Ìfísɔ̃̀ 5

Kɛ̀ɓe lɛ́ lɛ lɛ̀ púlú mɔ̀ɔ

1Lɛ̀ ka mɔṹ Wálà là nɔ́ɔ̀ lɛ́ o lɔ̀ kpɔ́ɔ̀ lɛ à mɔ̀ɔ káa, kà à píé gɔ̃́. 2Lɛ sɛ̀ lɔ̀-kɛ̀à-mɔ̀ é líé sí ka zì kɛ̀ɓe ká, zi nɔ́ doó lɛ́ ko lɔ̀ kpɔ́ɔ̀ lɛ à ká Kɛ́lɛ̀ì mɔ̀, lɛ́ a mɔ́ɔ̀ e dìè nɔ ɓo ko mɔ́ɔ̀ wɔ̃̀ mɔ̀ɔ ká. À zì dìè a nɔ kília, lɛ́ e nɔ̀-lɛ̀ɛ-pɛ̀ gĩĩ yiè zɛ̀ lɛ́ a nɔ, e bɛ̀i sálà lɛ́ a ɓo Wálà lɛ̀ɛ káa.

3Lɛ̀ ka Wálà là mia nì káa, lɛ̀ɛ́ à mɛ́ kṹ bɛ̃̀ɛ̃ kɛɛ sɔ̃̀ɔ̃ yɔɔ kɛɛ̀, wà wɔ̃́ lilì kṹã̀a zɛ̀ séĩ́ kɛɛ̀, ɛ̃́ɛ̃́ pɛ séĩ́ lɔ̀-kpɔ̀ mi mɔ̀, kɛ bɛ̃̀ɛ̃ ó o wɔ̃̀ gèe ka fĩ̀ã̀. 4Ɛ́ɛ̃́ ye wá bɛ̃̀ɛ̃ sɛ̀ kɛɛ ká wéé lilì kṹã̀a zɛ̀, ɛ̃́ɛ̃́ wɔ̃́ yí gíniìa zɛ̀, e bɛ̀i wéé wũ nyɛ̀-à-mɔ̀ zɛ̀ gèe bɛ̃̀ɛ̃. Kɛɛ lɛ ka mɔ̀ ká Wálà zúo ɓo. 5Lɛ à mɔ̀ ká wɔ̃́ e kéa yí dɔ. Ye lɛ́ e kélɛ̀, mi nɔ́ɔ fé lɛ́ è sɔ̃̀ɔ̃ yɔɔ kɛ̀, ɛ̃́ɛ̃́ è wɔ̃́ lilì kṹã̀a zɛ̀ kɛ̀, e bɛ̀i, lɛ́ pɛ séĩ́ lɔ̀ kpɔ́ɔ̀ lɛ à mɔ̀, lɛ́ à kɛ̀ kíli lɛ gbìnì kɛ̀ɛ̀-wɛ́lɛ́ lɛ̀ɛ káa, míá o kília o dò nɔ́ɔ fé dɔ̀lɔ̀ lɛ̀ɛ́ ló kɛɛ̀ mia lɛ́ Kɛ́lɛ̀ì wà Wálà o tóò lɛ o làa fĩ̀ã̀.

