Ìfísɔ̃̀ 3

Yɛɓo lɛ́ Pɔ́ɔ̀ a kɛ sɛ́lɛ́ gbɛɛ yí-mìà lɛ̀ɛ

1Wɔ̃́ e kéa mɔ́ɔ̀ wɔ̃̀ mɔ̀ɔ, ma Pɔ́ɔ̀ lɛ́ m Kɛ́lɛ̀ì Zízɛ̀ là bĩ́-kɛ̀ì mì ká míá ka sɛ́lɛ́ gbɛɛ yí-mìà káa ka mɔ́ɔ̀ wɔ̃̀ mɔ̀ɔ, ḿm̀ sɛ̀nɛ ɓo Wálà lɛ̀ɛ. 2Ḿm̀ à yí dɔ wánà ká kélɛ̀ kaà à ma kélɛ̀ Wálà zì zò-kɛ̀-sɛ̀ lɛ́ a kɛ lɛ́ e yɛɓo e kéa kpɔ́ m kɔ̀ là kɛ ḿ kɛ ka mɔ́ɔ̀ wɔ̃̀ mɔ̀ɔ. 3Wálà e wɔ̃́ lɛ́ à bĩ̀ĩĩ̀ e kɛáa, e lɛ́ɛ́ ɓo à là m lɛ̀ɛ. Wɔ̃́ e kília maà wɔ̃́ dò bɛ̃̀ɛ̃ e kpuú ká é gbɛ̃̀á à mɔ̀. 4È kɛ̀á káà nàà ká pɛ lɛ́ ma bɛ̃̀ɛ̃ gèea, káá wɔ̃́ lɛ́ à bĩ̀ĩĩ̀ e kɛá lɛ́ à gbɛ̃̀ɛ̃̀ lɛ Kɛ́lɛ̀ì mɔ̀ɔ, káá gíkã́ lɛ́ maà à dã́ à mɔ̀ɔ yí maà. 5Lúó lɛ́ aà diea píéa, òó gbaa wɔ̃́ e kéa zɔ̃̀ɔ̃̀ mia lɛ̀ɛ. Kɛɛ Wálà aà lɛ́ɛ́ ɓo à là gbaa là àpɔ́sɔ̀lɔ̀ vɔ̀ púlú, e bɛ̀i, dɔ̀à-lé-là-mìà lɛ̀ɛ Gɛ̀ɛ̀ Púlú kolo là zàá. 6Wɔ̃́ à bĩ̀ĩĩ̀ e kɛá kília, gɛ̃̀ e ké. Wɔ̃́ làṹ yièa kolo là zàáa, sɛ́lɛ́ gbɛɛ yí-mìà óò bɛ̀i gbaa à mɔ̀ wà Zúù-mìà ó dɔ gbaa lúà nì lɛ́ è go Wálà kɛ̀lɛ̀ɛ yí gbaa. O gbaa gbĩ-kpàla doó yí-mìà ká. Óò dɔ wè-dɔ-wè lɛ́ Wálà e e wè dɔ à káa yí Kɛ́lɛ̀ì Zízɛ̀ yí zàá.

7Wálà zì nɔ̀-lɛ̀ɛ-pɛ̀ kpànazɛ̀ lɛ́ a nɔ m lɛ̀ɛ, e m kɛ yɛɓo-kɛ-mì ká wɔ̃́ làṹ yièa wɛ̃́ĩ̀. Wálà e nɔ̀-lɛ̀ɛ-pɛ̀ e kília nɔ m lɛ̀ɛ yɛɓo lɛ́ à zì yíkɛ̀ gáàa à kɛ̀ɛ kolo là. 8Wálà mi yé Wálà-mìà yé o tóa o à mɔ̀ fìaa, à bɛ̃̀ɛ̃ lɛ m mɔ̀ fìa. É kɛ bɛ̃̀ɛ̃ kília, ye gɛ̃̀, Wálà e wɔ̃́ yiè e kéa nɔ m lɛ̀ɛ ɓɛ. Ye lɛ́ e kélɛ̀, ḿ wɔ̃́ làṹ yiè lɛ́ à gbɛ̃̀ɛ̃̀ lɛ Kɛ́lɛ̀ì là dɔ-pɔ̀ɔ̀ lɛ́ lóní wá à mɔ̀ɔ wɔ̃̀ gèe sɛ́lɛ́ gbɛɛ yí-mìà lɛ̀ɛ. 9Ɛ́ɛ̃́ lɛ́ zeĩ́ e kélɛ̀, kɛɛ ḿ mia séĩ́ kɛ ó wɔ̃́ lɛ́ Wálà a yà e gé á kɛ, lɛ́ à bĩ̀ĩĩ̀ e kɛáa, zi lɛ́ è lo kɛɛ̀ à káa, kɛ ó à gɛ̃̀. Wálà lɛ́ e pɛ séĩ́ kɛ-mì káa, e wɔ̃́ e kéa bĩ̀ĩ̀ mia mɔ̀ lúó lɛ́ aà diea píé, 10kɛɛ lúó lɛ́ e pɛ́nɛɛ ɓea, mia yí gáàa zɛ̀ wà yíkɛ̀ gáàa nì lɛ́ o lɛ̀ séĩ́ lɛ́ lɛ lɛ̀ía mɔ̀ɔ, kɛɛ ó Wálà zì gíkã́ kpolà doò do zɛ̀ɛ dɔ à zì mia nì kolo là zàá. 11Wálà e wɔ̃́ nì e kília kɛ wɔ̃́ lɛ́ aà yà e gé á kɛ, lɛ́ lɛ tòá kíli wɔ̃̀ káa, mɔ́ɔ̀ wɔ̃̀ mɔ̀. Wɔ̃́ lɛ́ a yà e gé kília, aà à kɛ gbaa, aà kɛ wánà zɛ̀ ko Dàa-mì Kɛ́lɛ̀ì Zízɛ̀ kolo là zàá. 12Kò ye nì ko kɛ̀ doó yí, ɛ̃́ɛ̃́ ko zì zò-dɔ̀à-mɔ̀ kolo làa, yíkɛ̀ gáàa nɔɔ̀ lɛ ko lɛ̀ɛ kɛ kó ló Wálà nyìɛ mɔ̀ zò píé wɛ́lɛ́-wɛ̀lɛ̀-là ká. 13À mɔ́ɔ̀ wɔ̃̀ mɔ̀ɔ, kà kpé lɛ sɛ̀, yékɛ̀ ka zò é dà zízàá, ɓii m wàa ɓèlèpìà ka mɔ́ɔ̀ wɔ̃̀ mɔ̀ɔ wɛ̃́ĩ̀. À séĩ́ lɛ lɛ̀ fɔ̀nɔ̀ ka bà mɔ́ɔ̀ wɔ̃̀ mɔ̀.

