Ìfísɔ̃̀ 1

1Óò m si Pɔ́ɔ̀. M Kɛ́lɛ̀ì Zízɛ̀ là àpɔ́sɔ̀lɔ̀ ká, ɓii Wálà a naa ḿ kɛáa mɔ́ɔ̀ wɔ̃̀ mɔ̀.

Ḿm̀ wèè Wálà là mia nì lɛ́ ka Ɛ́fɔ́sɔ̀, lɛ́ mia ò bɛ̀i o zò dɔɔ̀ ka mɔ̀ Kɛ́lɛ̀ì Zízɛ̀ yí zàáa bà.

2Kɔa Dàa Wálà wà kɔa Dàa-mì Zízɛ̀ Kɛ́lɛ̀ì o zì zò-kɛ̀-sɛ̀ɛ é kɛ ka píé, wáà zò-yà-gé nɔ̀ ka lɛ̀ɛ.

Wálà aà lúà kpɔ́ ko mɔ̀ Kɛ́lɛ̀ì yí

3Wálà lɛ́ e kɔa Dàa-mì Zízɛ̀ Kɛ́lɛ̀ì Dàa káa, kɔ̀à à tɔ́ ɓɔ. Ƃii kò Kɛ́lɛ̀ì nì ko kɛ̀ doóa mɔ́ɔ̀ wɔ̃̀ mɔ̀ɔ, aà lúà kpɔ́ ko mɔ̀, nɔ̀-lɛ̀ɛ-pɛ̀ séĩ́ lɛ́ lɛ lɛ̀ séĩ́ lɛ́ lɛ lɛ̀ía mɔ̀ɔ, nɔ̀ ko lɛ̀ɛ ko gɛ̀ɛ̀ mɔ́ɔ̀ wɔ̃̀ kolo là zàá. 4Kɛɛ kpóṹ là kɛɛ̀ é tĩã́ kɛɛ̀ à káa, Wálà e ko sí bèĩzɛ̀ kɛ kó kɛ là mia nì ká Kɛ́lɛ̀ì yí. A kɛ kíli kɛɛ kó kɛ púlú, ɛ̃́ɛ̃́ yékɛ̀ kɛɛ é kɛ ko mɔ̀ e wɛlɛ mɔ̀. Ko zì lɔ̀-kpɔ̀ Wálà mɔ̀ɔ, 5Wálà aà mɔ́ɔ̀ à yà ɓo e gé kélɛ̀ Zízɛ̀ Kɛ́lɛ̀ì kolo là zàáa, lɛ́ɛ̀ lo nuù ko ká e dìè píé, kɛ kó kɛ là nɔ́ɔ̀ ká. Wɔ̃́ lɛ́ a naa á kɛ, ɛ̃́ɛ̃́ lɛ́ à kɛɛ̀ à zò dàa, lɛ́ ɓɛ. 6Kɔ̀à Wálà tɔ́ ɓɔ à zì zò-kɛ̀-sɛ̀ yí fɔ̀nɔɔ̀ɔ zɛ̀ ɓɛ wɛ̃́ĩ̀. Kɔ̀à à tɔ́ ɓɔ nɔ̀-lɛ̀ɛ-pɛ̀ lɛ́ a nɔ kɔa lɛ̀ɛ ɓɔ̀ɔ à zì lɔ̀-kɛ̀á-nɛ̀ yí zàáa mɔ́ɔ̀ wɔ̃̀ mɔ̀.

