Àpɔ́sɔ̀lɔ̀ 21

Pɔ́ɔ̀ e ló Zùlúsàlɛ̀

1Ko o làapíé dà gbaa, kɔ́áà kò ló ɓò. Lɛ̀ ko die yíía zèí kpeĩ-kpeĩa, ko ɓɔ lɛ̀ lɛ́ ò si Kɔ́ɔ̀ɔ mɔ̀. Lɛ̀ à lɛ̀ e kpɛ̀ia, ko bɛ̀i ko ɓɔ Wólóò. Lɛ̀ ko gó yia, ko ló Pàtálà. 2Ko gɔɔ lɛ́ e kɛ lópìà Fìnísìàa gɛ̃̀ à lɛ̀ mɔ̀. Yé e kɛ kília, ko yà gbaa à yí, kɔ́áà lò. 3Ko nu gbaa lɛ̀ lɛ́ kò bɛ̀i à mɔ̀ kó kɛ yí, kó Sápà gɛ̃̀ɛ mɔ̀. Kɔa tó gbaa ko kɔ̀ gbiè yí, kɔ́áà lò Sílìà. Ko gbɛ̃̀ gbaa tã́ã̀ Táyà, ɓii o kɛ lópìà pɔɔ̀ ɓoò gɔ́ɔ́ɔ yí. 4Ko ɓɔ gbaa tò-Zízɛ̀-píé-mìà dò là yi. Kò ye nì ko kɛ yí lɔ́ɔ́ doó píé. Gɛ̀ɛ̀ Púlú zì yíkɛ̀ gáàa yí zàáa, wa gèe Pɔ́ɔ̀ lɛ̀ɛ yékɛ̀ é ló Zùlúsàlɛ̀. 5Kɛɛ lɛ̀ ko zì kɛ̀-o-píé lúó e nyɛɛ, ko gbɛ̃̀ zuú kó ló. Míáa wà o na nì, ɛ̃́ɛ̃́ wà nɔ́ɔ̀ nì o ko dɔ zuú é tóá kíli kó góá sɛ́lɛ́ e kília yí. Ko séĩ́-séĩ́ ko káá ko kpuò là mɛ̀ĩ́ kpóṹ là, kɔ́áà sɛ̀nɛ ɓò. 6Lɛ̀ e kɛ kília, ko ko kíe nì làapíé dà, ko bɛ̃̀ɛ̃ ko yà gbaa gɔɔ yí, lɛ̀ lɛ́ o bɛ̃̀ɛ̃ o kɛ yɛ́pìà o zía ká.

7Ko gó gbaa Táyà, kɔ́áà lò ko líé. Ko ɓɔ gbaa Tɔlèméyà. Ko ko lèe-gé vɔ̀ vùò-wè gèe à lɛ̀ mɔ̀. Kò ye nì ko kɛ yí lúó doó píé. 8À lɛ̀-kpɛ̀iìa, ko gó gbaa yí, ko ɓɔ Sízàlíà. Ko ló gbaa wɔ̃́ làṹ yièa gèe-mì lɛ́ ò si Félèa píé kɛ́ì. Ko kɛ gbaa yí. Félè e kília e kɛ mia sálápèèlɛ lɛ́ o o sía doó-mì ká. 9Là nɛ́ loà zɛ̀ yììsɛ lɛ́ gɔ̃ lɛ̀ɛ́ gbaa kɛ o píéa, o kɛ yí. O kɛ wɔ̃́ lɛ́ Wálà à kàà o léa gèe-mìà ká. 10Lɛ̀ ko kɛ yí lúó zààle píéa ko tó yi, dɔ̀-Wálà-lé-là-mì lɛ́ ò si Àgábàa, e gó Zùdíà e nu yí. 11E nu ko píé, e Pɔ́ɔ̀ là sɔ-là-ɓɛ̀lɛ̀ kṹ à kɛ̀lɛ̀, e e dìè gã̀ wà e kɔ̀ yèlè à ká, áà gèè kélɛ̀, “Wɔ̃́ lɛ́ Gɛ̀ɛ̀ Púlú à gèea, gɛ̃̀ e ké. Zúù-mìà lɛ́ o Zùlúsàlɛ̀ɛ, óò lo sɔ-là-ɓɛ̀lɛ̀ e kéa dàa-mì yèlè zi nɔ́ doó e kéa ká. Ɛ́ɛ̃́ óò lo à kɔ̀ nɔɔ̀ sɛ́lɛ́ gbɛɛ yí-mìà lɛ̀ɛ.”

