San Mateo 8

(Mr. 1:40-45; Lc. 5:12-16)

1Chi bza Jesús láani dany, zieny bniety guzanald laany. 2Ax güebinuu tuby bniety laany, laab racbɨ guelguidx ni lá lepra, chiy guzullibbɨ lo Jesús raipbɨ laany:

—Dad, belati sigueldbiu, laabiu zelee isiacbiu nare.

3Chiy bldí Jesús naany bguaaldny laab, guniigany:

—Rcaazla. Quebiac.

Chi gunii Jesús ziy, hóracqui gubicá guelguidxqui ax bía tɨɨxbɨ. 4Chiyru raipy Jesús laab:

—Bcuadiag ni iniia liú. Quɨt tu chagaiptiu dec abiacu. Lo bxozzi güeliuu liú, ne güené ni riáld chaníu lo Dios zec ni gunii Moisés, par gacbee irate bniety dec abiacu.

(Lc. 7:1-10)

5Chi biiu Jesús láani guɨdx Capernaum, tuby capitán roman güebinuub laany par banlasbɨ lony, 6raipbɨ laany:

—Dad, a xmosa nágaa liza racxúb. Niclɨ quɨt relee chasteb, quesentiand guelzii cateed guelguidx laab.

7Chiy cuaby Jesús lob:

—Nare chasiacab.

8Capitánqui ax guniib:

—Dad, quɨt riáldtia yiiubiu liza, per guniibiu diidx desdɨ rut zuguaabiu par yac mos xtena. 9Te pur ziyza nare rcuadiaga xtiidx de ni rnabee naa par chalee icuadiagza de suldad xtena xtiidxa. Chi gapia tubybɨ chiab ax zéb. Chi gapia stubybɨ dec gueedbɨ ax zéedzacbɨ. Ne chi rnabiia xmosa xi chagaanybɨ, ax regaanybɨ ni raipiab.

10Chi bindiag Jesús ziy, quesentiand bdxalony pur de xtiidx capitánqui ax raipny de bniety ni zanald laany:

—Rguixtiia lot, per niclɨ Israel gady idxialtia tuby bniety ni quesentiand reldilaaz Dios zec ni reldilaaz bnietquɨ Dios. 11Ne nare rniia laat zienguilliú bniety iranezte yáld yiuné to Abraham, to Isaac, ne to Jacob rut canabee Dios. 12Chiy de ni ná par níiu rut canabeeny, laadeb yálddeb rut guundeb ne rut axtpacza golaideb.

13Chiyru raipy Jesús capitánqui:

—Quebiabiu lizbiu, ne su chagac zec ni agüeldilaazbiu.

Ax hóracqui biac xmos capitánqui.

(Mr. 1:29-31; Lc. 4:38-39)

14Deni güe Jesús liz Bed, laany gunány xnansuergrɨ Bed, nágaab nuub xliaa. 15Chiy gunaazny naab, ax gubicá xliaaqui. Chiy ax güesteb guzulo bíub laadeb.

(Mr. 1:32-34; Lc. 4:40-41)

16Chi biiu guxin, güené de bniety zieny de bniety ni nuu bɨndxab láani lazdooni lo Jesús. Ne cun tuby diidx ni guniiny guléeny bɨndxabqui láani lazdoodeb, ne ziyza bsiacny irate de bniety racxú. 17Ziy xquel guc, par guc cumplir ni gunii profet Isaías chi guniib: “Laany bdzɨcány de guelguidx xtennɨ, ne laany zéneny de guelzii xtennɨ.”

(Lc. 9:57-62)

18Chi guná Jesús zienguilliú bniety abdii laany, ax gunabeeny par tednény de xpɨnny dets nis ni ná ruy. 19Chiy güebinuu tuby maistrɨ ni nán ley Jesús, raipbɨ laany:

—Maistrɨ, nare rcaaza sanalda laabiu nez ruttispac chiabiu.

20Ax raipy Jesús laab:

—De begu nuu xcuevdem, ne de maniin nuu xpitiaazdem. Per nare Bniety ni bxiaald Dios quɨt naptia niclɨ rut quixquiaa.

21Chiy raipy tuby de xpɨnny laany:

—Dad, bsaanbiu suguanía xtada axtquɨ chi gatybɨ.

22Per Jesús raipny laab:

—Quedanald nare, bsáan xtadu cun de bniety ni quɨt rcaaz sanald nare.

(Mr. 4:35-41; Lc. 8:22-25)

23Jesús biiuny láani barcu cun de xpɨnny, 24ne lalzi ni zeteeddeb lo nisqui bdiia tuby bidux parzi quesentiand rcuayaa nis barcuqui. Per Jesús nayaaisny láanqui. 25Chiy güecuaany de xpɨnny laany, raipdebny:

—¡Dad, gucnébiu dunnɨ! ¡A dunnɨ acayaaiznɨ láani nis!

26Laany cuaibny lodeb:

—¿Xínii cuenzi rdxibtɨ? ¡Xípalza gulliaaza reldilaaztɨ nare!

Chiyru güesteny ax cun xtiidxny bcuezny bi ne nisqui. Hóracqui irate guridxí. 27Chiy de xpɨnny bdxalodeb ne gunabdidxsaadeb:

—¿Túdxaza bnietquɨ, ningui axt bi ne nis rcuadiag xtiidxny?

(Mr. 5:1-20; Lc. 8:26-39)

28Chi bdzɨny Jesús stuby lad nisqui, lo liu xte de bɨny Gadara, chiy tiop bniety nguiu ni nuu bɨndxab láanni bdiiadeb glay de baa ax güebinuudeb Jesús. Laadeb quesentiand cuendroo racdeb, nialaazdeb, parzi ruteete quɨt tu releeti teed nezqui. 29Chi gunádeb Jesús ax gurɨxtiadeb:

—¿Xínii riutébiu cun dunnɨ, Jesús, Lliin Dios? ¿Ta zéedbiu rurén par iteedbiu dunnɨ guelzii anste ni idzɨny dxi?

30Per gax nezqui ri zieny cuch ni cayo, 31ax banlas de bɨndxabqui lo Jesús:

—Belati cuéebiu dunnɨ, bsaanbiu idxúun láani de cuchre.

32Chiy gunii Jesús:

—Gulchia.

Chiyru bdiia de bɨndxabqui láani de bnietqui ax biiudengui láani de cuchqui. Chiy irate de cuchqui guzulo rlluuindem ax güeyabdem ruu tuby barranc axtquɨ lo nis rut guaapy nis quiadem ax gutydem.

33De bniety ni cacualo de cuchqui, blluuindeb. Chiy chi bdzɨndeb láani guɨdx ax guzulo gudixteedeb irate ni guc ne irate xa xquel gudeed de bniety ni guu de bɨndxabqui láanni. 34Chiy irate bɨnguɨdxqui bdiia güe rut zuguaa Jesús, ax chi gunádeb laany, banlasdeb lony par idiiany ladxdeb.

Currently Selected:

San Mateo 8: zab

Highlight

Copy