7Ƃii Kɛ́lɛ̀ì zì léà kolo là zàáa, aà ko ɓoá wɔ̃́ yí. À yí lɛ́ e kélɛ̀, ko zì kɛ-wɔ̃̀ yɔɔ aà ɓo ko wũ mɔ̀. Zi sùu kpɛɛ̀ lɛ́ Wálà zì zò-kɛ̀-sɛ̀ 8lɛ́ a nɔ ko lɛ̀ɛ e yí gbùò zɛ̀ káa, lɛ à ká kpànazɛ̀ ké. À zì gíkã́ séĩ́ wà à zì ɓɔ̀ wɔ̃́ mɛ̀ĩ́a, 9Wálà e wɔ̃́ lɛ́ a yà e gé á kɛɛ kɛ. Wɔ̃́ lɛ́ a naa á kɛ, lɛ́ e kɛ tĩã́ bĩ̀ĩ̀pìà, lɛ́ aà yà e gé mɔ́ kɛ á kɛɛ̀ líé nyɛ Kɛ́lɛ̀ì yí zàáa, aà à kɛ, kɔaà à yí dɔ. 10Wɔ̃́ lɛ́ Wálà aà yà e gé á kɛ lɛ́ è lo à líé nyɛɛ̀ yé à lúó aà ɓɔɔ káa, ye lɛ́ e kélɛ̀, lɛ́ɛ̀ lo pɛ séĩ́ lɛ́ aà kɛ lɛ́ e lɛ̀í ɛ̃́ɛ̃́ tã́ã̀ zèea, o páà e kíe mɔ̀, tó e Kɛ́lɛ̀ì kɛ o séĩ́ o là.

11Pɛ séĩ́ kɛɛ̀ lɛ lɛ̀ zí Wálà aà e yɛ́lɛ́ táá à ká, ɛ̃́ɛ̃́ lɛ̀ zí aà yàá e gé ó kɛáa ká. Wálà e ko sí kɛ kó kɛ là mia nì ká kò Kɛ́lɛ̀ì nì ko zì kɛ̀ doó yí, ɓii lɛ́ɛ̀ à nàà á kɛ kília mɔ́ɔ̀ wɔ̃̀ mɔ̀. A naa á kɛ kíli ɓii zía lɛ́ aà wɔ̃́ yàá e gé á kɛá wɔ̃́ gɛ̃̀ gbɛ̃̀pìàa. 12À mɔ́ɔ̀ wɔ̃̀ mɔ̀ɔ, mia lɛ́ ko kɛ mia bèĩzɛ̀ ká kó ko zò kɛ Kɛ́lɛ̀ì mɔ̀ɔ, kɔ̀à Wálà zì lɛ̀-fɔ̀nɔ-kɔ̀ɔ tɔ́ ɓɔ.

13Zía lɛ́ nɔ́ e kɛá ka bɛ̃̀ɛ̃ ka káa. Lɛ̀ ka wéé wánà zɛ̀, lɛ́ e wɔ̃́ làṹ yiè lɛ́ e nu la-ɓo ká ka lɛ̀ɛ maa, ka ka zò dɔ Kɛ́lɛ̀ì mɔ̀. Ɛ́ɛ̃́ Wálà e e dɔ̀á kɛ ka mɔ̀, Gɛ̀ɛ̀ Púlú lɛ́ aà e wè dɔ à káa nɔ̀ ka lɛ̀ɛ kolo là. 14Pɛ lɛ́ Wálà aà e wè dɔá kɛ á nɔ là mia nì lɛ̀ɛ, à wè-wɛ́lɛ́ lɛ́ e Gɛ̀ɛ̀ Púlú e kília káa. Wɔ̃́ e kéa lɛ́ɛ̀ à zɔ̃̀ɔ̃̀ kélɛ̀ Wálà lɛ́ɛ̀ lo e dìè là mia nì ɓoò wɔ̃́ yí féfé le. Kɔ̀à à zì lɛ̀-fɔ̀nɔ-kɔ̀ɔ tɔ́ ɓɔ.