12Lɛ̀ ko wɔ̃́ e kéa maa, kò mia yé ko kɛ yía, ko kpé kã́ Pɔ́ɔ̀ lɛ̀ɛ yékɛ̀ é ló Zùlúsàlɛ̀. 13Pɔ́ɔ̀ e à là nìɛ̀ weeá kélɛ̀, “Mɛ́ kà mɔ́ɔ̀ gbóó ɓo ké, lɛ́ kà kɛ̀ lɛ́ m zò è sìè m gé ké? M pɛ̀ kɛɛ̀ wá m yèlè ò lo à ɓoò Zùlúsàlɛ̀ɛ doó mɔ́ɔ̀ wɔ̃̀ mɔ̀. Kɛɛ à kɛɛ̀ lɛ, é kɛ̀á ḿm̀ lo gaà bɛ̃̀ɛ̃ yí ko Dàa-mì Zízɛ̀ mɔ́ɔ̀ wɔ̃̀ mɔ̀ɔ wɛ̃́ĩ̀ nɔ́ kíli.”

14Lɛ̀ɛ́ gbaa naa é wéé ko wéè mɔ̀. Lɛ̀ e kɛ kília, ko tèá gbaa, kɔ́áà gèè, “Wɔ̃́ lɛ́ à kɛɛ̀ è ko Dàa-mì zò kũa, è kɛ.”

15Lɛ̀ ko ɓo yí pèèlɛɛ, ko kò pɔɔ̀ lúú, ko wɛ̀lɛ̀ gbaa kɔ́áà lò Zùlúsàlɛ̀. 16Tò-Zízɛ̀-píé-mìà lɛ́ o kɛ Sízàlíàa dò o ló ko kpɔ́ɔ̀. O ló ko ká gɔ̃ lɛ́ ko kɛ lópìà à píéa píé kɛ́ì. Gɔ̃́ e kília tɔ́ lɛ́ Nésĩ̀. E kɛ gópìà Sápà. E kɛ tò-Zízɛ̀-píé-mì zii ká.

