Àpɔ́sɔ̀lɔ̀ 24
24
Zúù-mìà o wɔ̃́ gèe Pɔ́ɔ̀ gbĩ mɔ̀
1Lɛ̀ lúó sɔ́ɔ́li e diea, sálà-ɓò-Wálà-mɔ̀-mìà wũ-là-mì Ánànáyà, wà mia dìè-dìè vɔ̀ dò, ɛ̃́ɛ̃́ o zì mɛ́ĩ́-ɓo-mì lɛ́ ò si Tɔ̀tálàa, o ló Sízàlíà. O ɓɔ gbaa mia wũ-là-mì Fílè wɛlɛ mɔ̀. O wɔ̃́ lɛ́ ò gèe Pɔ́ɔ̀ a kɛɛ, gã̀ pɛ́ɛ́ à lɛ̀ɛ. 2O Tɔ̀tálà súo kɛ. E gbɛ̃̀ gbaa áà wɔ̃̀ gèè Pɔ́ɔ̀ gbĩ mɔ̀ weeá kélɛ̀,
“M dàa-mì Fílè. È gɔ̃̀á kɛɛ̀ i káa, zò-yà-gé lɛ̀ɛ́ gɔ̃̀ kɛɛ̀ ko pà-sɛ̀lɛ̀ yí. I zì wɔ̃́ kɛ-zì kpeĩ ɓɛ, ɓaà wɔ̃́ kɛ-zì búnùzɛ̀ mɛ́ vɔ̀ɔ à ká, kɛ é gbũ kò sɛ́lɛ́ɛ yí-mìà mɔ̀. 3Ko kɔ̀ yàà lɛ wɔ̃́ nì e kília wì lɛ̀ séĩ́ mɔ̀, ɛ̃́ɛ̃́ lúó séĩ́ ká, ɛ̃́ɛ̃́ kɔ́áà i zúo ɓò nyɔ́ɔ̀ɔ à mɔ́ɔ̀ wɔ̃̀ mɔ̀. 4Kɛɛ m̀ḿ naa ḿ ɓà lúó káá tã́ã̀. À mɔ́ɔ̀ wɔ̃̀ mɔ̀ɔ, ḿm̀ kpé kã i lɛ̀ɛ í i tóó dɔ kò wɔ̃́ kpuú lɛ́ kò lo à gèeèa mɔ̀ zò-kɛ̀-sɛ̀ ká. 5Ko gɔ̃́ e kéa gɛ̃̀ áà mia tóó yí sìè. E à kɛ wéé áà kã̀ Zúù-mìà fĩ̀ã̀ sɛ́lɛ́ séĩ́ là. À ye lɛ́ e mia lɛ́ ò o si Názàlĩ́ĩ̀-mìàa, líé-sí-mìà doó-mì káa. 6E kɛ zeĩ́ à kɛ-zì naapìà kɛ é sálà-ɓò-Wálà-lɛ̀ɛ-kà wì sìè. Lɛ̀ e kɛ kília, ko à kṹ. [Ko kɛ à naapìà kó mɛ̀ĩ́-sà dɔ à mɔ̀ ko zì Lɔ́ɔ̀ɔ ká. 7Kɛɛ sóyà vɔ̀ wũ-là-mì lɛ́ ò si Lísìàa e nu, e à ɓo ko kɛ̀lɛ̀ gèlè kpó-kpó ká. 8Lɛ̀ e kɛ kília, Lísìà a gèe kélɛ̀ mia lɛ́ o kɛ wɔ̃́ kpɔ́pìà à wĩĩ́a ó nu i wɛlɛ mɔ̀.] Í gɔ̃́ e kéa wɛ̃́ĩ́-lɔ̀ɔ kɛ̀áa, i dìè-tĩ́ íì lo wɔ̃́ lɛ́ kò gèe à gbĩ mɔ̀ɔ, séĩ́ maà à dìè lé.” 9Zúù-mìàa o dà gbaa Tɔ̀tálà píé wáà gèè wɔ̃́ e kéa séĩ́ lɛ wánà ká.