Kɛ́lɛ̀ì zì mia lɔ̀-kpɔ̀à-mɔ̀

14Wɔ̃́ e kéa mɔ́ɔ̀ wɔ̃̀ mɔ̀ɔ, ma mɔ́ɔ̀ káá ɓo m kpuò là mia Dàa 15lɛ́ mia kɔ̀-píé-mìà séĩ́-séĩ́ lɛ́ o lɛ̀í, ɛ̃́ɛ̃́ lɛ́ o tã́ã̀ zèea, ò o tɔ́ sɔ̀lɔ̀ ɓo à kolo làa wɛlɛ mɔ̀. 16Ḿm̀ wɔ̃́ e kéa pɛ̃ Wálà mɔ̀. Ye lɛ́ e kélɛ̀, kɛ é yíkɛ̀ gáàa lɛ́ è go là dɔ-pɔ̀ɔ̀ lɛ́ à yàlà ɓoò lɛ lɛ̀-fɔ̀nɔ-kɔ̀ɔ yía, kɛɛ á nɔ ka lɛ̀ɛ à zì Gɛ̀ɛ̀ Púlú kolo là kɛɛ é mi lɛ́ e ka yía mɛ́ kɛ gágà, 17ɛ̃́ɛ̃́ kɛɛ Kɛ́lɛ̀ì é e yàlà kṹ ka zò píé zò-dɔ̀à-mɔ̀ kolo là. Ḿm̀ sɛ̀nɛ ɓo kɛɛ ka gáná wà ka gã̀-gbɛ̃̀à-là gɛ̀lɛ̀ dɔɔ̀ é kɛá lɔ̀-kɛ̀à-mɔ̀ là, 18kɛɛ ɓieò, í dàá Wálà là mia nì séĩ́ bàa, kɛ yíkɛ̀ gáàa é kɛ ka kɛ̀lɛ̀, kɛɛ ká zi lɛ́ Kɛ́lɛ̀ì zì mia lɔ̀-kpɔ̀à-mɔ̀ lɛ à ká gbèĩ, ɛ̃́ɛ̃́ zi lɛ́ à là lɛ à ká gbálá-gbàlà, ɛ̃́ɛ̃́ zeĩ́ zi lɛ́ à dɔ̀-là-kɔ̀ lɛ à ká gbèĩ, e bɛ̀i zi lɛ́ à lò-gìè-kɔ̀ lɛ à ká gbèĩa, kɛɛ ká yí ma. 19Yé bɛ̃̀ɛ̃ mi ìí bɛ̀i à dɔɔ̀ féfé lea, Wálà é gbũ ka mɔ̀ ká à dɔ, kɛɛ ka paà é kɛá Wálà zì mia pà-pɛ-ká zì kpó-kpó ká.

20Mi lɛ́ yíkɛ̀ gáàa lɛ à kɛ̀lɛ̀ kɛ é wɔ̃́ kɛá, é diá wɔ̃́ lɛ́ bɛ̀i lɛ ko mɔ̀ kɛ kó pɛ̃́, ɛ̃́ɛ̃́ kɛ bɛ̃̀ɛ̃ kó ko yɛ́lɛ́ táá à káa, là pɔ̃ũ le yíkɛ̀ gáàa lɛ́ è yɛɓo kɛ̀ ko yía, kolo là zàáa, 21ò tɔ́-ɓɔ nɔ mí e kíli lɛ́ e Wálà káa lɛ̀ɛ Wálà-mìà séĩ́ fĩ̀ã̀, ɛ̃́ɛ̃́ Kɛ́lɛ̀ì Zízɛ̀ yí zàá lúó séĩ́ wà tòá kíli wɔ́lɔ́-wɔ́lɔ́ ká. É kɛ kíli.

Currently Selected:

Ìfísɔ̃̀ 3: MNT

Highlight

Copy