6Yékɛ̀ ká tó mi nɔ́ɔ fé é ka bèkɛ̀ ɓo wéé yí gíniìa zɛ̀ gèeè ká. Ƃii wɔ̃́ nɔ́ doó e kília kɛɛ̀ lɛ́ Wálà zì wɔ̃́à-wàa-kɔ̀ è lo à mɔ́ɔ̀ nu ɓoò mia lɛ́ òó à wéè kɛɛ làa. 7À mɔ́ɔ̀ wɔ̃̀ mɔ̀ɔ, mia sùu o kília kà ka lé ɓo wà wɔ̃́ yí. 8Ka dìè ka mɔ́ bĩ́ tii bà. Kɛɛ yé kaà kɛ gbaa ko Dàa-mì là mia nì káa, ka gbaa lɛ̀ púlú mɔ̀. À mɔ́ɔ̀ wɔ̃̀ mɔ̀ɔ, lɛ ka mɔ̀ ká wɔ̃́ kɛ lɛ̀ mia lɛ́ lɛ̀ púlú lɛ o kɛ̀lɛ̀ɛ lɛ́ ò wɔ̃́ kɛ̀. 9Ƃii lɛ̀ lɛ́ lɛ̀ púlú e kília lɛ yía, wɔ̃́ yiè doò do, ɛ̃́ɛ̃́ wɔ̃́ kpeĩ kɛɛ̀, e bɛ̀i wánà-wɔ̃̀ liì lɛ yí. 10Kà à kɛ-zì naa ká wɔ̃́ lɛ́ è ko Dàa-mì zò dàa mɛ́ dã́. 11Kà ka kɔ̀ ɓo bĩ́ tii zì yɛɓo à kɛ̀, lɛ́ lɛ wɔ̃́ dà tã́ã̀ zɛ̀ káa bà. Kɛɛ kà nu o ká lɛ̀ púlú mɔ̀. 12Lɛ wɔ̃́ yɛ́lɛ̀ zɛ̀ ká kɛɛ wɔ̃́ lɛ́ mia ò kɛ̀ bĩ̀ĩ̀ káa, kɛ à wɔ̃̀ gèeè é kɛá bɛ̃̀ɛ̃. 13Ɛ́ɛ̃́ yé waà nu pɛ séĩ́ ká lɛ̀ púlú mɔ̀ɔ, kɛɛ zi sùu lɛ́ o kɛ-kɔ̀ lɛ à káa, kɛɛ lɛ́ɛ́ aà ɓo gbaa o là. 14Ƃii pɛ nɔ́ɔ fé lɛ́ lɛ́ɛ́ ɓoò lɛ à làa, kɛɛ aà kɛ gbaa lɛ̀ púlú ká. Pɛ́ à kɛ̀ lɛ́ ò gèe kélɛ̀,

“Yi zɛ-mì, ì vùò.

Ì wɛ̀lɛ̀ ga kɛ̀lɛ̀.

Kɛ́lɛ̀ì lɛ́ɛ̀ lo lɛ̀ fɔ̀nɔɔ̀ i bàa,” lɛ́ ɓɛ.

15À mɔ́ɔ̀ wɔ̃̀ mɔ̀ɔ, kà ka yɛ́lɛ́ kɛ ka dìè táá-kɔ̀ píé. Yékɛ̀ ká táá lɛ̀ mia lɛ́ òó wɔ̃́ yí dɔɔ lɛ́ ɓe. Kɛɛ kà táá lɛ̀ gíkã́-mìà lɛ́ ɓe. 16Kà yɛɓo yiè kɛ lúó lɛ́ e ka kɛ̀lɛ̀ɛ píé, ɓii lúó e kéa lɛ lúó yɔɔ ká. 17À mɔ́ɔ̀ wɔ̃̀ mɔ̀ɔ, yékɛ̀ ká kɛ bè zɛ̀. Kɛɛ kà kɛ-zì naa kɛɛ ká wɔ̃́ lɛ́ ko Dàa-mì à nàà ká kɛɛ yí ma.

18Yékɛ̀ wã́ã́ĩ̀ é ka kɛ. Ƃii wɔ̃́ e kília lɛ́ɛ̀ mi sìè. Kɛɛ é kã́ à yee mɔ̀ɔ, ka paà è kɛá Gɛ̀ɛ̀ Púlú ká. 19Kà wéé ka kíe nì píé tã́ lɛ́ e Wálà là kíía yí, e bɛ̀i, tã́ yé è nu tɔ́-ɓɔ káa, ɛ̃́ɛ̃́ zeĩ́ Wálà-tã̀ ɓoò yí zàá. Kà tã́ doò do ɓo ko Dàa-mì píé káà tɔ́ ɓɔ̀ ka zò píé. 20Kà Wálà lɛ́ e mia Dàa káa zúo ɓo pɛ séĩ́ wɛ̃́ĩ̀, ko Dàa-mì Zízɛ̀ Kɛ́lɛ̀ì tɔ́ yí zàá teele.

Gɔ̃ã̀ wà o na nì

21Kà kɛ ka kíe nì wì, ɓii káà tùò Kɛ́lɛ̀ì lɛ̀ɛ mɔ́ɔ̀ wɔ̃̀ mɔ̀.