Pɔ́ɔ̀ e wɔ̃́ gèe Fílè wɛlɛ mɔ̀
10Fílè e e kɔ̀ zɔ̃̀ɔ̃̀ Pɔ́ɔ̀ ká é e wè pɛ́ɛ́. Pɔ́ɔ̀ a gèe kélɛ̀,
“Ḿm̀ à yí dɔ ɓaà kɛ mɛ̀ĩ́-sà ɓo-mì ká sɛ́lɛ́ e kéa yí kɛ̀ɛ̀ búnù-búnùzɛ̀ píé. À mɔ́ɔ̀ wɔ̃̀ mɔ̀ɔ, m gé lɛ́ɛ̀ li kɛ ḿ mɛ́ĩ́ ɓo wɔ̃́ ɓò-m-wũ-mɔ̀ zì píé i wɛlɛ mɔ̀. 11Íì bɛ̀i à mɔ̀ i wɛ̃́ĩ́-lɔ̀ɔ kɛ píé i dìè lɛ̀ɛ. Ló ma ɓo Zùlúsàlɛ̀ kɛ ḿ gbini Wálà lɛ̀ɛ yía, à lɛ̀-kpɛ̀iì lɛ̀ɛ́ die nɛ́ vũ̀ doó wɛ́lɛ́ pèèlɛ là. 12Zúù-mìà òó gbaa m gɛ̃̀ kò mi dò kɔ́áà tèé dà sálà-ɓò-Wálà-lɛ̀ɛ-kà wì. Ɛ́ɛ̃́ kɛ bɛ̃̀ɛ̃ ó m gɛ̃̀ máà wéé kã̀ mia-fĩ̀ã̀-wè gèè o zì Wálà-kàa wì píé píé, ɛ̃́ɛ̃́ kɛ bɛ̃̀ɛ̃ ó m gɛ̃̀ sɛ́lɛ́ɛ lɛ̀ nɔ́ɔ fé dò mɔ̀ wɔ̃́ sùua kɛpìà. 13Wéé lɛ́ ò gèe ma kã́ yà kɔa ɓoa yía, à kɛ̀ wánà ká pìà gbɛɛ wá ɓe. 14Wɔ̃́ yé e kéa ḿm̀ lo wéè à mɔ̀. Ye lɛ́ e kélɛ̀, ḿm̀ gbìnì Wálà lɛ́ e ko dàa ye dàà nì wà Wálà káa lɛ̀ɛ Zí lɛ́ ò gèe ye wá kpeĩa ká. Kɛɛ ḿm̀ wɔ̃́ séĩ́ lɛ́ à bɛ̃̀ɛ̃ɛ̃̀ lɛ Móózè là Lɔ́ɔ̀ɔ yía, ɛ̃́ɛ̃́ pɛ séĩ́ lɛ́ à bɛ̃̀ɛ̃ɛ̃̀ lɛ dɔ̀-Wálà-lé-là-mìà wà kíía yía gɛ̃̀ wánà ká. 15Ɛ́ɛ̃́ m zò lɛ Wálà mɔ̀ wɔ̃́ nɔ́ doó lɛ́ míá o kéa o zò lɛ à wɛ̃́ĩ̀ Wálà mɔ̀ɔ wɛ̃́ĩ̀. Wɔ̃́ e kília lɛ́ e kélɛ̀, mia séĩ́-séĩ́ ó kɛ bɛ̃̀ɛ̃ kɛ-pɛ̀ yɔɔ kɛ-mìà ká, ɛ̃́ɛ̃́ kɛ-pɛ̀ yiè kɛ-mìà káa, óò lo wɛ̀lɛ̀ ga kɛ̀lɛ̀. 16À mɔ́ɔ̀ wɔ̃̀ mɔ̀ɔ, ḿm̀ m yí dɔ gágà yékɛ̀ m zò é mɛ̀ m mɔ̀ Wálà wà mia ɓéèe o wɛlɛ mɔ̀ teele.
