèlè, ɓáà pɛ mì.’ 9Káà yí dɔ e yɛɓo‐kɛ‐mìa zúo ɓo wɔ̃́ lɛ́ a gèe á kɛ, lɛ́ a kɛɛ, mɔ́ɔ̀ wɔ̃̀ mɔ̀? 10Zi nɔ́ doóa lɛ́ lɛ ka káa. Yé kaà wɔ̃́ séĩ́ lɛ́ waà gèe ka lɛ̀ɛ ká kɛɛ, kɛɛ, kà à gèe, ‘Ko nɔ́ yɛɓo‐kɛ̀‐mi‐mɔ̀‐mìà ɓɔ̀ɔ ká. Wɔ̃́ nɔ́ e ko mɔ̀ kó kɛɛ, lɛ́ kɔaà à kɛɛ.’ ”
Zízɛ̀ e gbéè‐mìà vũ̀ doó la
11Lɛ̀ Zízɛ̀ e kɛ lópìà Zùlúsàlɛ̀ɛ, e die sɛ́lɛ́ lɛ́ ò si Sɛ̀mɛ́lìà wà Gálàlíìa o fĩ̀ã̀. 12Lɛ̀ e kɛ dàpìà kpã̀ãã̀ dò mɔ̀ɔ, wà gbéè‐mìà vũ̀ doó o o kíe gɛ̃̀. O dɔ Zízɛ̀ ká gbèkèni, 13wáà gbɛ̀ɛ̀ weeá kélɛ̀, “Zízɛ̀, ko dàa‐mì, ì ko yéĩ̀ kṹ.”
14Zízɛ̀ e o gɛ̃̀, áà gèè o lɛ̀ɛ, “Kà lo ká ka dìè zɔ̃̀ɔ̃̀ sálà‐ɓò‐Wálà‐mɔ̀‐mìàa lɛ̀ɛ.”
Lɛ̀ o gbɛ̃̀ gbaa zuú, wáà lòa, o laà e kɛá, tó bɛ̀i e kɛ gbaa o mɔ̀ kɛ ó dà o ɓɛ́ĩ̀ bà. 15Lɛ̀ lɛ́ o doó‐mì a gɛ̃̀ kélɛ̀ aà laa, e yɛ́ e zí, áà e wúú wɛ̀lɛ̀ lɛ̀í Wálà tɔ́ ɓɔɔ̀ ká. 16E e dìè dà gbaa tã́ã̀ Zízɛ̀ gã̀ dṹɔ̃̀, áà à zúo ɓò. Gɔ̃́ e kília, e kɛ Sɛ̀mɛ́lìà mi ká. 17Zízɛ̀ a gèe à lɛ̀ɛ, “Ḿ gɔ̃̀, míá ka la‐ɓo sɔ̀lɔ̀ ɓoa, ka kɛ vũ̀ doó? Mia sɛ́lɛ́ìsɛ yé o tóa o mɛ́? 18Mɛ́ e kɛ lɛ́ sɛ́lɛ́ gbɛɛ yí‐mì doó e kéa yee, è yɛ e zí kɛ é Wálà zúo ɓo ɓe?” 19Zízɛ̀ a gèe à lɛ̀ɛ, “Ì wɛ̀lɛ̀ í ɓà ló ɓo. I zì zò‐dɔ̀à‐mɔ̀ aà i la.”
Wálà zì tò‐mia‐là nu‐lùò
(Máfìù 24.23-28, 37-41)
20Fálásíì‐mìà gbṹũ̀ o Zízɛ̀ wɛ̃́ĩ́‐lɔ̀ɔ kɛ lúó lɛ́ Wálà zì tò‐mia‐là è lo ɓɔɔ̀ à káa, mɔ́ɔ̀ wɔ̃̀ ká. Zízɛ̀ a yí ɓo o lɛ̀ɛ kélɛ̀, “Wálà zì tò‐mia‐làa lɛ̀ɛ́ nu zi lɛ́ mia ò bɛ̀i à mɔ̀ ó gɛ̃̀ à káa ká. 21Mi gbɛɛ lɛ̀ɛ́ ló à gèeè kélɛ̀, ‘Lɛ̀ gɛ̃̀, ye gɛ̃̀ e ké,’ ɛ̃́ɛ̃́ kɛ bɛ̃̀ɛ̃ mi á gèe kélɛ̀, ‘Ye gɛ̃̀ e dĩ̀ĩ ké,’ ɓii Wálà zì tò‐mia‐là kɛ̀ ka yí mɔ́ɔ̀ wɔ̃̀ mɔ̀.”