Pɔ́ɔ̀ e ló ɓɔɔ̀ Zĩ́ĩ̀ píé

17Lɛ̀ ko ɓɔ Zùlúsàlɛ̀ɛ, ko lèe-gé vɔ̀ o ko kpɛ̀ɛ̀ kɛ yí gbùò zɛ̀. 18Lɛ̀ à lɛ̀ e kpɛ̀ia, kò Pɔ́ɔ̀ nì ko ló ɓɔ́ɔ̀ Zĩ́ĩ̀ píé. Wálà-mìà dìè-dìè vɔ̀ séĩ́ o kɛ à lɛ̀ mɔ̀ lɛ̀ ko lóa ká. 19Pɔ́ɔ̀ e o vùò-wè gèe, áà wɔ̃́ séĩ́ lɛ́ Wálà aà kɛ sɛ́lɛ́ gbɛɛ yí-mìà fĩ̀ã̀ à zì yɛɓo kɛɛ̀ yía wɔ̃̀ séĩ́ yí ɓò o lɛ̀ɛ. 20Lɛ̀ o nyɛ wɔ̃́ e kília maà mɔ̀ɔ, o Wálà tɔ́ ɓɔ. O à gèe gbaa Pɔ́ɔ̀ lɛ̀ɛ, “Ko lèe-gé Pɔ́ɔ̀, zi lɛ́ wɔ̃́ lɛ à káa, ɓáà gɛ̃̀. Zúù-mìà lɛ́ waà o zò dɔ Zízɛ̀ mɔ̀ɔ, o vɔ̀ wáá búnùzɛ̀. Ɛ́ɛ̃́ o séĩ́ o fã̀ã́-wàà lɛ Lɔ́ɔ̀ɔ kɛɛ̀ mɔ̀. 21Míá o kéa waà wɔ̃́ lɛ́ mia waà gèe i gbĩ mɔ̀ɔ ma. Wɔ̃́ waà maa lɛ́ e kélɛ̀, Zúù-mìà séĩ́ lɛ́ o sɛ́lɛ́ gbɛɛ yí-mìà pàa, ɓaà pɛ zɔ̃̀ɔ̃̀ o lɛ̀ɛ, ɓáà gèè o lɛ̀ɛ ó kã́ Móózè là Lɔ́ɔ̀ɔ lɛ̀ɛ. Ɛ́ɛ̃́ yékɛ̀ wà nɔ́ɔ̀ nì ó bɔ̃́ɔ̃́ sí, ɛ̃́ɛ̃́ zeĩ́, yékɛ̀ ó wɔ̃́ kɛ Zúù-mìà zì wɔ̃́ kɛ-kɔ̀ kpáá yí. 22Óò lo i kɛ̀ zèe wɔ̃̀ maà wánà ká. Kóò lo mɔṹ à kɛɛ̀ kpɛ? 23Wɔ̃́ lɛ́ kò lo à gèeè i lɛ̀ɛ kɛ. Gɔ̃à yììsɛ lɛ́ waà o wè ɓèlè Wálà lɛ̀ɛ o zèe. 24Gɔ̃à o kília, kà ye nì kà lo. Ì dà o bà wɔ̃́ lɛ́ ò lo à kɛɛ̀ yi, kɛ ó kɛ púlú Wálà lɛ̀ɛ à kɛɛ̀ yí. Ɛ́ɛ̃́ pɛ lɛ́ lɛ o mɔ̀ ó à nɔ yía, ì o zìa nɔ. Yé aà kɛ kília, bɛ̀i lɛ́ɛ̀ lo kɛɛ̀ gbaa o mɔ̀ kɛ ó o wĩĩ́-wũ̀ káá. Zí e kéa káa, mia séĩ́ óò lo gbaa wɔ̃́ séĩ́ lɛ́ waà à gèe o lɛ̀ɛ i gbĩ mɔ̀ɔ, yí dɔɔ̀á nɛ̀ ká. O dìè óò lo gbaa à yí dɔɔ̀ kélɛ̀ i dìè íì wɔ̃́ kɛ̀ Móózè là Lɔ́ɔ̀ɔ kpáá yí. 25Kɛɛ sɛ́lɛ́ gbɛɛ yí-mìà lɛ́ waà o zò dɔ Zízɛ̀ mɔ̀ɔ yee, kɔaà kii vɔ o píé. Kíí e kília yía, ko wɔ̃́ lɛ́ kɔaà yà ko géa, gèe o lɛ̀ɛ. O lɛ́ o kélɛ̀, yékɛ̀ ó léɓèlè nɔ́ɔ fé lɛ́ à kóná ɓoò lɛ kɛ̀ɛ̀-wɛ́lɛ́ mɔ̀ɔ ɓèlè, ɛ̃́ɛ̃́ yékɛ̀ ó léà nɔ́ɔ fé dò ɓèlè, e bɛ̀i, yékɛ̀ ó wìì nɔ́ɔ fé lɛ́ wa kṹ e kpɛí, lɛ́ e gaa ɓèlè, ɛ̃́ɛ̃́ zeĩ́ ó o dìè ɓo sɔ̃̀ɔ̃ yɔɔ kɛɛ̀ bàa káa.”