17“Lɛ̀ m góò e kɛá Zùlúsàlɛ̀ kɛ̀ɛ̀ zààle píéa, m ló pɛlèe dò ká yi kɛ ḿ nɔ m pà-mìà lɛ̀ɛ gbũ̀-o-mɔ̀ pɛ̀ ká, ɛ̃́ɛ̃́ kɛ ḿ sálà ɓo. 18O m gɛ̃̀ wɔ̃́ e kília kɛpìà sálà-ɓò-Wálà-lɛ̀ɛ-kà wì, lɛ̀ lɛ́ m nyɛɛ̀ e kɛá wɔ̃́ lɛ́ ò kɛ̀, lɛ́ mi ì kɛ̀ púlú Wálà lɛ̀ɛ kɛɛ̀ mɔ̀ɔ ká. Lɛ̀ o m gɛ̃̀ɛ, mia gbũ lɛ̀ɛ́ gbaa kɛ yí. Ɛ́ɛ̃́ wéé kã́ã̀ lɛ̀ɛ́ gbaa kɛá yi. 19Kɛɛ Zúù-mìà yé ò go Ésìàa, o dò e kɛ yí. Lɛ o bɛ̃̀ɛ̃ o mɔ̀ ó nu i wɛlɛ líé kɛ ó o zì wɔ̃́ lɛ́ lɛ o gé m gbĩ mɔ̀ɔ, gèe i lɛ̀ɛ, é kɛ̀á wɔ̃́ dò lɛ o géa ká. 20Yé ye wá kília, míá o kéa ò wɔ̃́ lɛ́ wa gɛ̃̀ lɛ́ e káá m wĩĩ́, lɛ̀ lɛ́ m dɔ mɛ̀ĩ́-sà ɓo-mìà wɛlɛ mɔ̀ɔ káa gèe, 21é kã́ wɔ̃́ doó lɛ́ m dɔ m gã̀ mɔ̀ o wɛlɛ mɔ̀, lɛ́ m gbɛ́ɛ́ máà gèè kélɛ̀, ‘Ka mɛ̀ĩ́-sà dɔpìà m mɔ̀ pɛ́nɛɛ, ɓii ḿm̀ gɛ̃̀ wánà ká kélɛ̀ mia lɛ́ waà gaa, óò lo wɛ̀lɛ̀ ga kɛ̀lɛ̀.’ ”
22Fílè e Zí e kéa mɔ́ɔ̀ wɔ̃̀ yí dɔ e yiè ká. E mɛ́ĩ́a wũ kṹ gbaa áà gèè, “Ḿm̀ lo kà mɛ́ĩ́a kã́ã̀ yé sóyà vɔ̀ wũ-là-mì Lísìà aà nua ká.” 23A gèe sóyà vɔ̀ líé-sí-mìa lɛ̀ɛ é e nyìɛ kɛ Pɔ́ɔ̀ mɔ̀. Kɛɛ è à tó áà ɓɔ̀ pɛlɛí ɓéĩ́ ɓo, ɛ̃́ɛ̃́ è à tó à ɓɛ́ĩ̀ nì lɛ́ ò nu gbũũ̀ à mɔ̀ɔ ó ɓɔ à mɔ̀.
Pɔ́ɔ̀ lɛ Fílè wà Dùsílà o wɛlɛ mɔ̀
24Lɛ̀ lúó dò e diea, Fílè wà e na o nu. À na e kília e kɛ Zúù mi ká. O kɛ à sípìà Dùsílà. Félè e nɛ́ vɔ Pɔ́ɔ̀ wɛ̃́ĩ̀. Ɛ́ɛ̃́ e e tóó dɔ Pɔ́ɔ̀ mɔ̀ lɛ̀ lɛ́ e kɛ wɔ̃́ gèepìà, áà gbɛ̃̀á zò-dɔ̀ Kɛ́lɛ̀ì Zízɛ̀ mɔ̀ wɔ̃̀ mɔ̀ɔ gèepìàa ká. 25Kɛɛ lɛ̀ lɛ́ Pɔ́ɔ̀ e kɛ lópìà líé wé gèeè ká, áà gbɛ̃̀á wɔ̃́ kpeĩ wà dìè-kũ̀-tã́ã̀, ɛ̃́ɛ̃́ mɛ̀ĩ́-sà dɔ̀-mia-mɔ̀ lùò lɛ́ lɛ nupìàa mɔ̀ɔ, Fílè e gbɛ̃̀ gbaa áà tùò. A gèe gbaa Pɔ́ɔ̀ lɛ̀ɛ kélɛ̀, “Ì lo gbaa nɛ́. Ḿm̀ lo i súo kɛɛ̀ zeĩ́ yé lúó aà kɛ m kɛ̀lɛ̀ɛ ká.” 26Lúó nɔ́ doóa káa, e kɛ à naapìà kɛ Pɔ́ɔ̀ é pɛlèe nɔ à lɛ̀ɛ. Wɔ̃́ e kéa mɔ́ɔ̀ wɔ̃̀ mɔ̀ɔ, e kɛ Pɔ́ɔ̀ súo kɛpìà teele kɛ wà ye nì ó dɔ́ɔ́ dɔ.
27Lɛ̀ kɛ̀ɛ̀ pèèlɛ e diea, Pɔ́sɔ̀ Fɛ́sɔ̀ e yà gbaa Fílè yàlà mɔ̀. Fílè a naa é Zúù-mìà zò-dà-wɔ̃̀ kɛ. À mɔ́ɔ̀ wɔ̃̀ mɔ̀ɔ, a mɔ́ɔ̀ Pɔ́ɔ̀ tó ɓo bĩ́-kɛ̀ì.
Currently Selected:
Àpɔ́sɔ̀lɔ̀ 24: MNT
Highlight
Share
Copy
Want to have your highlights saved across all your devices? Sign up or sign in
Mann New Testament © Bible Society in Liberia, 1978.