22Míá ka gɔ̃ã̀ na nì káa, kà kɛ ka dɛ̃ nì wì, lɛ̀ zí ka à ká ko Dàa-mì wìa lɛ́ ɓe. 23Ƃii gɔ̃ lɛ e na là, lɛ̀ zí Kɛ́lɛ̀ì lɛ à ká là mia nì làa lɛ́ ɓe. Kɛɛ Kɛ́lɛ̀ì dìè lɛ là mia nì lɛ́ o à gbĩ-kpàla káa, La-mì ká. 24À mɔ́ɔ̀ wɔ̃̀ mɔ̀ɔ, lɛ loà nì mɔ̀ ó o dìè kɛ o dɛ̃ nì wì zi séĩ́ ká, lɛ̀ zí Kɛ́lɛ̀ì là mia nì ò o dìè kɛ̀á Kɛ́lɛ̀ì wìa lɛ́ ɓe.

25Lee-sí-gɔ̃̀ã̀ ka bɛ̃̀ɛ̃, ka na nì lɔ̀ è kpɔ́ ka mɔ̀, zi doó lɛ́ Kɛ́lɛ̀ì là mia nì lɔ̀ kpɔ́ɔ̀ lɛ à ká à mɔ̀, lɛ́ e e dìè nɔ o wɛ̃́ĩ̀a ká. 26A kɛ kíli kɛɛ é là mia nì kɛ ó kɛ Wálà doó là mia nì ká e wéè kolo là, lɛ̀ lɛ́ e nyɛ o mɛ́ pɛ́lɛ̀ mɔ̀ yíí bà, lɛ́ o mɛ́ ɓɔɔ̀ e kɛá gbaa ká. 27A kɛ kíli kɛɛ é Wálà-mìà nɔ e dìè lɛ̀ɛ o zì li-kɔ̀ɔ yí, kɛɛ ó kɛ púlú, ɛ̃́ɛ̃́ yékɛ̀ o kɛɛ é kɛ o mɔ̀, ɛ̃́ɛ̃́ yékɛ̀ zeĩ́ pɛ píé wà o kii fɔ̃́-nyɔ́ kṹũ̀, ɛ̃́ɛ̃́ pɛ dò nɔ́ɔ fé lɛ́ è bɛ̀i o kɛɛ̀ yɔɔ é kɛ o mɔ̀. 28Lɛ gɔ̃ã̀ mɔ̀ o na nì lɔ̀ é kpɔ́ o mɔ̀ lɛ̀ zí o dìè gbĩ-kpàla lɔ̀ kpɔ́ɔ̀ lɛ à ká o mɔ̀ɔ lɛ́ ɓe. Mi lɛ́ à lɔ̀ kɛ̀ e na káa, kɛɛ láà nàà e dìè ká. 29Mi gbĩ-kpàla lɔ̀ lɛ̀ɛ́ nyɛ i dìè mɔ̀. Kɛɛ íì léɓèlè nɔ à lɛ̀ɛ, tó ɓáà i yɛ́lɛ́ yiè kɛ̀ à píé, lɛ̀ zí Kɛ́lɛ̀ì à kɛ̀á là mia nì káa lɛ́ ɓe. 30Ƃii ko à gbĩ-kpàla gbɛ̃ĩ̀-pɛ ká. 31“Wɔ̃́ e kília mɔ́ɔ̀ wɔ̃̀ mɔ̀ɔ, gɔ̃ lɛ́ɛ̀ lo e dàa wà e lèe o tóò, tó wà e na o dà o kíe bà, tó o pèèlɛɛ o kɛ gbaa doó.” 32Wánà-wɔ̃̀ kpànazɛ̀ lɛ wɔ̃́ nì e kéa yí. M zì yɛ́lɛ́-táá yía, ḿm̀ gèe à wɔ̃̀ gbɛ̃̀ɛ̃̀ lɛ Kɛ́lɛ̀ì wà là mia nì o mɔ̀. 33Kɛɛ à gbɛ̃̀ɛ̃̀ lɛ ka bɛ̃̀ɛ̃ ka mɔ̀ nɔ́ kíli. Lɛ gɔ̃ séĩ́ mɔ̀ à na lɔ̀ kpɔ́ɔ̀ é kɛá à mɔ̀, lɛ̀ zí à dìè lɔ̀ kpɔ́ɔ̀ lɛ à ká à mɔ̀ɔ lɛ́ ɓe. Ɛ́ɛ̃́ lɛ lee séĩ́ mɔ̀ é ɓɛ̀lɛyà nɔ e dɛ̃ lɛ̀ɛ.

Currently Selected:

Ìfísɔ̃̀ 5: MNT

Highlight

Copy