22Lɛ̀ e kɛ kília, a gèe là tòà‐píé‐mìà lɛ̀ɛ, “Lúó lɛ́ kà lo à naà kɛ ká Mi Gbe kɛ̀à‐yí‐lùò dò gɛ̃̀áa, lɛ́ɛ̀ lo ɓɔɔ̀. Kɛɛ kàá ló à gɛ̃̀ɛ̃̀. 23Mia dò óò lo à gèeè ka lɛ̀ɛ, ‘Kà lɛ̀ gɛ̃̀ dĩ̀ĩ ké,’ ɛ̃́ɛ̃́ ‘Kà lɛ̀ gɛ̃̀ lɛ̀ e kéa mɔ̀.’ Kɛɛ yékɛ̀ ká ló à nàá sí. 24Zi lɛ́ lɛ̀í‐kɛ‐gɛ́lɛ́ è kɛ̀á, tó áà lɛ̀ fɔ̀nɔ̀ kɔ̀ pɔ̃́ũ̀ pèèlɛ làa, zi nɔ́ Mi Gbe è lo kɛɛ̀á à zì lúó káa lɛ́ ɓɛ. 25Kɛɛ lɛ à mɔ̀ ḿ wɔ̃́ nyɔ́ɔ̀ɔ búnùzɛ̀ gɛ̃̀ nɛ́ bèĩzɛ̀, ɛ̃́ɛ̃́ zeĩ́, lɛ à mɔ̀ mia lɛ́ o ɓe yà kɔa ɓoa yía, ó m wɔ̃̀ dà nɛ́ o kɔ̀ mɛ̀ĩ́. 26Zi lɛ́ wɔ̃́ e kɛá Nóà zì yìì yía, zi nɔ́ doóa lɛ́ è lo kɛɛ̀á Mi Gbe zì lúó káa. 27Mia o kɛ nɔ́ pɛ ɓèlèpìà, wáà pɛ mì, gɔ̃à wà loà nì wáà o kíe sì, é ló é ɓɔá lúó kpó‐kpó lɛ́ Nóà e ló à ká gɔɔ yí, lɛ́ yíí paàa e nu, lɛ́ e mia séĩ́ zɛɛ mɔ̀. 28Wɔ̃́ lɛ́ɛ̀ lo kɛɛ̀ lɛ̀ zí e kɛá Lɔ́ɔ̀ yìì yía ká. Mia o kɛ nɔ́ pɛ ɓèlèpìà, wáà pɛ mì, ɛ̃́ɛ̃́ wáà pɛ lɔ̀, tó wáà pɛ lɔ̀ɔ̀ dɔ̀, ɛ̃́ɛ̃́ wáà pɛ tàà, tó wáà dɔ‐pɛ̀ dɔ̀. 29Kɛɛ lúó lɛ́ Lɔ́ɔ̀ e góá Sɔ́dɔ̃̀ɔ, tíé wà sɔ́fà o gó lɛ̀í, wáà bã̀ tã́ã̀ lɛ̀ lɛ̀ɛ lɛ́ ɓe. E o séĩ́ o zɛ. 30Zi nɔ́ doóa lɛ́ wɔ̃́ è lo kɛɛ̀ à ká lúó lɛ́ Mi Gbe è lo e dìè zɔ̃̀ɔ̃̀ à ká mia lɛ̀ɛ káa.
31“Mi lɛ́ è lo kɛɛ̀ e píé ká là lɛ̀í lúó e kília káa, yékɛ̀ é gbɛ̃̀ tã́ã̀ é ló kɛ́ì, kɛ é là pɔɔ̀ lɛ́ e yía sí. Zi nɔ́ doóa káa, yékɛ̀ mi lɛ́ lɛ e píé nyɛ́nɛ̀ĩ̀a, é ló e mɛ̀ĩ́ e píé kɛ́ì. 32Ka zò è vùò Lɔ́ɔ̀ na mɔ́ɔ̀ wɔ̃̀ ká. 33Mi lɛ́ à kɛ‐zì nàà é e dìè zì kɛ̀ɓe laa, lɛ́ɛ̀ lo kɔ̃́ɔ̃̀ e dìè wɔ̃̀ yí ká. Mí è e dìè wɔ̃̀ dà tã́ã̀a, lɛ́ɛ̀ lo e dìè laà. 34Kà tó ḿ gèe ka lɛ̀ɛ, ɓĩ́ e kília míàa, gɔ̃à pèèlɛ óò lo kɛɛ̀ wɔ̀ɔ̀á kpĩ̀ĩ̀ doó là. Óò lo mi doó kṹũ̀, tó mi doó‐mì bɛ̃̀ɛ̃ e là tó ɓo yí. 35Loà pèèlɛ óò lo kɛɛ̀ pɛ zɔ̃pìà e kíe bà. Óò lo mi doó síì, tó mi doó‐mìa bɛ̃̀ɛ̃ e là tó ɓo yí. [ 36Gɔ̃à pèèlɛ óò lo kɛɛ̀ nyɛ́nɛ̀ĩ̀. Óò lo mi doó síì, tó mi doó‐mìa bɛ̃̀ɛ̃ e là tó ɓo yí.]”
37Là tòà‐píé‐mìàa wa wɛ̃́ĩ́‐lɔ̀ɔ kɛ kélɛ̀, “Mɛ́ɛ̀ zàá, ko Dàa‐mì?”
Zízɛ̀ a gèe o‐lɛ̀ɛ, “Lɛ̀ lɛ́ pɛ bílí lɛ yía, lɛ́ kɔ̀a vɔ̀ ò kpũ̀ũ‐kpũ̀ũ kũ yía.”
Currently Selected:
Lúù 17: MNT
Highlight
Share
Copy
Want to have your highlights saved across all your devices? Sign up or sign in
Mann New Testament © Bible Society in Liberia, 1978.