26Lɛ̀ e kɛ kília, Pɔ́ɔ̀ wà gɔ̃àa nì o ló. À lɛ̀-kpɛ̀iì gbɛɛ káa, pɛ lɛ́ gɔ̃àa wa kɛ lɛ́ o kɛ púlú Wálà lɛ̀ɛ, Pɔ́ɔ̀ e e zì kɛ. Lɛ̀ e kɛ kília, e ló sálà-ɓò-Wálà-lɛ̀ɛ-kà wì, e lúó lɛ́ aà tó kɛ ó o kɛ̀-púlú-wɔ̃̀ kɛ à píéa gèe. Lúó e kília káa lɛ́ ò lo sálà ɓoò à ká o tɔ́ mɔ̀ doó doóa.

O Pɔ́ɔ̀ kṹ Wálà-kà wì

27Lɛ̀ lúó sálápèèlɛ e kília líé e kɛ nyɛpìàa, Zúù-mìà yé ò go Ésìàa, o Pɔ́ɔ̀ gɛ̃̀ Wálà-kà e kília wì. O mia gbũ lɛ́ e kɛ yía kã́ e kíe mɔ̀, wáà wì Pɔ́ɔ̀ mɔ̀. 28O gbɛ́ɛ́ weeá kélɛ̀, “Ko ɓɛ́ĩ̀ Éézɛ̀lɛ̀-mìà, kà gbũ ko mɔ̀. Gɔ̃ lɛ́ è lo sɛ́lɛ́ séĩ́ yí, áà pɛ zɔ̃̀ɔ̃̀ mia séĩ́ lɛ̀ɛ, ye gɛ̃̀ e ké. Lɛ́ɛ̀ wɔ̃́ gèe Éézɛ̀lɛ̀-mìà wà Móózè là Lɔ́ɔ̀, e bɛ̀i ká ko à wì e kéa gbĩ mɔ̀. Ɛ́ɛ̃́ dɛɛ ká vɔ̀ɔ, à nuù lɛ sɛ́lɛ́ gbɛɛ yí-mìà dò ká Wálà-kà e kéa wì, áà lɛ̀ púlú e kéa lilì kũ̀.” 29Wa gèe kíli, ɓii waà Tɔ́lɔ́fímà lɛ́ è go Ɛ́fɔ́sɔ̀ɔ gɛ̃̀ Pɔ́ɔ̀ píé sɛ́lɛ́ e kília yí. Ɛ́ɛ̃́ wa gɛ̃̀ ɓɔ̀ɔ kélɛ̀ Pɔ́ɔ̀ e ló à ká Wálà-kàa wì.