Pɔ́ɔ̀ zì sɛ̀nɛ a ɓoa

15Wɔ̃́ e kéa mɔ́ɔ̀ wɔ̃̀ mɔ̀ɔ, é kã́ lúó lɛ́ m zi lɛ́ kà ka zò dɔá kɔa Dàa-mì Zízɛ̀ mɔ̀, ɛ̃́ɛ̃́ Wálà-mìà séĩ́ zì lɔ̀-kpɔ̀ ka mɔ̀ɔ ma wɔ̃̀ ma à káa, 16m̀ḿ mɔ́ɔ̀ tèá ɓo do Wálà zúo ɓoò ká ka mɔ́ɔ̀ wɔ̃̀ mɔ̀. M zò lɛ́ɛ̀ vùò ka ká yé maà kɛ sɛ̀nɛ ɓopìàa ká. 17Ɛ́ɛ̃́ ḿm̀ Wálà lɛ́ e ko Dàa-mì Zízɛ̀ Kɛ́lɛ̀ì là Wálà ká, lɛ́ e ko Dàa lɛ́ lɛ̀ è fɔ̀nɔ à bàa káa, ḿm̀ Gɛ̀ɛ̀ Púlú pɛ̃ à mɔ̀ kɛ á nɔ ka lɛ̀ɛ. Gɛ̀ɛ̀ Púlú e kília lɛ́ɛ̀ lo ka kɛɛ̀ gí kã́ã̀a zɛ̀, ɛ̃́ɛ̃́ tó áà Wálà zɔ̃̀ɔ̃̀ ka lɛ̀ɛ, kɛɛ ká à dɔ. 18Ḿm̀ à pɛ̃ à mɔ̀ kélɛ̀ kɛɛ é ka zò píé lé ɓo, kɛɛ ká à zì lɛ̀-fɔ̀nɔ-kɔ̀ gɛ̃̀, kɛɛ ká zò-kɛ̀à-mɔ̀ pɛ̀ lɛ́ a mɔ́ɔ̀ ka súo kɛ ɓoa dɔ, ɛ̃́ɛ̃́ kɛ zi lɛ́ lúà kpàlézɛ̀ lɛ́ aà e wè dɔ à ká là mia nì lɛ̀ɛ, zi lɛ́ lɛ à ká kpànazɛ̀ɛ, kɛ ká dɔ, 19ɛ̃́ɛ̃́ zeĩ́, kɛ ká zi lɛ́ là yíkɛ̀ gáàa lɛ́ è yɛɓo kɛ̀ mia lɛ́ kò ko zò dɔ à mɔ̀ɔ yía, zi lɛ́ à mɛ́ lɛ à ká gágà kpó-kpó ɓoa, kɛ ká dɔ. Yíkɛ̀ gáàa lɛ́ e ko yí kília, 20wà mɛ́ kɛ̀-gágà-lɛ̀ kpànazɛ̀ lɛ́ e kɛ à kɛ̀lɛ̀, lɛ́ e Kɛ́lɛ̀ì wɛ̀lɛ̀á ga kɛ̀lɛ̀, lɛ́ e à yà e kɔ̀ yiè yí lɛ̀ía, lɛ nɔ́ doó. 21Kɛ́lɛ̀ì lɛ pɛ séĩ́ là pɔ̃ũ le yí. Lɛ pɛ séĩ́ lɛ́ o pɛ yí gáàa zɛ̀ lɛ́ o lɛ̀ía ká, ɛ̃́ɛ̃́ gòmɛ́nɛ̀, e bɛ̀i yíkɛ̀ gáàa séĩ́, wà mia dàa-mìà nì séĩ́ là. E bɛ̀i, Kɛ́lɛ̀ì tɔ́ lɛ tɔ́ séĩ́ lɛ́ mia ò ɓɛ̀lɛyà nɔ à lɛ̀ɛ kpóṹ e kéa là, ɛ̃́ɛ̃́ kpóṹ yé aà tó é nua làa, lɛ o là. 22Wálà e pɛ séĩ́ wàà Kɛ́lɛ̀ì gã̀ wì, ɛ̃́ɛ̃́ e à nɔ Wálà-mìà séĩ́ lɛ̀ɛ, kɛ é kɛ o wũ-là-mì gbùò ká pɛ séĩ́ là. 23Wálà-mìà o kília o lɛ́ o Kɛ́lɛ̀ì gbĩ-kpàla káa. O lɛ́ ò Kɛ́lɛ̀ì nyáá pa e kíe mɔ̀ɔ. Ɛ́ɛ̃́ Kɛ́lɛ̀ì dìè bɛ̃̀ɛ̃ à ye lɛ́ è pɛ séĩ́ nyáá pa e kíe mɔ̀ɔ.

Currently Selected:

Ìfísɔ̃̀ 1: MNT

Highlight

Copy