30Wéé kpó-kpó kã́ã̀ e kɛá sɛ́lɛ́ e kília yí. Míáa o nu o kíe là tíè-tíèe, o Pɔ́ɔ̀ kṹ, wa gã́ã́ tã́ã̀, o gó à ká Wálà-kàa wì. Yé e kɛ nɔ́ kília, o Wálà-kàa lé taa. 31Míá o kília o kɛ à naapìà ó Pɔ́ɔ̀ zɛ, lɛ̀ lɛ́ o ló lɛ́ o wɔ̃́ɔ gèe Wólómà sóyà vɔ̀ wũ-là-mì lɛ̀ɛ ká. Wa gèe à lɛ̀ɛ kélɛ̀ wéé kã́ã̀ lɛ Zùlúsàlɛ̀ lɛ̀ séĩ́ mɔ̀. 32Nɔ́ zá lea, sóyà vɔ̀ wũ-là-mì e kília, e sóyà vɔ̀ wà o líé-sí-mìà dò sí, e ló o ká mia gbũ e kília yí tíé-tíèe. Lɛ̀ míáa o wà sóyà vɔ̀ɔ nì gɛ̃̀ɛ, o tèá Pɔ́ɔ̀ mɛ̀ɛɛ̀ ká. 33Sóyà vɔ̀ wũ-là-mìa e ló e Pɔ́ɔ̀ kṹ, áà gèè ó à yèlè pɛ-kúlú ɓɛ̀lɛ̀ pèèlɛ ká. Lɛ̀ e kɛɛ, e wɛ̃́ĩ́-lɔ̀ɔ kɛ weeá kélɛ̀, “Dé e gɔ̃́ e kéa ká? Ɛ́ɛ̃́ mɛ́ aà kɛ?” 34Mia dò lɛ́ o kɛ gbṹ e kília yía, o kɛ gbɛ́ɛ́pìà wɔ̃́ gbɛɛ̀ gbɛɛ gèeè ká, o dò bɛ̃̀ɛ̃ wáà à gbɛɛ̀ gbɛɛ gèè. Wéé kã́ã̀ e kɛá yi, tó áà kɛ̀ sóyà vɔ̀ wũ-là-mìa lɛ̀ɛ́ wɔ̃́ lɛ́ e kɛ kɛpìàa yí kpó-kpó dɔ. À mɔ́ɔ̀ wɔ̃̀ mɔ̀ɔ, a mɔ́ɔ̀ à gèe ɓo sóyà vɔ̀ɔ lɛ̀ɛ ó ló Pɔ́ɔ̀ ká o zì yà-pìàa mɔ̀. 35O ɓɔ gbaa Pɔ́ɔ̀ ká mia tɛ̀nɛ̀-lɛ̀í-pìàa mɔ̀. E kɛ sóyà vɔ̀ɔ mɔ̀ kɛ ó Pɔ́ɔ̀ sí lɛ̀í o kɔ̀ là gbaa, ɓii míáa wũ-kũ̀-tã́ã̀-zì lɛ̀ɛ́ gbaa kɛ ɓe. 36O séĩ́-séĩ́ o kɛ nupìà à mɔ̀, wáà gbɛ̀ɛ̀ weeá kélɛ̀, “Ò à zɛ.”

Pɔ́ɔ̀ e e dìè ɓò-wɔ̃́-yí-wɔ̃̀ gèe

37Lɛ̀ wa kɛ ó ló gbaa Pɔ́ɔ̀ ká sóyà vɔ̀ yà-pìàa mɔ̀ɔ, a gèe o wũ-là-mì lɛ̀ɛ, “Ƃà kpé lɛ sɛ̀, ḿm̀ nàà ḿ wɔ̃́ dò gèe i lɛ̀ɛ.”

Gɔ̃́ɛɛ a gèe à lɛ̀ɛ kélɛ̀, “Íì Gílíì-wè gèe? 38Yé lɛ kília, ɓi wá mɔṹ Ízè gɔ̃ lɛ́ e kɛ mɔ́ zèe, lɛ́ e gbɛ̃̀ áà gèlè gɔ̃̀ gòmɛ́nɛ̀ káa ká. Ɛ́ɛ̃́ lɛ́ e ló kɛ-pɛ̀ yɔɔ kɛ-mìà wáá yììsɛ ká yɛ̀í làa, ɓi wá mɔṹ à ká.”

39Pɔ́ɔ̀ a yí zṹ weeá kélɛ̀, “Zúù mi lɛ́ e m ká. O m ye Táásà lɛ́ e Sìlísìàa mɔ̀. Lɛ̀ m̀ go yía, lɛ dóo sɛ́lɛ́ kpànazɛ̀ ká. Ƃà kpé lɛ sɛ̀, ì à tó ḿ mɛ́ĩ́ ɓo míáa píé.”

40Lɛ̀ e kɛ kília, gɔ̃́ɛɛ e wéé à mɔ̀. Pɔ́ɔ̀ e dɔ gbaa mia tɛ̀nɛ̀-lɛ̀í-pìàa mɔ̀, áà e kɔ̀ là zɛ̀ míáa lɛ̀ɛ. Lɛ̀ o o lɛ̀à gaa, Pɔ́ɔ̀ e mɛ́ĩ́ ɓo o lɛ̀ɛ Hííbúlù-wè yí weeá kélɛ̀,

Currently Selected:

Àpɔ́sɔ̀lɔ̀ 21: MNT

Highlight

Copy